Luka 6
6
Ruu hɨnɛ ayuu lee susunɛ
1A lee susunɛ Yesɔ u ɗɔɔ tɛɛnɛ a dɔjaa. U jadɔyi kaki shɔ yuu vishaa, i kpãã a naa, i shaarɛ. 2Shɔ farasiya gãsiyi i hɨnɛ, <<Aru ivi ɔ pɛli vigbete nya ãsinɛ zãritɔ a lee susunɛ viya?>>
3Yesɔ kasiyinya nɛ, <<Ɔ jo ɓali vigbete Dauda pɛliyɛ a ɗagbete i nta nwo a shɔbiiyini ɓaya? 4To wɛrɛ Ɗa a tuu borodi gbete shɔ ã Ɗalapa yɛ a shaarɛ, a ã u shɔ dɔɔranɛyi rɛjo. Shɔm ma nyaãsinɛ zãritɔ see shɔlansi ikɔyi shaarɛ sheeli.>> 5Kɛɗɔn Yesɔ sɔ̃ri nya ruunɛ, <<Jashɔzɛ Uɓeyelapa ukɔ ɔ̃rɛ lee susunɛ.>>
Yesɔ gati jaa gbete au naa vɔyɛ
6Sɔ̃n a lee susunɛ wɔɔ Yesɔ yɛrɛ a mati shɔvi aɗɔgbete shɔ Yahudawayi i toli nya i nwa ruu aɗɔn. Jawɔɔ siɗɔn gbete u nakɨn vɔtɔ. 7Shɔmala nya ãsinɛ a farasiyayi gãsi i kã nyaɓa Yesɔ sãnɛ nɛ ji pɛliɓa vi ntoɓa, i taa nɔɔ au bi nɛi zɛkɨn ko yɛ gati shɔ kati a lee susunɛ niya. 8Ama Yesɔ zɛyi sisɨntɔ a geli jau nɛ,<<Yulapanɛ a apɛ ɗekɨn mi.>>Jau yuurɛ a shirɛ a ɗɔuni. 9Kɛɗɔn Yesɔ geliyinɛ, <<N hɨ ɔ pɛ: Nya ãsinɛ shanɛ u pɛli ivi a lee susunɛni viya? Nya ãsinɛ kasinɛ shɔu pɛli vitɔ̃vɨng ya ko shɔu lɛsitɔya? Shɔu raa shɔ suruya ko shɔu nyɔtɔ?>> 10A kɨn nɔɔ ai bi piti kpai, kɛɗɔn a geli jau nɛ,<<Gɨn naa nɛ.>>Jau pɛlirɛ, u naa gati sɔ̃nrɛ.
11I sisɨn lɛsi waanɛ i gaakɛ nyaba kãnɛ vigbete iyɛ pɛli a Yesɔni.
Yesɔ lɔu jashonɛ kopi atu ziti
12A ɗawuni Yesɔ gɛ̃kɛ kɔpɔ lapa ɗɔ Ɗa gakinɛ zɨzɨ dii gbɛɛsɛ. 13Naa dii kaatɛ, a ɓaa u jadɔyi nya a zɔ̃ kopi atu ziti ai tetteni, a ɓai nii nɛ jashonɛyi: 14Siman gbete baunɛ Bituru a ɓɛzɔ̃ Anduru, Yakubu, Yɔhana, Filibu, Batalomi, 15Matiyu, a Toma, a Yakubu Alifa ɓɛjaa a Siman shɔgbete ɔrinɛ u tipiu kpaa ɔ̃nɛ yuu, 16Yahuda Iskariyoti Yakubu ɓɛjaa a Yahuda Isikariyoti au mɛli Yesɔ yɛ.
Yesɔ mati shɔvi a gati shɔ
17Naa Yesɔ notɛ a yukɔpɔ au jashonɛyini, a shikɛ aɗɔ wati au jadɔyini waanɛ. Mɔɔ waanɛ gbete i ali a tipi Yahudiya a koomɔɔ Urushalima wɔyi shɛ a tipi Taya a Sɔdom gbete maani a nya waponi: 18I arɛ nɛ i nta ruu a Yesɔ nya wɔɔ aru u gatiyi vɔrɔ abi, shɔgbete suru kɔ̃linɛ pɛli waanɛ i au ɗɔbii a gatirɛ. 19Shɔ piti i kasinɛ i ɗiu naa bi, kaka gbete shovi awuni yɛ shɛ au bi a gatiyirɛ piti kpai.
Binyatɔ̃nɛ a sisɨn vɨri
20Yesɔ kn nɔɔ au jadɔyi bi a shanɛ,
Vɔu tasɔɔ susãri biini shɔraayi;
kpati roonɛ a Ɗa wɛrɛ ɔ ɓɛkɔ!
21Vɔu tasɔɔ susãri biini shɔgbete i nta nwo dɔdɔrim;
a ɗekɨn ɔ yɛ putɔ!
Vɔu tasɔɔ susãri biini shɔgbete ɔ ɗɔ sɨnɛ dɔdɔrim;
aru ɔ yɛ latitɔ ɗekɨn ni!
22Vɔu tasɔɔ susãri biini naa shɔji kasɔ ruubii ɓa, shɔkɛ ɓɛ̃ɛ ɔ ruubiinɛ, shɔkɛ dãwɔnɛ, shɔkɛ shanɛ nɛ ɔ shɔ kɔ̃linɛ aru n yuu shɔzɛja!
23Ɔ nta yɛti purutɔ shɔkɛ pɛlɔɔnɛ nankɔ, ɔ sasa a sisɨn puru, aru Ɗalapa pɔ̃sɔɔ vitɛ pẽniɓa a kolapa. mɛuruyi i pɛli Ɗa jashonɛyi sijo nankɔ.
24Ama gɨn kɔnɛ ɗɔn ɓuruni shɔgbete ɔ vinaa ɗɔn dɔdɔrim,
ɔ nta tɔ̃vɨntɛ gboti!
25Gɨn kɔnɛ ɗɔn shɔgbete ɔ putɛ dɔdɔrim;
aru nwo yɛ sɨwɔtɔ!
Gɨn kɔnɛ ɗɔn shɔgbete ɔ ɗɔɔ latinɛ dɔdɔrim;
ɔ yɛ lɛritɔ waanɛ sɨnɛni!
26Gɨn kɔnɛ ɗɔn shɔkɛ bɛlɔɔnɛ piti kpai; aru mɛuruyi i pɛli janyagadi nyayelinɛ si jo nankɔ.
Shɔnopɔ̃yi ɔrinɛ
27Ama n gelɔɔtɛ shɔgbete ɔ wesho a nyam: ɔ ɔri ɔ shɔnopɔ̃tɔ, ɔ pɛli shɔgbeteyi bẽẽ ɔ ruubii vitɔ̃vɨngtɔ, 28ɔ tasi shɔgbete i wirɔɔ yɛ vɔɔ susãri biini, ɔ gaki shɔgbete i tasɔɔ raayɛ i Ɗa tɔ. 29Shɔgbete kɛ wāànɛ a kashinya, a tesiu kawɔ sɔ̃n u wāà sɔ̃nrɛ ɗɔn tɔti; shɔu kɛ raa fãrã bizunɛ nɛ a ãu a fãrã tosinɛ sɔ̃n tɔti. 30Shɔgbete kɛ gaki vinɛ aa naa a ãutɔ, naa shɔgbeteu kɛ tuu a vinɛ, mokɔ hɨnɛ toti. 31Pɛli shɔ jo vigbete a kasinɛ shɔu pɛlaayɛ.
32Akɛ ɔrinɛ shɔgbete ai ɔraayɛ, ɔ tɛɛ vɔɔ susãri kɛpi aru viya? Ko shɔ ruuviniyi ma i ɔri shɔgbete ai ɔriyɛ tɔ! 33Akɛ pɛli vitɔ̃vɨng nɛ shɔgbete ai pɛlaayɛkɔ sheli, ɔ tɛɛ vɔɔ susãri kɛpi aru viya? Ko shɔruuvini ma i pɛlitɔ nankɔ ni! 34Ɔ kɛ kɔ̃si vinɛ shɔgbete ai yɛ sɔraa yɛ ko sheli, ɔ tɛɛ vɔ susãri kɛpi aru viya? Ko shɔruuviniyi ma i kɔ̃si jo shɔgbete ai sɔriyi nɔgbete ai tɛsiyɛ! 35Ama ɔ ɔri ɔ shɔ nopɔ̃yitɔ, ɔ pɛliyi vitɔ̃vɨng; ɔ kɔ̃siyi vitɔ ɔ kã sɔrinɛɓa. Kɛɗɔn ɔyɛ kpa vigbete Ɗalapa pɔ̃sɔɔyɛtɔ, ɔyɛ ɔ̃ Ɗalapa kiriri jaa. Aruviya Ɗalapa pɛli shɔgbete i dɔ̃ri ɓayɛ tɔ̃vɨntɔ a shɔ fooyi ni. 36Ɔ ɔ̃ shɔ -shɔraa ntanɛ naa ɔ Uɓeyelapa nta shɔ raayɛ.
Ɔkɔ yeeri shɔ ruunɛ yuu
37Ɔ kɔ yeeri shɔ ruunɛ yuu, ɔkɔma Ɗalapa yɛ yeerɔɔ ruu ɓa yuuni ɓa; ɔkɔ tɔnɛ shɔwɔnɛ u shɔ ruuvini, Ɗalapa ma sha ɓa nɛ ɔ shɔ ruuvini ɓa; Ɔ yasi shɔ ruuvinitɔ, Ɗalapa ma yɛ yasɔɔ jo. 38Ã shɔ vitɔ, Ɗalapa yɛ ãwɔ sɔ̃njo. Ɔ waa vimanɛ shɔyɛ yisɔɔ lot, yɛ tɛ̃ɛ̃ gãsi a ɓili, shɔ yɛ tɛ̃rɔɔ wɔ a naa nɔgbete ɔ yɛ sã yɛ. <<Waa vimanɛ gbete ɔ masi shɔvi awuni, Ɗalapa yɛ masa sɔ̃njo a ukɔ.>>
39Yesɔ geliyi ruuɓusinɛ shɔm nɛ, Shɔ nɔgbãti yɛ sãri shɔ nɔgbãti wɔ laba ɓa; ko kɛ pɛlinɛ i yɛ tɛ̃ɛ a to. 40Javimatinɛ yɛ tɛɛ shɔmala ɓa; ama javimatinɛ kɛ yisi vimatinɛ nɛ yɛ ɔ̃ kɛ naa u shɔmala.
41A zɛ jaa laa pɛ̃tɛ̃rɛ̃ pi kovi a mɛzɔ̃u nɔɔ, ama aji zɔ̃ laa gbete pẽniba aa nɔɔm ɓa viya? 42A yɛ geli mɛzɔ̃u pi kovi nɛ,<<Sokɔ, mazɔ̃ n zɔ̃sa jaa laa pɛ̃tɛ̃rɛ̃ pɛ aa nɔɔ,>> ama a ɓɛɛ a nɔɔ pẽniba aji zɛɓa? Shɔ -shɔ ɗakinɛmiyi! Ɔ gaa zɔ̃nɛpɛ laa pɛ̃niɓa gbete awɔ nɔɔmi, n ɗa ɔ kpa ɗɔ zɛnɛ kɨn tɔ̃vɨn a zɔ̃si mɛzɔ̃u ɓɛɛ kɛkɨn.
laa au jaa
43<<Laa tɔ̃vɨn yee jaa foo ɓa, ko laa kɔ̃linɛ u yee jaa tɔ̃vɨn ɓa.>> 44Kopi laa gbete piya shɔ zɛu nii jo au jaa gbete yeeyɛ a hã sɨnti ɓa a kɔkɔni ɓa ko laa shaanɛ a bi kɔkɔ ɓa. 45Shɔ tɔ̃vɨn ntijo vitɔ̃vɨng au ɗɔ visɨnɛ gbete au sisɨn, shɔ foo ntijo vifoo au ɗɔ visɨnɛ ni. Aru viya nya shajo vigbete shɛ a sisɨn yɛ.
Shɔ kpẽnɛ a shɔrãn ɗɔ manɛyi
46<<Ɔ ɓaa nya nɛ ivi <Uɓeyelapa, Uɓeyelapa viya,> ɔ pɛli sɔ̃nɓa vigbete n gelɔɔyɛ ɓa? 47Shɔgbete kanɛ ang ɗɔbii kɛ wesho nɛ vigbete n geliuyɛ kɛ gɨnnɛ, N yɛn tasɔɔ nɔgbete ɔ̃yɛtɔ. 48U naa shɔgbete au, gɨn dojaa, a gbã a dii gbikiri-gbikiri a gaa manɛrɛ ayuu tari. Mii lɔrɛ waa ɗɔurɛ ji zɨtiɓa, aru viya maa ɗɔu aɗɔ tɔ̃vɨn. 49Ama shɔgbete kɛ wesho nɛ ang nya ji gɨn n nyaɓa u naa shɔgbete au maa wɛrɛ, jo gbã dɔjaa gbikiri-gbikiri ɓayɛ; naa miikɛ lɔnɛ kɛ waa wɛrɛunɛ yɛ zɨi kɛtɔ yɛ sãki ɗette-ɗette!>>
Currently Selected:
Luka 6: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
