Roomeke Manni'a 1
1
1Yessuusi Kiristoosike erganjo kade'eeke, ergammallumatee ye'emeeke, Mageniinxe wengeele'aanna foyemeeke Phawuloosinaa'n ergendeexxa erga.
2Tinni wengele Mageni wabeeko ifixxi darree'n woyyichcha maxaafuwwa'n ediseexxi uwweemake addachiisatike hiyyichchon. 3Tinni wengeelenna Mageniink belti manjuma ifixxe darree'n, Daawwitixxe sannenaa'n ilemeexxa haasotaaxxen; 4iittanni no'ok Gootti Yessuusi Kiristoosi woyumatike Hafuurinni#1:4 yookaan Ifixxe woyyummake Hafuurinni reyotenaa'n ka'ati Magenke Belto kadeexxa lumoxxe hunnanni ege'nende. 5Kiristoosi ga'mii'n Ayihudake kadebaake ardi duuchchi giddii'n manna isike summa'n amanat afendaaxxe ajajemabaa ye'atee badhaadhakanna ergammallumma adhineennen.
6Ha'noonna Yessuusi Kiristoosike kaddino'a ookkone Mageni ye'emake manni giddii'niten. 7Magenoke'n eeyyendineexxi woyyoole kadatee ye'endineenek Roomi giddo hexxineeke duuchchchi'a nage'ekinna badhaadhi Mageno no'oke anninaa'ninna Gootta Yessuusi Kiristoosinaa'n ha'noo'a kadowwaal.
Roomii'i Uudatee Pawuloosixxa Halcha
8Butta duuchcha'n hedheeke manna'n ha'nooxxi amana haaso'endeemmaxxee edisennexxi Yessuusi Kiristoosi ga'mii'ni ha'noo duuchchiingixxee Mageno anka galateefataannen. 9Duuchchi wodda soodachchoti ha'noo qaabataannexxa, isike Beltixxa wengeele lallabat wo'ma qalbenni ergatemaannek Magen dhuga kula anxen. 10Iittanni ta'a udunse ha'nobaa dagatee'e fidhii Mageniinxenni ora ani'a qajeelo'a duuchchi wodda soodataannen. 11Jabaatinaashsha ha'noo assitaaxxa Hafuuriinxa uwwa ha'no'aa qoodonaa ha'noo uudatee halchaannen. 12Tenneenna hiyya anxi ani ha'nooxxe amananni, ha'noonna anxe amananni weli weli dayyeesinnannoshshaten.
13Anke dayyuwwaa, Ayihudake kadebaake wele manni giddo heddo Mageno amanaaka manna alfennashshanni iitanni ha'noo giddonna Mageno amanaaka manna alfatee haseennan; yaane kinni ha'noobaa dagatee heddo yanna qixxeefatennexxi ta'i qico hoyyemeennexxa egendino'a eeyyaannen. 14Girkeeke manna kadeekeeri'anna kadebaakeeri'a, beekoleteenna qalbeeffachcho afebaake manni'a magannete afe'eennen. 15Tennexxeeten, ha'noo Roomi giddo hexxina'neeke'n wengeele lallaba halchaanechchi.
16Ani wengeelete'n shookabe'no; tinni wengeele ediseexxi Ayihudiinka manna ookkoneechchi uduma Ayihudake kadebaaka duuchcha anjirtaaxxe Mageniinxe hunnanni. 17Mageniinxa qullumma wengeele kulde'een; «Qullichchi amanat hedhaan» hiyyendeexxi borreesendemmashsha tinni qullumma siretenaa'n muuxamii qico'n kaddeek amanatiten#1:17 yookaan amanatenaa'n amanatibaa.
Mannake'n Mageniinxa Mufe
18Fuggaalessumma ifixxenni dhugaa buqaakeera'n insa'nexxe xaqaro'ninna fuggaalessumma duuchcha'n Mageniinxi mufe iimii'n insa'ne'n daggaan.
19Mageni umo ifingenninni insa'ne Mageniinxee ege'na hassissaaxxa yaane insa'ne'n ifiseemmaxxe insa'ne eettene yaane duuchcha egene'een. 20Buttini dadendee woddinaa'n lellabaak Mageniinki adab, kuinninna duuchchi woddixxi isixxi hunnanna isixxi Magenumma isi dadeexxe dada darree'n ca'a hiteexxi leellitaammaxxee ifi'a balleesaaxxe balleesa'a manni aalataachchi hedhaba'a. 21Insa'ne Mageno egeneenni he'neexxi isoo isixxe magenummaa hasisaaka ulfinnanna galata uunebaan; yaada ifiken wayi fulabaake kande, qalbeefachcho affebaaxxi insa'exxi qalbenna dukkande. 22«No'o beekoleten» hina'ni gowwolete kande. 23Duuchchi woddike Magenika gaachchanna reyaake manjixxe'n ci'atixxe'n, horiinxe'ninna godobik me'aachuwwixxe dadaxxe fakke'n jijjiirre.
24Tennexxee Magen cubboti wo'miteexxe insa'nexxe qalbexxe gaabbenni weli'aan weli ifika biso salphinso'a insa'nee battitte yabaabbule'a sa'isse uwwe. 25Tinninna kaddeechchi dhugaa Mageniinxa dharake'n jijjiireexxee, dadeeke Magenixxe bakka dademeechcho magenooffanteemmaxxeenna konneechchwwi'a ergateemmeexxeeten. Magen kinni duuchchii woddi'a galateefatemeeken. Hamiin.
26Tennexxee Mageni insa'nee hara shookkisaaxxe gaabe'a sa'isseexxi uwwe. Melaalle insa'nexxi midde ege'nemeeka maaliinxe afenshaka ora ege'nemebaake'n jijjiirte. 27Iittanni labbalikinna ege'nendeexxa maaliinxa afensha melaalleti afensha waaleexxi weli'a weli maaliinxe afenshaxxe gaabbenni jammi hiyye. Labbak labbakenni welt shookkishshaaxxa asseexxi tenne ifixxe fuggoxxe hujeexxeenna geltaaxxa mura woxa ifike umo'n adhdhaan. 28Tenne'ni hana insa'ne yaada ifik giddo Mano ege'naa wayi fuldabaan hiyyat assema hassissabaaxxa yaane assinaashsha Magen wayif fuldabaaxxe sammo'a insa'nee sa'isse uwwe. 29Tennexxee xaqaro duuchcha, fuggoo assaa, kajjeella, haaphphaalessummanna fuggaalessumma insa'ne'n wo'mite; hinaaffee, manjo anga sa'aa, lolemaa, sobinna, shokko assa, insa'nen womiteekeeran; hamataakeera 30manjo summa balleessaa, Mageno gibaa, manjo yowwaa, hollaa, ifi dukaakeeran, fuggoxxa assatika ora dadaakeeran; hadokee ajajemmabaan; 31qalbefatabaake, wel aageexxa digaakeera, mararte afebaakeeranna jaba godobike mannan. 32Tenne yaanuwwa assaaki duuchchi «Reya hassissa» hiyyaaka Mageniika seera egena'inni tennee duuchcha assinaan; tennee assa calla kaddebaak, tennee asso'a welekanna tittirsinaan.
Currently Selected:
Roomeke Manni'a 1: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
