Malako 2

Yesu wunyakisa muntu wuna mbwolokoto

(Mat 9.1-8; Luk 5.17-26)

1Mwa bilumbu kwandi bihyoka, Yesu wuvutuka ku mbanza Kapenawumi. Bantu bayuwa ti mu nzo kadi. 2Ni bayiza kutakana babingi, na kusaala dyaka bibuka ko natee ku mbazi yii ha mwelo wu nzo. Yesu ni kedi balonganga Mambu ma Nzambi 3Bantu bayiza ku Yesu na muntu wumosi wubeela mbolokoto, wuba wunangunu ku bakakala baya. 4Kansi balenda ko mu mutudisa natee ha bela Yesu, mu dyambu di mpumbu yi bantu. Ni hahoho, bamakina ku yulu muludi wu nzo, babambula wo nkatika ha bela Yesu, ni bakulumuna mbevo yiba yilambalala ha yulu kipoyi. 5Yesu bu kayena kiminu kyawu, wuta ku muntu wuu na mbolokoto ti: «Mwana ani, masumu maku malemvokolo.» 6Mwa ndambu yi milongisi mi Misiku, miba mizakala hoho, myedi tanga ku nsye mitima myawu ti: 7«Mu dyambu dinki bakala bedidi kana zonzila bobo e? Wuna vweza Nzambi. Nani lendi lemvokila masumu tala ti ka Nzambi yandi bende ko e?» 8Yesu wubakula mu nswalu mabanza mawu ni kabateela ti: «Bila nki ludi na mabanza mabobobo ku nsye mitima myeno e? 9Nkye dyambu dilutidi nayakiyaki mu ta ku muntu wuna mbolokoto: “Masumu maku malemvokolo”, hoti “Telama, bonga kipoyi kyaku na yenda e?” 10Kedika! Mwanki luzaba ti Mwana Muntu wuu na luve lwe lemvokila masumu ha butoto.» Buna wuteela ku muntu wuna mbolokoto ti: 11«Nina kuteela, telama, bonga kipoyi kyaku na vutuka ku nzo aku!» 12Bakala ditumbu telama, wubonga kipoyi kyandi na wuduuka mu nzo ha meso ma bantu bamvimba. Bamvimba bayituku na bakembila Nzambi, ni bata ti: «Yeto twayeni misamu mingitukulu mibubu ko.»

Mbokolo yi Levi mutoti wu mpaku

(Mat 9.9-13; Luk 5.27-32)

13Yesu wuvutuka dyaka ha kumu di dyanga di Ngalili. Mpumbu yimvimba yi bantu yiyiza ku yandi, ni kedi balonga. 14Bu kedi hyoka, wuyena Levi, mwana wu Alefe, wuzakala ha kibuka ki bakwe futilanga mpaku. Wumuteela ti: «Ndanda!» Wutelama na wumulanda.

15Ku manima, Yesu wuyenda dya mu nzo yi Levi. Mitoti mi mpaku na minsumuki mimingi miba mizakala ha meza na Yesu ha kimosi na milongoki myandi, mu dyambu ti babingi bedi kwe mulandingi. 16Milongisi mi Misiku miba mu kabu di bafalisi, bu miyena ti Yesu wuna dya ha kimosi na minsumuki, mpe na mitoti mi mpaku, ni mita ku milongoki myandi ti: «Bila nki kana diila ha kimosi na mitoti mi mpaku, mpe na minsumuki e?» 17Yesu wubayuwa, wubateela ti: «Ka bantu ba muhinya ko ba na nsatu yi mumbuki, kansi ni bambevo. Nayizidi mu tumisa bantu balunungu ko, kansi minsumuki.»

Yesu na kumina nsoki

(Mat 9.14-17; Luk 5.33-39)

18Kilumbu kimosi, milongoki mi Yoane mumbotiki na bafalisi bamina nsoki. Ni hahoho, bantu bayiza fuudila Yesu ti: «Bila nki milongoki mi Yoane mumbotiki na mi bafalisi mikwe mininanga nsoki, kansi mimyaku mi minanga nsoki ko e?» 19Yesu wubavutudila ti: «Nga yeno luna banzila ti bantu babatumisi ku mukembo wu makwela balendi mina nsoki mu ntangu kikwedi bu kakidi nawu kintwadi e?» Mu ntangu yi kakidi nawu kintwadi, balendi mina nsoki ko. 20Kansi bilumbu byaakwiza bi ba bakatula kikwedi, bilumbu bebyobyo baamina nsoki.

21«Kunaani muntu kwe tunganga kitende ki mulele wumoona mu kinkutu kintama. Tala ti kabobo ko, kitende kimona kyaakyakuna ndambu yi kinkutu kintama mpe kukyakuka kwahyoka dyaka bunene. 22Kunaani muntu kwe tulanga vinu dinsonso mu mitumbu mintama. Tala ti kabobo ko, vinu mbo dibula mitumbu na vinu dyaamwangana, mpe mitumbu myaahombila. Kansi bufweni ti vinu dinsonso diba mitumbu mimona.»

Yesu na kilumbu ki saba

(Mat 12.1-8; Luk 6.1-5)

23Mu kilumbu ki saba, Yesu wedi hyokila mu zimfuba zi mbutu zi bele. Milongoki myandi mitona mu konya mbutu bu bedi kwe hyoki. 24Bafalisi bata ku Yesu ti: «Bila nki milongoki myaku mina hiidikila misamu mi bakanikina mu kilumbu ki saba e?» 25Yesu wubavutudila ti: «Lutanga ko misamu mihidika Davidi bu kaba na nsatu, yandi mpe na bantu baba nandi kintwadi, baba na bima bye dya ko e? 26Wukota mu nzo-Nzambi mu ntangu Abiatali yikaba mfumu nganga-Nzambi. Wudya mampa mahaanu mu minkayulu ku Nzambi, mpeleko Misiku mina lomba ti zinganga-Nzambi kaka zii na luve mu dya mo. Kansi ni kahaana mo mpe ku bantu bandi.» 27Mboki Yesu wubwesa bateela dyaka ti: «Bahidika saba mu dyambu di muntu, kansi ka muntu mu dyambu di saba ko. 28Ni hahoho, Mwana Muntu kadi Mfumu yi saba.»

Currently Selected:

Malako 2: dde Ddo

Highlight

Copy