2 MAKABE GƏ̄ 10
10
Tə́gon̄ kem kújə yā Kɔ́ɔ̄ɓē
1Kɔ́ɔ̄ɓē ɔr no Makabe nin̄ kə madə̄n gēé adə̄ tél taā lo kə́ táĺ gogə́ ō, tél taā ɓē gogə́ ō. 2Dabə tun̄ yá̰a̰ gə̄ ń tə̄rā gə̄ rāān̄ ndágə loó ní, ni nujəń kɔ̄ɔ́ ō, nujə kə lo ndɔ̄ȳ gēé ō. 3Dan ń nin̄ tə́gon̄ kem kújə yā Kɔ́ɔ̄ɓē oy anī, rāān̄ dabə tun̄ yá̰á̰ kə́ rang. Nin̄ usən̄ mbal̄ hor gə̄ naā tə́, ba dan ń əɓa hor anī, unjə̄n̄ aw̄ rāānəń hor dɔ dabə tun̄ yá̰á̰ tə́ tun̄nəń yá̰a̰. Tɔdɔ̄ asə ɓāl̄ jōó ní, deē tun̄ yá̰a̰ alé. Nin̄ róōn̄ nūū kāgə̄ kə́ otə majə adə̄ əɓa saa ō, tə́ndān̄ hor ta bay hor gə̄ tə́ ō, ɓōkə́n̄ mápa gə̄ dɔ tábəl gə̄ tə́ ō. 4Dan ń rāān̄ yá̰a̰ kūjə́ gə̄ ń nuū oy anī, laan̄ kemdə́ nang tə́ ba ndɔ̄ȳn̄ Kɔ́ɔ̄ɓē ədan̄ na kə lōō kəya̰də́ kadə̄ n-əsōn̄ kum yá̰á̰ kə́ tōr̄ kə́ tītə̄ ń nuū gə̄ tə́ tṵ. Ba ré na n-rāān̄ majə aĺ seneé gogə́ ɓáý tṵ anī kə əndadə́ kə gōó, ba kə lōō kəladə́ jī nápar de gə̄ kə́ háĺdə́ i hál dā̰ gə̄ ō, i ngé tájə̄n gə̄ ō ń nuū tə́. 5Ndɔ̄ tə́go kem kújə yā Kɔ́ɔ̄ɓē əsō i ndɔ̄ ń tə̄rā gə̄ rāānəń kújə yā Kɔ́ɔ̄ɓē kújə́ kə́ karī tə́ ní. Adə̄ i kə ndɔ̄ kə́ nge kṵ kutə jōó gidə i mí yā nāā nəkɔ́ ń nuū ń i nāā Kislew ní. 6Nin̄ rāān̄ rɔ̄nel̄ ndɔ̄ sɔ́sɔ́ tītə̄ lo rāā nāā kújə́ kámbə gə̄ beé. Əga kemdə́ dɔ tə́ kadə̄ i ngɔr ɓáý n ndɔ̄ gə̄ ń kadə̄ nin̄ rāānəń nāā kújə́ kámbə gə̄ ɓáa ton̄ i mbo̰ō̰ mbal̄ gə̄ tə́ ō, bəlo mbal̄ gə̄ tə́ ō, tītə̄ dā̰ kə́ bembeé gə̄ beé ní. 7I tām̄ ń toō tə́ n nin̄ tétə̄n̄ ta jī kāgə̄ kə́ mbōl̄ gə̄ jīdə́ tə́, ba ənīn̄ pā rɔȳnəń nge ń rāā tá kadə̄ tə́gon̄ majaĺ ń tákə̄ lo kə́ táĺ yān ní adə̄ udə gírí majə ní. 8Nin̄ əndān̄ ndū najə̄ kə́ de gə̄ malang ndigən̄ dɔ tə́, tām̄ yā gíŕ de gə̄ ń i Jipə gə̄ ní tə́, kadə̄ kə dɔ ɓāl̄ gə̄ ɓáa de gə̄ rāān̄ rɔ̄nel̄ ndɔ̄ gə̄ ń nuū tə́.
A̰tiyokus Opator ndi mban̄g gotə bɔbə̄n tə́
9Yá̰á̰ ń reē kə yoó dɔ A̰tiyokus ń rī tɔ̄ȳn na i Epipan tə́ ní n nuú. 10Ngɔlaā ní, j-a j-ɔr̄ i najə̄ yā A̰tiyokus Opator ń i ngōn̄ nge taā kem Nə́ɓā aĺ ngeé ń toō ní. I yá̰á̰ kə́ to kum kaȳ aĺ gə̄ ń rɔ̄ɔ̄ reēn̄ ní ngóy n j-a jə-tə́dá kə́ ngón̄g ngón̄g gə̄ ní. 11Dan ń Opator ndi mban̄g anī, əndā de kə́rēý kə́ rīn na i Lijiyas dɔ yá̰a̰ gə̄ tə́. Lijiyas i nge kṵ ɓē kə́ Siri kə́ bo tə́ ō, Penisi tə́ ō. 12Pətoleme ń rī tɔ̄ȳn na i Makəro̰ ní, i ni n i de kə́ ta kəga dɔ kə́ nge rāā yá̰á̰ kə́ gōtə́ kə Jipə gēé sɔɔ̄ń yá̰á̰ kə́ gōtə́ aĺ ń rāān̄ sedə́ ní. Ni nāā kṵ ɓē dɔdə́ tə́ kə lɔmɔɔ́. 13I tām̄ najə̄ ń nuū tə́ n madə̄ mban̄g gə̄ sekə́nən̄ rɔ̄ mban̄g Opator tə́ ní. Kə kum mbang gə̄ malang ɓáa, ni oō kadə̄ de gə̄ ədan̄ na ni na i de kə́ nge ra dɔ ndūn tə́ kə madə̄n gēé aĺ ō, na n-əya̰ dor̄ lo kə́ Sipər ń Pilometor əndān ta tə́ ní kɔ̄ɔ́ ba na n-tetə rɔ̄n na i gō A̰tiyokus Epipan tə́ ō. Dan ń ni a̰ā̰ kadə̄ de gə̄ rāān̄ kəla kṵ ɓē yān i kəla kə́ to ngáā aĺ tə́ anī, a̰ȳ yá̰a̰ oy kɔ̄ɔ́.
Judas ənī ɓē kə́ ngan̄g gə̄ kə́ Idume tə́ rɔ̄ɔ̄
14Dan ń Gorjiyas tél nge kṵ ɓē kə́ gō nang kə́ Idume tə́ ní, ni ɔy áskar kə́ ngé rāā kəla gír naraá gə̄ ō, ta róbə gə̄ malang ń a ənge ní, a ənīń i Jipə gə̄ rɔ̄ɔ̄ ō. 15Tá ɓáý tṵ ní, Idume gə̄ ń ndin̄ kem ɓē kə́ ngan̄g ngan̄g gə̄ tə́ ní, asədə́ kənī Jipə gə̄ rɔ̄ɔ̄ alé. De gə̄ ń de kə́ Jerusalem gə̄ tə̄ɓān̄də́ kɔ̄ɔ́ ní, nin̄ əhɔn̄də́ kə̄ rɔ̄də́ tə́ ō, rāān̄ yá̰a̰ malang ń tɔ́gə́də́ asə ní yā kadə̄ rɔ̄ɔ̄ toń ta kaw̄ kə̄ kété ō. 16Banī Makabe nin̄ kə áskar yān gēé ndɔ̄ȳn̄ Nə́ɓā ndágə lo kə́ kem ɓēé tə́ ō, dəjen̄ Nə́ɓā kadə̄ ni i gíŕdə́ nin̄ tə́ ō. Ba gō tə́ anī, ɔrə̄n̄ dɔɔ́ yā kaw̄ kənī ɓē kə́ ngan̄g yā Idume gə̄ rɔ̄ɔ̄. 17Nin̄ ənīn̄ rɔ̄ɔ̄ kə́ təngā ngá̰ý dɔ ɓē gə̄ ní tə́, tə̄ɓān̄ de gə̄ malang ń a rɔ̄ɔ̄n̄ dɔ ndogə̄ mbal̄ gə̄ tə́ ní kɔ̄ɔ́, ba taān̄ lo kə́ ngan̄g ngan̄g gə̄ ní. De gə̄ ń əsōn̄ kem jīdə́ tə́ ní, nin̄ tə́jān̄ míndə́də́ kɔ̄ɔ́ malang: tɔ́lə̄n̄ de gə̄ kə́ kutədə́ dūú dūbú kutə jōó ń nuū alé. 18Áskar gə̄ kə́ asən̄ dūbú ndōhó ń nuū ɓɔ̄ɔ̄n̄ rɔ̄də́ kem kújə́ kə́ ngāl̄ ɓururu kə́ ngan̄g gə̄ tə́ gír i jōó. Kánə̄n̄ yá̰a̰ malang kem kújə gə̄ ní tə́ kadə̄ ré de gə̄ gīrə̄n̄ ɓē kə rɔ̄ɔ́ anī, kə de kə́ kemeé gə̄ kə teēnəń kum tə́. 19Makabe əya̰ Simo̰ ō, Jəjep ō, Jase kə de gə̄ yān gə̄ kə́ kutədə́ asə tām̄ ō, kadə̄ gīrə̄n̄də́ kə rɔ̄ɔ́, ba nəkɔ́ tá aw̄ lo gə̄ kə́ to kadə̄ ni aw̄ tū tə́ láẃ tə́. 20Banī de gə̄ yā Simo̰ rāān̄ ta nar ngá̰ý, adə̄ nin̄ əya̰n̄ rɔ̄də́ adə̄ ngé ngɔ̄m̄ kújə́ kə́ ngāl̄ ɓururu gə̄ mangən̄də́ kə nar kə́ asə sə́lē gində̄ arjā̰a̰ dūbú kutə sīrí. Lo ń nuū tə́ nin̄ əya̰n̄ ngé kə́rēý gə̄ dandə́ tə́ adə̄ teē a̰ȳn̄. 21Dan ń ədan̄ Makabe yá̰á̰ ń rāā yá̰á̰ ní anī, ni ɔsə dɔ ngol ɓūtə̄ áskar gə̄ kə̄ naā tə́, ba əndā najə̄ dɔ ngé gə̄ ń igən̄ kə ngákṵ́ṵ́də́ gēé ní tə́. Tɔdɔ̄ nin̄ əya̰n̄ madə̄ ba̰ā̰ ngákṵ́ṵ́də́ gə̄ adə̄ teē a̰ȳn̄ naā kɔ̄ɔ́ gír naraá. 22Makabe adə̄ ndūn kadə̄ tɔ̄lə̄n̄də́ kɔ̄ɔ́ tītə̄ ngé kigə kə madə̄də́ gēé beē, ba taā kújə́ kə́ ngāl̄ ɓururu kə́ jōó gə̄ ní kɔ̄ɔ́ kə̄ ta jī tə́ nuū. 23Rɔ̄ɔ̄ malang ń ni un dɔ ní, tɔ̄l̄ ta majə. Ni tɔ̄l̄ de gə̄ kə́ tɔȳn̄ dūbú kutə jōó ń nuū kem kújə́ kə́ ngāl̄ ɓururu kə́ jōó gə̄ ní tə́.
Judas tetə rɔ̄ɔ̄ kə́ Gajara
24Tá Timote ń Jipə gə̄ tetənən̄ rɔ̄ɔ̄ kété ní, ɔy áskar tə̄rā gə̄ kə́ kutədə́ i ngá̰ý ō, reē kə sə́ndá kə́ Aji tə́ gə̄ ngá̰ý ɔsə dɔdə́ naā tə́ ō, ba tél dɔ tə́ a reē kə̄ dɔ nang kə́ Jude tə́. Ni gír̄ taā ɓē ní kə rɔ̄ɔ́. 25Dan ń ni ugə̄ ngɔr anī, Makabe nin̄ kə de gə̄ yān gēé rāān̄ Nə́ɓā ɓɔ́. Nin̄ əgan̄ bumbə́ru kə̄ dɔdə́ tə́ ō, ədān̄ sákə̄ ɓōdə̄də́ tə́ ō, əhɔnə̄ń ndoō. 26Nin̄ ɔsən̄ nodə́ nang tə́ ta dabə tun̄ yá̰á̰ tə́, ba dəjen̄ Kɔ́ɔ̄ɓē kadə̄ rāā kem majə sedə́ ō, kə tél madə̄ ba̰ā̰ madə̄ ba̰ā̰də́ gə̄ ō, madə̄ kɔ̄l̄ madə̄ kɔ̄l̄də́ gə̄ ō, kə gō ń ndū najə̄ ədań adə̄ unjə̄ ngá̰ý ní. 27Dan ń nin̄ teēn̄ lo ndɔ̄ȳ tə́ anī, ɔȳn̄ yá̰a̰ rɔ̄ɔ̄ yādə́ gə̄ ba aw̄n̄ sa̰y ngá̰ý rɔ̄ ɓē tə́. Dan ń ugə̄n̄ ngɔr kə̄ rɔ̄ madə̄ ba̰ā̰ gə̄ tə́ anī, dəban̄. 28Dan ń mbang əɓa adə̄ lo unjə̄ anī, nin̄ ō, madə̄ ba̰ā̰ gə̄ ō, udən̄ naā tə́ rɔ̄ɔ̄n̄ naā. Jipə gə̄ əndān̄ kemdə́ i dɔ kəhɔ rɔ̄ tɔgə yādə́ tə́ yā tetəń rɔ̄ɔ̄. Ba kə́ ngá̰ý ɓá anī i dɔ Kɔ́ɔ̄ɓē tə́ kadə̄ dḭḭ̄də́. Banī madə̄ ba̰ā̰də́ gə̄ əndān̄ kemdə́ i dɔ wūn̄g yādə́ tə́ yā rɔ̄ɔń. 29Dan ń rɔ̄ɔ̄ udə kə̄ naā tə́ anī, madə̄ ba̰ā̰ gə̄ a̰a̰n̄ de kə́ majə ngá̰ý gə̄ mí teēn̄ dɔ rā̰ tə́, ndin̄ i gidə sə́nda gə̄ kə́ jámá kə́ tadə́ tə́ i kə́ rāā kə lɔ́rɔ́. Nin̄ i kété no Jipə gə̄ tə́. 30Nin̄ ənīn̄ Makabe dɔ dáńdə́ tə́ ba ngɔ̄m̄nən̄ kə yá̰a̰ rɔ̄ɔ̄ yādə́ gēé kadə̄ ənge do alé. Tá rāān̄ adə̄ man̄ tel̄ tītə̄ gərā kə́ kur beé kə̄ dɔ madə̄ ba̰ā̰ gə̄ tə́ adə̄ ndór̄ kumdə́. Madə̄ ba̰ā̰ gə̄ a̰ȳn̄ naā kə̄ lo gə̄ tə́ kə́ deē a̰a̰ gō madə̄n alé. 31Ngé rɔ̄ɔ̄ kə njadə́ gə̄ dūbú kutə jōó kə ɓú mí ō, ngé kal̄ sə́nda gə̄ ɓú mehḛ́ ō, i kə́ tə́jān̄ míndə́də́ kɔ̄ɔ́. 32Timote nəkɔ́ a̰ȳ aw̄ ɓɔ̄ɔ̄ rɔ̄n lo kógə̄ḿ kə́ ngan̄g kə́ ngɔ̄mə̄n̄ majə ngá̰ý tə́. A ɓārə́n̄ lo ní na i Gajara ō, i Kereyas n i nge kṵ ɓē dɔ tə́ ní ō. 33Banī Makabe nin̄ kə de gə̄ yān gēé tḭ̄ḭ̄n̄ rɔ̄də́ gīr̄nəń lo kə rɔ̄ɔ́ dɔ ndɔ̄ i sɔ́. 34De gə̄ ń ndin̄ kemeé ní, taān̄ kem kadə̄ yá̰á̰ kógə̄ḿ na a ɔdə rɔ̄də́ alé. Adə̄ asədə́ kɔr̄ najə̄ kə́ to ngonjə̄ gə̄ dɔ Nə́ɓā yā Jipə gə̄ tə́ aĺ ō, najə̄ kɔr̄də́ i najə̄ kɔr̄ de kə́ ngé rāā yá̰a̰ kə gō kem ndigə yā Nə́ɓāá aĺ gə̄ ō. 35Kə ndɔ̄ kə́ nge kṵ mí, dan ń mbang əndā dɔn anī, áskar yā Makabe kə́ balsáá gə̄ kutə jōó, wūn̄g asədə́ nák sɔɔ̄ń ngonjə̄ ń ngonjə̄n̄ dɔdə́ tə́ ní, adə̄ ənīn̄ ndogə̄ mbal̄ dɔɔ́ alə̄n̄ kə wurkilií. De gə̄ malang ń əsōn̄ kem jīdə́ tə́ ní, tɔ̄lə̄n̄də́ kə wūn̄g kə́ to tītə̄ yā dā̰ gə̄ beé. 36Kə́ madə̄ gə̄ alə̄n̄ tītə̄ yādə́ ba rə̄ngōn̄ rɔ̄də́ i gidə madə̄ ba̰ā̰ gə̄ ń gīrə̄n̄də́ ní tə́ n a rɔ̄ɔ̄nəńdə́ ní ō, tə́lan̄ hor dɔ kújə́ kə́ ngāl̄ ɓururu gə̄ tə́ ō, dɔ kīr̄ kə́ kán̄ dɔ naā tə́ gə̄ tə́ ō, ba ɓōkə́n̄ de gə̄ ń ngonjə̄n̄ dɔ Nə́ɓā tə́ ní kum tə́ kə kumdə́. Ngé kə́ kété gə̄ tétə̄n̄ ta róbə gə̄ adə̄ gotə áskar gə̄ udənə̄ń ō, i nin̄ n taān̄ ɓē kété ní ō. 37Nin̄ əjan̄ míndə Timote ń aw̄ ɓɔ̄ɔ̄ rɔ̄n kem bəlo taā man̄ ndī tə́ ní ō, əjan̄ míndə́ ngōkṵ́ṵn Kereyas nin̄ kə Apolopan naā tə́ seneé ō. 38Gō yá̰á̰ kə́ rāā lo go̰ tə́ gə̄ ń toō ɓá anī, nin̄ ənīn̄ pā rɔȳnəń Kɔ́ɔ̄ɓē ō, tɔ̄ȳnəń Kɔ́ɔ̄ɓē ō. Tɔdɔ̄ ni rāā majə ngá̰ý kə Israel gēé ō, rāā adə̄ nin̄ tetən̄ rɔ̄ɔ̄ ō.
Currently Selected:
2 MAKABE GƏ̄ 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
2 MAKABE GƏ̄ 10
10
Tə́gon̄ kem kújə yā Kɔ́ɔ̄ɓē
1Kɔ́ɔ̄ɓē ɔr no Makabe nin̄ kə madə̄n gēé adə̄ tél taā lo kə́ táĺ gogə́ ō, tél taā ɓē gogə́ ō. 2Dabə tun̄ yá̰a̰ gə̄ ń tə̄rā gə̄ rāān̄ ndágə loó ní, ni nujəń kɔ̄ɔ́ ō, nujə kə lo ndɔ̄ȳ gēé ō. 3Dan ń nin̄ tə́gon̄ kem kújə yā Kɔ́ɔ̄ɓē oy anī, rāān̄ dabə tun̄ yá̰á̰ kə́ rang. Nin̄ usən̄ mbal̄ hor gə̄ naā tə́, ba dan ń əɓa hor anī, unjə̄n̄ aw̄ rāānəń hor dɔ dabə tun̄ yá̰á̰ tə́ tun̄nəń yá̰a̰. Tɔdɔ̄ asə ɓāl̄ jōó ní, deē tun̄ yá̰a̰ alé. Nin̄ róōn̄ nūū kāgə̄ kə́ otə majə adə̄ əɓa saa ō, tə́ndān̄ hor ta bay hor gə̄ tə́ ō, ɓōkə́n̄ mápa gə̄ dɔ tábəl gə̄ tə́ ō. 4Dan ń rāān̄ yá̰a̰ kūjə́ gə̄ ń nuū oy anī, laan̄ kemdə́ nang tə́ ba ndɔ̄ȳn̄ Kɔ́ɔ̄ɓē ədan̄ na kə lōō kəya̰də́ kadə̄ n-əsōn̄ kum yá̰á̰ kə́ tōr̄ kə́ tītə̄ ń nuū gə̄ tə́ tṵ. Ba ré na n-rāān̄ majə aĺ seneé gogə́ ɓáý tṵ anī kə əndadə́ kə gōó, ba kə lōō kəladə́ jī nápar de gə̄ kə́ háĺdə́ i hál dā̰ gə̄ ō, i ngé tájə̄n gə̄ ō ń nuū tə́. 5Ndɔ̄ tə́go kem kújə yā Kɔ́ɔ̄ɓē əsō i ndɔ̄ ń tə̄rā gə̄ rāānəń kújə yā Kɔ́ɔ̄ɓē kújə́ kə́ karī tə́ ní. Adə̄ i kə ndɔ̄ kə́ nge kṵ kutə jōó gidə i mí yā nāā nəkɔ́ ń nuū ń i nāā Kislew ní. 6Nin̄ rāān̄ rɔ̄nel̄ ndɔ̄ sɔ́sɔ́ tītə̄ lo rāā nāā kújə́ kámbə gə̄ beé. Əga kemdə́ dɔ tə́ kadə̄ i ngɔr ɓáý n ndɔ̄ gə̄ ń kadə̄ nin̄ rāānəń nāā kújə́ kámbə gə̄ ɓáa ton̄ i mbo̰ō̰ mbal̄ gə̄ tə́ ō, bəlo mbal̄ gə̄ tə́ ō, tītə̄ dā̰ kə́ bembeé gə̄ beé ní. 7I tām̄ ń toō tə́ n nin̄ tétə̄n̄ ta jī kāgə̄ kə́ mbōl̄ gə̄ jīdə́ tə́, ba ənīn̄ pā rɔȳnəń nge ń rāā tá kadə̄ tə́gon̄ majaĺ ń tákə̄ lo kə́ táĺ yān ní adə̄ udə gírí majə ní. 8Nin̄ əndān̄ ndū najə̄ kə́ de gə̄ malang ndigən̄ dɔ tə́, tām̄ yā gíŕ de gə̄ ń i Jipə gə̄ ní tə́, kadə̄ kə dɔ ɓāl̄ gə̄ ɓáa de gə̄ rāān̄ rɔ̄nel̄ ndɔ̄ gə̄ ń nuū tə́.
A̰tiyokus Opator ndi mban̄g gotə bɔbə̄n tə́
9Yá̰á̰ ń reē kə yoó dɔ A̰tiyokus ń rī tɔ̄ȳn na i Epipan tə́ ní n nuú. 10Ngɔlaā ní, j-a j-ɔr̄ i najə̄ yā A̰tiyokus Opator ń i ngōn̄ nge taā kem Nə́ɓā aĺ ngeé ń toō ní. I yá̰á̰ kə́ to kum kaȳ aĺ gə̄ ń rɔ̄ɔ̄ reēn̄ ní ngóy n j-a jə-tə́dá kə́ ngón̄g ngón̄g gə̄ ní. 11Dan ń Opator ndi mban̄g anī, əndā de kə́rēý kə́ rīn na i Lijiyas dɔ yá̰a̰ gə̄ tə́. Lijiyas i nge kṵ ɓē kə́ Siri kə́ bo tə́ ō, Penisi tə́ ō. 12Pətoleme ń rī tɔ̄ȳn na i Makəro̰ ní, i ni n i de kə́ ta kəga dɔ kə́ nge rāā yá̰á̰ kə́ gōtə́ kə Jipə gēé sɔɔ̄ń yá̰á̰ kə́ gōtə́ aĺ ń rāān̄ sedə́ ní. Ni nāā kṵ ɓē dɔdə́ tə́ kə lɔmɔɔ́. 13I tām̄ najə̄ ń nuū tə́ n madə̄ mban̄g gə̄ sekə́nən̄ rɔ̄ mban̄g Opator tə́ ní. Kə kum mbang gə̄ malang ɓáa, ni oō kadə̄ de gə̄ ədan̄ na ni na i de kə́ nge ra dɔ ndūn tə́ kə madə̄n gēé aĺ ō, na n-əya̰ dor̄ lo kə́ Sipər ń Pilometor əndān ta tə́ ní kɔ̄ɔ́ ba na n-tetə rɔ̄n na i gō A̰tiyokus Epipan tə́ ō. Dan ń ni a̰ā̰ kadə̄ de gə̄ rāān̄ kəla kṵ ɓē yān i kəla kə́ to ngáā aĺ tə́ anī, a̰ȳ yá̰a̰ oy kɔ̄ɔ́.
Judas ənī ɓē kə́ ngan̄g gə̄ kə́ Idume tə́ rɔ̄ɔ̄
14Dan ń Gorjiyas tél nge kṵ ɓē kə́ gō nang kə́ Idume tə́ ní, ni ɔy áskar kə́ ngé rāā kəla gír naraá gə̄ ō, ta róbə gə̄ malang ń a ənge ní, a ənīń i Jipə gə̄ rɔ̄ɔ̄ ō. 15Tá ɓáý tṵ ní, Idume gə̄ ń ndin̄ kem ɓē kə́ ngan̄g ngan̄g gə̄ tə́ ní, asədə́ kənī Jipə gə̄ rɔ̄ɔ̄ alé. De gə̄ ń de kə́ Jerusalem gə̄ tə̄ɓān̄də́ kɔ̄ɔ́ ní, nin̄ əhɔn̄də́ kə̄ rɔ̄də́ tə́ ō, rāān̄ yá̰a̰ malang ń tɔ́gə́də́ asə ní yā kadə̄ rɔ̄ɔ̄ toń ta kaw̄ kə̄ kété ō. 16Banī Makabe nin̄ kə áskar yān gēé ndɔ̄ȳn̄ Nə́ɓā ndágə lo kə́ kem ɓēé tə́ ō, dəjen̄ Nə́ɓā kadə̄ ni i gíŕdə́ nin̄ tə́ ō. Ba gō tə́ anī, ɔrə̄n̄ dɔɔ́ yā kaw̄ kənī ɓē kə́ ngan̄g yā Idume gə̄ rɔ̄ɔ̄. 17Nin̄ ənīn̄ rɔ̄ɔ̄ kə́ təngā ngá̰ý dɔ ɓē gə̄ ní tə́, tə̄ɓān̄ de gə̄ malang ń a rɔ̄ɔ̄n̄ dɔ ndogə̄ mbal̄ gə̄ tə́ ní kɔ̄ɔ́, ba taān̄ lo kə́ ngan̄g ngan̄g gə̄ ní. De gə̄ ń əsōn̄ kem jīdə́ tə́ ní, nin̄ tə́jān̄ míndə́də́ kɔ̄ɔ́ malang: tɔ́lə̄n̄ de gə̄ kə́ kutədə́ dūú dūbú kutə jōó ń nuū alé. 18Áskar gə̄ kə́ asən̄ dūbú ndōhó ń nuū ɓɔ̄ɔ̄n̄ rɔ̄də́ kem kújə́ kə́ ngāl̄ ɓururu kə́ ngan̄g gə̄ tə́ gír i jōó. Kánə̄n̄ yá̰a̰ malang kem kújə gə̄ ní tə́ kadə̄ ré de gə̄ gīrə̄n̄ ɓē kə rɔ̄ɔ́ anī, kə de kə́ kemeé gə̄ kə teēnəń kum tə́. 19Makabe əya̰ Simo̰ ō, Jəjep ō, Jase kə de gə̄ yān gə̄ kə́ kutədə́ asə tām̄ ō, kadə̄ gīrə̄n̄də́ kə rɔ̄ɔ́, ba nəkɔ́ tá aw̄ lo gə̄ kə́ to kadə̄ ni aw̄ tū tə́ láẃ tə́. 20Banī de gə̄ yā Simo̰ rāān̄ ta nar ngá̰ý, adə̄ nin̄ əya̰n̄ rɔ̄də́ adə̄ ngé ngɔ̄m̄ kújə́ kə́ ngāl̄ ɓururu gə̄ mangən̄də́ kə nar kə́ asə sə́lē gində̄ arjā̰a̰ dūbú kutə sīrí. Lo ń nuū tə́ nin̄ əya̰n̄ ngé kə́rēý gə̄ dandə́ tə́ adə̄ teē a̰ȳn̄. 21Dan ń ədan̄ Makabe yá̰á̰ ń rāā yá̰á̰ ní anī, ni ɔsə dɔ ngol ɓūtə̄ áskar gə̄ kə̄ naā tə́, ba əndā najə̄ dɔ ngé gə̄ ń igən̄ kə ngákṵ́ṵ́də́ gēé ní tə́. Tɔdɔ̄ nin̄ əya̰n̄ madə̄ ba̰ā̰ ngákṵ́ṵ́də́ gə̄ adə̄ teē a̰ȳn̄ naā kɔ̄ɔ́ gír naraá. 22Makabe adə̄ ndūn kadə̄ tɔ̄lə̄n̄də́ kɔ̄ɔ́ tītə̄ ngé kigə kə madə̄də́ gēé beē, ba taā kújə́ kə́ ngāl̄ ɓururu kə́ jōó gə̄ ní kɔ̄ɔ́ kə̄ ta jī tə́ nuū. 23Rɔ̄ɔ̄ malang ń ni un dɔ ní, tɔ̄l̄ ta majə. Ni tɔ̄l̄ de gə̄ kə́ tɔȳn̄ dūbú kutə jōó ń nuū kem kújə́ kə́ ngāl̄ ɓururu kə́ jōó gə̄ ní tə́.
Judas tetə rɔ̄ɔ̄ kə́ Gajara
24Tá Timote ń Jipə gə̄ tetənən̄ rɔ̄ɔ̄ kété ní, ɔy áskar tə̄rā gə̄ kə́ kutədə́ i ngá̰ý ō, reē kə sə́ndá kə́ Aji tə́ gə̄ ngá̰ý ɔsə dɔdə́ naā tə́ ō, ba tél dɔ tə́ a reē kə̄ dɔ nang kə́ Jude tə́. Ni gír̄ taā ɓē ní kə rɔ̄ɔ́. 25Dan ń ni ugə̄ ngɔr anī, Makabe nin̄ kə de gə̄ yān gēé rāān̄ Nə́ɓā ɓɔ́. Nin̄ əgan̄ bumbə́ru kə̄ dɔdə́ tə́ ō, ədān̄ sákə̄ ɓōdə̄də́ tə́ ō, əhɔnə̄ń ndoō. 26Nin̄ ɔsən̄ nodə́ nang tə́ ta dabə tun̄ yá̰á̰ tə́, ba dəjen̄ Kɔ́ɔ̄ɓē kadə̄ rāā kem majə sedə́ ō, kə tél madə̄ ba̰ā̰ madə̄ ba̰ā̰də́ gə̄ ō, madə̄ kɔ̄l̄ madə̄ kɔ̄l̄də́ gə̄ ō, kə gō ń ndū najə̄ ədań adə̄ unjə̄ ngá̰ý ní. 27Dan ń nin̄ teēn̄ lo ndɔ̄ȳ tə́ anī, ɔȳn̄ yá̰a̰ rɔ̄ɔ̄ yādə́ gə̄ ba aw̄n̄ sa̰y ngá̰ý rɔ̄ ɓē tə́. Dan ń ugə̄n̄ ngɔr kə̄ rɔ̄ madə̄ ba̰ā̰ gə̄ tə́ anī, dəban̄. 28Dan ń mbang əɓa adə̄ lo unjə̄ anī, nin̄ ō, madə̄ ba̰ā̰ gə̄ ō, udən̄ naā tə́ rɔ̄ɔ̄n̄ naā. Jipə gə̄ əndān̄ kemdə́ i dɔ kəhɔ rɔ̄ tɔgə yādə́ tə́ yā tetəń rɔ̄ɔ̄. Ba kə́ ngá̰ý ɓá anī i dɔ Kɔ́ɔ̄ɓē tə́ kadə̄ dḭḭ̄də́. Banī madə̄ ba̰ā̰də́ gə̄ əndān̄ kemdə́ i dɔ wūn̄g yādə́ tə́ yā rɔ̄ɔń. 29Dan ń rɔ̄ɔ̄ udə kə̄ naā tə́ anī, madə̄ ba̰ā̰ gə̄ a̰a̰n̄ de kə́ majə ngá̰ý gə̄ mí teēn̄ dɔ rā̰ tə́, ndin̄ i gidə sə́nda gə̄ kə́ jámá kə́ tadə́ tə́ i kə́ rāā kə lɔ́rɔ́. Nin̄ i kété no Jipə gə̄ tə́. 30Nin̄ ənīn̄ Makabe dɔ dáńdə́ tə́ ba ngɔ̄m̄nən̄ kə yá̰a̰ rɔ̄ɔ̄ yādə́ gēé kadə̄ ənge do alé. Tá rāān̄ adə̄ man̄ tel̄ tītə̄ gərā kə́ kur beé kə̄ dɔ madə̄ ba̰ā̰ gə̄ tə́ adə̄ ndór̄ kumdə́. Madə̄ ba̰ā̰ gə̄ a̰ȳn̄ naā kə̄ lo gə̄ tə́ kə́ deē a̰a̰ gō madə̄n alé. 31Ngé rɔ̄ɔ̄ kə njadə́ gə̄ dūbú kutə jōó kə ɓú mí ō, ngé kal̄ sə́nda gə̄ ɓú mehḛ́ ō, i kə́ tə́jān̄ míndə́də́ kɔ̄ɔ́. 32Timote nəkɔ́ a̰ȳ aw̄ ɓɔ̄ɔ̄ rɔ̄n lo kógə̄ḿ kə́ ngan̄g kə́ ngɔ̄mə̄n̄ majə ngá̰ý tə́. A ɓārə́n̄ lo ní na i Gajara ō, i Kereyas n i nge kṵ ɓē dɔ tə́ ní ō. 33Banī Makabe nin̄ kə de gə̄ yān gēé tḭ̄ḭ̄n̄ rɔ̄də́ gīr̄nəń lo kə rɔ̄ɔ́ dɔ ndɔ̄ i sɔ́. 34De gə̄ ń ndin̄ kemeé ní, taān̄ kem kadə̄ yá̰á̰ kógə̄ḿ na a ɔdə rɔ̄də́ alé. Adə̄ asədə́ kɔr̄ najə̄ kə́ to ngonjə̄ gə̄ dɔ Nə́ɓā yā Jipə gə̄ tə́ aĺ ō, najə̄ kɔr̄də́ i najə̄ kɔr̄ de kə́ ngé rāā yá̰a̰ kə gō kem ndigə yā Nə́ɓāá aĺ gə̄ ō. 35Kə ndɔ̄ kə́ nge kṵ mí, dan ń mbang əndā dɔn anī, áskar yā Makabe kə́ balsáá gə̄ kutə jōó, wūn̄g asədə́ nák sɔɔ̄ń ngonjə̄ ń ngonjə̄n̄ dɔdə́ tə́ ní, adə̄ ənīn̄ ndogə̄ mbal̄ dɔɔ́ alə̄n̄ kə wurkilií. De gə̄ malang ń əsōn̄ kem jīdə́ tə́ ní, tɔ̄lə̄n̄də́ kə wūn̄g kə́ to tītə̄ yā dā̰ gə̄ beé. 36Kə́ madə̄ gə̄ alə̄n̄ tītə̄ yādə́ ba rə̄ngōn̄ rɔ̄də́ i gidə madə̄ ba̰ā̰ gə̄ ń gīrə̄n̄də́ ní tə́ n a rɔ̄ɔ̄nəńdə́ ní ō, tə́lan̄ hor dɔ kújə́ kə́ ngāl̄ ɓururu gə̄ tə́ ō, dɔ kīr̄ kə́ kán̄ dɔ naā tə́ gə̄ tə́ ō, ba ɓōkə́n̄ de gə̄ ń ngonjə̄n̄ dɔ Nə́ɓā tə́ ní kum tə́ kə kumdə́. Ngé kə́ kété gə̄ tétə̄n̄ ta róbə gə̄ adə̄ gotə áskar gə̄ udənə̄ń ō, i nin̄ n taān̄ ɓē kété ní ō. 37Nin̄ əjan̄ míndə Timote ń aw̄ ɓɔ̄ɔ̄ rɔ̄n kem bəlo taā man̄ ndī tə́ ní ō, əjan̄ míndə́ ngōkṵ́ṵn Kereyas nin̄ kə Apolopan naā tə́ seneé ō. 38Gō yá̰á̰ kə́ rāā lo go̰ tə́ gə̄ ń toō ɓá anī, nin̄ ənīn̄ pā rɔȳnəń Kɔ́ɔ̄ɓē ō, tɔ̄ȳnəń Kɔ́ɔ̄ɓē ō. Tɔdɔ̄ ni rāā majə ngá̰ý kə Israel gēé ō, rāā adə̄ nin̄ tetən̄ rɔ̄ɔ̄ ō.
Bibəl ta Sar̄ © L'Alliance Biblique du Tchad, 2006, 2010.