Mavanga 9

Sawuli wuviluka

(22.6-16; 26.12-18)

1Mu ntangu beyoyo, Sawuli mabanza maba nandi kaka ni mu fyetikisa na mu honda milongoki mi Mfumu. Wuyenda yenikina mfumu nganga-Nzambi, 2mu mulomba mikanda mya muhaana luve mu kwe koti mu zinzo zi lusambulu zi Bayudayo zii ku mbanza yi Damasi. Tala ti wenzi batikisa bantu, bakento hoti babakala bana landa nzila yi Mfumu, ka bakanga na ka banata ku mbanza yi Yelusalemi. 3Bu kaba mu nzila, bela-bela na mbanza yi Damasi, wuyitukulu kwandi ni kya kikingi kifuma ku yulu, kitumbu muzungidila mu kyezezi andi. 4Wubwa ha nsi na wuyuwa ndinga yedi muteela ti: «Sawuli, Sawuli, bila nki wuna mfyetikisila e?» 5Wumufuula ti: «Mfumu, ngeye ni nani e?» Ndinga yimuvutudila ti: «Meno ni Yesu yondowo wu wuna fyetikisa. 6Kansi telama, kota mu mbanza. Mbo bakuteela nki fweti sa.» 7Bantu bazyeta ha kimosi nandi batelama, mu kinkunku bekyokyo bakituka bonso mababa. Bayuwa ndinga, kansi bayena muntu ko. 8Sawuli wutelama. Mpeleko meso mandi maba matemoka, kansi kedi bwesa yena ko. Bamusimba mu kooko mu munata ku mbanza yi Damasi. 9Bilumbu bitatu kasa, ka muyena ko, ka kudya ko mpe ka kunwa ko.

10Ku mbanza yi Damasi kuba na mulongoki wumosi nkumbu andi Ananiase. Mfumu wumuyenikina mu mbweno na wumuteela ti: «Ananiase!» Wuvutula ti: «Mfumu, meno ewu!» 11Mfumu ni kamuteela ti: «Telama, yenda mu bala-bala yi bakwe tumisinanga ti Yisungama, mu nzo yi Yuda, fuula muntu wumosi nkumbu andi Sawuli mwisi-Talisi. Mu ntangu beyiyi, kusambila kana sa 12mpe mu kati di mbweno, yeni muntu wumosi nkumbu andi Ananiase wuna kota na wuna mutentika moko mwanki kabwesa yena.» 13Ananiase wuvutula ti: «Mfumu, bantu babingi banzonzidi muntu bewowo. Bantedidi misamu mimvimba mimbi mi kahidikidi ku balongo baku ku mbanza yi Yelusalemi. 14Wizidi ehaha na lulendo lumvimba lu katambudi ku zimfumu zi nganga-Nzambi mu bwila bamvimba bebobo bakwe sambilanga nkumbu aku.» 15Kansi Mfumu wumuteela ti: «Yenda, mu dyambu ti yandi nsoodidi mpe naamusadila mu zabikisa nkumbu ani ku balembolo ba Bayudayo, ku zintinu na ku ba-Isaeli. 16Meno bende mbo na mulonka mimvimba mi kayenina mpasi mu dyambu di nkumbu ani.» 17Ananiase ni kayenda. Bu kakota mu nzo, wutentika Sawuli moko na wuta ti: «Sawuli mpangi ani, Mfumu wu kuyenikini mu nzila yi wuyizidi, yandi wuntambikidi mwanki meso maku mabwesa yena na wufuluka mu Mpeve Yilongo.» 18Hansi na nsi, bima biba bonso makalu bi katuka mu meso. Ni kabwesa yena dyaka. Wutelama na wubotoko. 19Bu kamana dya, wubaka dyaka makindangolo.

Sawuli wuna longa ku mbanza yi Damasi

Wuzakala mwa bilumbu na milongoki mi ba ku mbanza yi Damasi.

20Mboki, wutumbu tona mu samuna mu zinzo zi lusambulu zi Bayudayo ti Yesu Mwana wu Nzambi kadi. 21Bamvimba bedi muyuwa, bayituku na bata ti: «Ka yandi ko wedi fyetikisanga mu ngolo zimvimba ku mbanza yi Yelusalemi yobobo bakwe sambilanga nkumbu yi Yesu e? Nga kizidi ekuku ko mu bakanga na mu banata ha ntadisi yi zimfumu zi zinganga-Nzambi e?» 22Kansi Sawuli wedi vula lonka ku kwikama kwandi na wedi kangisa Bayudayo ba mbanza yi Damasi minwa, bu kedi samuna ti Yesu Mesiya kadi.

23Mwa ntangu yifyoti yihyoka, Bayudayo basa mfundu mu hondoso Sawuli. 24Mpimpa na mwini bedi kenganga myelo mi mbanza mwanki ba muhonda, kansi wubakula mfundu awu. 25Ni hahoho, mu mpimpa milongoki mi Sawuli mimunata mu muhyokisa ku ndambusu yihiika yi kibaka ki mbanza. Mu kati di kitunga bamukulumunina.

Sawuli mu mbanza yi Yelusalemi

26Bu katuula ku mbanza yi Yelusalemi, Sawuli wutonta mu ba kintwadi na milongoki. Kansi bamvimba bamuyena bunkuta mu dyambu ti bakwikila ko ti wuhikidi mulongoki. 27Buna Banabase wumubonga na wumunata ku zintumwa. Wubayadila bwedi Sawuli kayenina Mfumu wu muzonzila mu nzila, mpe bwedi ku mbanza yi Damasi kasamunina mu kivuvu kimvimba nkumbu yi Yesu. 28Tuka ntangu beyoyo, Sawuli wuba kintwadi nawu. Wedi kwendanga na wedi vutukanga nawu mu mbanza yi Yelusalemi, mpe wedi longanga mu nkumbu yi Mfumu mu kivuvu kimvimba. 29Mpe wedi mokananga na Bayudayo bakwe zonzanga ndinga yi kingeleke na bedi vutasananga. Kansi, yawu ni basosa mu muhondisa. 30Bu bazaba wo, minkwikidi mimunata ku mbanza yi Sezale. Ku manima, ni bamufidisa ku mbanza yi Talisi.

31Dibundu dimvimba mu kizunga ki Yuda, ki Ngalili na ki Samaliya diyiza ba mu kati di kiyenge. Dibundu dyedi kula mu kiminu na dyedi dyata ku nsye lutumumu lu Mfumu, mpe bantu bedi bwesamanga babingi mu lusadusu lu Mpeve Yilongo.

Petelo ku mbanza Lida: Lunyakusu lu Ene

32Petelo wedi kwe zyeti mu nsi yimvimba, wuyenda ku balongo bedi zinganga ku mbanza yi Lida. 33Wuyenda yena koko, muntu wumosi nkumbu andi Ene, wuba wulambalala ha yulu mbuka tuka mvula nana, mu dyambu ti wuba na kimbevo ki mbolokoto. 34Petelo wumuteela ti: «Ene, Yesu-Klisto wukunyakisi. Telama na hidika ngeye bende mbuka aku.» Mpe wutumbu telama. 35Mukangu wumvimba wu mbanza yi Lida na wu nsuku yi Saloni bu wumuyena, wuviluka mu landa Yesu.

Petelo ku mbanza yi Zope: Mfulukulu yi Tabita

36Ku mbanza yi Zope, kuba na mulongoki wumosi wu mukento nkumbu andi Tabita. Mbangululu yi nkumbu beyoyo mu ndinga yi kingeleke ti Dolokase hoti zobongo. Wedi hidikanga misamu mimingi mimbote na wedi kabulanga mbongo zandi ku bamputu. 37Mu bilumbu bebyobyo, wuyiza baka kimbevo, ni kafwa. Bu bamana muyobisa, ni bamutuula mu kihinga ki ku yulu. 38Milongoki mi mbanza yi Zope miyuwa ti Petelo wuu ha mbanza yi Lida, yi ba bela-bela na mbanza yi Zope, bamutambikila babakala bole mu mubombidila ti: «Yiza nswalu ku yeto, kusandi lunzingu ko.» 39Petelo wutelama na wuyenda nawu. Bu katuula, bamunata mu kihinga ki ku yulu. Mafoola mamvimba ma muzungidila buna mana dila, ni bedi mulonka mazwele na biyunga byedi tunganga Tabita buna wakidi nawu kintwadi. 40Petelo wuduukisa bamvimba ku mbazi, wufukama na wusambila. Mboki, wutala ku bela mvumbi, ni kata ti: «Tabita, telama!» Wuzibula meso mpe bu kayena Petelo, ni kazakala. 41Petelo wumusimba mu kooko na wumutedimisa. Ku manima, wutumisa mafoola na bantu balongo. Ni kabalonka Tabita wumoyo. 42Musamu wuzabakana mu mbanza yimvimba yi Zope na babingi bakwikila mu Mfumu. 43Petelo wuzakala mwa bilumbu bifwana ha mbanza yi Zope, ku muntu wumosi wedi hidikanga bima mu mikanda mi bibulu, nkumbu andi Simoni.

Currently Selected:

Mavanga 9: dde Ddo

Highlight

Copy