Acts 7
7
Istifanu Nyanwanɛ
1Kɛɗɔn yupɛ̃ni shɔlansi a wɛrɛ Ɗa hɨ Istifanu nɛ,<<Vim nizɛ ya?>> 2Istifanu kasinya nɛ,<<Mazɔ̃yi a Mayeyi, ɔ weshɔpɛ ang nya! U ɓɛuru Ibirayi ɓɛɛ yɛnɛ nɛn ɔ̃ a tipi Haranyɛ, Ɗalapa gbete u bassinɛ aɗɔn shɛ au bi a Mesopotamiya, 3a geliu nɛ, <Yaa a shɔwɛrɛyinɛ aa tipi yeenɛni a yɛ tipi gbete n yɛn tasaa yɛ.> 4Kɛɗɔn Ibirayi yau tipirɛ a yɛrɛ a ɔ̃ Haran. Akɨnti gbete Ibirayi ɓeye vɔyɛ, Ɗalapa n-tiu tipirɛ gbete ɔ ɗɔ ɔ̃nɛ aɗɔn dɔdɔrim yɛ. 5Ɗalapa ji ã Ibirayi tipi kawɔɔ ɓa nɛu ɓɛɛ ɓa, ko dɔɔ naa nɛ gbete ɓa. Ama Ɗalapa marɛ nɛn ãu tipiutɔ au laduruyini. A ɗagbete Ɗalapa marumyɛ, Ibirayi jaa siɓa. 6Shompɛ vigbete Ɗalapa geliuyɛ<A laduru i yɛ ɔ̃ a tipi ɓili, shɔ tipiwi i yɛ risɔɔ foo, i yɛ tasɔɔ raa waanɛ saa laa mbati. 7Ama nkɔng Ɗalapa n yɛn tasi shɔ gbete ai yɛ ɔ̃ foo ai dɔɔ yɛ raatɔ, kɛɗɔn akɨntini Ibirayi laduruyi yɛ sharɛ a tipiuni i bassi Ɗalapa a ɗɔukɔ.> 8Kɛɗɔn Ɗalapa ãsi Ibirayi nyanɛ ko-pi javɔshɔ gbete pi au wɛrɛ kpai shɔu yeeriyi shaatɔ, u ɔ̃kɛ vitasinɛ ruumanɛ gbete i mayɛ. A Ibirayi yeeri Ishayaku shaarɛ a dii maantaa a shɔ yeeuyɛ; Ishayaku yeeri ɓɛɛ javɔshɔ Yakubu sɔ̃njorɛ, Yakubu yeeriu ɓɛɛ javɔshɔ kopi atu ziti sɔ̃njirɛ, ikɔi ɔ̃kɛ uɓeyeyi kopi atu ziti shɔ Israila.>> 9Yakubu jaayi i kaagɨn a ɓɛzɔ̃ Yusufuni i mɛliurɛ a shɔ Masar i naa nɛu ɔ̃kɛ i foo. Ama Ɗalapa u si awuni, 10a shɛshi Yusufu rɛ au raa gbete si ɓooyɛni kpai, a kpati Firauna ɗekɨn a Masar Ɗalapa pɔ̃rɛ nɛu kpaa u ɔ̃ a shɔ ɗekɨn tɔ̃vɨn a sɛ̃rɛ̃ni. Kpati Firauna pɔ̃rɛ Yusufu ɔ̃kɛ Gɔmna a tipi Masar a yupɛ̃ni au yɛti wɛrɛni kpai. 11Kɛɗɔn vaanwɔ shɛrɛ a Masar a kaana ni, gbete n ti shɔ raaɓoonɛ waanɛ. U ɓɛuruyi i ji kpaa vishaanɛ wɔɔ ɓa, 12naa Yakubu ntatɛ nɛ nɔvisha a Masarni, a sho ɓɛɛ jaayi, u ɓɛuruyi, shomkɔ ɔ̃rɛ i zati gbete i gaa yɛnɛ a Masar nɛi woo vishaanɛyɛ . 13Naayi pɛsi ɗɔu yɛnɛtɛ Yusufu tasiu yuu a ɓɛzɔ̃yi ɗekɨn, kɛ ɗɔukɔ kpati Masar arɛ a zɛ Yusufu shɔwɛrɛyi kɛkn. 14Kɛɗɔn Yusufu shoshi ɓeye Yakubu nyarɛ, geliurɛ au shɔwɛrɛyini kpai, shɔzɛ kpai laa taati au jaa kopi atu maani nɛi a Masar. 15Kɛɗɔn Yakubu yɛ Masar rɛ, a ɗɔwakɔ i vɔlirɛ a ɓɛɛ jaayini. 16Shɔ sii vɔrɔ shɔ sɔriyi Shɛɛkɛm, shɔ gbã a yusàà gbete Ibirayi woo a saa azurfa a Hamo ɓɛɛ jaayi naa a Shɛɛkɛm. 17Naa ɗaa atɛ ɗɔɔli aru Ɗalapa u pɛli vigbete masi a Ibirayi ni, siu shɔbiiyi shatɛ a Masar waanɛ. 18Kɛɗɔn kpati wɔɔ gbete ji zɛ viwɔɔ ɓa a Yusufu yuuni ɓa ukɔ roo kpatirɛ a Masarni. 19Kpatiu ɗaki u ɓɛuruyitɔ, a tasi raatɔ, pɔ̃irɛ i loriyi jabɛ̃rɛ̃tirɛ, aru nɛi vɔlikɛtɔ. 20Shɔ yee Musa ji ɗaamkɔ, u si jaa tɔ̃vɨn a Ɗalapa ɗɔbiini, shɔ bàu a ɓeye wɛrɛ shɛllɛ taati. 21Naa shɔ tuu Musatɛ shɔ pɔ̃utɛ a nyaɓooti, kpati ɓɛɛ jaa soro tuurɛ a basiurɛ naa ɓɛɛ jaa, 22Shɔ mati Musa Masaryi sẽrẽẽ kpai, a ɔ̃kɛ shɔ nyanwanɛ pɛ̃niba a vishonɛni. 23Naa Musa saa yɛtɛ laa ziti, a kã yɛnɛ nɛn zɛ ɓɛshɔbiiyi Israila i ɔ̃nɛ pɛ. 24A zɛ shɔ Masar wɔɔ u ɗɔ gbete kuli u shɔbii wɔɔ nɔɔ, kɛɗɔn Musa yɛrɛ nɛn pɔ̃si Israilayi naa a kɔsinɔɔ a shɔ Masar vɔrɔ nyonɛ. 25(Musa tuunɛ mɛnɛ u shɔbii i yɛ zɛtɔ nɛ Ɗalapa yɛ pɛli vishonɛ a nkɔ aru u rairɛ, ama i ji zɛ ɓa.) 26A dii ɓuru zɛ shɔ Isirelayi ziti i ɗɔɔ bawaanɛ, a kasinɛn vɔsiyi bautɔ, A shanɛ, <<Ɔ weshopɛ mazɔ̃yi, ɔ pɛ n shɔbii Isirelayi; Ɔ waaba aruviya?>> 27Ama shɔu waa ɓɛzɔ̃u dɔ̃ Musa kagbete, a hɨnɛ, <<Pi pɔ̃ a yupɛ̃ni pi a yeeruu au yuu piya?>> 28<<A kasin nyonɛ nagbete a nyo shɔ Masar wɔɔ a si ɓuruyɛ ya?>> 29Naa Musa nta vimtɛ naam, a yurɛ a yɛkɛ tipi Madiyana, a ɗɔukɔ a yee javɔshɔ ziti. 30Akɨnti saa laa ziti, Ɗajashonɛlapa shɛ a Musa bi a yeenya yaa a ɗɔ gbete laa ɓa ɗɔmbayɛ ɗɔɔli a kɔpɔ Sinayini. 31Naa Musa zɛ vimtɛ bizautɔ aru vigbete zɛyɛni, a yɛ ɗɔɔli nɛn zɛ viupɛ. Ama nta Uɓeyelapa yeenya shanɛ: 32<<Nkɔng ɔ̃rɛ meuruyi Ɗalapa, Ibirayi Ɗalapa, Ishayaku, a Yakubuni.>> Kɛɗɔn Musa bi gaa zaanɛrɛ, ji kpaa kara zɛnɛ tɔɓa. 33Uɓeyelapa geliu nɛ, <<Zɔ̃ kɔdɔɔtɔ, aru ɗɔ gbete a shiɗɔnmi pɛ ɗɔ Wɔsɔ-wɔsɔ. 34N zɛ nɔgbete shɔ tasi mashɔzɛyi raa a Masartɛ. N ntayi nyavɔtɛ, n nɔrɛ n raipɛ. Anɛ dɔdɔrim; n yɛn sho a, a Masar.>> 35Shɔ Israila i bɛ̃ɛ si jo Musa kɔ. I hɨnɛ <<Pi pɔ̃ arɛ a ɔ̃ yupɛ̃ni aru a yeeruu au yuu piya?>> Ukɔ ɔ̃rɛ shɔ gbete Ɗalapa shourɛ nɛu ɔ̃ri u shɔbiiyi yupɛ̃ni, a nyaba Ɗajashonɛlapa u raayitɔ gbete tasiu yuu a shɛ au bi a yaa shaanɛ a ɗɔ gbete shɔ ɓa ɗɔmba yɛ. 36Ukɔ shɛshi shɔrɛ a tipi Masarni, a ɗɔu pɛli vibiizaanɛ a vitasinɛni a Masar a ɓooti nweri, saa laa ziti a ɗɔ gbete laa ɓa ɗɔmɓayɛ. 37Musa kɔ ɔ̃rɛ shɔ gbete geli shɔ Israilayi nɛ, <<Ɗalapa yɛ shoshɔɔ janyagaditɔ ji naa au shonɛyɛ, a janyagadiu yɛ ɔ̃ ji shɔzɛ gbete awɔ tete shɔbiiyikɔ.>> 38Ukɔu si ji a shɔ Israilayini aɗagbete i tolinya a ɗɔgbete laa ɓa ɗɔn bang ɓayɛ; u si ji ɗɔukɔ au ɓɛuruyi a Ɗajashɔnɛlapani shɔ gbete nwanya awuni a kɔpɔ Sinayi, ukɔ tɛ Ɗa nyaruubii au ã suruyɛ, a geliurɛ. 39Ama u ɓɛuruyi i bɛ̃u nyagɨnnɛtɔ; i bɛ̃ɛ̃yi a nɔɔni, ai sisɨn i kasinɛi si sɔɔ Masar. 40I geli Haruna nɛ,<<Pɛliu jaɗa fɛ̃ɛyi pɛ gbeteyi yɛ tɛɛsiu ɗekɨn yɛ. U ji zɛ vi gbete pɛli Musa yɛ ɓa, shɔ gbete au shɛshiu a Masaryɛ.>> 41Kɛɗɔn i pɛli viwɔɔrɛ naa jagunapu, i ãu viyuu ãnɛrɛ, ai tɔ̃soo i sásàrɛ aru i bassi vigbete i pɛli ai yuuyɛ. 42Ama Ɗalapa risiyi kntirɛ, a ãyi naarɛ nɛi gɨn sɛyi a kolapa, ji nagbete shɔ bee a laabeenɛ janyagadiyi:
Ɔ shɔ Israila!
ɔ ji yeerin vivaayi ji ɓa ɔ ji ãng viyuu ãnɛyɛ ji ɓa
a saa laa ziti a ɗɔ gbete laa ɓa ɗɔn bang ɓayɛ.
43Ɔ tuu taali jaɗa molɛk
a sɛ jaɗa jasuru shɔ ɓaanɛ Refan,
ikɔyi ɔ̃rɛ jaɗa gbete ɔ pɛliyɛ nɛi basiyɛ.
Aru gbetenkɔ n yɛn ãwɔ naa ɔ tɛɛ tipi Babila tɔ. 44Aɗagbete u ɓɛuruyi si a ɗɔgbete laa ɓa ɗɔn bang ɓayɛ, i si a taali gbete Ɗalapa suru a ɓuzɨn ni. Shɔmkɔ ɔ̃rɛ taali shɔ gbete Ɗalapa geli Musa nɛu pɛliyɛ, shɔ pɛli ji nagbete Ɗalapa tasi Musa nɛu pɛliyɛkɔ. 45Kɛ au kɨnti ni u ɓɛuruyi i tɛ taalim ai ɓɛuru-ɓɛuruyi naa. i n ti tipim a ɗa gbete Joshuwa si yupɛ̃ni yɛ, naa i raa tipiutɛ a moo gbete Ɗalapa pɔ̃rɛ nɛi yaa tipiu i naani, kɛɗɔn shɔ Israila i ɔ̃ a ɗɔukɔ yɛnɛ ɗagbete Dauda roo kpati yɛ. 46Ɗalapa nta tɔ̃vɨntɔ a Dauda ni, a gaki Ɗalapa nɛu yang pɛ nɛn maa ɗɔ gbete Yakubu Ɗalapa yɛ ɔ̃ ɗɔnyɛ pɛ. 47Ama Sulɛmanu ukɔ maari Ɗalapa wɛrɛu rɛ.
48Ama Ɗalapa shɔ gbete vitɛu kaka ɓa rooɓa a wɛrɛ gbete shɔzɛ maayɛni ɓa; ji nagbete janyagadiyi shayɛ:
49Uɓeyelapa shanɛ, <<Kolapa ukɔ ɔ̃rɛ n la,ɔ̃nɛ kpati,
a kootipi ukɔ ɔ̃rɛ n ɗɔɔ dɔɔpɔ̃nɛ.
Ɔ maarin kɛpi zɔng wɛrɛ shɔpiya?
Ɗɔ gbete n yɛn ɔ̃ a ɓuzɨn kɛpiya?
50Ɓang nkɔ pɛli vimrɛ kpai ɓaya?>> 51Istifanu yɛ ɗekɨn a shaanɛni nɛ,<<Ɔ shɔ yuu lakinɛ, a shɔ sisɨn lakinɛyi, ɔ shɔ gbeteyi nɔɔ shootɛ aru Ɗa nyaruubiini, nɔ gbete mɛuruyi pɛliyɛ ɔ ji nankɔ, ko-pi leepiya ɔ ɓɛ̃ɛ̃ Ɗa Suru nyagɨnnɛtɔ. 52Janyagadi wɔɔ pɛ a ɗɔnni gbete a mɛuruyi i ji tasiu raa ɓaya? I nyo Ɗalapa jashonɛyi, shɔ gbeteyi si tɛ̃ɛtɛ̃ɛ i sharuu jawɛrɛ tɔ̃vɨn anɛyɛ, dɔdɔrim ɔ mɛliutɛ ɔ nyou vɔrɔtɛ. 53Ɔkɔɔ tɛ Ɗalapa nya-ãsinɛjo a Ɗajashonɛlapayi naa, ama ɔ ji gɨn ɓa!>>
Shɔ Lori Istifanu A Tari
54Naa Yupɛ̃ni Yahudawayi nta vigbete Istifanu shayɛtɛ, i sisɨn lɛsi fɛ̃ɛm, i shaa ntari shɛtɛ̃tɛ̃ aru sisɨn lɛsinɛni. 55Ama Istifanu shɔ gbete Ɗa Suru rau bitɛ kpai, kɨnnɔɔ a kolapa a zɛ Ɗalapa bassinɛ a zɛ Yesɔ a ɗɔshinɛ a Ɗalapa ka nakɨn. 56A shanɛ.<<Kɨnnɔɔ pɛ, n zɛ kolapa ɓelitɛ, a Shɔzɛja u ɗɔshinɛ a Ɗalapa ka nakɨn!>> 57A kakani yupɛ̃ni Yahudawayi nɔɔ shoorɛ ai naa. Kɛɗɔn i kpai i yɛu ɗɔbii gbãgbã nɔgbete, 58i shɛshiu a komoowuni yɛnɛ ɓili, ai loriu a tari. Shɔ shinɛkɨntiyi yai fãrã a jakasa wɔɔ ɗɔbii u niinɛ Shawulu. 59I ɗɔ ɗekɨn yɛnɛ a Istifanu lorinɛ a tari, Istifanu u ɓɛjo ɗɔ gbete gaki Uɓeyelapa a shanɛ, <<Uɓeyelapa Yesɔ, tɛn surunɛ.>> 60A ta a yugboti, a ɗee yeenya a kakani a shanɛ, <<Uɓeyelapa mɔkɔ kpaa sisɨn nɛ ai yuu ruuvini ni.>>Naa shatɛ naam a vɔrɛ.
Currently Selected:
Acts 7: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
