TAKADA 8
8
1Shawulu ma anya ni, e yeda ni kisa ni Isitipanu.
Shawulu ba Nsubiya Yesu Takaasi
A nana ni totolo takaasi puari a kiya nsubiya Yesu de su ma Wurishelima. Guru nsubiya Yesu su yaapi worosu su a kesa Yawudiya nja Samariya sede e rigye yayamanki na kin. 2Se worosu su nsu bowuta Mirikisi bishina Isitipanu, su yi kuka ni muntu yi soseyi. 3Sede Shawulu sigeba ni ba nsubiya Yesu Genbeki; e ma biya gizi gizi, e ma kwa yi menza nja mata, e ma sa su a jaru.
Manki Ni Pilibu a Samariya
4Worede su yaapi su mu su ma beyi manki nabari kyakyawu mu a guru anya de su te. 5Pilibu te a totolo geri Samariya e beyi manki ni Kiristi anya ni. 6De ntani su zi Pilibu nja su geni mbo beyi mamanki de e mayi, guru asu su beyi ankeli a kiya mbode e ma pala. 7Mumungu aworo ni kuruwa na su ma butu a nki ntani nyowa, Pilibu worikye ni nsu nki sha riki nja gurugu nyowa. 8Nkayomu peri siki soseyi a totolo geri ni.
9Nseminji daa nsu seni Sima de e mayi sapi a siki ni totolo geri ni e ma ba ntani Samariya guru mamanki. E ma dege dolo nkye e shi e ma mbodaa la, 10ntani guru a siki totolo geri, su beyi ankeli asu su ma nkye. <<Nseminji mu, sori yi mu mani Mirikisi nsu Girima la.>> 11Su ba yi ankeli su soseyi sobon e dede e ma ba su mamanki ni sapi yi. 12Sede de su beigaskye ni manki nabari kyakyawu de Pilibu yi a kiya solota Mirikisi nja seni Yesu Kiristi, su yi su tunkwasa, menza nja mata. 13Ari Sima nkiya yi beigaskye; se su yi yi tunkwasa, dege anya ni E mala ni Pilibu guru anya de yaa te, de e geni alama nja totolo mbo mamanki de Pilibu meyi Sima yi mamanki soseyi.
14De yayamanki de ma a siki Wurishelima su zi ntani Samariya su keleba beta ni Mirikisi, se su kiri Biturusu nja Yaaya. 15De Biturusu nja Yaaya su keyi Samariya, su yi su lepa de su keleba Aworo Nsuseki. 16Sobon Mirikisi tuku ba nseda asu Aworo woba; sede su yi su tunkwasa a siki seni Obagizi Yesu. 17Se Biturusu nja Yaaya ja su nani a kiya, se su keleba Aworo Nsuseki.
18De Sima geni te anya sa nani yayamanki na su ma keleba Aworo. Se Sima ba Biturusu nja Yaaya gyolo, 19Sima nkye, <<Eni ma ku ba ni sori mu de guru nsude ni ja yi nani e keleba Aworo Nsuseki.>>
20Sede Biturusu keleba nkye, <<E ke nja gyolo ake ku te a gizi wuta, ki meyi tunani ni gyolo na ka keleba kyawuta ni Mirikisi! 21Ki mani nani a siki ANKI mu ba ko piri, nkaa dishiya ake man kyawu ba a geba Mirikisi ba. 22Juyi bila mumungu ANKI de ki meyi, de ki yi lepa te Obagizi ko yaa yape ke mbode ki yi tunani dishiya mu. 23Nkaa ni geni dishiya ake sika ni awu nja ki ma dodomuna a siki lepi.>>
24Se Sima gye Biturusu nja Yaaya nkye, <<Ku yi lepa te nja Obagizi de kede mbode ku pala mu ko daa e sani ba.>>
25De Biturusu nja Yaaya su beyi sheeda sukwa beyi manki kyakyawu ni beta Obagizi, se su kuma nbeyi ta a Wurishelima. A kiya turiki su beyi manki nabari kyakyawu a siki dende geri Samariya nyowa.
Pilibu nja Nseminji Itiyopiya
26Se meleku Obagizi daa gye Pilibu nkye, <<Dege de ki ta kudu ki biya turiki de butu dege Wurishelima te a Gaza.>> turiki mu su ma biya yi kuma ba. 27Se Pilibu dege te. A kiya turiki e gomu nja nseminji Itiyopiya de ma memeleta, e ma totolo nse na a solota ni Kandis, mata seleki ni Itiyopiya. Nseminji mu te a Wurishelima de bowuta Mirikisi, 28a kiya turiki de e ma kuma mbayi ta gizi e zunwa a kiya doki yi e bure takada ni anebi Ishaya e ma karanta. 29Aworo Nsuseki gye Pilibu nkye, <<Ja te anya doki ni de ki sakisi kusa nshi.>>
30Pilibu yi gudu te anya ni doki ni e zi nseminji ni ma karanta takada ni anebi Ishaya. Pilibu minya yi,<<Ki gane mbode ki ma karanta?>>
31Totolo nseminji ni keleba nkye, <<Yaya Na ma gane?>> <<Se nseda gye ni>> Se e pala gye Pilibu nkye e nyunwa kiya doki de zunwa nja shi.
32Anya de e ma karanta a siki beta Mirikisi de pala nkye:
<<Su keyi te kankye timshiya de su la yi te anya yanka.
kankye yaa timshiya de ma shuru a nani nsu yanka.
yomu na e bure baki ba.
33Su yi wulakenshi ari su nana yi gaskye.
Waa yaa yi yaa pala nabari ni juriya yi?
Nkaa su la leyi yi a durinya.>>
34Se totolo nseminji memeleta mu minya Pilibu nkye, <<Gye ni, woni anebi na yaa yi beta a kiya yi? Sobon kiya yi na ko nseda mbom la?>> 35Se Pilibu para bure baki yi e para shashi ni takada beta Mirikisi e gye yi nabari kyakyawu a kiya ni Yesu.
36De su ma a kiya turiki su ma yi tepiya, de su zo anya riki, se totolo nseminji mu nkye, <<Kone riki naka anya mu. Mina nana de su yi Ni tunkwasa?>>
37Pilibu nkye, <<Nde ki yeda ni dishiya daa, sua yi ke nshi.>>
Se totolo nseminji memeleta mu nkye, <<Ni yeda, Yesu Kiristi e ma Yaa Mirikisi na.>>
38Anya ni totolo nseminji memeleta gye su nkye su sakisi ni doki, Se e shi nja Pilibu su sonka yuru a siki ni riki se Pilibu yi tunkwasa. 39De su butu a siki riki, Aworo Obagizi la Pilibu dandani bila yi. Totolo nseminji memeleta mu sakye geni Pilibu ba, sede e sigeba ni tepiya yi e meyi peri siki. 40Sede Pilibu geni kiya yi Azotu; anya ni e gyowe geri geri, e ma beyi nabari kyakyawu ari e keyi Keseriya.
Currently Selected:
TAKADA 8: Gaa
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Nigeria