ACT - NUMANA 6
6
Hria aneshir ataŋgba
1Nǝ iber yi gayir abɛ zǝ Arik ate du, fe ane Yahudawa abaŋ ndi wɔ aŋa Helɛnawa alɛ ne atu ayi Ibraniyawa te di ba nek amba baŋ ndi alulumɔ ne ku kili kɔte ber tayi ba. 2Fe amɛ awur ane yaa ma azho aneshir te di ba, <<Bane rɛ te tabǝ duŋ ndum mɔr kɛ du lɛ kɛ Arik, te kam nyak amkpa ne gab kili ba. 3Amunzumɔr, ne rɛ izhin bɛ hria aneshir amɛ taŋgba abɛ yine Izhu tsetser ne miŋ min abaŋ ndi anayi Mgbemgbeb te nek ba ndum kǝŋe 4taba tabǝ nek tu mɔr te kɔmɔ te ben Arik te tsar lɛ kɛ Arik.>>
5Iki yiŋ ndi ne bla aneshir ne ta nyɛmɛ bɔbɔk, fe ne hria Istifanus, iner waŋ ndi ne zhi Arik nena yine Izhu Tsetser, ben Filibus, ben Burokɔras, ben Nikana, ben Timan, bǝn Barnaba, bǝn Nikɔla awɔnǝ Antakiya waŋ ndi ne yir Yahudiya. 6Waŋa abaŋ ndi abɛ zǝǝ lɛ ke Arik tǝ nɛ gli ba gar ne ti kɛ abɛ na ndum kɛ Arik. Ndi ne ben Arik ne sak ba ŋɔk.
7Ilɛ kɛ Arik zen kɔte ti. Abɛ ta lɛ kɛ Arik izen te du ne Urshelima tetɛk, abɛ na ndum maa ne te tetɛk ne ta nyɛmɛ ne nek tu iye aneshir.
Ne vuŋ Istifanus
8Fena Istifanus, ndi nena ki didik ye Arik mgbyamgbyaŋ kɛ Arik ne duŋu ne na kiki yi vuŋ anu ne min aneshir. 9Ankyak ine akaba anuŋ ndi azhɔu te (Akaba aner abɛ zuk shur) agɛn abɛ zuk shur anuŋ ne ntuntun ne tuŋ akpa men ne ntuntun te nga aŋa ben Istifanus te abla mu ne tu maa; tuno ayi, Libatiya ndi ayi Kuruya ben Iskandariya ben Asiya, ne te antam ben Istifanus te yenu tuk, 10ama bane kɔgu ne lɛ ba te Izhu tsetser iyi ben abɔu.
11Fe ne ku ba anu te shɔk aneshir, te di, <<Aba ne wɔu azǝn yen Musa, te zen la sak kɛ Arik.>>
12Fena ne lɛk susun kɛ aneshir ben angɔŋgɔŋ, ben abɛ Atora, fe akɔ te mfu te vuŋu, te gliu te kɔmɔ ben abɛ te ambuk. 13Fe akɔ zuk lǝlɛ yi mu ashur ba, te di, <<Iner waŋa azǝn lɛ lǝlɛ mimin ne tu yi akaba ne yi tsetser ben cɛr yi Musa. 14Ta ne wɔu a zen di te Yesɔ ayi awɔnǝ Nazara a tei zir amkpa waŋa, te na sen kiki yiŋ ndi Musa ne duŋ ta neyi.>>
15Abaŋ ndi akɔ sɔŋ ne amkpa ne te ambuk go ashuru ayi, ayik ti maa yi ndi iti kɛ ne shar ayi Arik.
Currently Selected:
ACT - NUMANA 6: NAA
Highlight
Copy
Compare
Share
Want to have your highlights saved across all your devices? Sign up or sign in
The word for the World International and The word for the World Nigeria