Esther (Hebrew) 9
9
1 Uweshi wa Vayawudi
1Mulijuva lya lilongu na ndatu lya mwesi wa lilongu na mbili wuvawukema mwesi wa Adali, amuli yilayishiwili na mutwa yikudayiliwa yigoleki. Lijuva ali fimdwama va Vayawudi vakacheyi davavawesha Vayawudi, lakini lijuva lila lyaghalambukili Vayawudi vavaweshili fimdwama vawu. 2Lijuva lilila lila Vayawudi vayikungashili mubwani shawu mumikowa yosi ya mutwa Ahasuelu, vavapundangili vala yivadayila kuvawulagha. Kwahela yoyonda yaweshili kuleva na veni, kwanongwa vandu va milima yimonga vavatilili. 3Vonda yivavelili vakomi va mikowa vakomi va lingandawu na vatavala na vakomi na maufisa va mutwa vavatangili Vayawudi, nongwa vonda vamtilili Modikayi. 4Modikayi avelili mundu yamanyikili munyumba ya mutwa, jumu shaki shakwilili mumikowa yonda na uweshi waki wayongishikili munu. 5Topi Vayawudi vavapundangilili vafimdwama vawu kwa mimayi yivelili vekuveku kunu na kunu na vavasinja na kuvadanganyisha nakamu na kuvagola ngimu wuvadayila vala yivavanyekwili.
6Mubwani yivelili na luviwu ya Shushani Vayawudi vavawulaghili vandu mya muhanu. 7Wuwulawula vavawulaghili Palishendati, Dalifoni na Asipati. 8Na Polati na Adalia na Alidati. 9Na Palimashiti na Alisai na Waisati. 10Vana lilongu va Hamani yaavelili chimdwama wa Vayawudimwana mwana wa Hamedati. Hata naha vakamulili ha findu mumgoha.
11Lijuva lilila lila, mutwa awombiliwili tolitoli ya vandu vosi yivawulayiwili mubwani ngomi ya Shushani. 12Pambeli mutwa amuwombilili muhumbu Esta, “Vayawudi vavawulagha valulumi mya muhanu na vana lilongu va Hamani mubwani yivelili muluviwu lwa Shushani. Ukwihola vagola wuliwuli aku kumikowa yingi ya mutwa yisighalili! Ponopa chiwudayila liki? Na yeni dawugayiliwi. Ung'ombeli chuwuluva liki, na cheni davakugoleli.”
13Esta kayangula, “Yuwi mutwa payikunovela wuvajumishi Vayawudi yivavelili Shushani vayendileli kuvatova na chilawu, na vana lilongu va Hamani vatumbikiwi mulibiki lya kwikongela vandu.” 14Topi mutwa alamulili achi chigoleki, na valandulili kumbwani ya Shushani na vana va Hamani lilongu vavakongewi luwoyi pawelu. 15Aku Shushani Vayawudi vayikungasha pamu mulijuva lya lilongu na mchechi lya mwesi wa Adali, vavawulayili valulumi mya ndatu lakini vatolili ha findu fivakamulili mumgoha.
16Chipindi chichila chila Vayawudi vasighalili mumikowa ya mutwa, vayikungasha kwidima veni na vapatili pausi kufuma ya vafimdwama vawu. Vavawulayili fimdwama vawu alufu milongu saba na muhanu lakini vagufyili ha findu fya vafimdwama vawu. 17Chindu achi chagolikili lijuva lya lilongu na ndatu lya mwesi wa Adali na lijuva lya lilongu na mchechi vapumulilili na valigolili lijuva lya lihungu na seku. 18Vayawudi va aku Shushani hata naha vayikungashili lijuva lya lilongu na ndatu na lya lilongu na mchechi, mulijuva lya lilongu na muhanu vapumlili na kugola lijuva lya lihungu na seku. 19Ayi ndi nongwa Vayawudi yivayikala kufijiji na mbwani dokwa, vakugola lijuva lya lilongu na mchechi lya mwesi wa Adali kuva lijuva lya lihungu na seku, lijuva lya kwigayila fupu.
Lihungu lya uweshi kwa Vayawudi
20Modikayi ayandikili afi fyosi yififumbukili na kufiyegha kwa Vayawudi vonda yivayikala mumikowa ya mutwa Ahusuelu, yivelili kutali na pabehi. 21Avadayilili kila mwaka vagoli lihungu mulijuva lya lilongu na mchechi na lilongu na muhanu, ya mwesi wa Adali, 22kwanongwa Vayawudi vavaweshili vafimdwama vawu mumajuva ava, na mumwesi awu lung'ong'u lwawu lwaghalambukili kuva seku, na fivembu fyawu kuva lihungu. Valayishiwili vakotoo kwivasuwa majuva ava kwa kugola lihungu na majuva va seku na kwigayila fupu sha filili veni kwa veni na fupu kwa vagaju. 23Topi Vayawudi vajumilili kuyendilela kugola hungu sivasikandili na ngimu Modikayi wavayandikilili.
24Kwanongwa Hamani chimudwama wa Vayawudi vosi mwana wa Hamedati Mwagagi, aveli kagola mbedula kwilata Vayawudi, kucha lijuva limu kuvadanganyisha, wuwula wula avelili kagola doo, ili kulamula lijuva lya kuvawulagha na kuvadanganyisha nakamu Vayawudi. 25Lakini filongofi pafifikili kwa mutwa, avalayilili kwa baluwa kwilata yila milandu ya wafu yagolili Hamani kwa Vayawudi, yikudayiliwa yimuwuyili mweni, wuwula mweni pamu na vana vaki vatumbikiwi mulibiki lya kukongela vandu. 26Topi majuva ava vavakemili Pulimu, lifumila muchilongu puli, yani kugola doo. Kwanongwa ya fila yifiyandikiwili mubaluwa ayi na kwanongwa ya fila yivafiwonili na fila fivafumbukilili. 27Vayawudi vayigolili chishovi chawu, na fileli fyawu na mundu yoyonda yayilumba na veni, kucha muchipindi chiutunga kila mwaka ngajila kuleka, majuva ava mavili kila mwaka ligoleki lihungu ngimu walayilili Modikayi. 28Wuwula wula Vayawudi vawombanili kucha, kila longu ya Chiyawudi chileli na chileli mumikowa yonda na mbwani yikudayiliwa kuvi na ngumbungumbu mulijuva lya lihungu lya uweshi na kusigolela lihungu majuva vonda.
29Pambeli muhumbu Esta kamwali wa Abihaili paghava na Modikayi, Myawudi, ayandikili kwa unakaka wosi baluwa ya pili kwilata Pulimu. 30Na Modikayi alayishili baluwa kwa Vayawudi vonda mumikowa mya na milongu mivili na saba ya mutwa Ahasuelu. Baluwa yeni yavelili na filongu fya kusika na shuvililu, 31na kuvakuvilisha veni na fileli fyawu vagoli lihungu lya Pulimu kwa chipindi vachishawulili, ngimu wula wuvavelili na ngumbungumbu ya shaliaya kwikaja kulya chipindi cha kulila chivembu. Lulayilayi alu lwafumili kwa Modikayi, myawudi pamu na muhumbu Esta. 32Balua ya Esta yakuvilishili milandu ayi ya Pulimu na kuyandikiwa muchitabu cha ngumbungumbu.
Currently Selected:
Esther (Hebrew) 9: OTNdambBL
Highlight
Share
Copy
Want to have your highlights saved across all your devices? Sign up or sign in
The Old Testament in Ndamba @The Word for The World International and Ndamba Language translation. All rights reserved.
