LUK 14
14
Jeju ngáā nge mo̰y kógə̄ḿ
1Jeju aw̄ ɓē ngār yā Parijiyḛ gə̄ kógə̄ḿ tə́ ndɔ̄ sabat tə́ yā kəsa yá̰a̰, anī de gə̄ ń ndin̄ ní əndān̄ kumdə́ dɔn tə́. 2Deē kógə̄ḿ kə́ kemən teē ndi no Jeju tə́. 3Anī Jeju un najə̄ ɔr̄ kə ngé kɔjə ndū najə̄ gə̄ ō, Parijiyḛ gə̄ ō ndɔ̄ sabat tə́ ní, ndū najə̄ yā Nə́ɓā adə̄ ta róbə rāā kadə̄ de kə́ mo̰y rɔ̄n ngáā aké adə̄ aĺ ḿ?
4Banī nin̄-ndin̄ tadə́ mbóo beé. Tā anī Jeju əhɔ jī nge mo̰y ní rāā adə̄ rɔ̄n ngáā ba əya̰n adə̄ aw̄. 5Gō tə́ anī ni-ədadə́ na:
I náā dansí tə́ laā n ngōnən aláa man̄g yān əsō bəlo maná anī, a ɔrə̄n kɔ̄ɔ́ kə ngɔ̄dɔ̄ɔ́ ndɔ̄ sabat tə́ alé ní?
6Ba nin̄-asən̄ kədan yá̰á̰ kógə̄ḿ dɔ nge ń noō tə́ alé.
Najə̄ kə́ dɔ kəhɔ loo ndi tə́
7Dan ń a̰a̰ kadə̄ ngé gə̄ ń ɓāŕdə́ kadə̄ reēn̄ loo kəsa yá̰á̰ tə́ ní əhɔn̄ i dɔ loo kə́ kété gə̄ tá ní anī, ədadə́ kūjə́ najə̄ kógə̄ḿ ń toō:
8Ré deē mērī loo kaw̄ kəsa yá̰a̰ kaw̄ kə dəyá̰ kə̄ kújú tə́ anī, ī-lōō kaw̄ ndi loo kə́ kété tə́, tɔdɔ̄ ré deē ń mērī kəsa yá̰á̰ ní mēr̄ madí kə́ bo tɔyī ta reē kəsa yá̰á̰ ní tə́ ō, 9tá nəkɔ́ ń mēr̄sí kəsa yá̰a̰ mbak ní, reē ədaī na kə ə́ya̰ loo kə́ kété, kə ādə̄ madí ní anī, loo ń noō tə́ ní ḭ́ḭ kə rɔ̄sɔlɔ̄ɔ́ ta kaw̄ loo kə́ gogə́ tə́. 10Ba ré mērə̄nī kaw̄ loo kəsa yá̰á̰ tə́ anī, āw̄ ī-ndi loo kə́ gogə́ tə́, yā kadə̄ ré nge ń mērī kaw̄ kəsa yá̰á̰ ní reē ugə̄ anī, ədaī na: Madə́, āw̄ kə̄ kété nó tá! Loo ń noō tə́ ā ə́nge kɔsə gɔn ta kum madí kə́ rang gə̄ malang ń mērə̄n̄də́ kaw̄ loo kəsa yá̰á̰ tə́ ní. 11Tɔdɔ̄ deē ń ɔsə rɔ̄n kə̄ dɔɔ́ anī, a télən̄ seneé kə̄ nang tə́, ba deē ń a tél kə rɔ̄neé kə̄ nang tə́ ní, a ɔsənən̄ kə̄ dɔɔ́.
12Gō tə́ anī, Jeju əda deē ń mērən kaw̄ kəsa yá̰á̰ ní na:
Dan ń ā ī-rāā yá̰a̰ kəsa kə́ kadaá aláa kə́ ndɔ̄ɔ́ yā mērəń de gə̄ ní a, ī-lōō mēr̄ balsáa madí gə̄ ō, ngákó̰ó̰í gə̄ ō, ngééí gə̄ ō, madə̄ ɓēí kə́ kənge yá̰á̰ ngá̰ý gə̄ ō, tɔdɔ̄ ndɔ̄ yādə́ tə́ anī nin̄ a télən̄ yā mērīn̄ kəsa yá̰á̰ tə́ ō. Loo ń noō tə́ ní, ḭ̄ ə́ngé yá̰á̰ kə́ kum gotə yāí kɔ̄ɔ́. 13Banī, dan ń ī-rāā yá̰a̰ kəsa yā ɓārəń de gə̄ ní anī, ī-mēr̄ de kə́ ngé ndoō gə̄ ō, de kə́ nujə gə̄ ō, ngé tə́sō motə gə̄ ō, de kə́ kum tɔ̄ɔ̄ gə̄ ō. 14Loo ń noō tə́ rɔ̄í a nelī, tām̄ nin̄ a asən̄ kadī kum gotə alé. Tɔdɔ̄ a télən̄ kə yá̰a̰ gə̄ ń toō yā kadī gogə́ ndɔ̄ ń de kə́ súmūú gə̄ a ndólə̄n̄neé tə́ ní.
Kūjə́ najə̄ kə́ dɔ yá̰a̰ kəsa kə́ ngá̰ý tə́
(Á̰a̰ī Mat 22.1-10)
15Dan ń deē kógə̄ḿ kə́ dan ngé gə̄ ń mērə̄n̄də́ loo kaw̄ kəsa yá̰á̰ tə́ ní oō tītə̄ ń noō anī, əda Jeju na:
Rɔ̄nel̄ i kə deē ń a əsa yá̰a̰ kem Ɓē ko̰o̰ yā Nə́ɓā tə́ ní.
16Anī Jeju ədan na:
Deē kógə̄ḿ rāā yá̰a̰ kəsa kə́ ngá̰ý yā mērəń de gə̄. Ni mēr̄ de gə̄ ngá̰ý kadə̄ kə reē kə əsan̄. 17Dan ń mbang kəsa yá̰a̰ asə anī, əla ngōn̄ nge kəla yān gō de gə̄ ń ni-ɓāŕdə́ kadə̄ reēn̄ loo kəsa yá̰á̰ tə́ ní kadə̄ reēn̄ tā tɔdɔ̄ yá̰a̰ malang na oy kɔ̄ɔ́. 18Ba nin̄ malang ní tél ədan̄ kə ndūdə́ kə́ tītə̄ yā naā ədan̄ na kə mā̰ȳ rɔ̄n dɔdə́ tə́ na loo reēdə́ na gətóo. Nge kə́ ta kəga dɔ əda yān na: Mā m̄-mang loo ndɔr̄ adə̄ loo kadə̄ m-āw̄ m-á̰a̰ loo ndɔr̄ ní alé gətóo. 19Nge kógə̄ḿ əda yān na: Mā m̄-mang man̄g ndɔr̄ gə̄ i kutə, adə̄ m-ā m-āw̄ i kə̄ nāādə́ tə́ ní, m̄-rāāī ɓɔ́ ba ī-māȳ rɔ̄í dɔḿ tə́, na loo kaw̄ḿ gətóo. 20Nge kə́ rang əda yān ɓáý to̰ na: Mā m̄-taā dəyá̰ i ngɔr ɓáý, adə̄ mā m-á̰a̰ loo kaw̄ alé. 21Nge kəla ní tél reē ɔjə kɔ́ɔ̄n gotə najə̄ gə̄ ń toō malang. Anī wōn̄g rāā kɔ́ɔ̄ kújə́ ní ngá̰ý, adə̄ əda nge kəla yān ní na kə aw̄ kə̄ ndágə loo gə̄ tə́ ō, kə̄ kə̄lá róbə gə̄ kə́ mbo̰ō̰ ɓē tə́ ō, ba kə kán̄ ngé ndoō gə̄, kə de kə́ nujə gə̄, kə ngé kum tɔ̄ɔ̄ gə̄, kə ngé tə́sō motə gə̄, kə reē sedə́. 22Nge kəla ní reē ədan na: Kɔ́ɔ̄ḿ, m̄-rāā yá̰a̰ gə̄ ń ɔ́jəm̄ ní malang, ba na̰y loo kə́ karī gə̄ laā ɓáý. 23Anī kɔ́ɔ̄n ní tél ədan na kə ɔr̄ gō loo róbə gə̄ kə́ gidə ɓē tə́ ō, mbo̰ō̰ ndɔr̄ gə̄ tə́ ō, ba kə ɔsə kə de gēé ta kudə ndogó looneé, kadə̄ kem kújə yān i kə́ rosə. 24Tɔdɔ̄ ādə̄ m-ə́dásí, ngé gə̄ ń ɓārəńdə́ kadə̄ reēn̄ loo kəsa yá̰á̰ tə́ ní, deē kógə̄ḿ dandə́ tə́ kə́ a ɔdə yá̰á̰ kəsa yāḿ tan tə́ a gətóo.
Yá̰a̰ gə̄ ń kadə̄ deē a rāā tá a téləń nge ndóō yá̰a̰ yā Jeju ní
(Á̰a̰ī Mat 10.37-38)
25Kósə de kə́ ngá̰ý gə̄ a njə̄rān̄ kə Jeju anī, ni-tél tūr̄ rɔ̄n kə̄ rɔ̄də́ tə́ ba ədadə́ na:
26Deē ń reē gōḿ tə́ kanjə̄ kəndām̄ mā kó tár yān tə́ kété no bɔbə̄n tə́ ō, kó̰o̰n tə́ ō, nə̄yá̰n tə́ ō, ngánən gə̄ tə́ ō, ngákó̰o̰n kə́ dəngam gə̄ tə́ ō kə́ dəyá̰ gə̄ tə́ ō, aláa kanjə̄ kəndām̄ mā kó tár yān tə́ kété no ngarān̄g kum rɔ̄n nəkɔ́ tə́ ō ní, ni-asə tél nge ndóō yá̰a̰ yāḿ alé. 27Deē ń ətō kāgə̄ kə́ dēsə́ yān aĺ ō, njə̄rā gōḿ tə́ aĺ ō ní, ni-asə tél nge ndóō yá̰a̰ yāḿ alé. 28Tɔdɔ̄ ré deē kógə̄ḿ gḛy rāā kújə kə́ ngāl̄ ɓururu kum kə̄ dɔɔ́ anī, a əla gír a ndi i nang tə́ yā tə́da kutə yá̰a̰ gə̄ ń a rāań ní yā ka̰a̰ kété pá tá ké n-ənge yá̰a̰ asə jīn yā rāań kadə̄ oy wa. I náā dansí tə́ n a rāā tītə̄ ń noō aĺ ní? 29Tɔdɔ̄ ré ni-əndā gíŕ kújə kə́ ngāl̄ ɓururu kum kə̄ dɔɔ́ kɔ̄ɔ́, tá asə tɔ̄l̄ ta aĺ anī, de gə̄ malang ń a̰a̰n̄ ní a télən̄ yā kəgōn, a ədan̄ na: 30Á̰a̰ī, dəngam ń toō əla gír rāā kújə, ba rāā dumə̄n kɔ̄ɔ́ wa. 31Aláa ré mban̄g kógə̄ḿ a aw̄ yā rɔ̄ɔ̄ mban̄g madə̄n anī, a əla gír a ndi nang tə́ pá táyā kəndā ma̰ȳ ka̰a̰ ké kə áskar yān kə́ dūbú kutə kógə̄ḿ gə̄ ń toō ní, ké n-a n-asəń kaw̄ rɔ̄ɔ̄ madə̄n ń áskar yān gə̄ i dūbú kutə jōó tə́ ní wa. I mban̄g kə́ rá n a rāā tītə̄ ń noō aĺ ní? 32Ba ré a̰a̰ kadə̄ n-asən̄ aĺ ɓáa, dan ń madə̄n i sa̰y ɓáý ní, ni a ɔr̄ de gə̄ yā kəladə́ yā dəjen kadə̄ kə n-ndin̄ lɔm kə naá. 33Tītə̄ ń noō ō ní, náā nəkɔ́ dansí tə́ laā n, kɔ́ɔ̄ əya̰ gō yá̰a̰ kənge yān gə̄ malang kɔ̄ɔ́ aĺ ní anī, ni a asə tél nge ndóō yá̰a̰ yāḿ alé.
Ādī nel̄ katə̄ teē alé
(Á̰a̰ī Mat 5.13; Mark 9.50)
34Katə̄ i yá̰á̰ kə́ majə, ba ré nelə̄n teē kɔ̄ɔ́ ní, i rí n a ɓōkə́n̄ gotoó yā kadə̄ a tél a nelə̄ń gogə́ ní? 35Ni majə tām̄ yā dɔ nang tə́ to̰ aĺ ō, majə kəlan tū yedə̄ yá̰á̰ tə́ yā ndɔrə̄ń to̰ aĺ ō. A ɓōkə́nən̄ i ndágá kɔ̄ɔ́ ngóy. Náā nəkɔ́ ń i kə mbīneé yā koōń najə̄ anī, adə̄ kɔ́ɔ̄ oō.
Currently Selected:
LUK 14: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.