Makətūbə̄ yā Jeremi 1
1
1Najə̄ yā Jeremi kə́ ngōn̄ Hilkia, kə́ kógə̄ḿ yā *ngé tun̄ yá̰a̰ gə̄ kə́ ndin̄ Anatot, gō nang yā Benjamḛ tə́. 2I gō nang ń noō tə́ n Kɔ́ɔ̄ɓē ɔr̄ najə̄ seneé ní, i ɓāl̄ ko̰o̰ ɓē kə́ nge ko̰ kutə gidə i mətá yā Josias kə́ ngōn̄ Amon, mban̄g kə́ *Juda tə́. 3Kɔ́ɔ̄ɓē ɔr̄ najə̄ seneé ɓáý to̰ i ɓāl̄ yā Joakim, ngōn̄ Joas, mban̄g kə́ Juda tə́, bátə́ ta tɔ̄l̄ ta ɓāl̄ kə́ nge ko̰ kutə gidə i kógə̄ḿ yā Sedekias, ngōn̄ Josias, mban̄g kə́ Juda tə́, bátə́ kadə̄ əhɔn̄neé de kə́ Jerusalem gə̄ dɔ gúú tə́ aw̄n̄ sedə́ dɔ nang kə́ rang tə́, kem nāā kə́ nge ko̰ mí tə́.
Nə́ɓā ɓāŕ Jeremi kadə̄ tél nge koō ta yān
4Kɔ́ɔ̄ɓē ɔr̄ najə̄ seḿ tītə̄ ń toō beé əda na:
5Pá tá kadə̄ m-ə̄ɓāī kem kó̰ó̰í tə́ ní,
m̄-gerī kɔ̄ɔ́ ɓá.
M-ɔ̄r̄ kamīí m-ə̄ndāī tayā kadə̄ ī-tél *nge koō ta
tām̄ yā nápar de gə̄ tə́.
6M-ə́da na: Á! Kɔ́ɔ̄ɓē Nə́ɓā, m̄-ger̄ kɔr̄ najə̄ alé, mā i ngōn̄ ngá̰ý ɓáý.
7Kɔ́ɔ̄ɓē ədam̄ na:
Ī-lōō kəda na:
Mā i ngōn̄ ngá̰ý ɓáý.
Loo malang ń m-ə́laī tū tə́ ní, āw̄ tū tə́,
yá̰a̰ malang ń m-ādī ndūḿ kadə̄ ə́dá ní,
ā ə́dá yá̰á̰ ní.
8Ī-lōō ɓōĺ deē kógə̄ḿ bátə́,
mā i naā tə́ seí yā gān̄g dɔí.
Najə̄ ń Kɔ́ɔ̄ɓē əda ní n noó. 9Kɔ́ɔ̄ɓē əla jīn ɔdəń taḿ.
Ni ədam̄ na: Ń toō m-ə̄ndā najə̄ yāḿ taí tə́.
10Ī-ger̄ majə kadə̄ m-ādī ndū ko̰o̰ ɓē dɔ nápar de gə̄ tə́ ō,
dɔ ɓē ko̰o̰ gə̄ tə́ ō ɓōólaā,
yā kadə̄ ī-ró̰ȳ kə ngəraá ō, ī-ɓéngə̄lē ō,
yā kadə̄ ī-nujəń ō, ī-bótə̄yō̰ ō,
yā kadə̄ ī-rāā ō, ə̄ndā ō.
Jeremi a̰a̰ ta jī kāgə̄ amand ō, jóo gində̄ kə́ bo kə́ dɔ hor tə́ ō
11Kɔ́ɔ̄ɓē ɔr̄ najə̄ seḿ əda na: Jeremi, i rí n á̰a̰ā̰? M-ə́da na: Yá̰á̰ ń m-á̰a̰ā̰ ní, i ta jī kāgə̄ amand. 12Kɔ́ɔ̄ɓē ədam̄ na: Ḭ̄ á̰a̰ kə gōó majə. M-ə̄ndā kumḿ gír najə̄ yāḿ tə́ kadə̄ reē udə gírí.
13Kɔ́ɔ̄ɓē ɔr̄ najə̄ seḿ ɓáý to̰ nja kə́ nge ko̰ jōó əda na: I rí n á̰a̰ā̰? M-ə́da na: Yá̰á̰ ń m-á̰a̰ā̰ ní, i jóo gində̄
kə́ bo kə́ ndi dɔ hor tə́ a ndīr̄ dām̄ mbɔ́r ɓē kə́ ko̰ó̰ tə́.
14Kɔ́ɔ̄ɓē ədam̄ na:
I dām̄ mbɔ́r ɓē kə́ ko̰ó̰ tə́ n
yá̰á̰ kə́ to kum kaȳ aĺ a teē tū tə́
yā rāā de kə́ kem ɓēé gə̄ malang ní.
15M-ā m̄-ɓāŕ gír kaa gə̄ malang
yā ɓē ko̰o̰ gə̄ kə́ mbɔ́r ɓē kə́ ko̰ó̰ tə́.
Najə̄ ń Kɔ́ɔ̄ɓē əda ní n noó.
Nin̄ a reēn̄ yā tə́ndā kōr̄ kāgə̄ mban̄g yādə́ gə̄
ta róbə́ gə̄ kə́ yā kudə ń kə̄ Jerusalem tə́,
ta ndogə̄ gə̄ kə́ kəndā kə mbalá adə̄ gīr̄ gidə tə́ ō,
ta ɓē bo gə̄ kə́ *Juda tə́ malang ō.
16M-ā m̄-gān̄g sarya yāḿ dɔdə́ tə́
sɔɔ̄ń dɔ yá̰á̰ kə́ gōtə́ aĺ gə̄ ń rāān̄ ní:
Nin̄ mbātə́mə̄n̄ kɔ̄ɔ́,
nin̄ róōn̄ *yá̰a̰ ndējə̄ gə̄ adə̄n̄ nə́ɓā kə́ rang gə̄,
nin̄-*ɔsən̄ nodə́ nang tə́
no yá̰á̰ kə́ nin̄ kɔ́ gə̄ rāān̄ kə jīdə́ tə́ rɔȳn̄neédə́.
17Banī ḭ̄, ī-do̰ō̰ ndāŕ mbə́yō mbōdīí tə́,
ḭ́ḭ dɔɔ́ āw̄ ə́dádə́ yá̰a̰ malang ń m-ə̄ndā taí tə́ ní.
Ī-lōō kə ndew ta kumdə́ tə́,
ré i beé aĺ anī,
i mā n m-ā m̄-rāāī kadə̄ ā ī-ndew ta kumdə́ tə́ ní.
18Ɓōólaā m-ə̄ndāī dɔ ɓē tə́ kə taá malang
tītə̄ ɓē bo kə́ ngan̄g ngá̰ý ō,
tītə̄ ngaa dan gində̄ ō,
tītə̄ ndogə̄ mbal̄ kə́ rāā kə gində̄ nə̄ngá kasaá
ta kum mban̄g gə̄ kə́ *Juda tə́ ō,
de kə́ bo gə̄ tə́ ō, *ngé tun̄ yá̰a̰ yān gə̄ tə́ ō,
ta kum gír de kə́ kem ɓēé gə̄ tə́ ō.
19Nin̄ a rɔ̄ɔ̄nī,
banī nin̄ a asən̄ rāā yá̰a̰ seí sḛ́ý aĺ bátə́.
Mā i naā tə́ seí.
I Kɔ́ɔ̄ɓē n ɔr̄ najə̄ yā gān̄g dɔí.
Currently Selected:
Makətūbə̄ yā Jeremi 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad