KUM KEDƏ̄ 7
7
Salomo̰ i deē karī
1Mā i deē kə́ m-ā m-óy tītə̄ gotə de gə̄ malang ō,
mā i gír kaa deē kə́ ta kəga dɔ ń rāānən̄ kə nángāá ní ō,
m̄-mbūsə̄, adə̄ m̄-ngan̄g mámájə́ i kem kṵ́ṵ́ḿ tə́.
2Mósə́ kṵ́ṵ́ḿ mbūsə̄m̄ kem naā tə́ nāā kutə adə̄ m̄-ngan̄g mámájə́.
Ojəmə̄n̄ i kə ta kūl̄ kōō deē, gō rɔ̄nel̄ yā ɓīī kə naá tə́.
3Mā gə̄gē a dan ń ojəmə̄n̄ ní, m̄-taā i koō nəkɔ́ kə́ kógə̄ḿ beē ń j-a jə-taāī ní ō.
I dɔ nang ń a əhɔjí kə̄ rɔ̄n tə́ i tītə̄ naā malang ní n m-ə̄sō tū tə́ ní ō.
M-ə́ga kɔŕ yāḿ kə́ ta kəga dɔ i tītə̄ yā gotə ngáń kásə̄ kə́ rang gə̄ ō.
4Ɓír̄mə̄n̄ kə kūbūú ō, a̰a̰n̄ gōḿ majə ō.
5Mban̄g kógə̄ḿ kə́ ndi kə kumneé kə́ ojənən̄ tītə̄ ń nuū aĺ ní gətóo.
6Tām̄ yā de gə̄ tə́ malang ní, lo reējí dɔ nang tə́ i kə ta róbə́ kə́ kógə̄ḿ beē ō, ta téĺjí i kə ta róbə́ kə́ kógə̄ḿ beē ō.
Salomo̰ tár kum kedə̄
7Adə̄ m̄-ndɔ̄ȳ Nə́ɓā ō, Nə́ɓā rāā adə̄ m̄-ger̄ kɔr̄ kam̄ yá̰a̰ ō,
m̄-rāan ɓɔ́ anī, ndíl kum kedə̄ reē dɔḿ tə́ ō.
8m̄-gḛy kum kedə̄ tɔȳ kāgə̄ jī yā ngār gə̄ ō, kōr̄ kāgə̄ mbang gə̄ ō.
Tām̄ yāḿ mā tə́ ɓáa yá̰a̰ kənge i yá̰á̰ kə́ karī kadə kum kedə̄ tə́.
9M-ɔ́jə seneé mbal̄ kə́ gātən i ngá̰ý alé.
Tɔdɔ̄ lɔ́r malang kə́ dɔ nang tə́ laā ní, ré deē əndādə́ kadə naā tə́ seneé anī, to i tītə̄ ngárə̄ḿnjēý kə́ sḛ́ý beē beé ō,
gində̄ arjā̰a̰ tā anī, ré deē əndā kadən tə́ anī, a to i tītə̄ bɔr beé ō.
10m̄-tárən tɔȳ rɔ̄ ngan̄g ō, tɔȳ majə deē ō.
m̄-gḛy kadə̄ ni i lo kunjə̄ yāḿ, tɔdɔ̄ ni unjə̄ kanjə̄ kəsō til.
11Lo ń m-ə́nge kum kedə̄ ní, m-ə́ngé i yá̰a̰ malang ō,
yá̰a̰ kənge kə́ jīn tə́ i kə́ dum̄ tə́da ō.
12Yá̰a̰ kənge gə̄ malang ń nuū ní, rāān̄ majə seḿ, tām̄ m̄-ger̄ kadə̄ i kum kedə̄ n reē sedə́ adə̄m̄ ní.
Ba kété ní m̄-ger̄ kadə̄ i ni n reē sedə́ ní alé.
13Yá̰á̰ ń m̄-tél kə rɔ̄ḿ kə̄ nang tə́ m̄-ndóoń ní, m-ɔ́jə de gə̄ i kanjə̄ ɓɔ̄ɔ̄ kógə̄ḿ.
m̄-ɓɔ̄ɔ̄ dɔ yá̰a̰ kənge yāḿ alé.
14Tɔdɔ̄ kum kedə̄ i mōȳ yá̰a̰ kənge kə́ a təgā aĺ bátə́ tām̄ yā de gə̄ tə́.
Ngé gə̄ ń unən̄ kum kedə̄ rāānəń kəla ní, əhɔn̄ i madə̄ naā kə Nə́ɓāá.
Yá̰á̰ kə́ majə gə̄ ń əngen̄ karī kə ta kūl̄ kɔjɔ̄ɔ́ ní, rāā adə̄ nel̄ Nə́ɓā sedə́.
Nə́ɓā i gír gisə yá̰a̰ ger̄ malang
15Ādə̄ Nə́ɓā rāā adə̄ m-ɔ̄r̄ najə̄ kə́ de kə́ kur̄ dɔn ger̄ yá̰á̰ tə́ ō,
rāā adə̄ m-āw̄ kə gír̄ kə́ asə kə gō kadə̄ karī ń m-ə́ngé ní tə́ ō.
Tɔdɔ̄ i ni n i nge ndɔ́r̄ kum kedə̄ ta róbə ō, nge kɔjə ngé kum kedə̄ gə̄ ta róbə ō ní.
16Ni əla dɔjí gíŕ tɔ́gən tə́, jḭḭ̄ gə̄gē, najə̄ kɔr̄jí gə̄gē,
yá̰a̰ ger̄ malang kə́ kur̄ dɔjí tə́ ní gə̄gē, kəla malang ń jījí ger̄ rāā ní gə̄gē.
17I beé n ni rāā adə̄ m̄-gerə̄ń yá̰á̰ kə́ to rɔ̄kum ní.
Yá̰a̰ gə̄ ń ɔsə njadə́ naā tə́ rāań yá̰a̰ malang ní ō, lo rāā kəla yādə́ gə̄ ō ní, ni ndóōm̄ adə̄ m̄-ger̄.
18Ni rāā adə̄ m̄-ger̄ ta kəla gír kum mbang ō, ta tɔ̄l̄ ta mbang ō, lo kə́ danaá yān ō.
Ni rāā adə̄ m̄-ger̄ ɓar ō, ɓāl̄ ō, ngā nəngā ō, kūl̄ ō ń a mánə̄n̄ kə gír naā ní ō,
19m̄-ger̄ lo mān̄ ń ɓāl̄ gə̄ a mānə̄n̄ ní ō, lo ra tíyō̰ gə̄ ō.
20Ni rāā adə̄ m̄-ger̄ yá̰á̰ ń i dā̰ ní ō, hál dā̰ kə́ bembeé gə̄ ō,
tɔ́gə́ Ndíl gə̄ ō, gír̄ yā de gə̄ ō,
rāā adə̄ m̄-ger̄ kāgə̄ kə́ dáńg dáńg gə̄ ō, tɔ́gə́ ń ngəra kāgə̄ gə̄ ní a tɔ̄l̄nəń moy dɔ deē tə́ ní ō.
21Yá̰a̰ malang kə́ rɔ̄kum kə́ to lo ɓɔ̄ɔ̄ tə́ ō, kə́ deē a̰a̰ kə kumneé ō ní, m̄-ger̄də́.
Tɔdɔ̄ kum kedə̄ ń i nge kəndā yá̰a̰ malang ní, ndóōm̄ yá̰a̰ adə̄ m̄-ger̄.
Yá̰á̰ ń i kum kedə̄ ní
22Kum kedə̄ aw̄ kə ndíĺ kə́ ger̄ yá̰a̰ ō, kə́ táĺ ō,
kə́ kógə̄ḿ beē ō, kəla rāan gə̄ i ngá̰ý ō,
hálən majə ngá̰ý ō, ndi gotə kógə̄ḿ aĺ ō,
to tayā ō, yá̰á̰ kə́ majə aĺ tákə̄n aĺ ō,
unjə̄ njáý njáý ō, a nujə aĺ ō,
gḛy yá̰á̰ kə́ majə ō, ɔl ō,
23i kɔ́ɔ̄ rɔ̄n ō, nge rāā majə ō, i madə̄ ta deē ō,
ra ngan̄g dɔ ndūn tə́ ō, kemən tɔ́sən aĺ ō,
ndi lo yān jəke ō, asə rāā yá̰a̰ malang ō, əndā kumən gíŕ yá̰a̰ malang tə́ ō,
ger̄ gír̄ yā de gə̄ malang ō,
ger̄ gír̄ yā ngé gə̄ ń kur̄ dɔdə́ ger̄ yá̰á̰ ngá̰ý ní ō, ngé gə̄ ń unjə̄n̄ njáý njáý ní ō, ngé gə̄ ń ngam yādə́ i ngá̰ý ní ō.
24Adə̄ kum kedə̄ ɔl tɔȳ yá̰a̰ malang kə́ a ndɔ́tə̄.
Ni mān̄ ba udə tū yá̰a̰ gə̄ tə́ malang sɔɔ̄ń hálən kə́ unjə̄ njáý njáý.
25Kum kedə̄ teē i tū tɔ́gə yā Nə́ɓā tə́.
I yá̰á̰ kə́ unjə̄ njáý njáý kə́ teē tū kɔsə go̰n yā Nə́ɓā kə́ bo kə́ tɔ́gən i ngá̰ý tə́.
I tām̄ najə̄ ń toō tə́ n yá̰á̰ kə́ yḛr kógə̄ḿ kə́ yā kɔdə rɔ̄n a gətóó ní.
26Kum kedə̄ rāā rɔ̄n i lo kunjə̄ kə́ ngándáńg kə́ ɔjə rɔ̄n kə̄ ndágá tə́.
Ni i kútə́ram kə́ kanjə̄ yūró ń deē a a̰a̰ kəla rāā Nə́ɓā tū tə́ ní ō,
ni i kum gotə kem majə yā Nə́ɓā ō.
27Tītə̄ ń nəkɔ́ i kal kógə̄ḿ beē ní, ni asə rāā yá̰a̰ malang.
Ni to i kum gotən ō, rāā yá̰a̰ malang ń ni əndā ní adə̄ téĺ kə́ kijə ō.
Kə gō ɓāl̄ gə̄ ń a mānə̄n̄ nuú ní, ni udə kem de kə́ táĺ gə̄ tə́,
rāādə́ adə̄ télən̄ madə̄ Nə́ɓā ō, ngé koō taa gə̄ ō.
28Tɔdɔ̄ i ngé gə̄ ń gerə̄n̄ naā kə kum kedēé majə ní ngóy n Nə́ɓā táŕdə́ ní.
29Ni ndə́lē tɔȳ mbang ō,
ni tɔȳ ɓūtə̄ tíyō̰ gə̄ malang ō.
Ré deē əndādə́ kadə naā tə́ kə lo kunjú anī, ni tɔȳn sa̰y ngá̰ý.
30Lo kə́ ndɔ̄ɔ́ un gotə lo kə́ kadaá,
banī yá̰á̰ kə́ majə aĺ a un gotə kum kedə̄ aĺ bátə́.
Currently Selected:
KUM KEDƏ̄ 7: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
KUM KEDƏ̄ 7
7
Salomo̰ i deē karī
1Mā i deē kə́ m-ā m-óy tītə̄ gotə de gə̄ malang ō,
mā i gír kaa deē kə́ ta kəga dɔ ń rāānən̄ kə nángāá ní ō,
m̄-mbūsə̄, adə̄ m̄-ngan̄g mámájə́ i kem kṵ́ṵ́ḿ tə́.
2Mósə́ kṵ́ṵ́ḿ mbūsə̄m̄ kem naā tə́ nāā kutə adə̄ m̄-ngan̄g mámájə́.
Ojəmə̄n̄ i kə ta kūl̄ kōō deē, gō rɔ̄nel̄ yā ɓīī kə naá tə́.
3Mā gə̄gē a dan ń ojəmə̄n̄ ní, m̄-taā i koō nəkɔ́ kə́ kógə̄ḿ beē ń j-a jə-taāī ní ō.
I dɔ nang ń a əhɔjí kə̄ rɔ̄n tə́ i tītə̄ naā malang ní n m-ə̄sō tū tə́ ní ō.
M-ə́ga kɔŕ yāḿ kə́ ta kəga dɔ i tītə̄ yā gotə ngáń kásə̄ kə́ rang gə̄ ō.
4Ɓír̄mə̄n̄ kə kūbūú ō, a̰a̰n̄ gōḿ majə ō.
5Mban̄g kógə̄ḿ kə́ ndi kə kumneé kə́ ojənən̄ tītə̄ ń nuū aĺ ní gətóo.
6Tām̄ yā de gə̄ tə́ malang ní, lo reējí dɔ nang tə́ i kə ta róbə́ kə́ kógə̄ḿ beē ō, ta téĺjí i kə ta róbə́ kə́ kógə̄ḿ beē ō.
Salomo̰ tár kum kedə̄
7Adə̄ m̄-ndɔ̄ȳ Nə́ɓā ō, Nə́ɓā rāā adə̄ m̄-ger̄ kɔr̄ kam̄ yá̰a̰ ō,
m̄-rāan ɓɔ́ anī, ndíl kum kedə̄ reē dɔḿ tə́ ō.
8m̄-gḛy kum kedə̄ tɔȳ kāgə̄ jī yā ngār gə̄ ō, kōr̄ kāgə̄ mbang gə̄ ō.
Tām̄ yāḿ mā tə́ ɓáa yá̰a̰ kənge i yá̰á̰ kə́ karī kadə kum kedə̄ tə́.
9M-ɔ́jə seneé mbal̄ kə́ gātən i ngá̰ý alé.
Tɔdɔ̄ lɔ́r malang kə́ dɔ nang tə́ laā ní, ré deē əndādə́ kadə naā tə́ seneé anī, to i tītə̄ ngárə̄ḿnjēý kə́ sḛ́ý beē beé ō,
gində̄ arjā̰a̰ tā anī, ré deē əndā kadən tə́ anī, a to i tītə̄ bɔr beé ō.
10m̄-tárən tɔȳ rɔ̄ ngan̄g ō, tɔȳ majə deē ō.
m̄-gḛy kadə̄ ni i lo kunjə̄ yāḿ, tɔdɔ̄ ni unjə̄ kanjə̄ kəsō til.
11Lo ń m-ə́nge kum kedə̄ ní, m-ə́ngé i yá̰a̰ malang ō,
yá̰a̰ kənge kə́ jīn tə́ i kə́ dum̄ tə́da ō.
12Yá̰a̰ kənge gə̄ malang ń nuū ní, rāān̄ majə seḿ, tām̄ m̄-ger̄ kadə̄ i kum kedə̄ n reē sedə́ adə̄m̄ ní.
Ba kété ní m̄-ger̄ kadə̄ i ni n reē sedə́ ní alé.
13Yá̰á̰ ń m̄-tél kə rɔ̄ḿ kə̄ nang tə́ m̄-ndóoń ní, m-ɔ́jə de gə̄ i kanjə̄ ɓɔ̄ɔ̄ kógə̄ḿ.
m̄-ɓɔ̄ɔ̄ dɔ yá̰a̰ kənge yāḿ alé.
14Tɔdɔ̄ kum kedə̄ i mōȳ yá̰a̰ kənge kə́ a təgā aĺ bátə́ tām̄ yā de gə̄ tə́.
Ngé gə̄ ń unən̄ kum kedə̄ rāānəń kəla ní, əhɔn̄ i madə̄ naā kə Nə́ɓāá.
Yá̰á̰ kə́ majə gə̄ ń əngen̄ karī kə ta kūl̄ kɔjɔ̄ɔ́ ní, rāā adə̄ nel̄ Nə́ɓā sedə́.
Nə́ɓā i gír gisə yá̰a̰ ger̄ malang
15Ādə̄ Nə́ɓā rāā adə̄ m-ɔ̄r̄ najə̄ kə́ de kə́ kur̄ dɔn ger̄ yá̰á̰ tə́ ō,
rāā adə̄ m-āw̄ kə gír̄ kə́ asə kə gō kadə̄ karī ń m-ə́ngé ní tə́ ō.
Tɔdɔ̄ i ni n i nge ndɔ́r̄ kum kedə̄ ta róbə ō, nge kɔjə ngé kum kedə̄ gə̄ ta róbə ō ní.
16Ni əla dɔjí gíŕ tɔ́gən tə́, jḭḭ̄ gə̄gē, najə̄ kɔr̄jí gə̄gē,
yá̰a̰ ger̄ malang kə́ kur̄ dɔjí tə́ ní gə̄gē, kəla malang ń jījí ger̄ rāā ní gə̄gē.
17I beé n ni rāā adə̄ m̄-gerə̄ń yá̰á̰ kə́ to rɔ̄kum ní.
Yá̰a̰ gə̄ ń ɔsə njadə́ naā tə́ rāań yá̰a̰ malang ní ō, lo rāā kəla yādə́ gə̄ ō ní, ni ndóōm̄ adə̄ m̄-ger̄.
18Ni rāā adə̄ m̄-ger̄ ta kəla gír kum mbang ō, ta tɔ̄l̄ ta mbang ō, lo kə́ danaá yān ō.
Ni rāā adə̄ m̄-ger̄ ɓar ō, ɓāl̄ ō, ngā nəngā ō, kūl̄ ō ń a mánə̄n̄ kə gír naā ní ō,
19m̄-ger̄ lo mān̄ ń ɓāl̄ gə̄ a mānə̄n̄ ní ō, lo ra tíyō̰ gə̄ ō.
20Ni rāā adə̄ m̄-ger̄ yá̰á̰ ń i dā̰ ní ō, hál dā̰ kə́ bembeé gə̄ ō,
tɔ́gə́ Ndíl gə̄ ō, gír̄ yā de gə̄ ō,
rāā adə̄ m̄-ger̄ kāgə̄ kə́ dáńg dáńg gə̄ ō, tɔ́gə́ ń ngəra kāgə̄ gə̄ ní a tɔ̄l̄nəń moy dɔ deē tə́ ní ō.
21Yá̰a̰ malang kə́ rɔ̄kum kə́ to lo ɓɔ̄ɔ̄ tə́ ō, kə́ deē a̰a̰ kə kumneé ō ní, m̄-ger̄də́.
Tɔdɔ̄ kum kedə̄ ń i nge kəndā yá̰a̰ malang ní, ndóōm̄ yá̰a̰ adə̄ m̄-ger̄.
Yá̰á̰ ń i kum kedə̄ ní
22Kum kedə̄ aw̄ kə ndíĺ kə́ ger̄ yá̰a̰ ō, kə́ táĺ ō,
kə́ kógə̄ḿ beē ō, kəla rāan gə̄ i ngá̰ý ō,
hálən majə ngá̰ý ō, ndi gotə kógə̄ḿ aĺ ō,
to tayā ō, yá̰á̰ kə́ majə aĺ tákə̄n aĺ ō,
unjə̄ njáý njáý ō, a nujə aĺ ō,
gḛy yá̰á̰ kə́ majə ō, ɔl ō,
23i kɔ́ɔ̄ rɔ̄n ō, nge rāā majə ō, i madə̄ ta deē ō,
ra ngan̄g dɔ ndūn tə́ ō, kemən tɔ́sən aĺ ō,
ndi lo yān jəke ō, asə rāā yá̰a̰ malang ō, əndā kumən gíŕ yá̰a̰ malang tə́ ō,
ger̄ gír̄ yā de gə̄ malang ō,
ger̄ gír̄ yā ngé gə̄ ń kur̄ dɔdə́ ger̄ yá̰á̰ ngá̰ý ní ō, ngé gə̄ ń unjə̄n̄ njáý njáý ní ō, ngé gə̄ ń ngam yādə́ i ngá̰ý ní ō.
24Adə̄ kum kedə̄ ɔl tɔȳ yá̰a̰ malang kə́ a ndɔ́tə̄.
Ni mān̄ ba udə tū yá̰a̰ gə̄ tə́ malang sɔɔ̄ń hálən kə́ unjə̄ njáý njáý.
25Kum kedə̄ teē i tū tɔ́gə yā Nə́ɓā tə́.
I yá̰á̰ kə́ unjə̄ njáý njáý kə́ teē tū kɔsə go̰n yā Nə́ɓā kə́ bo kə́ tɔ́gən i ngá̰ý tə́.
I tām̄ najə̄ ń toō tə́ n yá̰á̰ kə́ yḛr kógə̄ḿ kə́ yā kɔdə rɔ̄n a gətóó ní.
26Kum kedə̄ rāā rɔ̄n i lo kunjə̄ kə́ ngándáńg kə́ ɔjə rɔ̄n kə̄ ndágá tə́.
Ni i kútə́ram kə́ kanjə̄ yūró ń deē a a̰a̰ kəla rāā Nə́ɓā tū tə́ ní ō,
ni i kum gotə kem majə yā Nə́ɓā ō.
27Tītə̄ ń nəkɔ́ i kal kógə̄ḿ beē ní, ni asə rāā yá̰a̰ malang.
Ni to i kum gotən ō, rāā yá̰a̰ malang ń ni əndā ní adə̄ téĺ kə́ kijə ō.
Kə gō ɓāl̄ gə̄ ń a mānə̄n̄ nuú ní, ni udə kem de kə́ táĺ gə̄ tə́,
rāādə́ adə̄ télən̄ madə̄ Nə́ɓā ō, ngé koō taa gə̄ ō.
28Tɔdɔ̄ i ngé gə̄ ń gerə̄n̄ naā kə kum kedēé majə ní ngóy n Nə́ɓā táŕdə́ ní.
29Ni ndə́lē tɔȳ mbang ō,
ni tɔȳ ɓūtə̄ tíyō̰ gə̄ malang ō.
Ré deē əndādə́ kadə naā tə́ kə lo kunjú anī, ni tɔȳn sa̰y ngá̰ý.
30Lo kə́ ndɔ̄ɔ́ un gotə lo kə́ kadaá,
banī yá̰á̰ kə́ majə aĺ a un gotə kum kedə̄ aĺ bátə́.
Bibəl ta Sar̄ © L'Alliance Biblique du Tchad, 2006, 2010.