Acts 4
4
Bituru a Yɔhanani a yupɛ̃ni Yahudawayi ɗekɨn
1Aɗagbete Bituru a Yɔhana ni sii ɗɔɔ nyanwanɛ a mooyini, shɔlansi wɛrɛ Ɗa a yupɛ̃ni wɛrɛ Ɗa ganɛ, a gãsi Sadukiyawayini i arɛ ai ɗɔbii. 2I sisɨn lɛsitɔ aruviya jashɔnɛ zitiwi i mati mooyi vi nɛ vɔrɔyi yɛ yutɛ a suruni, nagbete Yesɔ yuɓa a sàà a suruni yɛ. 3Kɛɗɔn i sã Bituru rɛ a Yɔhanani i pɔ̃yirɛ a jaahm nɛ see dii ɓuru, aruviya si ɗaa yiitɛ. 4Ama shɔzɛ waanɛ gbeteyi nta ruum ayuu Yesɔ i ã sisɨntɔ ɗɔn; kɛɗɔn shɔ gbeteyi ãsisɨn a Ɗa bi i nomba shakɛ mɛnɛ laa ziti atu kopi ɓa maani.
5A dii ɓuru Yahudawayi yupɛ̃ni, a shɔpẽni dɔlayi a Shɔmala nya-ãsinɛyini i tolinya a Urushalima. 6I kpazɔɔ a yupɛ̃ni shɔlansi wɛrɛ Ɗa Anaasi a Kayafa ni, Yɔhana, Alezanda, a gãsi shɔ gbeteyi yeenɛ gbete a yupɛ̃ni shɔlansi wɛrɛ Ɗani. 7I pɔ̃ Bituru a Yɔhanani i shi ai ɗekɨn ai hɨyinɛ,<<Ɔ pɛli vishonɛ a pi kaka piya? Ko ɔ shovi shonɛ a pi nii piya?>>
8Bituru shɔu si Ɗa Suruni rau bitɛ kpai, kasiyinya nɛ, mooyi yupɛ̃niyi a shɔpẽni dɔlayi: 9ɔ ruu gbete ɔ hɨurɛm pɛ aru vitɔ̃vɨng gbete u pɛli shɔdɔgbutum ya? Awɔ kasi nɛi zɛ shɔ gbete gatiuyɛ ya? 10Ɔ zɛtɔ kpai, a shɔ Israilayini, nɛ ja gbete shi awɔ ɗekɨn gatinɛ tɛpɛ-tɛpɛm ji a kaka gbete shɛ a Yesɔ Kirisi shɔ Nazara niikɔ gbete ɔ ɓau nalaayɛ, shɔ gbete Ɗalapa yusiu a sàà a suruniyɛ. 11Yesɔ kɔ ɔ̃rɛ shɔ gbete Ɗa nyaruubii shanɛ:
<< tari gbete ɔ shɔ ɗɔmaanɛ ɔ bɛ̃ɛ̃ yɛ,
ukɔ ritɛ tari gbete tɛɛ gãsiyi kpai a tɔ̃vɨn ni.
12Ukɔ raa shɔrɛ a ruuvini sheeli; aruviya nii wɔɓa a kootipini ɓa gbete Ɗalapa shoyɛ nɛu raurɛ ɓa.>> 13Yupɛ̃niwi i zɛ nɔgbete Bituru a Yɔhanani i sharuu kakani ai ɗekɨn, i zɛrɛ i ji shɔ gbãgbã weze, i ji ɓalilaa ɓa tot, kɛɗɔn bi-zaaikɛtɔ. I shanɛ nɛi si pɛ Yesɔ jadɔɔyi. 14Ama aru i zɛ jagbete Ɗalapa gatiuyɛ u ɗɔshinɛ a Bituru a Yɔhanani a ɗɔukɔ i vi pɛlinɛ si ɓa. 15Kɛɗɔn i geli Bituru a Yɔhanani nɛi shɛnɛ jaa ruyeenɛuni, ai gaa ruu shalinɛkɛ ai nɔɔ. 16I hɨnɛ<<U pɛli jaamiyi kɛpiviya? Kopiya a Urushalimayi kpai i zɛ tɛttɔ nɛ vibiizaanɛ pɛ̃nibam ikɔi pɛlirɛ, u yɛ mayisi nyaɓa ɗɔnɓa. 17Ama aru u zãri ruum sãtinɛ a mooyi tete koɗɔpiya, ɔ̃tɛ kaka jazɨng akɔrɔ u gɔ̃ jaamiyi yushotɔ ikɔi nwari shɔ nii Yesɔ nɛ toti.>> 18I ɓaa Bituru nya sɔ̃n a Yɔhanani a ɓuzɨn jaa i geliyi nɛ ikɔi nwari shɔ nyanɛ ko i mati shɔ vi a Yesɔ nii ni. 19Ama Bituru a Yɔhanani i kasiyinya nɛ,<<Ɔkɔma ɔ yeruu pɛji tɔ̃vɨn awɔ yuu, shɔpi tɔ̃vɨn piya a Ɗalapa ɗɔbii, u gɨn Ɗalapa nya ya? ko u gɨn ɔ nya ya?. 20U yɛ zɛnɔɔ vi gbete u zɛyɛ au ntayɛ yaanɛ shanɛ dɔɔɓa.>> 21Akɨnti gbete yupɛ̃niwi gɔ̃yi yushotɛ fɛ̃ɛm kɛɗɔn i yaayi naarɛ i yɛrɛ. I zɛrɛ yɛ pɛliɓa i tasiyi raarɛ ɓa, aruviya si shɔ kpai i dooɗɔ Ɗalapa bɛlinɛ aru vigbete pɛliyɛ. 22Jagbete shɔ pɛli vibiizaanɛ gatinɛm au biiyɛ si tɛɛ saa laa ziti au jaa kopitɛ.
Shɔ Sisɨn-ãnɛ Ɗa bi i Gaki Ɗa Aru i shovi-shonɛ Seti ntanɛ ɓa
23Naa Bituru a Yɔhanani shɔ yainaatɛ tɛ̃ɛ̃ti, i sɔɔ i shɔbiiyi ɗɔbiirɛ ai geliyi vigbete shɔlansi wɛrɛ Ɗa a shɔpẽni dɔlayi shayɛ kpai. 24Naa shɔ sisɨn-ãnɛ Ɗabii i ntatɛ, i kpai ɓasiyuu i gaki Ɗa rɛ: ai shanɛ, <<Mashɔwɛrɛ shɔ gbete shɛshi kolapa a kootipiniyɛ, a wapo a vi gbete a ɓuzɨn ni kpai!>> 25A nyaba Ɗa Suru a nwanya au ɓɛuru Dauda ni, a jawɛrɛ a shanɛ:
<< Shɔ gbeteyi ɓa Yahudawa ɓa i lɛsi sisɨn kɛ aruviya?
kɛpiruvi nyakooyi lɛsi sisɨn waati viya?
26Kpati kootipimiyi i mabii sɨtanɛ tɛttɔ,
a yupɛ̃niyi ni i ɓassiyutɛ nyazɔɔ
a Uɓeyelapa yuu au Shɔshɔranɛni.>>
27Pɛ nizɛ Kpati Hiridu a Bilatu ni i ɓassiyurɛ, a shɔ gbeteyi ɓa Yahudawa ɓa a komoom a shɔ Isirelayini a Yesɔ yuu i ɗɔ sɨntanɛ awuni, a jawɛrɛ wɔsɔ-wɔsɔ gbete a pɔ̃rɛ nɛu ɔ̃ Shɔshɔranɛyɛ. 28i tolinyatɛ aru i pɛli vigbete a matɛ gboti yɛ pɛlitɔ, aa kaka aa kasinɛ. 29Dɔdɔrim, Uɓeyelapa, zɛ nɔgbete i kã nyaba gbete nɛi zãriu vishopɛ. A ã a fooyi kaka gbeteyi nwa a ruubii pɛ seti ntanɛni ɓa. 30Gɨn naa nɛ a gati shɔvɔrɔyi rɛ, a pɛli vitasinɛ a vibiizaanɛni aa jawɛrɛ wɔsɔ-wɔsɔ Yesɔ nii.
31Naa i yisi Ɗa gakinɛtɛ, kɛɗɔn ɗɔ gbeteyi tolinyayɛ si ɗɔ zɨtirɛ. Kɛɗɔn Ɗa Suru raayi birɛ kpai i gaa Ɗa nyaruubii nwanɛrɛ seetintanɛ ɓa.
Shɔ sisɨn Ãnɛ Ɗabii i Vɔsi i vinaayi
32Kn shɔsisɨn-ãnɛ a Ɗabii i sisɨnānɛ ɔ̃ gbete i vi shanɛ ɔ̃ gbete. Vigbete i a wuniyɛ shɔwɔɔ ji toɓanɛ vim pɛ nɛn ɓɛɛ ɓa, ama i vɔsi ko-iviya ji a nyazɔɔ kpai. 33Jashonɛyi i geli shɔ ruum a kakani waanɛ i yɛ ɗekɨn a shinɛni a Yesɔ knti aru gbete yuu a sàà yɛ, Ɗalapa ntɛ̃riyi vɔɔ susãri a bi kpai. 34Shɔ wɔɔ ji kã viwɔɔ ɓa ai tete niɓa. Shɔ gbeteyi ɗɔ aɗɔn ko wɛrɛ i mɛlirɛ i n ti saaurɛ, 35i pɔ̃rɛ a jashɔnɛyi ɗekɨn, a saa u shɔ vɔsirɛ kopiya ji nɔgbete kasiyɛ. 36Yusufu Lawi ɓɛuru shɔ gbete shɔ yeeu a Sapuruyɛ, pɛli ji ɗɔkɔ shɔu jashonɛyi i ɓaunɛ Barnaba yɛ(ukɔ ɔ̃rɛ <<Shɔ gbete au masishɔbiiyɛ>> 37Barnaba mɛli u ɗɔrɛ a n ti saa rɛ a jashonɛyi ɗekɨn.
Currently Selected:
Acts 4: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
