Acts 24
24
Felis Yeeruu a Bulus Yuu
1Akɨnti dii maanzii yupɛ̃ni lansi a wɛrɛ Ɗa a ɗɔzɔɔ a Hananiya a shɔpẽni dɔlaayini wɔsɔ̃n lawuya u niinɛ Tartulus i yɛ Kaseriyarɛ, aru i wuli Bulus a gomna Felis ɗɔbii. 2Kɛɗɔn shɔ ɓaa Bulus nyarɛ a ɓuzɨn, a Tartulus gaa nyanwanɛrɛ a Felis ni wuliu nɛ,
Yupɛ̃ni, a nyaba vigbete a pɛliyɛ u nta ɔ̃nɛbinyatɔnɛtɛ ɗaa ɗɔkɔkɔ, a sẽrɛ̃ pɔ̃tɛ shɔ tɔ̃ri vitɛ fɛ̃ɛm au n ti i ɔ̃nɛbinyatɔnɛ aru tɔ̃vɨn shonɛ a koo. 3U tɛ vimtɛ nakaziti ko ɗaviya a ko ɗɔpiya. au dɔ̃raatɛ fɛ̃ɛm. 4Ama n ji kasi ɓa n yisaa ɗaarɛ ɓa, n gakaatɔ, a tasi tɔ̃vɨn a weshopɛ au vi dɔkaa gbete u gelaami. 5U kɨnnɔɔ u zɛrɛ jaam u pɛ shɔ yukɔnɛ n tinɛ, gaa yuyɔrinɛ a Yahudawayi tete piti a kootipini kpai, a uku ɔ̃rɛ yupɛ̃ni nyayelinɛ a shɔ ɓaanɛ Nazarawa yɛ. 6Kasinɛn lɛsi wɛrɛ Ɗa tɔ, ama au sãurɛ. 7Ama kpati Lisiya arɛ a raurɛ au naa a kaka bi. 8<<A kɛ hɨli jaam ruunɛ, aa yuu a yɛ zɛtɔ au ɗɔbii nɛ vi gbeteu wuliuyɛ au yuum pɛ nizɛ kɔ.>> 9Yahudawayi i sha sɔ̃njo nankɔ nɛ, vim kpai pɛ nizɛ.
Bulus Rau Yuu A Felis Ɗekɨn
10Kɛɗɔn gomna ã Bulus naarɛ nɛu nyanwanɛ, a Bulus a shanɛ,
N zɛ tɛttɔ a ɔ̃ shɔ ruuyeerinɛtɛ a tipim saa waanɛ, n nta binyatɔ̃nɛtɛ n ran yuu aa ɗekɨn. 11A kɛ hɨlinɛ ji tɛɛ lee kopi atu ziti ɓa ang yɛ Urushalima ɗɔ Ɗa basinɛ yɛ. 12Yahudawdayi i ji kpang ɓa a ɗɔ nyamasinɛ a shɔwɔni a wɛrɛ Ɗa niɓa, i ji kpang ɓa n aɗɔ mooyi dãlinɛ ɓa, ko ai ɗɔ-ɔ̃nɛ koɗɔpiya a komooni ɓa. 13Vigbeteyi sha ang yuu yɛ, i yɛ zɛ a nɔɔ tasinɛ dɔdɔrim dɔɔɓa. 14N ã sisɨn ɓɛɛjo a vi gbete sheeliː u ɔ̃rɛ n gɨn mauriyi Ɗalapa a nyaba gbeteyi shanɛ, nɛ nyaba nyayeelinɛ, ama n ã sisɨn wɔsɔn a ko-iviya gbete shɔ bee a labeenɛ Musa nya-ãsinɛ a labeenɛ janyagadiyi. 15N pɔ̃ sisɨn Ɗalapa bi nagbete shɔmiyi pɔ̃yɛ, nɛ shɔ yɛ yuutɔ sàà ni a suruni shɔ tɔ̃vɨn a shɔ kɔ̃linɛyini kpai. 16Arumkɔ kopiɗaviya n pɛli nɔgbete n yɛn zɛnɔtɛyɛ n ɔ̃ ɓa a yuyɔrinɛni a Ɗalapa a shɔzɛ ɗekɨn ni ɓa.
17Akɨnti gbete n ɔ̃tɛ saa waanɛ ang sɔɔ wɛrɛ Urushalimarɛ, aru n n ti n shɔbiiyi saa a viyuu ãnɛni. 18N a ɗɔ pɛlinɛ i kpanrɛ a wɛrɛ Ɗa, sin yisi n yuu sɔɔkinɛtɛ, mooyi i si ɓa ang ɗɔbiini ɓa ang ji pɔ̃ shɔ yuyɔrinɛ sɔ̃n ɓa. 19Ama Yahudawayi gãsi a tipi Asiya i si ɗɔuni, ikɔi yuu i arɛ aa ɗɔbii i wulinrɛ naa i vi shanɛ wɔɔkɛ ɔ̃nɛ a ɗɔni ang yuuni. 20Ko shɔ gbeteyi a ɗɔm i sha ruukɔ̃linɛ pɛ gbete i kpang a wuniyɛ aɗagbete i n a Yahudawayi yupɛ̃ni ɗekɨn yɛ, 21see ruugbete n shayɛ aɗagbete n shi ai ɗekɨn yɛː Ang shanɛ<<Aru n ãsisɨn nɛ Ɗalapa yɛ pɔrɛ shɔu yuu a sàà a suruni aruukɔ shɔ yeerin ruurɛ awɔ ɗekɨn ni nɛm.>>
22Kɛɗɔn Felis zɛ vi tɛttɔ a nyabani fɛ̃ɛm, a shiriyirɛ a shanɛ,<<Setɛ yupɛ̃ni soja Lisiya atɛ>> <<N nwa nyarɛ aa ruunni.>> 23Felis ãsi yupɛ̃ni soja rooma nyanɛ u ga Bulus tɔ, ama nɛ ukɔ bɔ̃unɛ ɓang, wɔsɔ̃n nɛi yaa ɓɛsayitɔ i au ɗɔbii i ãu vigbete kasiyɛtɔ.
Bulus a Felis a Durusila Ɗekɨn
24Akɨnti dɔɔ ziti Felis arɛ a ɓeso Durusila ni, ɓeso u si pɛ Yahudawa, kɛɗɔn Felis shonya nɛ shɔu ɓarin Bulus nya a weshoorɛ au nyani, aɗagbete nwanya aru sisɨn-ãnɛ a Kirisi Yesɔ bi. 25Aɗagbete Bulus yɛ ɗekɨn a nyanwanɛni aru tɔ̃vɨn shonɛ, a yuu sãnɛ a lee ruuyeenɛ gbete kaanɛyɛ, kɛɗɔn seeti pɛli Felis rɛ a shanɛ, <<Dɔdɔrim a sɔɔnɛ, n kɛ kpaa nyabanɛ n ɓaa nyarɛ.>> 26Au sisɨn nɛ mɛnɛ Bulus yɛ ã saa tɔ, aruukɔ ɓaliu nya a zɔng-zɔng.
27Akɨnti saa ziti pokiyu Festu tɛ laa gomna roonɛrɛ a Felis naa. Felis yaa Bulus rɛ a jaahm aru kasinɛn kpaa bassinɛ a Yahudawayi ɗekɨn.
Currently Selected:
Acts 24: Laa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
