Roomeke Manni'a 7
7
Seerakenaa'n Tikeme'enexxa
1Anke dayyuwwaa, seera ege'neeke manna'n haaso'aannen seer mitte manjo'n baallooma afaak manjichchi hedhot hedhee qico calla kaddeexxa egendinebaata? 2Fakkeenakee, mitte heerundeexxi manjichcho ifike aro'inni seerik userendaak isi hedhoti hedhee qico'niten; aro'i isek reyoole kinni ookkone aadha heerumatike Muusek seerinaa'n tikende'een. 3Tennexxee aro'i isek hedhoti hedhe'na'a wele labballo'n heerundoole yabaabultote hiyyendaan, aro'i isek eryena'a wele laballo'n herundoole kinni aadha herumatike seerakenaa'n tikendemaxxe yababultote hiyyendaba'a.
4Tennexxe anke dayyuwwaa, ha'nonna Kiristoosike bisidarre'n seerake rertine'een; tinninna no'o Magenoke guma guminsona'a, ha'no wele ookone reyotinaa'n ke'eke isike kaddino'aten. 5Maalnxe fedhi hunda gallana wodda reyote gumma gummisanosha seer dammaseexxe cubbotixxi halcha no'oke bisinke qooluwwa'n hujja'eman. 6Ta'a kinni ediwodda no'oo'o ookene usuremake'e rennexxi seerakenaa'n tikeme'enen; tinninna dullacha borresemamake seernte kaddebaak haaroke kade'eeke Hafuurke orni ergatemona'aten.
Cubboti Wolaancho Abixxa
7Yoona maata hinanno? Seer umo ifiken cubboteeta? Haranga waawo! Yaan kinni seerndarre'n kadagophe'a silat cubbo maacho kaddeexxa ege'nanaba'a. Seer «Gaabbitoxxe» hiyyagophe'a gaabbe maacho kaddeexxa hara ege'nannaba'a. 8Cubbo kinni seer darre'n qo'a alfite ani giddo duuchinxe fuggoxxa gaabbe dammasitte; seer hedhgophe'a cubbo reyeechoman. 9Seer hedhemaba wodda ani umo anigee'e hedhoti hedhanan, seernk ajaji dagee wodda kinni cubbo hedho alfite; ani kinni reyenne. 10Hedhotee uwwemeek seeriink ajaji ane'n reyo idageexxa ege'nenne. 11Cubbo seer darre'n afemeeka qo'a alfeexxi anee sobbe; seerindarre'ninna ane'e shilte.
12Tennexxe Muusk seer woyyichchake, ajajikinna woyyichake, qullichakenna eloke. 13Tinni eloxxe kaddexxi yaaneta ane'ni reyo idagge hiyyoteeta? Haranga waawo! Yaane kinni cubbo cubbumati egendo'a eloxxe kaddeexxe yaane ane'n reyo idagge; tinninna cubbo ajajidarre'n qubasaxxashaten.
14Muusek seer hafuurnxe yaane kadeexxa ege'neenen, ani kinn cubbotike garba kadona'a gurguremeenek maalinke manjon. 15Ani maa assa'enexxa ege'nebe'no. Tinninna eeyanexxa yaane assa waalenexxi eetene jibbanaxxa yaane assa'enaxxeten. 16Assa eeyabe'noxxa yaane assanole seer elocho kadeexxa adhdha'enne. 17Iitate kaddeechinni tenne assa'eenxi ani giddo hexxa'nexxe cubbo male anteba'a. 18Ane'n yookaan cubbalessa kadeeke anke cubbichi dadumi giddo eloxxi mitti yaanenna hexxabaxxa ege'ne'enen; eloxxa assatee halcha afe'enen yaane kinni eetene yaane assa dande'abe'no. 19Assanexxi assona'a halchenexelxe eloxxa yaaneba'a; yaane kinni asson'a hasebe'noxxe fugguxxe yaane assanon. 20Assona'a hassabenoxxa yaane assanelchinni tenne assa'enek ante kadebe'nok ani giddo hexxa'nexxe cubbon.
21Yoona eloxxa assa eeya'ni fuggoxxa assa'enechinni kunni cubbotik seer hujate'n hedheexxa age'nenen. 22Ani giddixxe anxe hedhonni Mageniike seera'n gammadanne. 23Yaane kinni anke bisike qooluwwi giddo huja'neeke cubbotik seer'a ane'e booji'emanosha assaak, anxe sammoke seern welt lolemaak wel seer anke bisike qooluwwi giddo huja'na'a uda'enen. 24Isi ani hitata cuqurto'eneke manjike manjo! Konne reyote uwwemeeke bisinaa'n ayete ane'e anjira? 25Gootta no'oke Yessuusi Kiristoosi darre'n galti Magnoke kadowaal.
Yoona ani sammo anxenni Magenke seerke garba kadenexxi anke cubbichi daduma'n kinni cubbotike seeri'a garban.
Currently Selected:
Roomeke Manni'a 7: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
