Luka 3
3
Yɔhana shɔ Batizima ãnɛ nyawaanɛ
1Si kpati Tibariyo roo kpatitɛ saa kopi tu maani kpati pẽniba; kayisa Bilatu usi gɔmna Yahudiya, Hiridu usi sɔ̃njo gɔmna a Galili, ɓezɔ̃ Filibu u sɔ̃njo gɔmna Ituriya a tipi Tirakoniti. Lisaniya usi pɛ gɔmna tipi Abilen, 2Ana a Kayifa ikɔ ɔ̃rɛ yupɛ̃ni shɔlansi pɛ̃niba, a ɗauni Ɗalapa nyaruubii a si Yɔhana Zakariya ɓɛɛ jaa u si ɗɔpɨnsi. 3Kɛɗɔn Yɔhana zaa nya ɓooti Urudu piti kpai, u ɗɔ Ɗa nya ruubii waanɛ nɛ<<Ɔ yaa ruuvini pɛlintɔ Ɗalapa yɛ yasɔɔ ruuvinitɔ shɔu pɛlɔɔ Batizima.>>
4Nagbete Ɗa jashonɛ Ishaya labeenɛ shayɛ:
<<Shɔwɔ ɗɔn u ɗɔ nya ɓaanɛ a ɗɔgbete laa ɓa ɗɔmɓa shanɛ:
<Ɔ tɔ̃ri Ɗalapa nyaba nɛ, ɔ kɔriu ɗɔ tɛnɛ,
ɔ shiritɔ gbororo nɔgbete yɛ tɛɛ aɗɔnyɛ.>
5Ko-pi too gbete piya shɔu gɔlitɔ.
ko-pi kɔpɔ pɛ̃tɛ̃rɛ̃ shɔpiya a kɔpɔni pɛ̃niba shɔu sãkitɔ piti kpai.
nyaba walinɛ gbete shɔ sɔɔ toti bayɛ shɔ tɔ̃ritɔ gbororo,
ɗɔ gɔgɔlɔki shɔu yikitɔ,
6Shɔzɛ a lakoo piti kpai i yɛ zɛ Ɗalapa shɔraanɛtɔǃ>>
7Moo shɔzɛ i a Yɔhana ɗɔbii neu pɛliyi Batizima. A geliyinɛ<<Jasɔɔ miyi! Pi gelɔɔ pi nɛ ɔ yɛ ranaatɔ a raboonɛ gbete Ɗalapa kɛ n ti nɛm piya? 8Ɔ pɛli jo vigbete au yɛ tasinɛ ɔ yaa ruuvinitɛ. Ɔ yaa shalinɛ nɛ awɔ nɔɔ nɛ Ibirayi upɛ uɓeye. N gelɔɔtɛ Ɗalapa yɛ tuu tarim dɔɔtɔ u risi Ibirayi jawuriyiǃ 9Shɔ pɔ̃ nya kpalitɛ a dɔɔ gɨnri laa; nɛn ɗanɛ lagbete au ji rɛɛ jaa ɓa nɛ shɔu kɔrɛ shɔu lɔki yaa.>>
10Kɛɗɔn mɔɔyi hɨunɛ, u yɛ pɛli kɛpikoviya?
11Yɔhana kasi nyanɛ, <<Shɔgbete au visinbii kɛ ɔ̃nɛ ziti ɔ̃riutɛ kaka jazɨng akɔrɔ u ã shɔwɔjo gbete au ɓa awuni ɓa yɛ, shɔgbete u vishaanɛ a ɗɔnni i vɔsitɔ a shɔgbete au ɓɛɛ ɓayɛ.>>
12Shɔ saa bɛnɛ i a sɔ̃njo nɛu pɛliyi Batizima. i hɨunɛ,<< Shɔmala, u yɛ pɛli kɛpikoviya?>>
13Geliyinɛ,<<Ɔkɔɔ tɛnɛ saa nɛ u tɛɛ vigbete shɔ tɔnɛ ɔ tɛyɛ.>>
14Shɔ diimanɛ gãsiyi i hɨu sɔ̃njo nɛ, <<Ukɔ fa? U pɛli ɓɛɛ kɛpikoviya?>>
A geliyi nɛ, <<Ɔkɔɔ tɛ saa nɛ a shɔ naa a kaka ko ɔ yeeri shɔ nya ayuu nɛ lɛsi ruutɛ. Ɔ pɔ̃ sisɨn jo avigbete shɔ shorɔɔyɛ.>>
15Shɔzɛ piti kpai i tɛɛ sisɨn nɛ, Yɔhana kɔ yɛ ɔ̃ kirisi ya? 16Kɛɗɔn Yɔhana geliyi piti kpai nɛ, <<N pɛlɔɔ Batizima a mii, ama shɔwɔ kanɛ ang knti gbete tɛnttɛtɔ a kakani. N ji yɛɓa nɔgbete n kaliu rii kodɔɔ yɛ ɓa. U kɔ yɛ pelɔɔ Batizima a Ɗa suru wɔsɔ̃n a yaa. 17U sikɨn a naani, yɛ deri gãri viu u wɛsi a ɓili u tɛ̃u nɔɔ a mbuntɛ; ama yɛ too gãri vi a yaa gbete niki ɓayɛ.>> 18Yɔhana nwari shɔ ruu tɔ̃vɨn a nyaba tottot nɛ shɔu ya ruuvini pɛlinɛtɔ.
19Ama Yɔhana mari kpati Hiridu tɔ, aru Hirodiya ɓɛzɔ̃ ɓeso au tɛyɛ a vikɔ̃linɛ gbete pɛliyɛni piti kpai, 20kɛɗɔn Hiridu pɛli vikɔ̃linɛ gbete au tɛɛ kaka ruugbete au maa Yɔhana a jaahm.
Yɔhana pɛli Yesɔ Batizima
21Akɨnti gbete Yɔhana pɛli shɔ Batizimatɛ piti kpai, Yesɔ ma Yɔhana pɛliu Batizima sɔ̃njorɛ. Yesɔ u si ɗɔɔ Ɗa gakinɛ see kolapa ɓɛlirɛ, 22Ɗa suru no au yuu naa koro. Shɔ nta yee nya shɛ a kolapa nɛ, << Mɔkaa n jaa ang yɛti ɔriyɛ, n nta sisɨn purutɛ a mokɔni waanɛ>>
Yesɔ laduru
23Aɗagbete Yesɔ gaa vishɔnɛ, usi mɛnɛ saa bmati atu kopi (30). Usi wujaa, shɔ tunɛ neu pɛ Yusufu jaa, shɔgbete upɛ Heli jaa, 24Heli u Matthat jaa, Matthat u Leewi jaa, Leewi u Milki jaa, Milki u Janayi jaa, Janayi u Yusufu jaa. 25Yusufu u Matatiya jaa, Matatiya u Emo jaa, Emo u Nahum jaa. Nahum u Azaliya jaa, Azaliya u Najaya jaa. 26A Najaya u Mahata jaa, Mahata u Matatiya jaa, Matatiya u Shimeya jaa, Shimeya u Yusufu jaa, Yusufu u Yahuda jaa. 27A Yahuda u Yuwana jaa, Yuwana u Resa jaa. Resa u Zerubabe jaa, a Zerubabe u Shalitiyel jaa, Shalitiyel u Neri jaa. 28A Neri u Meliki jaa, Meliki u Adi jaa, Adi u Kosam jaa, a Kosam u Elimadam jaa, Elimadam u Eri jaa, 29a Eri u Joshuwa jaa. Jashuwa u Eliyiza jaa. Eliyiza u Matata jaa. Matata u Leevi jaa. 30Leevi u Simiyon jaa. Simiyon u Yahuda jaa, Yahuda u Yusufu jaa. Yusufu u Jonam jaa, Jonam u Eliyakim jaa, Eliyakim u Maliya jaa. 31Maliya u Mena jaa, Mena u Matata jaa, Matata u Natang jaa, Natang u Dauda jaa, 32Dauda u Jessi jaa. Jeesi u Obida jaa, Obida u Buwaza jaa, Buwaza u Salamuna jaa, Salamuna u Nashong jaa, 33Nashong u Aminada jaa, Aminada u Adi jaa, Adi u Arama jaa. Arama u Heziron jaa, Heziron u Periza jaa, Periza u Yahuda jaa, 34Yahuda u Yakubu jaa, Yakubu u Ishayaku jaa, Ishayaku u Ibirayi jaa, Ibirayi u Tera jaa. Tera u Nashɔn jaa, 35Nashɔn u Saruja jaa. Saruja u Riyu jaa , Riyu Pelek jaa, Pelek u Eba jaa. Eba u Sheela jaa, 36Sheela u Kaana jaa. Kaana u Arafasa jaa. Arafasa u Sheem jaa, Sheem u Nuhu jaa. Nuhu u Lamek jaa, 37Lamek u Mɛtusela jaa, Mɛtusela u Nuhu jaa. Nuhu u Jared jaa, Jared u Mahalale jaa, Mahalale u kaana jaa. 38Kaana u Enosh jaa, Kaana u Shiitu jaa, Shiitu u Adamu jaa, Adamu u Ɗalapa jaa.
Currently Selected:
Luka 3: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
