TAKADA 14

Bulusu nja Barnaba a Ikoniya

1A siki ni Ikoniya, Bulusu nja Barnaba su yuru a siki ni kolonwa ni Yawudawa yiri de su saba. Anya ni su beyi manki ni Mirikisi sa ari ntani nyowa ni Yawudawa nja worede su shina Mirikisi ba su yeda. 2Sede Yawudawa de su ki yeda sua rikishe worede su shina Mirikisi ba su kiri su de kede su yeda ba su bebeta su dishiya de su yi geba nja yayuwa nsu biya Yesu. 3Se Bulusu nja Barnaba su la kwanki nyowa anya ni, su ma beyi sheeda beta ni Obagizi ba puari geba, Obagizi de saa manki e yi ni aniyeri de sa su yanki ni mamanki nja alama ni mbo beyi mamanki. 4Ntani totolo geri ni Ikoniya su laba keshi keshi; worosu su ma nja Yawudawa, worosu su ma nja yayamanki ni Yesu. 5Se Worede su ma Yawudawa ba nja worede su ma Yawudawa, guru asu nja kamkiya asu, su yi shiri de su dukwa su nja su ribi su ni dunsi su muntu. 6De yayamanki su zi mbode su ma so su yi gudu ta totolo geri ni Ikoniya ni Listira nja Darbe nja kesa de ma gyewe su, 7anya de su sigeba ni beyi nabari kyakyawu a kiya ni Yesu.

Bulusu Beyi Manki Mirikisi a Listira nja Darbe

8A siki ni Listira nseminji daa ma gurugu, tun dege nana de su yapu yi e taba yi tepiya ba. 9Nseminji zunwa anya de zi Bulusu de yaa yi beta. Bulusu kapa ndani kpanku yi tiriri, de Bulusu geni yiri de e man beigaskye de E worikye 10se Bulusu dege murinya nsori yi sukwa nkye, <<Dege de ki sakisi a bisi ni seni ake!>> Anya ni, nse minzi ni dege tirimi mayi tepiya.

11De ntani geni mbode Bulusu yi, su yi kuruwa ni arishiya Ikoniya, <<Boka zo sonka mu ni kama nse beki!>> 12Su ba Barnaba seni Zeyus, Bulusu su sukwa yi Hermes sobon e shina ma nsu yi beta. 13Se pirisi ni sapi Zeyus, de kunguni e yi ma beyi totolo geri, e keyi saa nja gyaga pure zo sa a baki kopa totolo geri sobon e shi nja ntani sua so de su yi sedeka baa Bulusu nja Barnaba.

14De Barnaba nja Bulusu yaa manki su zi mbo mu, su saga riga asu su yi seberi butu ta a siki ntani, su yi kuruwa du su nkye: 15<<Oboki, mina sa de kwa yi yomu? Omu du muma ntani na nta oku. Mwa keyi ku nabari kyakyawu, de ku bila mbo durinya mu de mani anpani ba de ku zi ta anya ni Mirikisi nsu leyi, de yi kisi nja bisi nja totolo riki nja guru mbode ma a siki asu. 16A kwanki beyi, Mirikisi bila guru kowoni ntani su yi tepiya a turiki asu. 17Nzun yomu Mirikisi nana kiya yi te anya yi mu mbo kyakyawu: Mirikisi ma nana ku aniyeri e yi anya ba ku riki dege bisi nja mbosi a kyakya kwanki; e ba ku mbosi nyowa nja sika dishiya aku ni peri siki.>> 18Nzun kelima mu guru, su sha Genbeki tuku de su nana yowa ntani dege yi su sedeka.

19Se worosu Yawudawa yuru Antakiya nja Ikoniya su shirigye ntani nyowa su ja ntani zo a keteri asu. Se su riripi Bulusu su ja yi te a beyi geri, su geni kankye e muntu. 20Sede a beyi de yayagizi Yesu gomu gyewe Bulusu, e dege a bisi kuma mbayi ta a siki totolo geri. De geri shekeri Bulusu nja Barnaba su te Darbe.

Bulusu nja Barnaba Te Antakiya A siki Suriya

21Bulusu nja Barnaba beyi manki nabari kyakyawu a siki totolo geri ni, su san yayagizi Yesu nyowa. Se su kuma mbayi ta a siki Listira, Ikoniya nja Antakiya. 22Nsu Bulusu ma ja nsubiya Yesu sori nja ba su sori guyam de su sakisi gaskye a siki ni beigaskye. Su nkye, <<Dole mwa sha Genbeki nyowa tuku de mwa samu yuru solota gizi Mirikisi.>> 23Bulusu nja Barnaba su zabi salaki a kowoni shoshi, nja su yi lepa nja azimi de su munka su ba Obagizi, nsu de su sadishiya su nja shi. 24A beyi de Bulusu nja Barnaba biya kesa ni Bisidiya, su zo a Papiliya, 25Se Bulusu nja Barnaba su yi manki kelima Mirikisi a Paga, se su te Italiya.

26Dede Italiya nunwa kwanto kuma mbayi ta Antakiya, anya de su yi su lepa de aniyeri ni Mirikisi e ma a kiya su ni ANKI de su gama. 27De su keyi anya ni, su tala nsubiya Yesu su keleba manki gye su guru mbode Mirikisi yi a nani asu nja yiri de Mirikisi bure kopa beigaskye ba worede su shina yi ba. 28Se su yi kwana bi anya ni nja nsubiya Yesu.

Currently Selected:

TAKADA 14: Gaa

Highlight

Copy