LEBI GƏ̄ 1
1
Ndū najə̄ dɔ yá̰á̰ kə́ tun̄ kadə̄ Nə́ɓā tə́
(1—7)
Yá̰a̰ tun̄ kə́ róō horoó kadə̄ Nə́ɓā
1Kɔ́ɔ̄ɓē ndi kem kújə kənge nāā tə́ ɓár̄əń Moijə, ɔr̄ najə̄ seneé ədan na 2kə əda ngán Israel gə̄ najə̄ ń toō:
Ré deē kógə̄ḿ dansí tə́ gḛy ndējə̄ Kɔ́ɔ̄ɓē yá̰a̰, adə̄ i man̄g, aláa i batə̄, aláa i bə̄yā̰ tá ní ndējə̄ Kɔ́ɔ̄ɓē.
3Ré yá̰a̰ ndējə̄ yā deē ní i man̄g kə́ yā róō horoó, adə̄ i man̄g kə́ bəra kə́ loon kógə̄ḿ nujə alé. Ni a aw̄ seneé ta kújə kənge naā tə́ kadə̄ Kɔ́ɔ̄ɓē ndigə dā̰ ní pá tá, 4gō tə́ anī ni a əndā jīn dɔ dā̰ ń Kɔ́ɔ̄ɓē ndigə tə́ ní, yā rāań yá̰á̰ kə́ yā kutəń dɔ majaĺ yān. 5Ni a əja kɔ́ɔ dā̰ ní ta kum Kɔ́ɔ̄ɓē tə́. Ngé tun̄ yá̰a̰ gə̄ ń ngán Aaro̰ gə̄ ní a ndējə̄n̄ Kɔ́ɔ̄ɓē mósə dā̰ ní pá tá a sə̄kān̄ kadə̄ gīr̄ gidə loo tun̄ yá̰á̰ ń ra ta kújə kənge naā tə́ ní. 6Ni a tóon ba a ɔr̄ ngə̄rān ō, a tɔ́r̄ dā̰n ō. 7Ngé tun̄ yá̰a̰ gə̄ a rāān̄ hor dɔ loo tun̄ yá̰á̰ tə́ ō, a tə́nīn̄ kīr̄ horoó ō. 8A tə́nīn̄ dā̰ kə́ tɔ́r̄ gə̄ ní ō, yibə̄n ō kum hor tə́. 9Nge ndējə̄ yá̰á̰ ní a tə́go tiīn gə̄ njan gə̄ ō kə maná. Go tə́ anī nge tun̄ yá̰á̰ kógə̄ḿ a róō yá̰a̰ gə̄ ń noō malang horoó dɔ loo tun̄ yá̰á̰ tə́. I yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.
10Ré i batə̄ aláa i bə̄yā̰ n deē a ndējə̄ róōn̄ tām̄ yā Kɔ́ɔ̄ɓē tə́ anī, ādə̄ i kə́ bal kə́ loon kógə̄ḿ nujə aĺ tá. 11Ni a ra i dām̄ loo tun̄ yá̰á̰ kə́ dām̄ mbɔ́r ɓē kə́ ko̰ó̰ tə́ n a əjań kɔ́ɔn ta kum Kɔ́ɔ̄ɓē tə́ ní. Ngé tun̄ yá̰a̰ gə̄ a sə̄kān̄ mósən dɔ loo tun̄ yá̰á̰ tə́ kadə̄ gīr̄ gidə. 12Ni a tɔ́r̄ dā̰n ō, gān̄g dɔn ō, a ɔr̄ yibə̄n ō. Gō tə́ anī nge tun̄ yá̰á̰ kógə̄ḿ a tə́nī dā̰ kə́ tɔ́r̄ gə̄ ní ō, dɔn ō, yibə̄n ō, kīr̄ tə́. 13Nge ndējə̄ yá̰á̰ ní a tə́go tiīn gə̄ ō, njan gə̄ ō kə maná. Gō tə́ anī nge tun̄ yá̰a̰ a ɔjə Kɔ́ɔ̄ɓē pá tá a róō yá̰a̰ gə̄ ń noō malang horoó dɔ loo tun̄ yá̰á̰ tə́. I yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.
14Ré i yel̄ n deē ní a ndējə̄ kadə̄ róōn̄ tām̄ yā Kɔ́ɔ̄ɓē tə́ anī, ādə̄ i dér gutə aláa i dér dum tá. 15Nge tun̄ yá̰á̰ a aw̄ kə yel̄ ní ta loo tun̄ yá̰á̰ tə́. Ni a gān̄g dɔ yā róō dɔ tə́. Gō tə́ anī ni a kə̄rā mósə yel̄ ní kadə̄ loo tun̄ yá̰á̰ tə́. 16Ni a ɔr̄ jɔdəbon kə yá̰á̰ kə́ kemeé gēé yā kənī kadə̄ loo tun̄ yá̰á̰ tə́, dām̄ kə́ gír ɓē tə́, loo ń a ɓōkə́n̄ kúl dā̰ kə́ róō gə̄ tū tə́ ní tə́. 17Ni a njar yel̄ ní danaá ba a gān̄g naā tə́ alé. Gō tə́ anī nge tun̄ yá̰a̰ a róō yel̄ ní horoó dɔ kīr̄ gə̄ ń i ɓōkə́ dɔ loo tun̄ yá̰á̰ tə́ ní. Nge ń noō i yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.
Currently Selected:
LEBI GƏ̄ 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.