ACT - NUMANA 1
1
Ibaŋ Yesɔ te kɔmɔ ne shu
1Nǝ cɛr muŋ iyi ku ti, Tiyofulo, mne ncɛr bɔbɔk ki yiŋ ndi Yesɔ ne kuti anai, ben ki yiŋ ndi ane tsarǝ 2te gar mkpaŋ keŋ ndi ane baŋu te kɔmɔ ne gbarshu, ndi ane nek anu akɛ nyɛ Izhu Tsetser ben abɛ nau ndum abaŋ ndi ne hria ba. 3Yesɔ ne tsar aneshir kpa maa ndi ne yik iyah, te na bla aneshir abɛ kli tetɛk te di wa ayi tsetser. Ane tsar tu maa amkpamkpaŋ har bɛr sɔknas, azǝn lɛ ilɛ kɛ kɔb Arik. 4Ndi ne yi ndɔ ben aba, ne nek ba nken lɛ te di <<Duŋ zhin Urshelima ba, ama izhin bǝ ŋub nek tǝ ta vli maa ndi ane blama, iyiŋ ndi zhin ne wɔ nenu amuŋ. 5Yɔɔna ne su aneshir ne amashir, ne miŋ kɛ bɛr watsɔb atei su zhin ne Izhu tsetser.>>
6Ndi ne kam anyɛ tuŋ abiŋ, ane rib bu, <<Ŋgɔŋ, ai mkpaŋ kǝŋe kɛ Utei ta ngɔŋ kɛ Isrela nek bai?>>
7A di ba: <<Izhi mkpaŋa ben zhi bǝn bai min ba, Tetɛɛ wa neka nyak mkpaŋa ne tu maa. 8Ama izhin tei ta mgbyamgbyaŋ ndi Izhu Tsetser te zǝǝ ne atu amin; izhineba tei du lɛ muŋ ne Urshelima, ben Yahudiya, ben Samariya te kɔmɔ ne tu klɛ yi gɔŋmimi.>>
9Ndi Yesɔ ne bla amɛ, Izhu Tsetser abaŋu te kɔmɔ ne shu neyi amen, akpa ne ku ndi bane na yigu ba.
10Nǝ shur ayi amen te zen shuru ayi ndi azǝn kɔmɔ, ankyak aneshir ayaa aklɛkli anyaŋ ba, ne su kiki klikla. 11Abɛ su ki klikla ma adi, <<Izhin aner abɛ Galili>> Adi ba, <<Izhin klɛ tɔ anii ne shu mɔi? Yesɔ waŋ ndi ne baŋu ben abɛ zhin te kɔmɔ ne shu, atei na kam aŋyak ndi zhin ne yik ne baŋu te kɔmɔ ne shumɔ.>>
Ne hria Matiya te baŋ mben yi Yahuda
12Ndi aneshir ne ŋur akam aŋyak Urshelima ndi ne zǝǝ are Igbu iyi Zaitun, iyiŋ ndi iyi gbahir bǝn Urshelima, itsin vǝtsɔb. 13Ndi ne nyak, ne yuŋ tuki kɛ sɔŋ mǝne. Abaŋ ndi ane yime ayi ane Biturus, ben Yɔɔna, ben Yakubu, ben Anduru, ben Filibus, ben Tɔma, ben Batɔlɔmi, ben Matiu, ben Yakubu izu Halfa, ben Saminu Zalɔt, ben Yahuza izu Yakubu. 14Aneshir abaŋa bɔbɔk mǝne ne susun zhiin ne tuŋ abiŋ te ben Arik, ben ane Mata ben Meryamu iyah maa Yesɔ, ben amunzumene.
15Nǝ mkpaŋ yuŋɔ Biturus ne lu aklɛ ne miŋ aneshir abɛ zǝ Arik abaŋ ndi ne yi amkplik azhin ne sɔk yaa (120) 16fe tedi, <<amunzumɔr, nɛrɛ te Ilɛ kɛ Arik keŋ ndi ne cɛr kɛ bɛ shaga ir keŋ ndi Izhu Tsetser ne bla nenu akɛ Doda netu kɛ Yahuda, waŋ ndi ne yi ne tsar ba ankɔŋ tǝ bɛ vuŋ Yesɔ 17Neyi zhiin ne min mɔrɔ, te ana yine ki yi na nemiŋ kɛ ndum kǝŋe.>>
18(Ndi ne ta idǝk maa kɛ na ki mimin,Yahuda ne lɛb amkpa; amɔ te akama zhaku antɔzi, ikpa maa ne lakŋar te duŋ alɛlɛ amaa ne ru akur ne abɛm. 19Iki yiŋɛ ne duŋ kɔte neshir tawa ne Urshelima ne wɔi, fǝ tǝ zhɔ amkpama ne aŋa mǝne te Akaldama, watɔ ahwaŋ ane azhizhi.)
20<<Fena,>> Biturus ne di, Ne cɛr amɛ nemin Zabura te di,
<<<Ikɔb maa bǝyi amkpɔk akɔ, inuŋ abɛ ta mben yi ndum maa> 21Ndi amɛ, ne rɛ te abɛ hria nuŋ ne min aneshir abaŋa ndi ne yi ben abɛta, nak rɛ mkpaŋ keŋ ndi Ŋgɔŋ amɔr Yesɔ ne yi ben abɛta, 22Nak baŋ rɛ mkpaŋ kɛ Yɔɔna ine su aner, te kɔmɔ ne mkpaŋ keŋ ndi ne baŋ Yesɔ agli adɔmɔ nǝ ti mɔr. Tǝ zhiin ne miŋ kɛ aneshir abaŋ ndi ne zǝ ta ayik ilumaa ne bɛ.>>
23Ankyak akɔ kpob aner ayaa: Yusuu ndi azhɔu te Barsabas, ana zhɔu te Yustus bǝn Matiya. 24Fe akɔ ben Arik, tedi, <<Ŋgɔŋ, Une zhi susun kɛ kɔte ŋɔwa. Nǝmin kɛ aneshir ayaa baŋa tsar ta waŋ ndi une tunu 25te abɛ ta ndum kɛ gar bla ishar yiŋ ndi Yahuda ne duŋ kɛ te kɔmɔ ne abɛ ndi ne teu anenen,> 26Fe akɔ shur ba ankeŋkam, nkǝŋkama kɔ vuŋ Matiya, akɔ blau azhɔk ne min kɛ aneshir awur ane zhiin abɛ gar ishar maa.
Currently Selected:
ACT - NUMANA 1: NAA
Highlight
Copy
Compare
Share
Want to have your highlights saved across all your devices? Sign up or sign in
The word for the World International and The word for the World Nigeria