Obadiah 1
1
Bambu davadanganyishi Vaedomu
1Ayi ndi milotu ya Obadia. Afi ndi filongu fyadetili Bambu Chapanga kwilata mlima wa Edomu.
Bambu Chapanga kalayisha mnjagila kumilima yimonga,
achi ndi chitupikanilili,
“tutandamuki, tuyenditu kalevi mgoha na Edomu.”
2Bambu akuvawombela vandu va Edomu, “Dandivagoli vasisuvafu munu gati ya milima, na damubedaliwi nakamu.
3Lukilu lwaku lukujanga.
yuwi yiwuyikala mumibuku ya migonguveli
na ukwifuna,
ukwihola kucha kuva panofu, nongwa kwahela ‘Lingandawu liiwesha kukuhomukela?’
4Ngukuwombela naha,
hata leki ukuwuluka kumbindi kucha ngwasi
na kugola chiyumba chaku kundondwa
dangusunushi pasi.
5Yingavelili wuliwuli,
leki vefi awu
vapoki vangakwisilili pamihi
wuli, vangatolili nda ngimu wuvadayila,
Leki yivanokola misabibu vangayisili
vangalekili misabibu midokwa hela nda?
6Lakini dayivi wuliwuli chileli cha Esau na mumgoha, sanja findu fyaki fitalamili dafikamuliwi mumgoha.
7Vala yimuva pamu vavajanga,
vavavingavinga mbaka mumlima wenu
vala yimwivikilili kusika vavawesha.
Vala yivalya filivi fyaku davakutegheli mtambu.
Umweni dawumanyi ha.
8Nenga Bambu ngudeta,
“Mulijuva ali dandivadanganyishi vandu yivavelili na luhunja va Edomu,
na vala vamanyi yivavelili mufidunda fya Esau.
9Valulumi kufuma fikwelu fya mbwani ya Temani davatayiwi chipwembu,
na kila mundu yavelili chileli cha Esau dawulayiwi.
Nongwa ya kulatuliwa Edomu
10“Kwanongwa ya usugu wuugolili kwa mlongu waku Yakobi,
dawupati chindipa
na dawudanganyishiwi jola.
11Lijuvali lila wawolukili kutali pawulola
kunu vahenja vayingilili mumitatilu yaki.
Kwitolela ulundamali,
pavayigolela doo Yelusalemu
yuwi waveli kucha veni.
12Wungambedalili ng'odu mlongu waku,
mulijuva lya chivembu chaki.
Wala kuvasekilela vandu va Yuda
Mulijuva lya danganyishilu yawu.
wala kwijuma munu
mulijuva lyawu lya tabu.
13Ungayingilili ng'odu mumitatilu ya vandu vangu
wala kuvabedala mulijuva lya njifwa yawu,
wala kuvapoka mali shawu
mulijuva lya njifwa yawu.
14Mungavetilili ha mumaleka
na kuvakamula yivatuva mgoha
wala kuvatawula vandu vaki yivasighalili kwa vafimdwama
mulijuva lyawu lya gobuleku.
Chapanga davahighi vandu va milima
15Lijuva liva pabehi
kwa milima yonda.
ndambu wumuvagolili vengi
ndi na yumwi damugoliwi ngimu wuwula wula.
Damuhombiwi ngimu wuyivelili figoli fyenu.
16Ngimu wuuyendili aku kuchidunda changu ching'alili na kulanda
ndi ndambu yiyila yila vandu va milima yonda davalandi,
na davayendileli kupata chitovi changu,
mbaka pavawesha kulanda kandi ha,
pambeli pavapela vosi tipu.
Isilaeli vakuwesha
17“Lakini kuchidunda Siyoni dakuvi na vandu yivavelili pekesu kandi,
na dapavi mahali pang'alili.
na chileli cha Yakobi dawuvawuyili kandi,
mlima na ulundamali dawuvi wawu
18Chileli cha Yakobi davavi hutu kucha motu,
nakaka chileli cha Yosefu davavi kucha myengi ya motu,
dachivadanganyishi nakamu chileli cha Esau,
kucha wula motu wuudanganyisha midasi miyumu.
Kwahela chileli cha Esau dachisighali. Achi ndi chadeta Bambu.”
19Vandu kufuma Negebu davatoli mlima wa Esau,
na vandu kufuma fiseleku fya fidunda davawutoli mlima wa Vafilisti kuva wawu.
davatoli fitava fya Ifelemu na Samaliya,
na vandu va Benjamini davatoli mlima wa Giliadi wuvi wawu.
20Lipinga lya Isilaeli livelili kuluhamila aku Kanani
davawuyi na kutola mlima mbaka Selepta wuvi wawu,
Vandu va Yelusalemu yivaveli kuluhamila aku Sefaladi
davayitoli mbwani ya Negebu yivi yawu.
21Vandu vala davavi pekesu dayendi kuchidunda Siyoni,
kutavali wutwa wa Esau.
Na mweni Bambu ndi daghavi mutwa.”
Currently Selected:
Obadiah 1: OTNdambBL
Highlight
Share
Copy
Want to have your highlights saved across all your devices? Sign up or sign in
The Old Testament in Ndamba @The Word for The World International and Ndamba Language translation. All rights reserved.
