Matendu 3

Petelo na Yohanawangumlamisa mlemafu

1Lichuwa limonga, saa itisa lumihi, Petelo na Yohanawawelili wakiyenda Mlighuta lya Sapanga, na hali ndiwa liwelili lipindi lya kumtundamila Sapanga. 2Na kula Mlighuta lya Sapanga kuwelili na mundu mmonga mlemafu kuhuma kuuwelekwa. Na kila lelu kuwelili na wandu wavile wakimtola na kumvika hayu mundu kumlyangu mkulu wa Lighuta lya Sapanga waukemili “Mlyango mmaha,” ili aluwi chochose kwa wala wawelili wakiyingila Mulighuta lya Sapanga. 3Paawawonili Petelo na Yohanawakiyingila Mlighuta lya Sapanga, akawaluwa wampeghi chochose. 4Petelo na Yohanawalimtumbulila mihu, na Petelo akamlongela, “Tulole.” 5Na mweni akawalola, akiwachila atepokela hindu kuhuma kwa weni. 6Hinu Petelo akamlongela, “Nahela lidini lya feza na nahela lidini lya zahabu, ila kila nikikola nitekupegha. Kwa lihina lya Yesu Kilisito wa Nazaleti, uyinuki na utyangi.” 7Hinu Petelo, akamkola liwoko lya kuliyila, akamyinula, palapala maghulu na vighughulumbi ghaki vikapokela makakala. 8Akajumba, akagholoka na kutumbula kutyanga, kangi akayingila pamonga na weni Mulighuta lya Sapanga, akityanga na kujumbajumba kunu akimyinula Sapanga. 9Wandu wogha wawelili pala wamwonili akityanga na kumyinula Sapanga. 10Wandu pawammanyili ndiwa yula awelili anguluwaluwa pabehi na hula mlyango mmaha wa Mlighuta lya Sapanga. wakakangaswa nesu hata wawesiling'ogha kumanya yamkolili.

Petelo angulongela yiwa Yesu angulamisa

11Yula mundu mlemafu alamisilwi paawelili akilongosana na Petelo na Yohana, wandu wogha walikangasili nesu wakahika kwa kubhutuka mbaka kulyugha lya Selemani. 12Hinu, Petelo paawalolili wandu wala akawalongela, “Wandu wa Izilaeli, kwa kyani mngukangaswa na mghalu hau? Kwa kyani mngututumbulila mihu handa vila tumghola kwa makakala gha twenga au ulungwana wa twenga baha tumghola mundu hayu awesi kutyanga?” 13Sapanga wa Ibulahimu na Isaka na Yakobu, Sapanga wa tati wa twenga, kamyinula mtumikila ghaki Yesu. Ila mwenga mumkamulili ili akomwi na kumlema kuulongolo gha Pilato hata badili gha Pilato kulamula kumleka ayendi zyaki. 14Awelili mundu wa Sapanga na mweni umaha, ila mwenga mumlemili, mkamhaghula mundu ghangi awelili mkoma wandu awoposolwi. 15Hinu, mkamkoma yula avile ni mtumbulo wa ukomu. Ila Sapanga akamuhindula, na twenga ni wandu tulola kwa mihu mghalu hau. 16Kwa kulikwinila lihina lya Yesu ndiwa vikongonu vya mundu hayu vipokela makakala mundu hayu mngumlola na kummanya. Kukwinila kwaki kwa kumkwinila Yesu ndiwa kumlamisa chakaka mundu hayu handa mumlola mwenga wogha. 17“Hinaa walongu ghangu ningumanya yiwa mwenga na wakulu wa mwenga mgholili ghala kwaikiva gha kumanya ng'ogha kwa mwenga. 18Ila havi ndiwa Sapanga agholili ghala ayalongelili dahile kwa kupitila walota wogha, yiwa ingupalwa Kilisito ghaki ahakilwi. 19Hinu, mleki uhakata na mumhyukile Sapanga ili mweni awalekeseli mahakata gha mwenga. 20Mgholi nagha ili Bambu awapeghi lipindi lya luheku mumioyu gha mwenga na kuwapegha yula Kilisito amhaghulili na mweni ndiwa Yesu. 21Ingupalwa mweni atami haku kundumba mbaka lihiki lipindi lya kughola kangi hyonu vindu vyogha, handa Sapanga alongelili kwa kupitila walota ghaki wambuletenesu wa kuhuma dahile. 22Kwaikiva Musa alongili, ‘Bambu Sapanga wa mwenga atewayinulila mlota handa kaniyegha nenga na atevile mmonga paghati gha mwenga baha na mhyoghanili hyogha atewalongela. 23Mundu yoyose yula kamhyoghanila ng'ogha mlota hayu atevile ng'ogha mundu wa Sapanga na ateyalamiswa.’ 24Walota wa Sapanga wogha, kuhumila Samweli na wala wahikili kuulongolo na mweni, wailongile ghala Sapanga ateyaghola na ni hagha yangugholeka machuwa hinaa. 25Lilaghano lila Sapanga alongelili kwa kupitila walota ghaki ni kwaikiva gha mwenga, na mngulihi pamonga lila lilaghano lya Sapanga aligholili na mambuyi wa mwenga, handa amlongelili Ibulahimu, ‘Kwa kupitila wawelekwa ghako, walongu wogha wa mlima wogha watehighilwa.’ 26Hinu, Sapanga paamhindulili Yesu mwana ghaki amyeghili kwa mwenga mtumbula, ili awahighili kwa kumghola kila mmonga wa mwenga aleki kughola mahakata ghaki.”

Currently Selected:

Matendu 3: NTMbBL2025

Highlight

Copy