LUK 10
10
Jeju əla ngé kə́ kutə sīrí gidə i jōó gə̄
1Gō yá̰a̰ gə̄ ń noō tə́ anī, Kɔ́ɔ̄ɓē gə̄rā de kə́ rang gə̄ kutə sīrí gidə i jōó, ba əladə́ jōó jōó kété non tə́ kem ɓē gə̄ malang ō, kə gō loo gə̄ ō ń nəkɔ́ a rāā yā kaw̄ tū tə́ ní. 2Ni ədadə́ na:
Kōō kə́ yā kəja əla loo kə̄ nang tə́ tā, banī de kə́ ngé kəjan gə̄ i ngá̰ý aĺ ní, ī-dəjeī kɔ́ɔ̄ kōō ní adə̄ əla kə de gēé kadə̄ əjan̄ kōō yān. 3Āwī! M-ə́lásí i tītə̄ ngán batə̄ gə̄ beé kə̄ dan soó gə̄ tə́. 4Ī-lōōī kun ngong nar, aláa sángá, aláa sākə̄rā jīsí tə́ ō, ī-rāāī deē lápə́ya róbó aĺ ō. 5Ré ā ī-rāāī yā kudə kə̄ kem kújə́ kə́rēý tə́ anī, ə́daī na kadə̄ kem sɔl̄ kə i kem kújə́ ń noō tə́, pá tá údiī ɓáý.
6Ré deē kógə̄ḿ kə́ nge ndigə kem sɔl̄ lɔm yā Nə́ɓā i kem kújə́ ní tə́ anī, lápə́ya yāsí a adə̄n kem sɔl̄. Ba ré i beé aĺ anī kem sɔl̄ yāsí a tél yā reē rɔ̄sí tə́ gogə́. 7Ī-ndiī kem kújə́ ní tə́. Yá̰a̰ kəsa ń a adə̄n̄sí kemeé ní ə́saī ō, yá̰á̰ kə́ yā ka̰ȳ ń a adə̄n̄sí kemeé ní ā̰yī ō. Tɔdɔ̄ majə kadə̄ de kə́ nge rāā kəla ənge yá̰a̰ kəndā nja yān. Ī-lōōī rāā ɓē mbā jōó. 8Ré údiī kem ɓē kə́rēý tə́ ba əhɔn̄sí kə̄ rɔ̄də́ tə́ anī, ə́saī yá̰á̰ ń a adə̄n̄sí ní. 9Ī-tɔ̄lī mo̰y dɔ de kə́ kemeé gə̄ tə́ ba ə́daīdə́ na: Ɓē ko̰o̰ yā Nə́ɓā reē bátə́ ugə̄ rɔ̄də́ tə́. 10Ba ɓē ń údiī kemeé banī de kə́ tū tə́ gə̄ əhɔn̄sí kə̄ rɔ̄də́ tə́ aĺ ní, ī-teēī, āw̄ ī-raī ndágə loo kə́ kem ɓē ní tə́ ba ə́daī na: 11Bumbə́rú kə́ kem ɓē yāsí tə́ gə̄gē ń əhɔ njají ní jə-*gógə̄ j-adə̄sí gogə́. Ba yá̰á̰ ń kadə̄ ī-gerī ní n toó: Ɓē ko̰o̰ yā Nə́ɓā reē ugə̄ rɔ̄sí tə́. 12Ādə̄ m-ə́dásí, ndɔ̄ń tə́ anī yá̰á̰ ń a reē dɔ ɓē ń noō tə́ ní, yā ɓē kə́ Sodom i só tə́ ngá̰ý tɔȳ yān.
Ɓē gə̄ ń mbātə́n̄ taā kem ní
(Á̰a̰ī Mat 11.20-24)
13M-ə́da na rɔ̄ ndoō i kə de kə́ Korajḛḛ gə̄ ō, rɔ̄ ndoō i kə de kə́ Betsaida gə̄ ō! Tɔdɔ̄ yá̰á̰ kə́ yáā gə̄ ń rāān̄ yá̰a̰ loodə́ ní, nə́ngētə́ rāān̄ yá̰a̰ i Tir ō Sidon ō anī, de kə́ kemeé gə̄ a o̰ō̰n̄ kūbə̄ kəhɔ ndoō ō, a ndin̄ kum bū hor tə́ ō i jóó ngá̰ý yā kɔjəń kadə̄ na n-gḛyn̄ tūr̄ háĺdə́. 14Adə̄ ndɔ̄ sarya tə́ ɓá anī yā de kə́ Tir gə̄ ō, de kə́ Sidon gə̄ ō a to só tə́ ngá̰ý tɔȳ yādə́. 15Ba ḭ̄, Kapernaum, ɔ́jəń na ā ḭ́ḭ kum kə̄ dɔɔ́ yā kugə̄ no rā̰ tə́ a? A télən̄ seí kə̄ nang tə́ bátə́ yā kəlaī ɓádá.
16Jeju əda ngé ndóō yá̰a̰ yān gə̄ ɓáý to̰ na:
Deē ń oō najə̄ tasí tə́ ní kɔ́ɔ̄ oō najə̄ i taḿ mā tə́ ō, deē ń mbātə́sí ní kɔ́ɔ̄ mbātə́m̄ i mā ō. Ba deē ń mbātə́m̄ mā ní kɔ́ɔ̄ mbātə́ i deē ń əlam̄ mā ní.
Ngé kə́ kutə sīrí gidə i jōó gə̄ tél reē ugə̄n̄
17Ngé kə́ kutə sīrí gidə i jōó gə̄ ní tél reē ugə̄n̄. Rɔ̄də́ nel̄də́ ngá̰ý adə̄ ədan̄ Jeju na:
Kɔ́ɔ̄ɓē, dan ń j-əda rīí anī, ndíĺ kə́ majaĺ gə̄ gə̄gē oōn̄ tají ba rāān̄ yá̰á̰ ń j-ədadə́ ní.
18Anī Jeju tél ədadə́ na:
M-á̰a̰ Sətan ḭḭ dɔ rā̰ tə́ əsō tītə̄ man̄ kə́ tel̄ beé. 19Ōōī, m-ādə̄sí tɔ́gə kadə̄ ī-tə́ɓāīneé dɔ lī gə̄ ō dɔ kókə́rang gə̄ ō, kadə̄ ī-tetiīneé tɔ́gə Sətan malang rɔ̄ɔ̄ kɔ̄ɔ́ ō, yá̰á̰ kógə̄ḿ a rāāsí aĺ ō. 20Ī-lōōī rāā rɔ̄nel̄ tām̄ koō kə́ ndíĺ kə́ majaĺ gə̄ oōn̄ tasí tə́, banī ī-rāāī rɔ̄nel̄ tām̄ yā rīsí gə̄ ń i kə́ ndang kɔ̄ɔ́ dɔ rā̰ tə́ ní.
Jeju rāā rɔ̄nel̄
(Á̰a̰ī Mat 11.25-27; 13.16-17)
21 Ndíĺ kə́ Táĺ adə̄ Jeju rɔ̄nel̄ kə́ ngá̰ý kemən tə́ kum mbang nəkɔ́ ń noō tə́, adə̄ Jeju əda na:
Bɔbə́ḿ, ḭ̄ ń i Kɔ́ɔ̄ɓē dɔ rā̰ tə́ ō, dɔ nang tə́ ō ní, m̄-tɔ̄yī tām̄ teē ń i teē kum ngé kə́ dūú gə̄ dɔ yá̰á̰ ń ī-mundə̄ ngé kum kedə̄ gə̄ ō, ngé ger̄ yá̰a̰ gə̄ ō ní tə́. Rɔ̄kum, Bɔbə́ḿ, i kem ndaa yāí n rāā adə̄ ī-gḛyń kadə̄ to i tītə̄ ń noō ní.
22Bɔbə́ḿ tél kə yá̰a̰ malang adə̄m̄. Deē kógə̄ḿ kə́ ger̄ Ngōn̄ gətóo ba i Bɔbə́ḿ nəkɔ́ tá ngóy ō, deē kógə̄ḿ kə́ ger̄ Bɔbə́ḿ gətóo ba i mā Ngōnən nəkɔ́ tá ngóy ō, i ngé gə̄ ń m̄-ndigə kɔjədə́ kə Bɔbə́ḿ ní tá ngóy ō.
23Gō tə́ anī Jeju tūr̄ rɔ̄n kə̄ rɔ̄ ngé ndóō yá̰a̰ yān gə̄ tə́ ba ədadə́ kə́ kéŕdə́ na:
Yāsí i rɔ̄nel̄ tām̄ yá̰á̰ ń toō ń á̰a̰ī ní tə́! 24Tɔdɔ̄ ādə̄ m-ə́dásí, ngé koō ta gə̄ ngá̰ý ō, mban̄g gə̄ ngá̰ý ō, sāān̄ ka̰a̰ yá̰á̰ ń sḭḭ̄ á̰a̰ī toó banī a̰a̰n̄ aĺ ō, sāān̄ koō yá̰á̰ ń sḭḭ̄ ōōī toó banī oōn̄ aĺ ō.
Kūjə́ najə̄ yā de kə́ Samari kə́ nge rāā kem ndaa
25Deē kógə̄ḿ kə́ nge ndóō de gə̄ ndū najə̄ gə̄ ḭḭ dɔɔ́ ba dəje Jeju najə̄ yā nāānneé, əda na:
Ngoləḿ, yá̰á̰ ń kadə̄ m̄-rāā tá m̄-ndiń kə kumḿ ngándáńg ní i rí?
26Anī Jeju dəjen najə̄ əda na:
Ndangən̄ kem makətūbə̄ ndū najə̄ gə̄ tə́ na i rí? Ḭ̄ ī-tə́da i ba̰ý?
27Anī dəngam ní tél ədan na:
Ā ī-táŕ Kɔ́ɔ̄ɓē Nə́ɓā yāí kə kemií malang ō, kə dā̰ rɔ̄í malang ō, kə tɔ́gí malang ō, kə gíŕ kə́ kemií tə́ malang ō, ā ī-tár deē madí tītə̄ ngarān̄g kum rɔ̄í īkɔ́ beé ō.
28Loo ń noō tə́ Jeju ədan na:
Ī-tūr̄ najə̄ ní i gō tə́ bang. Ī-rāā yá̰a̰ gə̄ ń noō, anī ā ī-ndi kə kumií.
29Banī nge ndóō de gə̄ ndū najə̄ gə̄ ní sāā kɔjə kadə̄ najə̄ i yān, adə̄ ni-dəje Jeju na ké i náā n i madə̄n ní wa?
30Anī Jeju tél ədan na:
Deē kógə̄ḿ ḭḭ Jerusalem a aw̄ kə̄ Jeriko. Ni-əsō jī ngé ɓogə gə̄ tə́ adə̄ ɔyn̄ yá̰a̰ yān malang ō, əndanən̄ ngá̰ý ō, ba ɔtə aw̄n̄ kɔ̄ɔ́. Nin̄-əya̰nən̄ adə̄ to i kə ta yo tə́. 31Nge tun̄ yá̰á̰ kógə̄ḿ un róbə ngeé ń noō ō. Ni-reē teē dɔ deē ní tə́, ba dan ń a̰a̰n anī əndā tīl̄ ba mān̄ aw̄ loo yān. 32Ngōn̄ Lebi kógə̄ḿ, reē ugə̄ loo ní tə́ ō, ba dan ń á̰a̰ deē ní anī ə̄ndā tīl̄ ba mān̄ aw̄ loo yān ō. 33Banī deē kógə̄ḿ kə́ Samari kə́ a aw̄ kə̄ mbā tə́ reē, ugə̄ rɔ̄ deē ní tə́ anī kumən o̰o̰n seneé, 34adə̄ aw̄ rɔ̄n tə́, ɓōkə́ yibə̄ ō kasə nduú ō ta don tə́ ba do̰ō̰ ta. Gō tə́ anī un əndān gidə kərō yān tə́, aw̄ seneé kújə ɓīī mbā gə̄ tə́ ō, a̰a̰ gōn majə ō. 35Teē kə ndɔ̄ kə́ noō anī ɔr̄ sə́lē arjā̰a̰ jōó adə̄ kɔ́ɔ̄ kújə́ ní ba ədan na: Á̰a̰ gōn majə, ba gúrsə ń ā ī-rāań yá̰a̰ tām̄ yān tə́ gotəḿ tə́ ní, ta télə́ḿ anī, m-ā m-ə̄gāī kə̄rān.
36Ní, dan de kə́ mətá gə̄ ń noō tə́ ní, i náā n ī-gír̄ kadə̄ i ni n i madə̄ dəngam ń əsō jī ngé ɓogə gə̄ tə́ ní?
37Nge ndóō de gə̄ ndū najə̄ gə̄ ní tél əda Jeju na:
I nge ń rāā kem majə seneé noō n i madə̄n ní. Anī Jeju ədan na:
Āw̄ ba ī-rāā tītə̄ ń noō ō.
Jeju i ɓē Martə nin̄ kə Mari
38Dan ń Jeju nin̄ kə ngé ndóō yá̰a̰ yān gēé i róbó ní, Jeju udə kem ɓē kógə̄ḿ tə́. Anī dəyá̰ kógə̄ḿ kə́ rīn na i Martə əhɔn mbā ɓēé looneé. 39Dəyá̰ ní aw̄ kə ngōkó̰o̰n kógə̄ḿ kə́ dəyá̰ kə́ rīn na i Mari. Ni kə́ Mari ngeé ń toō ndi nang tə́ nja Kɔ́ɔ̄ɓē tə́ a oōń najə̄ kɔrə̄n. 40Kəla kə́ kem kújú i ngá̰ý dɔ Martə tə́. Ni teē kə̄ dɔdə́ tə́ ba əda na:
Kɔ́ɔ̄ɓē, kadə̄ ngōkó̰ó̰ḿ əya̰m̄ ta kəla tə́ kə kérə́ḿ ní usiī aĺ a? Ədan ādə̄ reē rāā seḿ sḛ́ý!
41Banī Kɔ́ɔ̄ɓē tél ədan na:
Martə, Martə, ḭ̄ ī-sōl̄ ō, ī-ndebə jak jak ō tām̄ yā yá̰á̰ kə́ gíŕdə́ i kósə́ ngá̰ý gə̄ tə́. 42Banī yá̰á̰ ń i yá̰á̰ kə́ yā rāā gáŕ ní gír i kógə̄ḿ beē ngóy. I Mari n gə̄rā dāmə̄n kə́ majə tɔȳ madə̄ gə̄ ní, adə̄ deē a taā jīn tə́ alé.
Currently Selected:
LUK 10: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.