Teē Ngán Israel gə̄ 1
1
Nə́ɓā teē kə ngán Israel gēé kem ɓē kə́ Ejiptə tə́ kɔ̄ɔ́
(1-15)
Ngán Israel gə̄ i ɓəlo gə̄ dɔ nang kə́ Ejiptə tə́
1-4Ngán Jakob gə̄, adə̄ i ngán *Israel gə̄ ń reēn̄ kə bɔbə̄də́ kem ɓē kə́ Ejiptə tə́ ní, rīdə́ n toó: Ruben ō, Simeo̰ ō, Lebi ō, *Juda ō, Isakar ō, Jabulo̰ ō, Benjamḛ ō, Dan ō, Nepətali ō, Gad ō, Aser ō. Nin̄-reēn̄ i kə de kə́ kem ndogə̄ yādə́ gə̄ tə́ kə dɔdə́ gēé malang. 5Dan ngeé ń noō tə́ ní ngán Jakob gə̄ ō, ngán kaan gə̄ ō, malang i deē kutə sīrí. Jəjep ni i kem ɓē kə́ Ejiptə tə́ kété nodə́ tə́ kɔ̄ɔ́. 6Gō tə́ anī Jəjep oy ō, ngákó̰o̰n gə̄ oyn̄ ō, ngé gə̄ ń reēn̄ sedə́ ní oyn̄ malang ō. 7Ngán *Israel gə̄ ojən̄ naā ngá̰ý adə̄ kutədə́ ō, tɔ́gə́də́ ō i ngá̰ý. Nin̄-taān̄ kem ɓē malang.
8Loo ń noō tə́ mban̄g kə́ rang kə́ ger̄ Jəjep alé əla gír ko̰o̰ ɓē dɔ nang kə́ Ejiptə tə́. 9Ni-əda gír deē yān gə̄ na ngán *Israel gə̄ na télən̄ gír de kə́ kutədə́ i ngá̰ý tɔȳ yādə́ nin̄ gə̄ ō, tɔ́gə́də́ i ngá̰ý tɔȳ yādə́ ō, 10ní kə n-sāān̄ kum kedə̄ kə́ yā kɔgə̄ńdə́ kojə naā kum kə̄ kété, na sōgə́ rɔ̄ɔ̄ əsō anī ɓoon̄ rɔ̄də́ tū yā madə̄ ba̰ā̰də́ nin̄ gə̄ tə́ yā rɔ̄ɔńdə́ ba teēń kɔ̄ɔ́ kem ɓēé. 11Loo ń noō tə́ ɓáa tə́ndān̄ kabāta#1.11 Kabāta: I de kə́ əndānən̄ dɔ ngé rāā kəla gə̄ tə́. gə̄ dɔ ngán Israel gə̄ tə́ kadə̄ rāān̄ kəla ngámba#1.11 Kəla ngámba: I kəla kə́ əndān̄ gúu dɔ deē tə́ kadə̄ rāā, i kəla ɓəlo. sedə́, kadə̄ kutədə́ téləń kə̄ nang tə́. Adə̄ ngán Israel gə̄ rāān̄ ɓē bo gə̄ kə́ yā kán̄ yá̰a̰ kemeé gə̄ adə̄n̄ *Parao̰. Ɓē gə̄ ní i Pitom ō, i Ramses ō. 12Ba dan ń sāān̄ kadə̄ kutə ngán *Israel gə̄ tél kə̄ nang tə́ anī, i loo ń noō tə́ n a aw̄ i kə̄ kété ō, a taān̄ i loo kum kə̄ kété ō, ní. Adə̄ de gə̄ ndin̄ i kə sōlōó kekəre najə̄ yā ngán Israel gə̄ tə́. 13De kə́ Ejiptə gə̄ əndān̄ kəla dɔdə́ tə́ kə gúú, rāān̄də́ ɓəlo tə́. 14Adə̄n̄ a rāān̄ i kəla kə́ ngan̄g gə̄ adə̄ rɔ̄də́ atə̄də́ ngá̰ý: I kəla ndām̄ bɔr ō, kɔr̄ bəríkə ō, kəla ndɔr̄ gə̄ malang ō. Nin̄-tə́ndān̄ kəla gə̄ dɔdə́ tə́ kə gúú.
Parao̰ rāā kum ngán Israel gə̄ ndoō tə́
15Hebəro gə̄ aw̄n̄ kə dəyá̰ kə́ ngé taā ngán gēé jōó gə̄. Rī ngé kə́ kógə̄ḿ na i Sipəra ō, rī ngé kə́ noō na i Pua ō. Mban̄g kə́ Ejiptə ədadə́ na 16ré kə a taān̄ ngán gə̄ gír dəyá̰ Hebəro gə̄ tə́ anī, kə a̰a̰n̄ ngōn̄ ń a teē ní majə. Ré i ngōn̄ kə́ dəngam anī, kə rāān̄ kadə̄ oy, ba ré i ngōn̄ kə́ dəyá̰ anī kə əya̰nən̄ kadə̄ ndi kə kumneé. 17Ɓá tā ba dəyá̰ kə́ ngé taā ngán gə̄ ní ɓōlə́n̄ ndíĺ Nə́ɓā, adə̄ rāān̄ tītə̄ ń mban̄g kə́ Ejiptə ədańdə́ ní alé. Əya̰n̄ ngáń kə́ dəngam gə̄ adə̄ ndin̄ kə kumdə́. 18Anī mban̄g əla gōdə́ tə́, dəjedə́ na ké rāān̄ yá̰a̰ beé i tām̄ rí tə́ wa. Ké əya̰n̄ ngáń kə́ dəngam gə̄ adə̄ ndin̄ kə kumdə́ ké i tām̄ rí tə́ wa. 19Dəyá̰ kə́ ngé taā ngán gə̄ ní tél ədan̄ *Parao̰ na dəyá̰ Hebəro gə̄ na ton̄ tītə̄ dəyá̰ kə́ Ejiptə gə̄ alé. Tɔ́gə́də́ na i ngá̰ý adə̄ na ojən̄ ngán gə̄ na i kété kɔ̄ɔ́ pá tá kadə̄ dəyá̰ kə́ ngé taā ngán gə̄ na reē ugə̄n̄ ɓáý. 20-21Nə́ɓā rāā majə kə dəyá̰ kə́ ngé taā ngán gə̄ ní. Ni-rāā adə̄ ojən̄ naā tɔdɔ̄ ɓōlə́n̄ ndílən ni Nə́ɓā. Ngán *Israel gə̄ ojən̄ naā ngá̰ý ō, télən̄ de kə́ tɔ́gə́də́ i ngá̰ý gə̄ ō. 22Banī *Parao̰ əda gír deē yān gə̄ malang na kə tə́nīn̄ ngán Hebəro kə́ dəngam gə̄ kɔ̄ɔ́ kum bā tə́ ba kə əya̰n̄ ngé kə́ dəyá̰ gə̄.
Currently Selected:
Teē Ngán Israel gə̄ 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad