ACT - NUMANA 2
2
Izhu Yi Tsetser ne zǝǝ ne bɛr Pɛntekɔs
1Ndi bɛr sɔk tuŋ ne nyɛ, neyi amkpa azhiin bɔbɔk mǝne. 2Ankyak awɔ igu ndi ŋguŋgu rɛ shu te nyɛ shak kɔb keŋ ndi akɔsɔŋɔ. 3Akɔ yik laŋ ndi iyi ndi lǝlɛn lu te nyɛ gab sɔɔŋ ba netu. 4Bɔbɔk mǝne, Izhu Tsetser ku shak ba, akɔ lɛ ne aŋa kaaŋkaŋ, ndi Izhu Tsetser ne nǝk ba.
5Nǝ mkpaŋa Yahudawa anuŋ abɛ rɛ ntuntun yi gɔŋmimi ndi asɔŋ ne Urshelima abaŋ ndi aklu sǝsǝk Arik. 6Ndi ne wɔ igumɔ, tǝduŋ abiŋ te kime ne shak ba susun, te kɔte ŋɔwa awɔ ba alɛ ne aŋa amaa. 7Ndi ikime ne shak ba susun arib te di: <<Aner abaŋa ba yi aner abɛ Galili kai? 8Aye nii tsǝn tǝ ta wɔ kɔte ŋɔwa ne miŋ mɔrɔ awɔlɛ ne aŋaa aye kɔmen? 9Tayi ane Patinya, ane Midiya, ben ane Lametiya; abɛ sɔŋ ne Mesopotamiya, Yahudiya ben Kafadɔsiya, Pontɔs ben Asiya, 10Firijiya, ben Bamfiliya, ben Masar, ben gar kɛ Libiya yaŋ Siren; acɛn abɛ rǝ Roma 11(Yahudawa ben abaŋ ndi ne cɔk aglik bǝn abɛ zǝ lɛ kɛ tanyɛmɛ Yahudawa); Karita, bǝn Arabiya, ta wɔ ba abla kiki ngɔngɔŋ yiŋ ndi Arik nɛ nai ne aŋa amɔr!>> 12Bɔbɔk mǝne ikime ne kpa ba tu ne vuŋ anu, te rib akpa mɛn tedi, <<Waŋa ayi anii amei?>>
13Ankyak anuŋ, akɔ mlakba te di, <<Nǝ mli iki rǝrǝ te zen hwa.>>
Biturus ne Le ne Ber yi Pɛntekɔs
14Ankyak Biturus ne lu akli ne miŋ kǝ amɛ awur anezhiin abaŋa, ne lɛk kɔr tedi: <<Amunzumɔr Yahudawa bǝn aner abɛ Urshelima, shur zhin atɔŋ te wɔ iki ndi M tei mbla zhin. 15Aner abaŋa ba hwa ba ndi zhin yik ba me, azizaŋa ayi mkpaŋ kɛ teres kɛ amblimblɛ! 16Duŋ zhin, waŋa ayi lɛ keŋ ndi ine bla shar Arik Ijue ne lɛ:
17Arik ne di, <<<Mkpaŋ tei nyɛ klɛtu ndi,
M tei mbwaa aneshir kab Izhu muŋ.
Amunlum ben amunamba atei bla iki yi nyɛ ne ti,
Amunanzak atei yik iki yi nyɛ ti,
Acicɛ aneshir atei te rimla.
18Aneshir abaŋ ndi azǝm alulum bǝn amba,
M tei mbwa Izhu Tsetser muŋ ne bɛr yi nyɛ,
A tei bla kiki iyi nyɛ ne sak muŋ.
19M tei ntsar kiki ngɔngɔŋ ne shu
Bǝn ngir ne gɔŋmimi kɛ shin,
Azhizhi bǝn ilu, bǝn ntsiŋ ngɔŋ.
20A tei duŋ aririk akam atǝ ibu
Fe ihwa tei kam te azhizhi
Fe bɛr ngɔŋ iye Arik iteishi nyɛ.
21Waŋ ndi ate ben
Nǝ sak kɛ Arik atei yik ita zhɔk.>
22<<Aner abɛ Isrela, wɔ zhin lɛ kǝŋe: Yesɔ Awɔnǝ Nazara, iner waŋ ndi Arik ne bla zhin tedi iwa ne tanyɛme ben abɔu, ben kiki ngɔngɔŋ ndi ne nai, ben kiki yi vuŋ anu ndi nena, ben iki yik ne ayi ndi Arik ne nai ne aŋɔk amaa, ndi izhineba nǝ zhi. 23Yesɔ waŋa ayi Arik wa ne tanyɛme te nek zhin ne wu ne zhi maa ben zhin yi susun maa izhin ne kpaanu ben aner amimin te kɔru ne kuŋkun kɛ gen, te ŋunu ne aŋɔk ayi aner abɛ na zumimiŋ. 24Fe Arik ne lɛgu ne kumɔ, te iku bane gliu yir ba. 25Doda ne lɛ netu maa te di:
<<<Kɔ te mkpaŋ takɛ me yik Arik bene bɛm.
Ayi ne ŋɔk li muŋ,
Sǝsǝk kinuŋ ba tei vuŋ me ba.
26Ne me, susun muŋ ne klak, fe anu amuŋ atei gbar Arik asak,
Ikpa muŋ maayi itei sak ayi,
27Fena bau tei tyak me zhɔk ne bɛ ba,
Bau tei duŋ iner ami tsetser abɛ ku te bɔ ba.
28Ai wa Une tsar me nkuŋkɔŋ yiŋ ndi M tei vli;
Utei na duŋ mna nyɛr ne timi.>
29Biturus adi, <<Amun zumɔr, M tei mbla zhin ne susun zhiin netu ayi ntsǝntsǝm amɔr Doda, ndi ane ku, ne ruu, ibǝ maa iyi ben ta har aliŋe. 30Fena Doda ayi ne bla ishar ye Arik ndi ne zhi te Arik ne kpai aŋyak tedi, iwa a tei tun nuŋ ne aŋa amaa abaŋ asak ne mben ngɔŋ maa. 31Fǝ ndi Doda ne yik amɛ, te nena bla netu ayi lu Almasihu ne bɛ, tedi ba tei duŋu ne min bɛme ba, ikpa maa batei na yik bɔ ba. 32Yesɔ waŋa, Arik ne lɛgu ne bɛ bɔbɔk mɔrɔ tani yik amɛ ne ayi amɔr ilɛ mɛ iyi zub. 33Ne baŋu te kɔte nyagu ne ŋɔk li kɛ Arik, tena ta mben Tetɛɛ maa ne ikpa nyak yi Izhu Tsetser tena bwa shur iki ndi izhin yige tena wɔi. 34Tǝ, Doda bane yuŋ shu ba, ama wa ne tu maa ne di, <<<Arik ne di Ŋgɔŋ amuŋ: <<Zisɔŋ ne ŋɔk li muŋ 35Se mne nduŋ abɛ kyagu yi abɛyi ki caŋ ne aza mi.>>>
36<<Neme duŋ aneshir abɛ Isrela azhi te di: Arik ne duŋ Yesɔ waŋa, ndi ne kpaŋu ne kuŋkun kɛ gen, ayi wa Ŋgɔŋ tena yi Kristi.>>
37Ndi ne wɔ me, ilɛ mɛ ne tur ba, akɔdi Biturus ben nki abɛ na ndumo, <<Amunzumɔr, ta tei na kikini?>>
38Fe Biturus adi ba, <<Izhin bǝ nek asusun amin, te abɛ su zhin, kɔte ŋɔwa ne sak kɛ Yesɔ Kristi, teduŋ abɛ baŋ ilalɛ min agli tibɛ, atei na nek zhin Izhu Tsetser. 39Ikpa nyaga iyi min ben amumun amin ben abaŋ ndi ayi gbagbaŋ abaŋ ndi Ŋgɔŋ Arik amɔr atei zhɔ ba.>>
40Bǝn lǝlɛ nuŋ, te gbaŋ ba atɔŋ tena nǝk ba lɛ, tedi, <<Izhin bɛ Gli atu min igli rumɔ ne gɔŋmimi mimin kǝŋe.>> 41Abaŋ ndi ne tanyɛme nǝ lɛ maa ne su ba ne bǝn, aneshire idu mǝne ne vuŋ azhin atar.
Bine tu yi abɛ zi Arik
42Fe nɛ nǝk mkpaŋ men ben abɛ na ndum tsar amaa te vuŋ abɛ biŋ atu amen, tena gab kili, te ben Arik. 43Fe sǝsǝk ku vuŋ kɔte ŋɔwa, kiki yi vuŋ anu tetɛk ne aŋɔk aye abɛ na ndum kɛ Arik. 44Bɔbɔk abɛ zǝ Arik neyi amkpa zhiin tena kiki men abiŋ aŋkun azhiin. 45Ne vu kiki men alɛb, te gab azɔbɔ ne kpa men ndi iyah yi ŋɔ yime 46kɔte bɛr tayi akɔmɔ ne akaba ne susun zhin te zen gab kili ne akɔbɔ men, ali kili ne nyɛr ne min kɛ sik susun. 47Agbar Arik tena nyɛr ijɔk susun kɛ aneshir. Fe Ŋgɔŋ ne duŋ abaŋ ndi ne tau ate du.
Currently Selected:
ACT - NUMANA 2: NAA
Highlight
Copy
Compare
Share
Want to have your highlights saved across all your devices? Sign up or sign in
The word for the World International and The word for the World Nigeria