Matayo 27
27
Yesu isindikwa kwa Pilato
Maliko 15.1; Luka 23.1-2; Yohani 18.28-32
1Pekukiye, Vatekechi vakomi vonda na filongochi va Vayawudi, vakatang'ine kangi, kusaka ng'asi lya kumdocha Yesu. 2Vakamuwopa ndegei cha kyuma, vakamsindika kwa Pilato, yevakali mtavala va Kilumi.
Kufuwa kwa Yuda
Magito 1.18,19
3Baho, Yuda yeamseduke Yesu, peawene kuva vamuhigile suwe Yesu, akaichumamanga, akanyamule fipande fya sendi selasini akawuyise kwa Vatekechi vakomi. 4Akavalongela, “Ndihongecha kwa kumhecha munu seagitile sambi lyolyonda neke adochwe.”
Ila vawo vakalongile, “Wisaka tugite liki? Ilyo ndi nongwa lyako.”
5Suwe, Yuda akataga fila fipande fya sendi pakaye lya Nguluvi, akahuma kwivala, akahelela kwitumbika.
6Vatekechi vakomi vakanyamula fila fipande fya sendi, vakalonga, “Seing'ang'wa kuhanganisa fipande fya sendi ichi na fipande fya sendi fyefihechwa mulusanja lya Kaye lya Nguluvi, kwakuva fipande ifi fihombilwe neke munu adochwe.” 7Suwe, vilonganile, vakachitumila kugulila mgunda veukemelwa mgunda va madope va kugalanicha fiviya neke piveche pono kwa kusila vagenji. 8Ndeni, mbaka neng'uli vanu vakuukemela mgunda ugo, mgunda va danda.
9Ndeni, makani gya mvichi Yelemiya gakatimile, “Vakanyamule fipande fya sendi selasini, beyi yealongilwe na vanu va Isilaeli, 10vakagula mgunda veukali na madope vakugalanicha fiviya, ngita Mtwa pealagiliche.”
Pilato akumuhucha Yesu
Maliko 15.2-5; Luka 23.3-5; Yohani 18.33-38
11Yesu akahimilichwa pautalo lya Pilato, mtavala va Kilumi. Suwe, Pilato, akamuhucha, “Wuli, veve nde Mng'achale va Vayawudi?”
Yesu akamhigile, “Veve ulonga.” 12Ila Vatekechi vakomi na filongochi va Vayawudi pevakali vakumuhucha, seakavahigile kinu.
13Ndeni, Pilato akamuhucha, “Wuli, seupulika makani gevakulongela veve?”
14Ila Yesu seakamuhigile ata kinu kimwi, ata mtavala va Kilumi, akadudwive hilo.
Yesu ihigwa kufuwa
Maliko 15.6-15; Luka 23.13-25; Yohani 18.39—19.16
15Akali achoviye kila chipindi kya lihungu lya Pasaka mtavala va Valoma kuvadindulila Vayahudi vevagehe mukiwopo muwopwa yumwi yevamkelie. 16Chipindi ikyo kukali na muhopwa yumwi yeakali ichelanika kwa kugita uwofu, litawa lyake balaba. 17Suwe, vanu pevilundise pamwi, Pilato akavahucha, “Mwisaka ndimdindulile ani pagati lya ava vavili, Balaba awu Yesu yeikemelwa Kilisito?” 18Akalongela ndeni kwakuva akachela kuva vakamletile kwa mwene kwakuva lya wifu.
19Pilato peakali ikalile pakigoda kyake kya kuhiga, mdala vake akamsindikile njowo, “Ubihile kumgita kinu kyokyonda munu uyu musanzi, kwakuva neng'uli ndigudile hilo munjosi kwakuva lya mwene.” 20Ila Vatekechi vakomi na filongochi vakavalongela vanu vasuke Balaba ahumichwe na Yesu adochwe. 21Pilato akawauvcha, “Nde ani mugati gya ava vavili yemukumkela ndimdindulile?” Vakamuhiga, “Balaba!”
22Pilato akawahucha, “Nondee, ndigite liki kwa munu uyu Yesu yeikemelwa Kilisto?” Vonda vakalonga, “Adochwe!”
23Pilato akauchile, “Wuli? Agitile lukani liki liwofu?”
Vawo vakalutala kutowa kyoo, “Adochwe!”
24Suwe, Pilato peamanyile seivesa kugita kyokyonda na ndewo chivangile kuvanga, akanyamuwe malenga, akakalawa mawoko pautalo lya vala vanu, akalonga, “Nene ndihela nongwa pakyanya lya kufua kwa munu uyu, mwichela vavene.”
25Vanu vonda vakalonga, “Nguluvi atutove nefwe na vana vetu kwa iki kyetukukigita!”
26Baho, Pilato akavadindulila Balaba kuhuma mukiwopo, akaswitiliche atovwe Yesu ndomondo, akamuhumicha neke avambwe.
Vapuga vakumdanila Yesu
Maliko 15.16-20; Yohani 19.2-3
27Kangi, vapuga va Pilato vakamsindike Yesu mugati lya lidamwa lwa kaye lwa utavala, vapuga vonda vakamchingitila. 28Vakamfulile myenda gyake, vakamfwaliche lihingila lidung'u. 29Baho, vakabotile ingela lya mihomi, vakamfwalise kumtuwe, vakamvikile kangi lusaga muliwoko lyake lya ndewo. Vakafugamile pautalo lyake, vakumbeda vakilonga, “Kamwene mng'achale va Vayahudi!” 30Vakamfunyila mita, vakanyamula lila lusaga, vakamtovile pakituwe. 31Pevamalile kumgitila ago, vakamfulile lila lihingila, vakamfaliche myenda gyake, baho vakamuhechile na kumsindika kumvamba pakipindilihicho.
Yesu iwambwa pakipindilihicho
Maliko 15.21-32; Luka 23.26-43; Yohani 19.17-27
32Pevakali vihelela vakamwene munu yumwi litawa lyake Simoni, munu va Kulene, vapuga vakamswitiliche kunyamula lipindilihicho lya Yesu. 33Pevafikile pono pikemelwa Goligota, “Pono lya Lichege lya Mtuwe.” 34Vakamgavila muhanganiko va difayi na kinukikali. Ila Yesu peagechile akakanila kunyuwa.
35Vakamvambile pakipindilihicho, baho, vakagavine myenda gyake kwa kutova gudugudu. 36Pevamalile vakakalile, vakali vakumdima. 37Pakyanya lya kituwe pakipindilihicho vakavikile kibawo lyelisimbilwe, “Uyu nde Yesu Mwana va Vayawudi.” 38Vahichi vavili vagudilwe pamwi na mwene, yumwi lubali lwa ndewo yumwi lubali lwa linyigi.
39Vanu vevakali vichumba pepi na pono baho vakamligile na kuhogosa mituwe gyao na kumheka, 40“Veve ukayigitile uwesa kutunyula Kaye lya Nguluvi na kulichenga kwa figono fidatu? Ngita veve nde Mwana va Nguluvi! Witange yuve na ukwike kuhuma pakipindilihicho!”
41Ndeni ndeni, Vatekechi vakomi pamwi na vawulanichi va malagilicho na filongochi vakamdanila vakilonga, 42“Akavatangile vangi, ila kwitanga yumwene seivesa! Kuva mwene nde Ng'achale va Vayawudi! Nondee aike pakipindilihicho na nefwe twikumwidikila. 43Akamhuvilile Nguluvi na kulonga kuva mwene nde Mwana va Nguluvi, nondee, Nguluvi na amlowole ngita akumkela.”
44Kangi na vale vevagudilwe pamwi na mwene vakamligile.
Yesu ifuwa pakipindilihicho
Maliko 15.33-41; Luka 23.44-49; Yohani 19.28-30
45Kuhuma saa sita pamunyi mbaka saa tisa, kisi likahumile inyi yonda. 46Peifikile saa tisa Yesu akavembile kwa lichwi likomi, “Eli, Eli, lama sabakitani?” Maana lyake, “Nguluvi vangu, Nguluvi vangu, wuli unilekile?”
47Ila vanu vevaimile pala pevakapulike ago vakalonga, “Akumkemela Elia.” 48Yumwi vawo akanyila akanyamuwa lidodoki akachabika difayi yeihatile, akaivikile mukyanya lya lidenge, akamgavila anyuwe.
49Vangi vakalonga, “Leke tulole ngita Elia ikwacha kumtanga.” 50Baho, Yesu akavembile kangi kwa lichwi likomi na akafuwe.
51Baho lipasiya lya kaye lya Nguluvi ikademwike fipande fivili, kuhuma kukyanya mbaka panyi, inyi yonda ikahogosike, maganga gakabachwike, 52makabuli gakadinduka na vanu volofu va Nguluvi vevafue vakachulubuliwa, 53Navo pevakahuma mukabuli, peachulubuke Yesu, vakaingila mumwani va Nguluvi, vakaonekine na vanu volofu. 54Suwe, mkomi va vapuga na vala vevali vakumdima Yesu pe valolile luhogoseko lya mganga na lula lukani ukahumie, vakaogwipe hilo vaka longa, “Ndakyene munu uyu akali Mwana va Nguluvi.”
55Pono baho pakali na vadala volofu vakilola kwa utali. Avo nde vala vevamfutile Yesu kuhuma ku Galilaya vakimtanga. 56Mugati lyao akali Malia munu va Magidala Malia maye vake Yakobo na Yosefu pamwi na maye vawo vana va Zebedayo.
Yesu isilwa
Maliko 15.42-47; Luka 23.50-56; Yohani 19.38-42
57Peifikile palumiye, akachile munu yumwi yeakali na finu fyongofu munu va Alimataya, litawa lyake Yosefu. Nave akali mchulila va Yesu, 58akamuheleliye Pilato, akasuka amgavile mvili va Yesu. Suwe, Pilato akavalongela agavilwe. 59Yosefu akaunyamula ula mvili, akaugubikila mumwenda mvalafu hilo, 60akauvikile mugati lya kabuli lyake miya lyeakalihongile muliganga. Baho akalivika liganga likomi pautalo lya mlyangilo va likabuli, akahegile. 61Malia munu va Magidala na yula Malia yungi vakali vakaliye kuno vilola likabuli.
Kabuli lidimwa
62Kigono kye kifuatile kikalikigono kya kutulula, Vatekechi vakomi na Vafalisayo vakamuhelelie Pilato, 63vakamlongie, “Mkomi, twiwuka kuva yula mdesi chipindi seakafuwa akalonga kuva, ‘Pefichumba figono fidatu ichulubuka.’ 64Nondee lagiliche likabuli lidimwe mbaka kigono kya udatu neke vachulila vake vabihile kwacha kumhicha na kuvalongela vanu kuva achulubwike. Udesi huo va mwiso uvecha mkomi hilo kuchumba ula va pamwandi.”
65Pilato akavalongile, “Aya, mnavo vadima muhelele mukadime ngita muwesile.”
66Suwe, vakahelela na vadima neke validime unofu likabuli, vakamatile lila liganga na kuvaleka baho vapuga.
Currently Selected:
Matayo 27: NTBnBL2025
Highlight
Share
Copy
Want to have your highlights saved across all your devices? Sign up or sign in
The New Testament in Benamanga @The Word for The World International and Benamanga Language translation, 2025. All rights reserved.
