Laakosinka Maxaafa 24
24
1Eettenee yanna Bele'aami Duuchchi Woddik Gootti Isira'eeli'i eebisa eeya'neexxa afe wodda, wele woddishsha gojjo hasito me'ebaan. Yaane kinni alba qiilla gammoojjeba'a wirri hiyye. 2Bele'aaminna tammi asse uudaa wodda Isira'eelik ardi gosa gosatike mini hadinni kaambe giddo afoldeexxa uuda wodda Mageniink Hafuur iso'n dage. 3Isinna wabeekkumatika haaso'e safe hiyyee haaso'eqic:
«Ille isixxi ookkone banendeeke,
Bele'aami'i Bi'oorke beltika Wabeekkumatik haaso'a:
4Ookkone Magenika haao'a laqaake,
isi edo ibeenba'a ille isixxi banendeeke,
Duuchiinxa dandea'aake Magenixxa waleella uudaak hiyya'neeqic:
5«Koo Ya'iqoobi atik duunkaanuwwi,
tee Isira'eel ati galdaatek boonchuwwi hittatta ela'neeke!
6«Insa'ne dhooquwwatishsha,
galaani qarqara hedheeke hiddichchuwwinke boonchuwwisha barqaanqe'en;
Duuchchi Woddik Gootti kaasemmake heexotike haqichchuwwisha,
wodin qarqara lateeke birbirsuwwishaten.
7Insa'neke waabuwwanaa'n wodi'i phu'isaan,
insa'nexxi mayenna geyaaka wode'e alfitaan.
«Insa'nek moyanjinna Agaagii'i caalaan;
mootumma insa'nexxinna lummexxaan.
8«Mageni insa'nee Gibtsee'n fulcheen;
jabeenni insa'neekinn gafarisiinxe hunnashaten.
Insa'nenna ifike naapha kadeeka gosa gosaka arduwwa ninniffaani;
miqe ins'neexxanna bulleessinaan;
ifike gabetike mogidinni insa'ne ontaan.
9Kunni ardi adamatee qixxeeffateeke
labbake neenqishshanna meyyake neeqishsha rinphe'een;
ayyete mare iso'o dammassa dande'aak?
«Atee'e eebisaak ebbisemowwaal,
ate'e badinaakinna badinemeeke kadowwaal» hiyye.#Dada. 12:3; 49:9.
10Ookkonechchi uduma Baalaqi Bala'aami'n yo'oshsha mufate angatanna cala'n, «Naaphuwwa anka ani'a badindota'a ye'ennen; ati kinni sasiinxa yanna isa'ne'e eebbissetten. 11Yoona rakke mine atikibaa me'i; silaati ani hira ati uwwona'a hiyyeennan; Duuchchi Woddik Gootti kinni hirra alfitabexxoshsha ate'e hoyyeen.» 12Bele'aami Baalaqi'ni hiyyee hiisse haaso'e qic: «Anibaa ergitetteke manna'n 13‹Welechcho waalini Baalaqi worqetinna birretik sibilji wo'me'eeka ifika mootommatika mine ani'a uwwe'elenna midde Duuchchi Woddik Gootti hiyyaaxxa haaso'ati gadhidarre Duuchchi Woddike Goottike ajaji gadhidarre ani anke yaadinni eloyo'oxxa assa dande'abe'non hiyyennabaa?› 14Yoonna arda ankeba'a illeema higannon; yaane kinni dagaake baruwwa'n kuni Isira'elik ardi atike arda'n assaaxxa ate'n kulonna'a amo» hiyye.
Sholgaka Bala'aamika Wabeekkumatika Haaso'a
15Ookkonechchi uduma isi wabeekkuama hiyye safe haaso'aa qic:
«Bele'aami'i Bi'oorike beltik wabeekkumatik haaso'i
ookkone ille isixxi banendeeke manjichchika haaso'a.
16Ookkone Magenika hiyyichcho laqaaki,
Lumooke Mageninaa'n ege'na'a alfeeke
Duuchinxa dande'eeke Mageninaa'n waleella leelitaake
isi edo ibeenba'a ille isixxi bandeeke,
Duuchinxa dandea'aake Magenixxa leella uudaak hiyya'neeqic,
ibeeba'a hedhe'na'a ille isixxi banendeeke manjika wabeekkumatika haaso'a:
17«Iso'o afaanne kaddo male ta'atebaan;
iso'o uudaanne kaddo malee shiqotebaan.
Urjetishsha wa'a hiyyeek moyanji Ya'iqoobixxe gosanaa'n afemaan;
mootummatixxi bokko Isira'eeli giddi'ni kexxan.
Mo'aabixxa xiyyo
Seetixxe labbaxxe ooseka umiika qonjonna bullessaan.
18Eedoomii'i injifatemaan;
naaphi isik Seeyirinna kutti hiyyaan;
Isira'eeli kinni injifata'ne me'aan.
19Galchaak Ya'iqoobinaa'n afemaa'n
qachchi giddo gatemakaranna kutti assaan» hiyye.
Muxamiika Balaamika Wabeekkumika Haaso'a
20Ookkonechchi uduma Balaami Amaalaqi uudeexxi wabeekkuma haaso'a hiyyeeqic,
«Amaaleeqi gosa gosak ardi'a taakkakemman
udumi uduma kinni ba'aan» hiyye.
21Ookkonechchi uduma Qenaatito uudeexxi wabeekkuma hiyye haaso'eqic:
«Galdumi atik boonchi jabaate'eken;
qoorch atikinna kinjiinxe wele'o giddon.
22Kadoolenna ha'no Qenaatito,
Asoori boojite adhdhitaa wodda kutti assendinaan» hiyye.
23Ookonchi udumi'a isi lebe'e wabeekkuma hiyye haaso'eqic:
«Anee! Mageno tenne
assoole aate gate?
24Lumolla hoboluwwa Kitimike kasanaa'n,
daggaan;
Asooriinna Eboori'i abiddaan;
insa'nenna kutti assemmaan» hiyye.
25Ookkoneechchi uduma Bele'aami ke'e illee iima ifike minibaa hige: Baalaqinna ora ifinga me'e.
Currently Selected:
Laakosinka Maxaafa 24: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
