Yɔhana 14
14
Yesɔ kɔ ɔ̃rɛ nyaba yɛnɛ ɓeye ɗɔbii
1Yesɔ geliyi nɛ, <<Ɔkɔɔ yɔri yuunɛ, ɔ ã sisɨn a Ɗalapa bi wɔsɔ̃n ang bi. 2Jàá aɗɔn waanɛ a maye wɛrɛni, n yɛn yɛrɛ n tɔ̃rɔɔ ɗɔɔ ɔ̃nɛ tɛlɛ, si ɓa ɗɔkɔ ɓa n si gelɔɔtɛ. 3Akɨnti gbete nkɛ tɔ̃rɔɔ ɗɔɔ ɔ̃nɛ nɛ, kɛɗɔn n sɔɔrɛ n tuurɛ ang yuu, aru ɗɔgbete n a ɗɔnmi ɔ ɔ̃ji ɗɔukɔ. 4Ɔ zɛ nyaba ɗɔgbete n yɛ tɛttɔ.>>
5Kɛɗɔn Toma geliu nɛ, <<Uɓeyelapa u ji zɛ ɗɔgbete a yɛ yɛyɛ ɓa; u yɛ zɛ nyaba yɛnɛ ɗɔu kɛpikoviya?>>
6Yesɔ kasiunya nɛ,<<Nkɔng ɔ̃rɛ nyaba, a tɔ̃vɨn ãnɛ, nkɔng sɔ̃n suru; shɔwɔɔ ɓa ɗɔnni ɓa gbete yɛ to maye ɗɔbii rɛ setɛ sɔɔtɛ n ɗɔbii. 7A geliyi nɛ, nagbete ɔ zɛnɓankɔ, ɔ yɛ zɛ maye sɔ̃njo, yunɛ dɔdɔrim yɛnɛ ɗekɨn ɔ zɛutɛ, ɔ zɛu sɔ̃ntɛjo awɔ nɔɔ.>>
8Filibu geliu nɛ,<<Uɓeyelapa, tasiu meye pɛ; Vigbete u kasiyɛ.>>
9Yesɔ kasi Filibu nya nɛ,<<N ɔ̃tɛ a ɔkɔɔni tɛ̃ɛ̃tɛ̃ɛ̃ piti kpai; anɛ dɔdɔrim ɔ ji zɛm ɓa ya Filibu? Shɔgbete kɛ zɛnnɛ, si zɛ mayetɛ. Kɛ ruu-ivi a tɔnɛn tasaa maye pɛ viya? 10Filibu a ji ã sisɨn ɓaya? Nɛ n a maye yɛti ɓuzɨn, maye sɔ̃nji ang yɛti ɓuzɨn ɓa ya?>> Yesɔ geliu jaɗɔɔyi nɛ, <<Ruu gbete n gelɔɔ yɛ, ji shɛ ɓa ang ɗɔbii ɓa, maye gbete u ang yɛti ɓuzɨn ukɔ pɛliu vishonɛrɛ ang bi. 11Ɔ ã sisɨntɔ ang biini, naa nkɛ gelɔɔ nɛ n-tɛ n a Maye yɛti ɓuzɨn, Maye sɔ̃nji ang yɛti ɓuzɨn. n ɓa ɗɔkɔɓa, ɔ ã sisɨn aru vishɔnɛ gbete n pɛliyɛ. 12Shɔ gbete kɛ ã sisɨn nɛ ang biini yɛ pɛli vishonɛ gbete n pɛliyɛtɔ nn, i yɛ pɛli vigbete tɛɛ shɔmtɔ aru n yɛkɛ maye ɗɔbii. 13Vi gbete ɔ kɛ gakinɛ ang nii n yɛn pɛlitɔ aru nɔgbete shɔu tasi maye bassinɛ a Ɓɛɛ jaa bi. 14ko-iviya ɔ kɛ gakinɛ ang nii, n yɛn pɛlitɔ.>>
Rumanɛ Aru Ɗa Suru Anɛ
15Ɔ kɛ ɔrinnɛtɔ, ɔ yɛ gɨnn nya-ãsinɛtɔ. 16N yɛn gaki Maye, yɛ ãwɔ shɔ naapɔ̃sinɛtɔ wɔɔtɔ, gbete yɛ ɔ̃ a ɔkɔɔni dangdang. 17Ukɔ pɛ Suru shɔ gbete yɛ tasɔɔ ruu tɔ̃vɨn ayuu Ɗalapa. Shɔ kootipi yɛ tɛu naa ɓa, aru i yɛ zɛu ɓa nɔni ɓa, ko i zɛurɛ. Ama ɔ zɛutɛ aru u ɗɔɔ ɔ̃nɛ a ɔkɔɔni, u awɔ bikɔ.
18Nkɛ yɛnɛ, n yɛn yawɔ ɓa naa javɔni ɓa, n kɛ yɛnɛ, n sɔɔtɔ awɔ ɗɔbiini. 19Yaatɛ pẽtẽrẽ kootipi yɛ zɛm tɔɓa, ama ɔ yɛ zɛm ɓɛɛtɔ; aru n a suru ni, ɔkɔɔma ɔ yɛ ɔ̃ sɔ̃njo a suruni.
20Naa leu kaanɛ, ɔ yɛ zɛtɔ nɛ n a mayɛ sisɨn, ɔ sɔ̃nji ang sisɨn, ji naa gbete n awɔ sisɨn yɛ.
21<<Shɔ gbeteyi i kɛ tɛng nya-ãsinɛ nɛ, ai gɨnrɛ i ɔkɔi ɔ̃rɛ shɔ gbeteyi i ɔrintɔ. Maye yɛ ɔri shɔ gbete i ɔrin yɛtɔ, n kɔma n yɛn ɔriyitɔ n tasin yuutɔ ai biini.>>
22Kɛɗɔn Yahuza (ɓa Yahuza Isikariyoti ɓa) shanɛ, <<Uɓeyelapa aru ivi a yɛ tasaa yuu au ɗɔbii, ama ɓa shɔ kootipiyi ɓa?>>
23Yesɔ kasiu nɛ, <<Shɔgbete kɛ ɔrinnɛ gɨn n vimatinɛtɔ, Maye yɛ ɔriitɔ, Maye a nkɔni u yɛu arɛ u ɔ̃ ayini. 24Shɔgbete ji ɔrin ɓa, gɨn vigbete n matiyɛ ɓa. N vimatinɛ gbete ɔ ntayɛ ɓa n ma ɓa, ama shɛ a Maye ɗɔbii, gbete shonyɛ.>>
25N gelɔɔ vim kpai sin doo a ɔkɔɔni. 26Ama shɔnaapɔ̃sinɛ, Ɗa Suru, gbete Maye yɛ shoyɛ ang nii, yɛ matɔɔ vi kpai, u kpaarɔɔ sisɨn a vigbete n gelɔɔ ɓanni kpai.
27Vi gbete n yasɔɔyɛ ukɔ ɔ̃rɛ ɔ̃nɛbiinyatɔ̃nɛ; n ãwɔ pɛ n ɔ̃nɛbiinyatɔ̃nɛ, n ji ãwɔ ɓa nagbete kootipi ãyɛ ɓa. Ɔkɔɔ nta yukɔnɛnɛ, ɔkɔɔ nta setinɛ. 28Ɔ nta tɛttɔ n gelɔɔ n-tɛ, n yɛn yɛtɔ, ama n yɛn sɔɔ ɔ ɗɔbiitɔ. Ɔ kɛ ɔrinnɛtɔ, ɔ yɛ nta yɛti purutɔ nɛ n yɛn yɛkɛ ɗɔɔ Maye ɗɔbii; aru Maye tɛɛn tɛttɔ. 29Dɔdɔrim n gelɔɔ vimtɛ kpai aɗagbete ji gaa pɛ̃nɛ̃ɓa, aru kɛ pɛlinɛ, ɔ yɛ ã sisɨntɔ 30N yɛn nwanya dɔkɔkɔ tɔɓa a ɔkɔɔni ɓa, aruviya yɛ ɔ̃ ɓa ɗɔkɔkɔni ɓa kpati kotipim akɛtɔ. U kaka ɓa ang yuuni ɓa, 31ama ɔ̃rɔɔtɛ kaka jazɨng akɔrɔ kootipi u zɛtɔ nɛn ɔri Mayetɔ; arumkɔ n pɛli vigbete ãsinnya nɛn pɛliyɛ kpai.
<< Ɔ yunɛ u yaa ɗɔmrɛ.>>
Currently Selected:
Yɔhana 14: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
