Laakosinka Maxaafa 16
16
Qorexxa, Daatanixxanna Aberoonixxa Xaqaro
1Leewwike gosak mini hado kadeek Qe'aatixxe gosak Yisa'eerik belti Qore, Roobelixxe gosak mini hadinaa'ni Eliyabixxi labbaxxi oose Daataninna Aberooni, iittanni Fileetimik belti Ooni fuggoxxenni qophphi hine ke'neexxi,#Yih. 11. 2Muuse gaarrifante. Insa'nenni welti Isira'eelik ardi giddo gurra fuleekinna, tuutatike sooreesuwwa kado'a filemeemmaki lame dhibbinna onde tomme Isira'eelik manni insa'nenni welti hedhemman. 3Insa'nenna bukki hine dangeexxi Muuseenna Aaroonii'i gaarrifanta'n, «Ha'no hara bira saxxineen! Tenne Tuutatik mitti mitting manji woyyichchaken; Duuchchi Woddiki Goottinna insa'ne'n hedheen; mayeeteta ha'o Duuchchi Woddike Goottixxe tuuta'n ifi lummisina'neek?» Hine.
4Muusenna tennee laqeexxa yanna albik butta gonbisemeexxi, 5Qoreenna isinni hedhemmaka manna, «Soodo gorsa Duuchchi Woddik Gootti ifike kadeekanna woyyichchake kadeeka gargar foyeexxi leellishaan; ifi biri'anna iyyedagaan; fi'leeka manjo ifibaa shikki hiyyaashsha assaan. 6Koo Qore, atinna atik manni duuchchi assitinaa qici hixaaniinka gubimalchuwwa aaxxinee dagge! 7Soodo gorsa Duuchchi Woddike Gootti edo ookkone hixaaniinke gubmalchuwwa'n kashiloke'n hixxana worre; Duuchchi Woddik Gootti filaak manji isi woyyichchake kadaan; ha'no tee Leewwito haranga birasaxxineeki ha'noten.»
8Higgeena Muuse Qore'n, «Ha'no tee Leewwito, laqqe! 9Ha'noo Duuchchi Woddik Gootti wele gatteexxe Isira'eelixxe tuutanaa'n gargar hissiyyotinna Duuchchi Woddike Goottike Taabotiinke galdumixxa ergatema muuxxinaashsha ifibaa ha'noo shikki assedhiyyo, tuutatanna ergatendinaashsha tuutati edo uurritinaashsha isi assa calli ha'noo geltabaa? 10Isi ateenna wele atinni welti hexxeexxa Leewwito duuchcha ifibaa shikki assedhe'een; ta'a kinni ha'no Qeesumatixxa huje lephphitine hujjino'a wo'laandina'neen. 11Tennexxee atinna atee hordofemak manni bukki hitine kexxine'ek Duuchchi Woddike Gootta'niten; Aarooni'n adhdhundina'neek Aarooni isi ayyete?»
12Ookkoneechchi uduma Muuse Eliyaabika belto Daataninna Aberooni ye'emmaashsha manjo erge; yaane kinni insa'ne «Dangabe'non! 13Qiillaa gammoojje giddo no'oo shiltotaa malebo ado pu'isaake boginaa'n no'oo axxe fuldetaxxi atee geltabaa? Ta'a kinni no'o'n goottondota'a hassaatte? 14Tennee waalin malebi ado pu'isaake bogibaa no'oo iyyedagebexxo, yookaan fichchuwwakanna woyinetika hiddichchuwwa dhaallannoshsha assitebexxo; maata konnee manna ille abiddatto? Haranga dangabe'no!»
15Muusenna lumoshsha mufateexxi, Duuchchi Woddika Gootta, «Uwwa insa'nexxa mee adhdhi; ani konne manninaa'n mitte harrichco midde adhdhebe'non; insa'nenaa'ninna mittekanna balleessebe'non» hiyye.
16Ookkoneechchi uduma Muusenna Qoree hiyyee qici, «Atinna atinni welti hedhemmak manni duuchchi, iittanni Aarooninna, soodo gorsa Duuchchi Woddike Gootti edo shiqqe. 17Mitti mittiing manji ifii ifika hixaanika gubimalcho adhdheexxi isi giddonna hixaana worowwaal; duuchching gubimalchi mitteba 250 kadaan; iittanni atinna Aarooninna ifi ifika hixaanika gubimalcho Duuchchi Woddike Gootti edo sqishshe.» 18Tennexxee mitti mittiing manji ifi ifika hixaanika gubimalcho adhdheexxi giddonna kashiloke'n hixxana woreexxi Muuseninna Aarooninni welti afensahatike duunkaanixxe wuddumme'n uurre. 19Ookkoneechchi uduma Qorenna, ifixxa hordofeeyye duuchcha afenshatike duunkaanixxe wuddumme'n insa'nee bukki asse wodda Duuchchi Woddike Goottik ulfinni tuuta duuchcha'n leelle. 20Duuchchi Woddik Goottinna, Muusenna Aaroonii'i, 21«Duuchiinga insa'nee mittemba hirbake'n bironna'a, tenne tuuta giddi'n fulle» hiyye. 22Yaane kinni Muusenna Aarooni albik butta gonbisemeexxi, «Manji duuchike hafuurike Mageno kaddeeteke Magenoo, manji mitti cubbo hujoole, tuuta duuchcha'n mufattattota?» Hinne. 23Duuchchi Woddike Goottinna Muuse, 24«Tuutate'n, ‹Qoreke, Aberoonikenna Daatanike duunkaanibaa'n bayyatte› hite kuli hiyye.»
25Ookkoneechchi uduma Muusenna ke'eexxi Daatanibaanna Aberoonibaa mare, Isira'eelixxi akeekisanjuwwa isoo hordofe. 26Isinna tuuta, «Konne fuggaalesi mannike duunkaaninaa'n bayyatte! Isa'nechcho kadeechcho mittekanna tuqqinoqqe'e; kada gophphoole insa'nexxe cubbo duuchchixxe buuttonni ha'noo muddinaani» hiyye. 27Tennexxee Qoreke, Daatanikenna Aberoonike duunkaanuwwinaa'n bayyante; Daataninna Abirooni dangeexxi ifixxe aruwwanni, oosenninna ifixxe annoolenn welti ifike duunkaanuwwixxe wuddumme'n uurrine.
28Ookkoneechchi uduma Muusenna, «Assaannexxa yaanuwwa Duuchchi Woddiki Gootti anee erge'naate malee anke umike yaada kadebaaxxa egendinaa qici: 29Kunn manni manji reyamashsha seeriinxa reyyo reyoole yookaan reyammake manjo'n geltammaxxi calli insa'ne'n geltoole Duuchchi Woddik Gootti anee ergeebaan hiyyaten. 30Yaane kinni Duuchchi Woddik Gootti hara kadde egendebaaxxa haaroxxa yaane, buttini haanni hiyyeexxi insa'neenna insa'neechcho kadeechcho duuchcha liqinsee'naa hedhondinni hirreesi giddo mooggemmoole, kunni manni Duuchchi Woddika Gootta tuffateeke kadeexxa egendinaak ookkone woddan.»
31Tenne yaane duuchcha haaso'e bireeshshanni buttin uurrinemmaxxe bakka'n haani hiyyeexxi 32ins'neenna insa'neeka mini haduwwa, iittaanni Qoreenna isika manjo duuchcha horanteexxa karra duuchcha buttin liqiinse. 33Tennexxee insa'ne anfeemmaxxe yaane duuchchinni welti hedhondinni hirreesi giddi'a dhidhimme; buttinikinna insa'ne hana cufeme; insa'nenna ba'neexxi tuuta giddii'n fuggussemme. 34Insa'nexxe raarenaa'ninna kexxeexxa ookke hedhemak Isira'eeli ardi «Buttin no'onna liqinsaan» hiyya'n baaje.
35Ookkoneechchi uduma Duuchchi Woddike Gootti giira iimii'ni ergee'naa hixaana gubammaka lame dhibbanna onde tomme manna itte.
36Duuchchi Woddik Goottinna Muuse'n, 37«Hixaaniink gubimachchuwwi woyyichchake kademmaxxee giddo hedhemaka kashilo aa'ne bayinseexxi dunnaashsha qeesichcho Aaroonika belto Ali'aazaari'n kuli. 38Kunni hixxaniink gubimalchuwwinna cubbo hujati hedho ifixxa ifi'anni balleessemmake manniken; gubimalchuwwikinna Duuchchi Woddike Gootti edo shiqeexxi woyyoommeke kadeemmaxxee tolchimalchinke buyyisanjo kado'a tundettexxi hephpheesi; kunni hixxaaniink gubimalchuwwinna Isira'eelika arda xexxe'achiisatike beessisa kadaan.»
39Tennexxee Qeesichi Ali'aazaar iikki gubatemaki manni iyyedageemmaka segeetotike sibiljika gubimalchuwwa mitteba bukki asseexxi tolchimalchinke buyisanjo kado'a tume giise. 40Tenneenna isi iitta asseechchi Duuchchi Woddik Gootti Muuse darree'n isoo ajajemmashshaten. Tinni Aaroonixxe horte kaddoole malee'e ayyinna Duuchchi Woddik Gootti edo shiqeexxi hixaana gubabaashsha, guboole kinni Qore'ninna isike manna'n kaddemmaxxi ookkone manjo'n kaddaaxxa Isira'eelike ardi'a uwwendeexxe xexxe'achchiissamman.
41Langaxxa barra gorsa Isira'eelixxi tuuta, «Ha'no Duuchchi Woddike Goottika arda shiltine'een» hita'n Muuse'ninna Aarooni'ni adhdhunde.
42Yaane kinni Isira'eelixxi tuuta Muuse'ninna Aarooni'ni kexxo'a bukki hiteexxa yanna afenshatike duunkaanibaa wirri hineexxi uunda wodda duumanchi iikki woddi afenshatika duunkaana buqe'naa anfe; Duuchchi Woddike Goottik ulfinninna leelle. 43Ookkoneechchi uduma Muusenna Aarooni afenshatike duunkaani edi'a me'ine. 44Duuchchi Woddik Goottinna Muuse'n, 45«Tenne tuuta mitte yanna'n bira'ennen insa'ne birii'n bayyati» hiyye. Muusenna, Aarooni Albik butta gonbisemme. 46Ookkoneechchi uduma Muuse Aaroonii'i, «Duuchchi Woddike Goottixxi aare dagee'naa bala saffa'een gubimalcho aadhi, kashilokanna tolchimalchokenaa'n aaxxeetexxi hixaanik welt itti worte'e rakke gongite tuutatiba'a martettexxi insa'ne'a cubbo biri» hiyye. 47Tennexxee Aarooni Muuse hiyyemmashshanni tuuta giddi'a gonge mare e'ye; balatinna edisenni ardi giddo saffe'eemman; kaddoolenna Aarooni hixaana gubeexxi insa'neexxa cubbo bire. 48Isinna reyyeekeenna hedhoti hedheeke mannixxe oddo'n uure; balatinna uurte. 49Kaddoolenna Qorexxe buutonni reyeeke manni gadhi darre tommenna shoole kuminna torbaani dhibbi manni balati reye. 50Ookkoneechchi uduma bala uurte; Aarooninna Muuse hedheebaa afenshatike duunkaanixxe wudumeba'a ille iima hige.
Currently Selected:
Laakosinka Maxaafa 16: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
