Atnutnu 6

Anyagyignayi knyiknyi ngwnu-tnaaba

1Fyi n anyipyei yi she amwutuyi ɓə ya bəgyé mwaɓe, Agiriki-ayahudiyi ɓa ceawyi ntu Aibraniyi-ayahudiyi ɓo, ntuge a ɓə la əɓa anyigbayi knàya ma n gnagna, dna n nyagyi gná fyegyifyegyi. 2Ntulonu Awoceaba yi ɓaa amwutuyi yezhi vnyanya n abagbmanyi ɓa gna, “Kwo taa bmya yaa əyi ɓəvyitnutnu Shekwoyi ɓədagbma nya yashi, nabai ya gná nyagyi m. 3Əyi azaje, fye knyi aza ngwnu-tnaaba n əfye atasni, n a kpəlo ge ɓa nunui lo n Zafnui n wyemwai. Yi ɓa kwu tnutnu ye yafyi n əɓa akwnu 4jesnu ya kwu əyihni ga fyi n aduwazhni ɓədo n ɓədagbma ɓəvyitnutnui.”

5Ɓəmwushi ye kwa kwu da okwu ye vnyanya. Ɓa knyí Istifanus, əza n wo ɓə nunui n gaiciyagai jesnu n Zafnu Gyigyiyii; n Fyilibwusii ce, Pokworus, Nikano, Timon, Pamyena, jesnu Nikwolas woi gbmi n Antiyok, n wo ɓə la vyi Ayahudiyi kwnunu nyi. 6Ɓa ɓe n aza yei n atnutnuloyi aba, aza n ɓa ɓə zhniaduwa kpe ɓa, jesnu ɓa kpe ɓa əɓa aɓwa.

7Ntulonu Shekwoyi ɓədagbma kwa lapwi. Amwutuyi fyi n Urishelima ɓa mwa bəgyé wolowolo, jesnu apirisiti n mwa bəgyé ɓa kwu gaiciyaganunui shi əɓwa.

A lá Istifanus wna

8Nsayii Istifanus, əza n wo ɓə nunui n Shekwoyi shebmyashi n kalái, wa zhni aɓo wowoi ayaakwo n aznùi fyi n aza. 9Ntucenu, apaapagnyi kwa laka, kwoi gbmi n aza aba n ɓa kwnu n Ayahudiyibwokwnu Azayayai nya (shi a ɓə zhni ai yi kwo), Ayahudiyi Sireni nya n Alekzandariya ɓədo n aknyii n Kilikiya n Asiyai, n ɓa nu ɓə ya aɓənakpeaje n Istifanusii. 10Ama to ɓa myi n ɓa gnyiapaapa n wyemwai, n Zafnu ɓə ga wo, əsa n wo ɓə daɓo nyi m.

11Nlonu ɓaa kwo yefyi azaho fyaa nge ɓa da ge, “Yi kwu wo Istifanus woi da atukwopmi ɓo tu n Mwusa tukwo n Shekwoyii.”

12Ntulonu ɓa kwu aza bwugbakala zhi, n abyedai ɓədo n owa anyawuyi nyai. Ɓa wna Istifanus ɓa ɓe n woi n Sahindiri. 13Ɓa ɓe n Aɓəgbmiyi akatá nya, n ɓa ɓə gbmiɓo, “Əza ye too fa ɓəda daɓo tu n aba-gyigyiyi ye tukwo n owai m. 14Ntuge yi kwu wo woi gna nge Yeisu Nazeretiyi ye wo ɓa kwu abaye zhniagbma, jesnu wa shná akwnunu do n Mwusa ɓə fa kwo shi yi nyi.”

15Aza vnyanya n ɓa ɓə sase fyi n Sahindiri, ɓa shi Istifanus awye znuu, jesnu ɓa gye əwo awyeba n wu ngye Maləka awyeba.

Currently Selected:

Atnutnu 6: OGNB

Highlight

Copy

Want to have your highlights saved across all your devices? Sign up or sign in

Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi

Biblica® Open Gbagyi Contemporary Bible™, New Testament

‌

“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.

“Biblica” is a trademark registered in the United States Patent and Trademark Office by Biblica, Inc. Used with permission.

‌

See promoVersionInfo in metadata.xml for Creative Commons license.

Learn More About Biblica® Open Gbagyi Nyizeyenya Baibwulu: Shekwoyi Ɓədagbma