LUK 4
4
Sətan nāā Jeju
(Á̰a̰ī Mat 4.1-11; Mark 1.12-13)
1Jeju ń Ndíĺ kə́ Táĺ rosə kemən ní tél bā Jurdḛ tə́, anī Ndíĺ kə́ Táĺ ɔrən ta róbə aw̄ seneé kem dəla loo tə́. Ni-ndi noó ndɔ̄ kutə sɔ́, 2ba diabəl reē nāān. Kem ndɔ̄ gə̄ ń noō tə́ ní, ni-əsa yá̰a̰ alé. Ba dan ń gír ndɔ̄ gə̄ ní gān̄g anī ɓō rāān. 3Anī diabəl reē, ədan na:
Ré ḭ̄ i Ngōn̄ Nə́ɓā anī, ə́da kūbə̄rū mbal̄ ń toō adə̄ tél yá̰a̰ kəsa.
4Jeju tūr̄ ədan na:
I kə́ ndang kem makətūbūú na deē a ndi kə kumneé i kə ta kūl̄ yá̰a̰ kəsaá ngóy alé.
5 Diabəl aw̄ seneé dɔ loo kə́ kḭḭ kə̄ dɔɔ́ tə́, ba ɔjən ɓē ko̰o̰ gə̄ malang kə́ dɔ nang tə́ adə̄ a̰a̰də́ gidə kógə̄ḿ, 6ba ədan na:
M-ā m-ādī tɔ́gə dɔ ɓē ko̰o̰ gə̄ ń noō tə́ malang ō, kɔsə gɔn kə́ tū tə́ ō. Tɔdɔ̄ télən̄ kə yá̰a̰ gə̄ ń noō malang adə̄mə̄n̄ i mā adə̄ deē ń kemḿ ndigə anī m-ā m-ādə̄n. 7Adə̄ ré ī-rɔȳm̄ anī, yá̰a̰ gə̄ ń noō malang i yāí tə́.
8Ba Jeju tūr̄ ədan na:
I kə́ ndang kem makətūbūú na i Kɔ́ɔ̄ɓē Nə́ɓā yāí ngóy n ā rɔȳn ní ō, i ni ngóy n ā ī-rāā kəla yān ō ní.
9Gō tə́ anī diabəl aw̄ kə Jeju Jerusalem, aw̄ əndān jam kújə yā Kɔ́ɔ̄ɓē tə́ ba ədan na:
Ḭ̄ i Ngōn̄ Nə́ɓā ní ə́ya̰ jīí dɔɔ́ ə̄sō nang tə́. 10Tɔdɔ̄ i kə́ ndang kem makətūbūú na Nə́ɓā a əda de kə́ dɔ rā̰ tə́ yān gə̄ kadə̄ a ngɔ̄mə̄nī. 11Tá ndangən̄ ɓáý to̰ na: A ətōnī ta jīdə́ tə́ dɔɔ́ yā kadə̄ mbal̄ əga njaí alé.
12Ba Jeju tūr̄ ədan na:
Makətūbə̄ yā Nə́ɓā əda na, ā ī-nāā Kɔ́ɔ̄ɓē Nə́ɓā yāí alé.
13Dan ń diabəl təgā yá̰a̰ gə̄ ń kadə̄ ni-nāań Jeju ní malang anī əya̰n ba ɔr̄ rɔ̄n sa̰y kɔ̄ɔ́ rɔ̄n tə́, bátə́ kadə̄ ndɔ̄ kə́ rang ugə̄ń.
Jeju əla gír kəla yān dɔ nang kə́ Galile tə́
(Á̰a̰ī Mat 4.12-17; Mark 1.14-15)
14Jeju tél dɔ tə́, aw̄ gogə́ dɔ nang kə́ Galile tə́ kə tɔ́gə yā Ndíĺ kə́ Táĺ ō, rīn ɓār̄ ngá̰ý gō nang ngeé ń noō tə́ malang ō. 15Ni ndóō de gə̄ yá̰a̰ kem kújə́ kán̄ naā yādə́ gə̄ tə́ adə̄ nin̄ malang ədan̄ lūlū kɔsə gɔn yān ō.
De gə̄ mbātə́n̄ Jeju kem ɓē kə́ Najaret tə́
(Á̰a̰ī Mat 13.53-58; Mark 6.1-6)
16Jeju aw̄ Najaret tə́, ɓē ń ətōnən̄ tū tə́ ní tə́. Ndɔ̄ sabat tə́ anī, ni-aw̄ kem kújə́ kán̄ naá tə́ tītə̄ ń i jī bēl̄ loo rāān ní. Ni-ḭḭ dɔɔ́ yā tə́da makətūbə̄. 17Anī adə̄nən̄ makətūbə̄ yā Ijai nge koō ta. Ni-tútə gidə naā tə́ anī ənge loo ń ndangən̄ najə̄ ń toō tū tə́ ní:
18Ndíĺ Kɔ́ɔ̄ɓē i dɔḿ mā tə́.
Tɔdɔ̄ ni-*ur yibə̄ dɔḿ tə́ gə̄rām̄neé
i yā kadə̄ m-āw̄ m-ə́dá ngé ndoō gə̄ Najə̄ kə́ Majə.
Ni əlam̄ i kadə̄ m-āw̄ m-ə́da dəngáy gə̄
na a ɔrə̄n̄də́ dəngáyá ō,
i kadə̄ m-āw̄ m-ə́dá ngé kum tɔ̄ɔ̄ gə̄
na a télən̄ yā ka̰a̰ loo gogə́ ō,
i kadə̄ m-āw̄ m̄-taā ngé gə̄ ń rāān̄ kumdə́ ndoō tə́ ní
jī madə̄ ba̰ā̰də́ gə̄ tə́ m-ə́yá̰də́ dɔɔ́ ō,
19i kadə̄ m-āw̄ m-ə́da de gə̄ najə̄ yā ɓāl̄ ń Nə́ɓā a rāań kem majə kə de gēé ní ō#4.19 K. 18-19: Á̰a̰ī Ij 62.1-2.
20Gō tə́ anī Jeju ɓír̄ makətūbə̄ ní kem naā tə́ gogə́. Ni téləń adə̄ nge rāā kəla ba ndi nang tə́. De gə̄ malang ń ndin̄ kem kújə́ kán̄ naá tə́ ní əndān̄ kumdə́ dɔn tə́ sikəm. 21Loo ń noō tə́ ni-ədadə́ na:
Najə̄ ń ndangən̄ kem makətūbə̄ yā Nə́ɓā tə́ á ōōī toó ní reē udə gíŕ kə́ rɔ̄ tə́ ɓōólaā kɔ̄ɔ́.
22De gə̄ malang a ədan̄ i najə̄ kə́ majə yā Jeju. Najə̄ kɔrə̄n kə́ majə ngá̰ý gə̄ ní ɔr kumdə́ ngá̰ý adə̄ ədan̄ na:
I ngōn̄ Jəjep ní n noó aĺ a?
23Jeju ədadə́ na:
Rɔ̄kum, ā ə́damī kāgə̄ najə̄ ń na, nge rāā kadə̄ rɔ̄ de gə̄ ngáā, ī-rāā adə̄ rɔ̄í īkɔ́ ngáā ní ō, ā ə́damī na yá̰a̰ malang ń m̄-rāā Kapernaum nú ní na ōōī, adə̄ yá̰á̰ ń m̄-rāā nú ní kə m̄-rāā kem ɓē yāḿ mə̄kɔ́ tə́ ō.
24Tá ni-əda ɓáý to̰ na:
Ādə̄ m-ə́dásí najə̄ kə́ bo ngá̰ý, nge koō ta kə́ de gə̄ əhɔnən̄ kə̄ rɔ̄də́ tə́ majə ɓē kojən tə́ gətóo. 25Ādə̄ m-ə́dásí najə̄ kə́ rɔ̄kum, ɓāl̄ yā Eli tə́ ń man̄ edə aĺ ɓāl̄ mətá kə nāā mehḛ́ ō, ɓō kə́ ngá̰ý rāā de gə̄ kem ɓēé malang ō ní, dəyá̰ kə́ ngaa koy gə̄ i ngá̰ý dɔ nang kə́ Israel tə́, 26banī Nə́ɓā əla Eli rɔ̄ nge kə́ kógə̄ḿ dandə́ tə́ alé, ba əlan i rɔ̄ dəyá̰ kə́ ngaa koy kə́ Sarepta tə́, gō nang kə́ Sidon tə́ ngóy. 27Tá ɓāl̄ yā Elije nge koō ta tə́ ní, ngé bānjə̄ gə̄ i ngá̰ý dɔ nang kə́ Israel tə́ ō. Banī deē kógə̄ḿ dandə́ tə́ kə́ bānjə̄ yān ur̄ gətóo, ba i Naama ń i de kə́ Siri ní tá ngóy n bānjə̄ ur̄ rɔ̄n tə́ kɔ̄ɔ́ ní.
28De gə̄ malang ń ndin̄ kem kújə́ kán̄ naā tə́ ní, dan ń oōn̄ najə̄ gə̄ ń noō anī, wōn̄g asədə́ nák. 29Nin̄-ḭḭn̄ dɔɔ́, ndɔ́r̄nən̄ teēn̄ seneé gidə ɓē tə́ ndágá ba aw̄n̄ seneé dɔ ngōn̄ mbal̄ ń rāān̄ ɓē yādə́ dɔ tə́ ní tə́ yā mbəren kadə̄ ḭḭ ta tél mbal̄ tə́ dɔɔ́ teē əsō nang tə́. 30Banī ni-mān̄ dandə́ tə́ aw̄ loo yān.
De kə́ ndíĺ kə́ majaĺ kógə̄ḿ rāā kumən ndoō tə́
(Á̰a̰ī Mark 1.21-28)
31Tā anī Jeju aw̄ Kapernaum ń i ɓē kə́ gō nang kə́ Galile tə́ ní. Ni ndóō de gə̄ yá̰a̰ ndɔ̄ sabat tə́, 32anī loo ndóō deē yá̰a̰ yān ɔr kum de gə̄ ngá̰ý, tɔdɔ̄ tɔ́gə i tū najə̄ yān tə́. 33Deē kógə̄ḿ kə́ ndíĺ kə́ yḛr a rāā kumən ndoō tə́ ndi kem kújə́ kán̄ naā tə́. Ni əga kɔŕ ngá̰ý ba əda na:
34Ajá, Jeju kə́ Najaret, yāí i rí sejí? Ī-reē i nujə sejí tə́ kɔ̄ɔ́ a? m̄-gerī majə, ḭ̄ i Nge kə́ táĺ yā Nə́ɓā.
35Jeju ndán̄g ndíĺ kə́ majaĺ ní ba ədan na kə utə̄ tan ō, kə teē kɔ̄ɔ́ kem deē ń noō tə́ ō. Anī ndíĺ kə́ majaĺ ní ənī deē ní nang tə́ ta kum de gə̄ tə́ malang ba teē kemən tə́ kɔ̄ɔ́ kanjə̄ rāā yá̰á̰ kógə̄ḿ kə́ majaĺ seneé. 36Ɔr kum de gə̄ malang adə̄ de gə̄ ədan̄ naā dɔ dandə́ tə́ na:
I najə̄ kə́ ba̰ý beē? Deē ń toō ɔr̄ najə̄ kə ndíĺ kə́ yḛr gēé kə́ de kə́ kɔ́ɔ̄ yá̰á̰ tə́ ō, kə́ de kə́ aw̄ kə tɔ́gɔ́ dɔdə́ tə́ ō anī ndíĺ kə́ majaĺ gə̄ teēn̄ kɔ̄ɔ́ wa!
37Loo ń noō tə́ lūlū Jeju taā loo malang kə́ gō nang ngeé ń noō tə́.
Jeju rāā adə̄ ngé mo̰y gə̄ ngá̰ý əngen̄ rɔ̄ ngan̄g
(Á̰a̰ī Mat 8.14-17; Mark 1.29-34)
38Jeju teē kújə́ kán̄ naā tə́ anī aw̄ ɓē Simo̰. Gajə əhɔ um Simo̰ kə́ dəyá̰ ngan̄g ngá̰ý anī dəjen̄ Jeju kadə̄ kə rāā yá̰á̰ kógə̄ḿ tām̄ yān tə́. 39Jeju nōr̄ kə̄ dɔ dəyá̰ ní tə́ ba ɔr̄ najə̄ kə mo̰y gajaá kə tɔ́gɔ́ anī mo̰y gajə əya̰n. Dəyá̰ ní ḭḭ dɔɔ́ kə̄ ta jī tə́ beē rāā yá̰a̰ kəsa adə̄də́.
40Ta mbang kudə tə́ anī de gə̄ malang ń ngé mo̰y kə́ tayā tayā gə̄ rāān̄ deē yādə́ gə̄ ní, reēn̄ sedə́ rɔ̄ Jeju tə́. Ni-əndā jīn dɔdə́ gə̄ tə́ kógə̄ḿ kógə̄ḿ malang adə̄ rɔ̄də́ ngáā. 41Ndíĺ kə́ majaĺ gə̄ téēn̄ kem kósə́ ngé mo̰y kə́rēý gə̄ tə́ kə kɔrɔ́ tadə́ tə́. Nin̄-ədan̄ na: Ḭ̄ i ngōn̄ Nə́ɓā! Banī Jeju ndán̄gdə́ ɔgə̄də́ kɔr̄ najə̄, tɔdɔ̄ nin̄-gerə̄n̄ kadə̄ ni i Kərist.
Jeju ɔjə najə̄ kem kújə́ kán̄ naā gə̄ tə́
(Á̰a̰ī Mark 1.35-39)
42Dan ń loo tīī anī Jeju teē aw̄ dəla loo tə́. Kósə de gə̄ ndəlenən̄ ba dan ń əngenən̄ anī sāān̄ kəhɔn gotə kógə̄ḿ najə̄ kadə̄ a əya̰də́. 43Banī ni-ədadə́ na:
Majə kadə̄ m-ɔ́jə de kə́ kem ɓē kə́ rang tə́ gə̄ Najə̄ kə́ Majə kə́ dɔ Ɓē ko̰o̰ yā Nə́ɓā tə́ ō, tɔdɔ̄ Nə́ɓā əlam̄ i tām̄ nge ń noō tə́.
44Adə̄ ni-ɔjə najə̄ kem kújə́ kán̄ naā gə̄ kə́ dɔ nang kə́ Jude tə́.
Currently Selected:
LUK 4: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.