Yoane 20

Ndyamu yimpamba

(Mat 28.1-8; Mlk 16.1-8; Luk 24.1-12)

1Kilumbu ki lumingu mu minkyelo mi bwisi, mwa mpimpa buna yakidi, Maliya mwisi-Mangadala wuyenda ku ndyamu. Wuyena ti tadi dikwe kanganga mwelo wunkotolo wu ndyamu, dyabakatudi. 2Wuyenda mu muswalu ku Simoni na mulongoki wuhiika, yondowo Yesu wukedi tyanga, na wubateela ti: «Mfumu yandi bakatudi mu ndyamu, na tuzebi ko kwedi bamutudidi.»

3Petelo na mulongoki wuhiika, baduuka mu nzo na bayenda ku ndyamu. 4Banooka ntinu yababole, kansi mulongoki wuhiika wuvudila Petelo ntinu na wutuula wuntete ku ndyamu. 5Wukondama mu tadidila na wuyena bitende bi lino biba bituulu hoho, kansi kakota ko. 6Simoni Petelo wedi kwe mulandi, wutuula yandi mpe na wukota mu ndyamu. Wuyena bitende bi lino biba hoho, 7na mulele wu bazinga mutu wu Yesu. Mulele bewowo wuba kibuka kimosi ko na bitende bi lino. Kansi wuba wufutuku ha nsoso, ha kibuka kihiika. 8Mu ntangu beyoyo kwandi, mulongoki wuhiika, yondowo wutuula wuntete ku ndyamu, wukota yandi mpe. Wuyena na wukwikila. 9Mu dyambu ti milongoki mibakula ntete ko Masonama mata ti: «Yesu fweti fuluka mu bafwa.» 10Mboki milongoki mivutuka ku nzo awu.

Yesu wuyenikina Maliya mwisi-Mangadala

(Mat 28.9-10; Mlk 16.9-11)

11Maliya wuba wutelama ku mbazi, ha ntendo mwelo wu ndyamu. Bu kedi dila, ni kakondama mu tadidila mu kati di ndyamu, 12wuyena mbazi zi Nzambi zole zilwaata binkutu biba na veko-veko, zi zakala ha kibuka kiba nitu yi Yesu. Wumosi wuba kubela mutu, wuhiika kubela malu. 13Zimbazi zi Nzambi zimufuula ti «Mama, nki wuna didila e?» Wubavutudila ti: «Nitu yi Mfumu ani ya babongidi, na nzebi ko kwedi benzi mu tuula.» 14Bu kamanisa mu zonza bobo, wubaluka, wuyena Yesu wuba wutelama hoho. Kansi kedi bakula ko ti ni yandi. 15Yesu wumuteela ti: «Mama, nki wuna didila e? Nani wuna sosa e?» Kedi banzila ti yandi kisadi ki mfuba yi miti, ni kamuteela ti: «Tala ti ngeye wu mubongidi, nteela kwedi wenzi mutuula. Mwanki nenda namubonga.» 16Yesu wumuteela ti: «Maliya.» Maliya wubaluka na wuta mu ndinga yi ki-Ebeleo ti: «Labuni!» Mbangudulu ti: «Mulongisi!» 17Yesu wumuteela ti: «Kunsimbandi ko, mu dyambu ti natombokidi ku Tata ani ko. Kansi yenda ku zimpangi zani na bateela ti “Nina tomboka ku Tata ani wuu mpe Tata eno, ku Nzambi ani wuu mpe Nzambi eno.”» 18Maliya mwisi-Mangadala wuyenda ku milongoki na wubazabikisa ti: «Mfumu yandi nyeni.» Ni kabayadila mpolo mu mimvimba mi kamuteela.

Yesu yenikini ku milongoki myandi

(Mat 28.16-20; Mlk 16.14-18; Luk 24.36-49)

19Mu nkokila beyoyo kwandi yi kilumbu bekyokyo kilumingu, myelo mi nzo yiba milongoki miba mitoma kangama, mu dyambu ti baba na bunkuta bu zimfumu zi Bayudayo. Yesu wuyiza, wutelama ha kati-kati dyawu na wuta ti: «Kiyenge kyeno.» 20Bu kamanisa mu zonza bobo, wubalonka moko mandi na lubanzi lwandi. Milongoki baba mu kyese kikingi bu bayena Mfumu. 21Yesu wubateela dyaka ti: «Kiyenge kyeno. Bonso Tata kantambika, meno mpe nina lutambika.» 22Bu kamanisa mu zonza, wufuula mupepe mu yawu na wubateela ti: «Tambuleeno Mpeve Yilongo. 23Yobobo ba lwaalemvokila masumu, baatambula mulemvo. Yobobo ba lwaalembolo lemvokila masumu, baatambula mulemvo ko.»

Yesu na Toma

24Toma, wumosi mu milongoki kumi na myole, yondowo wu bakwe tumisinanga «Nsimba», kaba nawu kintwadi ko mu ntangu Yesu bu kayiza. 25Milongoki mihiika mi muyadila ti: «Yeto Mfumu yandi tuyeni.» Kansi wubavutudila ti: «Tala ti nyeni mu moko mandi bifu bi nsonso ko, tala ti ntudidi mulembo ani ha kifu ki nsonso na kooko kwani ha lubanzi lwandi ko, naakwikila ko.»

26Kisabala kimosi kihyoka, milongoki mi Yesu mi kutakana dyaka mu nzo, Toma wuba nawu kintwadi. Mpeleko myelo mimvimba miba mitoma kangama, Yesu wuyiza wutelama ha kati-kati dyawu na wuta ti: «Kiyenge kyeno.» 27Mboki wuteela Toma ti: «Yiza tuula mulembo aku eha, na tala moko mani. Lambula kooko kwaku na tuula ko mu lubanzi lwani. Bika maketiketi maku, kansi kwikila.» 28Toma wumuvutudila ti: «Mfumu ani na Nzambi ani.» 29Yesu wumuteela ti: «Bunyeni, hahoho kwikidi e? Kyese ku yobobo balembolo yena, kansi bakwikidi.»

Mfunu yi buuku bedidi

30Yesu wusa dyaka bimangu bibingi ha ntadisi yi milongoki myandi, bilembolo ba bisonama mu buuku bedidi. 31Kansi mii misonama, mwanki lukwikila ti Yesu ni Klisto, Mwana wu Nzambi. Bu lwakwikila, mbo lubaka moyo mu yandi.

Currently Selected:

Yoane 20: dde Ddo

Highlight

Copy