Matayi 7

Ka mufundisanga ko

(Luk 6.37-38,41-42)

1Ka mufundisa ko, mwanki balembolo lufundisa. 2Mu dyambu ti baalufundisa bonso bu lukwe fundisilanga bahiika, mpe kitezo ki lukwe tezilanga bahiika, kyakyokyo mpe baalutezila. 3Mu dyambu di nki wuna yenina kititi kii mu diisu di mpangi aku, kansi wuna yena kibuku kibaya kii mu diisu dyaku ko e? 4Bwedi lenda teela ku mpangi aku ti: «Bika na katula kititi kii mu diisu dyaku», kansi ngebende wuna kibuku kibaya mu diisu dyaku e? 5Ngeye muntu wu diisu ku nsye lukaya wudi! Katula ntete kibuku kibaya kii mu diisu dyaku, mboki mbo wuyena bwedi lenda katudila kititi kii mu diisu di mpangi aku.

6Ka luhaanandi bima bilongo ku zimbwa ko, na lulosandi misanga mintalu ku zingulu ko, mu dyambu ti zilenda mye dyatikisa, na zilenda lubangumukina mu lukaakuna.

Wonso waalomba waatambula

(Luk 11.9-13)

7Lombeeno na baaluhaana, soseeno mpe lwaabaka, konkoteeno na baaluzibudila. 8Ni hahoho, wonso waalomba, waatambula, mboki wonso waasosa waabaka na baazibudila ku yondowo waakonkota. 9Nani ha kati dyeno, lenda haana tadi ku mwana andi tala ti wumulombidi dimpa e? 10Hoti nyoka tala ti wumulombidi mbizi e? 11Mpeleko yeno nkatika bantu bambi ludi, luzebi muhaana bima bimbote ku baala beno. Bila nki Tata eno wu ku mazulu kalendi lembolo haanina bima bimbote ku yobobo bana mu lomba byo e?

12Mimvimba mi lutiidi ti bantu ba luhiidikila, yeno mpe bahidikileeno myo. Mu dyambu ti Misiku midi, na mi misonama mu buuku di mimbikudi.

Mwelo wufyetama

(Luk 13.24)

13Kotileeno ha mwelo wufyetama. Kadi mwelo wuwunene na nzila yisadila bikwe natanga ku mbungulu, mpe babingi bakwe kotilanga yo. 14Kansi mwelo wufyetama na nzila yifyetama bikwe natanga ku luzingu, na bafyuma kwandi baayena yo.

Mimbikudi mi luvunu

(Luk 6.43-44)

15Kebeeno kweno na mimbikudi mi luvunu. Bakwe kwizanga ku yeno mu kifwani ki mameme, kansi ku kati dyawu baa bonso zingo zikwe dyanga bantu. 16Mu mimbutu myawu lwaabazabila. Bakwe helanga mbutu zi miti mi vinu mu miti mi nsende ko, hoti mbutu zi fike mu zimpanga ko. 17Muti wumbote wukwe butanga mbutu zimbote, kansi muti wumbi wukwe butanga mbutu zimbi. 18Muti wumbote wulendi buta mbutu zimbi ko, na muti wumbi wulendi buta mbutu zimbote ko. 19Wonso muti wukwe lembolo butanga mbutu zimbote wufweti kwangu mpe wufweti tubu ku tiya. 20Kedika, mu mimbutu myawu lwaazabila mimbikudi mi luvunu.

Kilumbu kimfundusu

(Luk 13.25-27)

21Ka bamvimba ko bakwe ntumisinanga ti: «Mfumu, Mfumu!» Baakota mu Kimfumu ki mazulu, kansi yobobo kwandi bakwe sadilanga luzolo lu Tata ani wu ku mazulu. 22Kilumbu kyaaba mfundusu, babingi baanteela ti: «Mfumu, Mfumu, ka mu nkumbu aku ko twedi bikudilanga e? Ka mu nkumbu aku ko twedi kuminanga mpeve zimbi e? Ka mu nkumbu aku ko twedi sidilanga bimangu bibingi e?» 23Buna mbo nabateela ti: «Meno naluzebi ko, nkatukileeno, yeno lukwe sadilanga mambi!»

Nzo zole

(Luk 6.47-49)

24Ni hahoho, wonso muntu kwe yuwanga mambu mani ma nakwe zonzanga na kwe sadilanga mo, fwanakani na bakala dimosi di madyela, wu tunga nzo andi ha yulu matadi. 25Mvula bu yi noka, kikuka kiyiza, kitembo kingolo ki kukula na biyiza bwa mu nzo beyoyo, kansi bibwisa yo ko, mu dyambu ti wutunga lufulu andi ha yulu matadi. 26Kansi muntu wukwe yuwanga mambu mani ma nakwe zonzanga, na kwe lembolo sadilanga mo, fwaanakani na muntu wu kizengi tungidi nzo andi ha yulu munyenge. 27Mvula bu yinoka, kikuka kiyiza, kitembo kingolo ki kukula na biyiza bwa mu nzo beyoyo, na nzo yibwa mpe bimvimba bimana bwonzomoka.

Yesu wulonga mu lulendo

28Yesu bu kamanisa mu haana malongi bemomo, bantu batoma yituku mu ndongosolo andi, 29mu dyambu ti wedi longilanga mu lulendo, ka bonso milongisi mi Misiku myawu ko.

Currently Selected:

Matayi 7: dde Ddo

Highlight

Copy