Yɔhana 11
11
Liyazaro Vɔnɛ
1Jawɔɔ siɗɔn u niinɛ Liyazaro, u si vɔrɔ a Betani. Betani ukɔ ɔ̃rɛ koomo ɗɔgbete Mariyamu a ɓɛzɔ̃ Marita i ɗɔnyɛ. 2(Mariyamu si ji ukɔ su gbete pmri Uɓeyelapa nɔɔ sũrũ-sũrũ a bi a dɔɔni piti a sɔ̃li au suyu, si ji ɓɛnaakɔ Liyazaro u vɔrɔ. 3Kɛɗɔn ɓɛnaayi i sho shɔwɔ nɛu geli Yesɔ ayuu Liyazaro nɛ: <<Uɓeyelapa, mɛsau gbete a ɔriuyɛ u vɔrɔ>>
4Naa Yesɔ ntatɛ a shanɛ,<<Liyazaro vɔrɔm a kɨntiuni kpai yɛ vɔ ɓa, ama vim ɔ̃ nankɔ aru shɔu bassi Ɗalapa nii, a nyabankɔ Ɗalapa jaa yɛ kpaa basinɛrɛ.>>
5A shomni piti Yesɔ ɔri Marita tɔ a ɓɛzɔ̃ wujaa Mariyamuni wɔsɔ̃n a Liyazaro ni, 6ama naa Yesɔ ntatɛ nɛ Liyazaro u vɔrɔ, kɛɗɔn ɔ̃rɛ a ɗɔgbete u si ɗɔnyɛ dɔɔ ziti.
7Kɛɗɔn a geli u jadɔɔyi nɛ,<< U sɔɔ tipi Yahudiyanɛ.>>
8U jadɔɔyi i kasinya nɛ,<<Shɔmala, ji dii zitinkɔ shɔ tɔnɛ shɔ loraa a tari a ɗɔwakɔ; a kã sɔ̃n ɗɔukɔ sɔɔnɛ ya?>>
9Yesɔ shanɛ,<<Ɓa niti gbete dɔɔɗa kɔsinɛ kopi tu ziti ɓaya? Kopiya kɛ ranɛ atette niti kpai kɔdɔɔ ɓa, aru i ɗɔgbete i zɛ ɗɔsẽsẽ a koo. 10Ama ikɛ ranɛ a zɨmba i yɛ kɔdɔɔtɔ, aru ɗɔsẽsẽ gbete shɔ zɛ ɗɔɔ ɓa.>>
11Yesɔ sha vim a gai gelinɛ nɛ,<<U ɓɛusa Liyazaro roonɔrɔtɛ, ama n yɛn yɛrɛ n yusiu lapatɔ.>>
12U jadɔɔyi i kasinya nɛ,<<Kɛ ɔ̃nɛ a nɔrɔ Uɓeyelapa yɛ gatitɔ.>>
13Yesɔ nwanya ɓɛjo aru Liyazarɔ vɔnɛ, ama i ji zɛkara ɓa, i tɔɔɓɛjo nɛ Yesɔ sha nɔrɔ roonɛ nizɛm.
14Kɛɗɔn Yesɔ hãsiyi ruukɛ baras nɛ,<<Liyazaro vɔtɛ, 15N nta sisɨn purutɛ aru n ɓa Liyazaro ɗɔbiini ɓa awɔ yuu, nɔgbete ɔ yɛ ã sisɨn yɛ. Ama u yɛu ɗɔbiinɛ.>>
16Tooma (gbete shɔ ɓaunɛ jabɔ̃) geli ɓɛzɔɔ Yesɔ jadɔɔyi nɛ,<<U yɛnɛ a shɔmalani a ɗɔzɔ kpai, nɔgbete shɔ yɛ nyou jo awuni a ɗɔzɔ yɛ!>>
Yesɔ Kɔ Ɔ̃rɛ Yunɛ A Sàà A Suruni
17Naa Yesɔ to ɗɔutɛ kpaarɛ si shɔ gbã Liyazaro tɛ rootɛ a sàà lee nɛ̃ɛ̃ti. 18Yuunɛ a Betani yɛnɛ Urushalima si mɛnɛ kilomita taati, 19Shɔ Yahudiya i waanɛ i a ɗɔɔ Marita a Mariyamu nyaavɔ geenɛ aru ɓɛnaa Liyazaro vɔnɛ. 20Naa Marita ntatɛ nɛ Yesɔ kaanɛ, a yɛu ɗɔɔ kpaanɛrɛ, ama Mariyamu ɔ̃ ɓɛɛjo a yɛti wɛrɛu kɔ.
21Marita geli Yesɔ nɛ, <<A si ɗɔnni Uɓeyelapa, manaa si ji vɔ ɓa! 22Ama n zɛ tɛttɔ ko dɔdɔrim vi gbete a kɛ gaki Ɗalapa nɛ yɛ ãatɔ.>>
23Yesɔ geliu nɛ,<< mɛnau yɛ yuu sɔ̃ntɔ a suruni,>>
24Marita risinya nɛ, <<N zɛ tɛttɔ yɛ yuutɔ a suruni alee gadi.>>
25Yesɔ geliu nɛ,<< Nkɔng ɔ̃rɛ yuunɛ a sàà a suruni. Shɔ gbeteyi kɛ ãsisɨn nɛ ang biini ko i vɔtɛ i yɛ yuu sɔ̃ntɔ a suruni; 26kopiya gbete u suru aɗɔn kɛ ã sisɨn nɛ ang biini yɛ vɔ ɓa dangdang. A ã sisɨn tɛ ya?>>
27Marita kasinya nɛ,<<Nn, Uɓeyelapa! N ã sisɨn tɛttɔ mɔkaa pɛ Shɔshɔranɛ, Ɗaalapa jaa, shɔ gbete yɛ arɛ a koo.>>
Yesɔ sɨnɛ
28Akɨnti gbete Marita sha vimtɛ, a sɔɔrɛ a ɓaa ɓɛzɔ̃ Mariyamu nya kagbete a geliu nɛ, <<Shɔmala u yɛm, u ɗɔgbete u hɨ a ruubii yɛ.>> 29Naa Mariyamu ntatɛ nankɔ, yulapa a pɛli gbãgbã a yɛu ɗɔbiirɛ. 30(Si Yesɔ ji to jakoomɔu pɛ̃nɛ̃ɓa, ama u si doo ɗɔgbete Marita kpaauyɛ.) 31Shɔgbete i si a ɗɔɔ Mariyamu nyageenɛ a wɛrɛ yɛ, i gɨn Mariyamu rɛ yɛnɛ ɓili naa i zɛtɛ yuu ɓilitɛ gbãgbã. I tɔnɛ mɛnɛ yɛ ɗɔɔ sɨnnɛ a yusàà.
32Mariyamu to ɗɔgbete Yesɔ ɗɔnrɛ, tɛ̃ɛ̃ti naa zɛ Yesɔ tɛ, a nwesi au ɗekɨn a shanɛ,<<Uɓeyelapa, a si ɗɔnni manaa sijo vɔ ɓa!>>
33Yesɔ zɛurɛ a ɗɔɔ sɨnnɛ, a zɛ shɔgbete i si aukɔni i sɔ̃nji ɗɔɔ sɨnnɛ; vim ntau a sisɨn gbukut, yɛ feefee u ɗɔɔ lɛrinɛ. 34A hɨyinɛ, <<Ɔ gbãu piɗɔpiya?>>
I kasinya nɛ,<< Anɛ a zɛrɛ Uɓeyelapa,>>
35Yesɔ sɨnrɛ.
36Yahudawayi i shanɛ, <<Ɔ zɛ nɔgbete ɔri Liyazaro yɛ pɛ!>>
37Ama gãsiyi i hɨnɛ, <<Jaam ɓeli shɔnɔ̃gbayi i nɔɔ, ɓa ukɔ ɓaya? Yɛ zɛnɔɔ ɓa u zããri Liyazaro vɔnɛrɛ ɓaya?>>
Yesɔ Yuusi Liyazaro a Suruni
38Kɛɗɔn Yesɔ lɛri sɔ̃n au sisɨn gbukut, a yɛ yusàà rɛ, gbete si nyapuru shɔ kuki tari a nya sààuni. 39Yesɔ ãsinyanɛ, <<Ɔ giri tariunɛ kagbete!>>
Kɛɗɔn Marita shɔ vɔrɔu ɓɛnaa kasinya nɛ,<<Yɛ pmtitɔ dukuduku, Uɓeyelapa. Aru nɛm dii nɛ̃ɛ̃ti gbete u gbãu yɛ!>>
40Yesɔ geliu nɛ, <<N ji gelaa ɓaya, n-tɛ akɛ ã sisɨng nɛ, a yɛ zɛ Ɗalapa basinɛtɔ ɓaya?>>
41Kɛɗɔn i giri tariurɛ kagbete. Yesɔ ɗeenɔɔ a kolapa a shanɛ,<< N dɔ̃raatɛ, maye, a weshotɔ ang nyani. 42N zɛ tɛttɔ a weshotɔ ang nyani ko-pi lee piya, ama n sha vim aru shɔgbete i aɗɔm, nɔgbete i yɛ ã sisɨn nɛ mɔkaa shong-rɛ.>> 43Akɨnti gbete sha vimtɛ, a ɓaa nya a kakani a shanɛ,<<Liyazaro shɛ ɓilinɛǃ>> 44Liyazaro shɛ ɓilirɛ, u naa a dɔɔni shɔ mali tɛttɔ a làā vɔrɔ gbãnɛ, a fãrã ni au nɔkɨn.Yesɔ geliyi nɛ,<<Ɔ kaliu nɛ, u yɛrɛ.>>
Shɔ Maruu a Yesɔ Yuu
45Shɔzɛ waanɛ gbete i a ɗɔɔ Mariyamu nyageenɛ i zɛ vigbete Yesɔ pɛliyɛ, i ã sisɨn tɔ a Yesɔ biini. 46Ama gãsiyi i sɔɔ Farasiyayi i ɗɔbii i geliyi vigbete Yesɔ pɛliyɛtɔ. 47Kɛɗɔn Farasiyayi a shɔlansi wɛrɛ Ɗa wɔsɔ̃n yupɛ̃ni dɔlaa i ɔ̃rɛ i shanɛ,<<U pɛli pikoviya? Ɔ kɨnnɔɔ pɛ vibii-zaanɛ gbete jaam kɛ pɛlinɛ kpai! 48U kɛ yaunɛ u yɛ ɗekɨn a vimni, kopiya yɛ ã sisɨn tɔ au biini, shɔ Romayi i yɛ lɛsiu wɛrɛ Ɗa tɔ, i tɛu tipi sɔ̃ntɔ!>>
49Shɔzɛ gbete ai tete u nii nɛ Kayafa, u si yupɛ̃ni shɔlansi wɛrɛ Ɗa a saa uni shanɛ, <<Ɔ rãng ya! 50Ɔ ji zɛ ɓanɛ pɛ vi tɔ̃vɨn shɔzɛ gbete u vɔrɛ, aru shɔ waanɛyi yuu, a yugbete shɔzɛ kpai i lɛsirɛ ɓaya?>>
51Nizɛ kɔ, Kayafa vigbete sham ji shɛshi ɓa au sisɨn ɓa ama sharɛ aru si ji ukɔ ɔ̃rɛ yupɛ̃ni shɔlansi a wɛrɛ Ɗa a saa uni, shapɛ vigbete kaanɛ ɗekɨn, nɛ Yesɔ yɛ vɔtɔ a Yuhudawayi yuu, 52ɓa ai yuukɔ sheeli ɓa, ama wɔsɔ̃n u toli shɔ Ɗa gɨnnɛyi nya ai sãtiyɛ kpai ɗɔgbete.
53Sãnɛ lee ukɔ yɛnɛ ɗekɨn Yahudawayi i gaa nyaba kãnɛ nɔgbete i yɛ nyo Yesɔ yɛ.
54Arumkɔ Yesɔ ji ra tɔɓa a Yahudiya ni a shɔ nɔni ɓa, ama yɛrɛ a ɔ̃kɛ koo gbete shɔ ɓa ɗɔmɓayɛ maani, tokɛ koomo wɔɔ u nii nɛ Efaramu, ɔ̃kɛ ɗɔuko au jadɔɔyini.
55A ɗɔukɔ naa Yahudawayi i ɗaa yumusinɛ tɛnɛda atɛ maani, shɔzɛ waanɛ a jakomɔɔ i yɛ Urushalima aru i sɔɔyi yuu nɛ nɗa dii yumusinɛu yɛ a yɛ. 56I ɓɛɛjo ɗɔɔ Yesɔ kãnɛ, naa i toli nyatɛ a wɛrɛ Ɗa, i hɨ zɔɔnɛ, <<Ɔ zɛ pikoviya? Yɛ a ɗɔɔ yumusinɛ kati ya?>> 57Shɔlansi a wɛrɛ Ɗa a Farasiyayi i ãsinyanɛ, shɔgbete kɛ zɛ Yesɔ nɛ, ɔ̃riutɛ kaka jazɨng akɔrɔ u geliutɔ, nɔgbete i yɛ sãuyɛ.
Currently Selected:
Yɔhana 11: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
