Roomeke Manni'a 4
4
Abirihaami Amanat Qulloomeexxa
1Tennexxee no'ok edik maaliink anni Abirihaami maachcho alfee hinnanno? 2Abirihaami qulloomeek hujetite kaddeele, hollaaxxa yaane afe'eemma'a, kaddo malee'e Magen edo holla dande'aba'a. 3Woyyichchi Maxaafi maa hiyya? «Abirihaami Mageno amaneen; isixxi amananna isi'a qullumate kaddeexxi laakko'ende.» 4Mitti manji hujeexxe huje'a rundi isik isi'a hasisaake hira malee uwwatishsha laakko'emaba'a. 5Yaane kinni hujebaaka cubbichcha manjo qullichchake assaake Mageno'n amanaake manji'a mana isixxi, isi'a qullumma kadde'ee laakko'endaan. 6Daawwitinna qullumma huje belo isi'a laakko'endaake manjixxee eebbisensha'a haaso'e wodda hiyyee qic,
7«Insa'nexxa balleessa Magen insa'ne'a gattowwaali hiyyeek,
cubbo insa'nexxanna insa'ne'a bireek
iikki manni insa'ne eebbisemeeken.
8Mageni isixxa cubbo iso'n laakko'abaak manji
isi eebbisemeeken.»
9Tinni eebbisensha jila ofo'leekeeri calli'aate moo? Yookaan jila ofo'lebaakeerini'aate? «Abirihaamixxi amana Abirihaami'a qullumate kaddeexxi laakko'endeen» hine'eennen. 10Hittata isi'a laakko'ende? Jila ofo'lebaa edi darre moo yookaan jila ofo'leechchi uduma? Isi'a laakko'endeek jila ofo'lebaa edi darre malee'e jila ofo'leechchi udumaba'a. 11Abirhaami jila ofo'lebaang isixxi amana isi'a qullumate kaddeexxi laakko'endeexxa kokeesaake beesisa kado'a jila ofo'le. Tennexxee jila ofo'lebaang amanaakeeri'aanna amana insa'nexxi insa'ne'a qullummate kaddeexxi laakko'endaake duuchchiingee annaken. 12Iittanni Abirihami jila ofo'leekeeri'aanna annaken; jila ofo'leekeeri'aate calla kadebaak anni no'ok Abirihaami jila ofo'lebaa edi darre afe'eemmaxxa isixxe amanaxxa faana hordofaake duuchchiiri'aanna annaken.
13Butta duuchcha dhaalo'a, Abirihaami'aanna isixxe horte'a Mageni addachchiisa uwweek isi amanati lafeexxe qullunnite malee seera muuxemmaxxeetebaan. 14Seera muuxaakiiri dhaalanjuwwake kadoole amana la'o affaba'a; iitti addachchiisanna toliinxe. 15Seeri Mageniinxe mufe iyyedaga; seer hedhebaaba kinni seera sa'atixxe balleesa hexxaba'a.
16Tennexxee iitti addachchiisa amanat dagge'een; tinninna iitti addachchiisa Abirihaamixxe horte duuchchi'a badhaadhik uwwendeexxe kaddeexxa tennenni kokeesende'een. Tinninna seera horodofaake calli'ate kaddebaak Abirhaamishsha amaneeke duuchchi'aten; konne qicinni isi no'oo duuchchiingik annan.
17Tinninna, «Heddo gosa gosa ardike anna atee assannon» hiyyendeexxi borreesendeemmashaten. Isinna reyeekee hedho uwwaaxxa, hedhebaachchonna hedhaashsha assaaxxa amaneemake Magen edo isi no'oke annan.
18Horte atixxi bira saxxaan hiyyendeexxi iso'n kulendeemma qicinni mitte addachchiissaxxi yanne hexxebaaxxe yanna'n Abirihaami addachchiisate'n amaneexxi heddo gosa gosa ardike anna kade. 19Isi dhibba woggake manjo kadeenni hedheexxi ifike bisixxanna kadi Saarake gadaameessixxa corco hiyya ege'neenni hedheexxi amanate'n goofeba'a. 20Tenne caala amanate'n jabaata'n Mageno ulfeesse malee eettene Mageni uwweexxa addachchiisa'n mamaba'a. 21Tinninna kaddeechchi Mageni uwweemmaxxa addachchiisa muuxa dande'aaxxa wo'ma qalbenni amanemaxxeeten. 22Tennexxeetemman amana Abirhaami'a qullumate kaddeexxi laakko'endeemmachchi. 23Yaane kinni «Isi'a qullunma kaddeexxi laakko'endeen» hiyyaaki hiyyichchi borreesemeek Abirhami'a calli'aatebaan; 24yaane kinni Magen qullumma no'aa laakko'aak Gootta no'oka Yessuusii'i reyotenaa'n ke'isseeke Mageno'n ammanna'enneke no'onninni mittebaten.
25Gootti no'ok Yessuusinna cubbo no'oxxee reyo'a sa'isemeexxi uwwemeeke, no'oonna qulloonsatee reyotenaa'n ke'eeken.
Currently Selected:
Roomeke Manni'a 4: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
