Pā kə́ majə tɔȳ pā gə̄ 1
1
1Pā kə́ majə tɔ̄ȳ pā gə̄. Pā yā Salomo̰.
Dəyá̰ nin̄ kə dəngameé. Najə̄ kɔr̄ ngé rāā tɔdɔ̄ naā gə̄
(Dəyá̰ əda na)
2Ə́hɔm̄ kə̄ rɔ̄í tə́ ī-ɓirə̄m̄ dagə, ə́hɔm̄ kə̄ rɔ̄í tə́ ī-ɓirə̄m̄ dagə!
Tɔdɔ̄ tɔ́ý ń ī-tɔ́y rɔ̄ḿ ní majə tɔȳ kasə *nduú ō,
3majə tɔȳ yibə̄ kə́ kotə majə ō.
Ī-to tītə̄ yibə̄ kə́ taā kum adə̄ *unjə̄ njáý njáý.
I tām̄ najə̄ ń noō tə́ n nel̄ ngáń kə́ dəyá̰ gə̄ seí ngá̰ý ní.
4Əhɔ ta jīḿ, ī-ndɔ́rə̄m̄ gōí tə́ ō, ādə̄ j-a̰ȳ ngɔ̄də̄ ō.
Ḭ̄ i mban̄g yāḿ, āw̄ seḿ kújə yāí tə́.
Ī-rāā ādə̄ jḭḭ kɔ́ gə̄ jōó mbak ní rɔ̄jí nel̄jí ngá̰ý.
Ādə̄ jə-tɔ̄ȳ tár yāí tɔȳ loo kɔr ta kasə *nduú.
Ngáń kə́ dəyá̰ gə̄ ń nel̄də́ seí ní najə̄ i yādə́!
5Ngáń kə́ dəyá̰ kə́ Jerusalem gə̄, mā i de kə́ m̄-kərē kasə ō, m̄-majə deē ō.
m̄-to tītə̄ kújə tandā gə̄ kə́ rāān̄də́ kə bḭḭ̄ dā̰ kə́ ndul gusə gusə beē,
m̄-to tītə̄ kūbə̄ tapīi gə̄ kə́ gātə̄n i ngá̰ý beē.
6Ré m̄-ndul sḛ́ý ō mbang rāām̄ adə̄ m̄-kərē kasə ō anī,
ī-lōōī kəndā kumsí gírí.
Ngákó̰ó̰ḿ kə́ dəngam gə̄ rāān̄ wōn̄g seḿ:
Nin̄-əndāmə̄n̄ ta ngɔ̄m̄ *kāgə̄ nduú gə̄ tə́.
M-ə̄ndā kumḿ gír kāgə̄ nduú yāḿ mā tə́ alé.
7Ḭ̄ ń nelə̄m̄ seí ní, ɔ́jəm̄ mu ń ā āw̄ kə yá̰a̰ kul̄ yāí gēé dɔ tə́ ní.
Ɔ́jəm̄ loo ń dan kadə ndaá anī a taān̄ koō tū tə́ ní,
yā kadə̄ m̄-to tītə̄ dəyá̰ kə́ nge ngɔ̄də̄ gō dəngam gə̄ tə́
kadə yá̰a̰ kul̄ yā madí gə̄ tə́ alé.
(Ngé ngɔ̄m̄ yá̰a̰ kul̄ gə̄ ədan̄ na)
8Ḭ̄ ń ī-mandə ī-tɔȳ dəyá̰ gə̄ malang ní,
ré ī-ger̄ aĺ anī ún gō tóo nja batə̄ gə̄ ba ūl̄ ngán bə̄yā̰ yāí gə̄
kə gō kadə loo gə̄ ń dəngam kə́ ngé ngɔ̄m̄ yá̰a̰ kul̄ gə̄ a ndin̄ tū tə́ ní.
(Dəngam əda na)
9Madə́, njə̄rā gírí majə ngá̰ý
tītə̄ njə̄rā gíŕ sə́ndá kə́ majə ngá̰ý kə́ un púsə yā *Parao̰ beé.
10Yá̰a̰ ta mbī yāí gə̄ rāān̄ adə̄ mberí əja majə tɔȳ kə́ kété ō,
məde kə́ kɔ́í tə́ rāā adə̄ kɔ́í əja majə tɔȳ kə́ kété ō.
(Ngé ngɔ̄m̄ yá̰a̰ kul̄ gə̄ ədan̄ na)
11J-a jə-rāā yá̰a̰ ta mbī gə̄ kə lɔ́ŕ kə́ tə́la gində̄ arjā̰a̰ danaá yā kadī.
(Dəyá̰ əda na)
12Dan ń mban̄g yāḿ a əsa yá̰á̰ ní, sēē mu nár yāḿ otə mbo̰o̰.
13Kə́ tām̄ yāḿ tə́ ɓáa kó tár yāḿ rāā rɔ̄n i *mír kə́ kotə majə kə́ ndem̄
ba to dɔ dán mbaaḿ gə̄ tə́ ndɔ̄ɔ́ beē.
14Rāā rɔ̄n i dɔ bəra hútə̄ hínē#1.14 Hínē: I ngōn̄ kāgə̄ kə́ de kə́ dām̄ kə́ gír ɓē tə́ gə̄ a rāān̄ manə̄n dɔ njadə́ tə́ ō, gidə hēl̄ jīdə́ gə̄ tə́ ō. kə́ kem ndɔr̄ *kāgə̄ nduú gə̄ kə́ En Gedi#1.14 En Gedi: I loo kə́ kem dəla loo tə́ kə́ man̄ i tū tə́. Á̰a̰ī 1 Sam 24.3 tə́.
(Dəngam əda na)
15Ī-mandə ngá̰ý, madə́, ī-mandə ngá̰ý!
Kumií majə tītə̄ dér dum beé.
(Dəyá̰ əda na)
16Ī-majə ngá̰ý ō, kó tár yāḿ, ī-to ro̰ ngá̰ý!
Loo ń jə-to tū tə́ jə-sāań naā ní i dɔ mu kə́ mbōl̄!
17Sáā kāgə̄ kújə yājí gə̄, i kāgə̄ sédər gə̄,
kāgə̄ kutə̄ gidə bɔr kə́ kem kújə yājí tə́ gə̄, i kāgə̄ sipəres gə̄.
Currently Selected:
Pā kə́ majə tɔȳ pā gə̄ 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad