ABƏDIAS 1
1
1Yá̰á̰ ń Kɔ́ɔ̄ɓē Nə́ɓā ɔjə Abədias
adə̄ ger̄ kə ta kūl̄ yá̰á̰ ń
ni a̰ā̰ ní n toó.
Najə̄ ń ni-ɔr̄ dɔ ɓē kə́ Edom tə́ ní n toó:
Kɔ́ɔ̄ɓē əda na Edom a nujə
Kɔ́ɔ̄ɓē ədají najə̄ ń nge kəla kógə̄ḿ
aw̄ń yā kəda nápar de kə́ rang gə̄ ní
adə̄ j-oō, najə̄ ní n toó:
Ḭḭī dɔɔ́, ādə̄ j-aw̄ j-ənī ɓē kə́ Edom rɔ̄ɔ̄!
2Kɔ́ɔ̄ɓē əda na:
Edom, m-ā m̄-rāāī kadə̄
ā ī-tél ā ī-dūú dan nápar de gə̄ tə́.
A kídīn̄ tɔȳ de gə̄ malang.
3Kɔjə rɔ̄ yāí kə́ ngá̰ý gólī!
Ḭ̄ ī-ndi i bəlo mbal̄ gə̄ tə́,
ī-rāā kújə yāí gə̄
i loo kə́ kḭḭ kə̄ dɔɔ́ gə̄ tə́.
Ḭ̄ ə́da rɔ̄í na:
I náā n asə rāām̄
kadə̄ m̄-risə nang tə́ ní.
4Ká ré ḭ̄ ḭ́ḭń bɔ̄gə̄ aw̄ń
i dɔɔ́ sa̰y tītə̄ yā māl̄ gə̄gē,
ká ré ī-rāań ɓēí
i dan tə́yō̰ gə̄ tə́ gə̄gē,
m-ā m̄-mbəreī yā kənī nang tə́.
I mā Kɔ́ɔ̄ɓē n m-ə́da najə̄ ń noō ní.
5Ré ngé ɓogə gə̄, aláa
ngé kɔy yá̰a̰ yā de gə̄ dɔ gúú tə́ gə̄,
reēn̄ ɓēé looí ndɔ̄ɔ́ anī,
yá̰a̰ malang ń nin̄
a asən̄ kɔy ní, a ɔyn̄ ō,
yá̰á̰ kógə̄ḿ kə́ a na̰y
tām̄ yāí tə́ a gətóo ō.
Ré ngé kəla gə̄ reēn̄
kəja kan̄ nduú
kem ndɔr̄ kāgə̄ nduú yāí tə́ anī,
nin̄ a əya̰n̄ i dɔ bəran kə́rēý gə̄ ngóy.
6Sḭḭ̄ de kə́ kem kojə
yā Esau tə́ gə̄ ní,
ndúrə̄n̄ loo malang kə́
ɓēé loosí i tītə̄ ń noō ō.
Yá̰a̰ kənge yāsí gə̄ kə́ ton̄
loo ɓɔ̄ɔ̄ tə́ gə̄gē, teēn̄ dɔ tə́.
7Tə̄ɓān̄sí kɔ̄ɔ́ dɔ nang yāsí tə́.
Ngé ɓoo rɔ̄də́ tū yāsí gə̄ tə́ malang
teēn̄ kə gíŕsí dɔɔ́ ō,
nujən̄sí kɔ̄ɔ́ ō.
Ngé kəsa yá̰a̰ sesí gə̄
əyān̄ gūmbə̄ gír njasí tə́.
De gə̄ ədan̄ najə̄ yāsí na:
Dɔdə́ ndi kə gōó alé.
8A̰á̰ā̰, mā Kɔ́ɔ̄ɓē m-ə́da na:
Ndɔ̄ wōn̄g yāḿ tə́ anī,
m-ā m̄-rāā kadə̄ ngé kum kedə̄
kə́ dɔ nang yā Edom tə́ gə̄ a oyn̄.
M-ā m-ə́ya̰ deē kógə̄ḿ
kə́ asə ger̄ kum yá̰a̰
dɔ mbal̄ yān gə̄ tə́ alé.
9Ḭ̄ ɓē bo kə́ Teman,
ɓōĺ a tɔ̄l̄ ngé rɔ̄ɔ̄ yāí gə̄ kɔ̄ɔ́.
Loo ń noō tə́ a tɔ̄lə̄n̄ de kə́
kem ɓēé gə̄ malang kɔ̄ɔ́.
Yá̰á̰ kə́ to kum kaȳ aĺ ń teē dɔ Israel gə̄ tə́ ní, Edom gə̄ əngen̄ yá̰a̰ tū tə́
10Ngákó̰ó̰sí gə̄ ń i de gə̄ kə́
kem kojə yā Jakob tə́ ní,
sḭḭ̄ ɔ́yiī yá̰a̰ yādə́
dɔ gū tə́ ō, ī-tɔ̄līdə́ ō.
I tām̄ najə̄ ń noō tə́ n rɔ̄sí a sɔl̄sí ō,
a nujən̄sí kɔ̄ɔ́ kə́ njɔ́ḿ gə̄ tə́ ní ō.
11Kum mbang ń madə̄ ba̰ā̰də́ gə̄
ɔȳneé yá̰a̰ yādə́ gə̄ kɔ̄ɔ́ malang ō,
dan ń tə̄rā gə̄ reē udən̄neé
kem ɓē bo yādə́ tə́ ō ní,
sḭḭ̄ ī-raī i kə gōsí.
Dan ń de gə̄ ngeé ń noō
a túgə̄n̄neé wə̄lā dɔ yá̰a̰ kənge
kə́ Jerusalem tə́ ní,
sḭḭ̄ ī-rāāī tītə̄ yādə́ ō.
12Edom, dan ń á̰á̰ ngákó̰ó̰í gə̄
kum mbang ń tadə́ i kə̄ tḭ̄ḭ̄ kɔ̄ɔ́ tə́ ní,
majə kadə̄ ī-rāā rɔ̄nel̄ alé.
Kum mbang ń nujən̄neédə́ kɔ̄ɔ́ tə́ ní,
majə kadə̄ rɔ̄í nelī aĺ ō,
kum mbang ń wur kɔl
a əsōń dɔdə́ tə́ ní,
majə kadə̄ ī-tájə̄də́ aĺ ō.
13Kum mbang ń nujən̄neé
gír deē yāḿ gə̄ kɔ̄ɔ́ tə́ ní,
majə kadə̄ údə
kem ɓē yādə́ tə́ aĺ ō,
kum mbang ń tan tḭ̄ḭ̄ń kɔ̄ɔ́ tə́ ní,
majə kadə̄ ī-rāā rɔ̄nel̄ yá̰á̰ kə́ to
kum kaȳ aĺ ń teē dɔn tə́ ní aĺ ō.
Kum mbang ń ɔȳneé
yá̰a̰ yān gə̄ dɔ gúú tə́ ní,
majə kadə̄ ɔ́ý yá̰a̰
kənge yān gə̄ aĺ ō.
14Ngé ka̰ȳ naā gə̄ ní,
majə kadə̄ ī-ra ta gajə róbə gə̄ tə́
yā tɔ̄ləńdə́ aĺ ō,
ngé gə̄ ń ndin̄ kə kumdə́
kum mbang wur kɔl tə́ ní,
majə kadə̄ ə́ládə́ kem
jī madə̄ ba̰ā̰ gə̄ tə́ aĺ ō.
15A̰á̰ā̰, ndɔ̄ ń mā Kɔ́ɔ̄ɓē
m-ā m̄-gāngəń sarya
dɔ nápar de gə̄ tə́ malang ní,
dɔ to ngɔr.
Yá̰á̰ ń ḭ̄ ī-rāā kə madí gēé ní,
a rāān̄ seí ō.
Yá̰a̰ rāāí kə́ majaĺ gə̄
a télən̄ yā kəsō dɔí tə́.
Yá̰á̰ kə́ majaĺ ń Edom gə̄ rāān̄ kə Israel gēé ní, Israel gə̄ a rāān̄də́ yá̰á̰ kə́ majaĺ kum gotə
16 Israel gə̄, sḭḭ̄ ā̰yī
yá̰á̰ kə́ kem kópə wōn̄g yāḿ tə́
kɔ̄ɔ́ ɓá, dɔ mbal̄ yāḿ kə́ táĺ tə́.
I beé ní, nápar de gə̄
a a̰ȳn̄ tītə̄ yāsí ō, kanjə̄ dəba.
A a̰ȳn̄ bátə́ kadə̄ rāādə́ kə́ kasə tə́.
Gō tə́ anī, nin̄ a gətóon̄ kɔ̄ɔ́ malang.
17Loo ń noō tə́ ní, ngé gə̄ ń
a ndin̄ kə kumdə́ ɓáý ní,
a reēn̄ yā ɓɔ̄ɔ̄ rɔ̄də́ dɔ mbal̄ Siyo̰ tə́.
Dɔ mbal̄ Siyo̰ a tél loo kə́ táĺ gogə́ ō,
de gə̄ kə́ kem kojə yā Jakob tə́
a télən̄ yā taā ɓē yādə́ kɔ̄ɔ́
jī ngé gə̄ ń taān̄ ɓē yādə́ tə́ ní ō.
18Kojə yā Jakob ō, yā Jəjep ō,
a ton̄ tītə̄ hor beé.
Nin̄ a nujən̄ de gə̄ kə́ kem kojə
yā Esau tə́ malang kɔ̄ɔ́ tītə̄ mu beé.
De kə́ yā ndi kə kumneé a gətóo.
I mā Kɔ́ɔ̄ɓē n m-ə́da najə̄ ń noó ní.
Juda gə̄ a télən̄ yā taā loo kə́ gidədə́ gə̄ tə́
19 Juda gə̄ kə́ dām̄ mbɔ́r ɓē kə́ geleé tə́ a taān̄ mbal̄ bo gə̄ kə́ Edom ō, ngé gə̄ ń ndin̄ ndágə mbō gə̄ tə́ ní, a taān̄ dɔ nang yā Pilistin gə̄ ō. Nin̄ ndin̄ gō nang yā de gə̄ kə́ gír ɓē yā Epəraim tə́ ō, Samari tə́ ō. De kə́ gír ɓē yā Benjamḛ tə́ gə̄ a taān̄ gō nang kə́ Galaad.
20Ɓē ko̰o̰ yā Israel kə́ dām̄ mbór ɓē kə́ ko̰ó̰ tə́ ní, de kə́ kemeé gə̄ ń tə̄ɓān̄də́ kɔ̄ɔ́ dɔ nang yādə́ tə́ ní, a ɓoon̄ naā yā tél ɓūtə̄ ngé rɔ̄ɔ̄ kə́ rɔ̄kum gə̄. Nin̄ a taān̄ ɓē kə́ Penisi bátə́ ta kaw̄ kə̄ Sarepta. De kə́ Jerusalem gə̄ ń tə̄ɓān̄də́ kɔ̄ɔ́ dɔ nang yādə́ tə́, á ndin̄ Separad ní, a ndin̄ kem ɓē bo gə̄ kə́ dām̄ mbɔ́r ɓē kə́ geleé tə́ tə́. 21Nin̄ a tetən̄ rɔ̄ɔ̄ ō, a alə̄n̄ dɔ mbal̄ Siyo̰ tə́ ō. Nin̄ a ndin̄ i loo ń noō tə́ n a o̰ō̰n̄neé ɓē dɔ ɓē kə́ Edom tə́ ní.
Kɔ́ɔ̄ɓē a ndi mban̄g!
Currently Selected:
ABƏDIAS 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.