Laakosinka Maxaafa 13
13
Kenaanik Bogixxa Dooyyema
(Lan. 1:19-33)
1Duuchchi Woddike Gootti Muuse'n, 2«Tommenna lame Isira'eelike gosati mini'a uwwaanneka boga dooyyo'a heenoka manna erg; duuchchinge gosati mininaa'n mitte mitte seereessa ergi» hiyye. 3Tennexxe Muuse Duuchchi Woddike Goottike ajajajinni Faaraanixxe qiilla gammoojjenaa'n manna erge; kunni duuchching manni Isira'eelitotike akeekisanjuwwamman. 4Konne mannik summuwwinna konneechchi butta hedheeken: Roobelike gosati mininaa'n Zakkurika belto Samu'eelii'i; 5Simoonike gosati mininaa'n Suureka belto Sefaaxii'i; 6Yihudake gosati mininaa'n Yufoonika belto Kaalebii'i; 7Yisakoorike gosati mininaa'n Yoosefika belto Yigi'aalii'i; 8Efireemike gosati mininaa'n Neweka belto Hooshe'a. 9Biiniyaamike gosati mininaa'n Raafuka belto Felxii'i; 10Zabilonike gosati mininaa'n Sediika belto Gaadu'eelii'i; 11Minaaseke gosati mininaa'n kunninna Yooseefike gosati mine hiyyaten, Suusika belto Gaadii'i; 12Daanike Gosati mininaa'n Gemaalika belto Ami'eelii'i; 13Aseerike gosati mininaa'n Mika'eelika belto Setuurii'i; 14Nefitaalemike gosati mininaa'n Yaabika belto Naabii'i; 15Gaadike gosati mininaa'n Maakika belto Ge'u'eeli'i. 16Yoona boga dooyyo'a Muusee ergemmake mannik summi konneten; Muusenna Neweka belto Hooshe'a, «Iyyaasu» hiyye summa fulche.
17Muusenna Kenaanika boga dooyyaashsha manna hiyyeexxi ergee qici, «Negeebi darree'n alalle qabatineexxi koobatike bogibaa me'we. 18Bogi hitta hedheexxanna giddo hedheek manni hittee qico jabake yookaan shaqqake, heenoke yookaan heddateeke kadeexxa dooyye. 19Insa'ne he'na'neek bogi hitta hedheeke? Eloke mo'o elobaake? Giddo hedha'neek qachchuwwina'a? Dalla'i beloke mo'o yookaan kollotike? 20Buttinita hitta hedheeke? Shaqqake mo'o bagoke? Gongomiike mo'o gongomi beloke? Dandeessissee qicinni ookkone bogixxa gumma aaxxine dagge;» yanna iittinna woyyine gumma reefi ra'issitaamaxxe yannaman.
21Tennexxee manni alalle me'eexxi Tsiinxe qiilla gammoojje'n, Lebooni Hamaati darree'n Re'aabi qico'n calaqi hiyye me'ati boga dooyye. 22Insa'nenna Negeebi giddii'n alalle fulleexxi Ahimaan, Seesinna Telaami hiyyendaaxxi Enaaqixxi hundaayyetixxi horte hexxeeba Kebirooni dange; Kebiroon ijaarendeek Gibtse giddik Zo'aarik qachchi ijaaremebaaxxe torbaane wogga edi darremman. 23Insa'ne Eshikoolixxa dhooqa genneexxi ookkoo'n mitte daalo woyinetixxa rodde wonxe; lami manni tennee woyinetixxa rodde Roomanixxenna oddi'iinxe gummanni welti murgete'n leenxiseexxi dugumote'n duke. 24Isira'eelik manni woyinetike daalxa rodde wonxemaxxa eettenne bakka Eshikoolixxe dhooqa#13:24 Eshikool Ibrititotikenni woyinetixxe gummaxxa rodde hiyyaten. hiyyeme summa fulche.
Dooyya Fuleemmak Manni Iyydageexxa Odo
25Iikki mannikinna boga dooyyeexxi shoole tomme barra uduma ille iima hige. 26Iikki mannikinna Muuse Aarooninna Isira'eelik orgi hedhemmaba Faaraanixxe qiilla gammoojje giddo Qaadesi'a ille iima hige; uundeexxa duuchchanna insa'ne'ninna orga duuchcha'n haassonne; iyyedangemaxxa bogiinxa gummanna insa'ne'n leelinshe. 27Mannikinna Muuse'n hiyye haaso'ee qici, «No'oo ergitetteke boga'n genee'e e'yine dooyyineennen; bogi malebi ado phu'isaaken; gumma isixxinna tenneten. 28Yaane kinni ookkone boga'n hedheek manni jajjabbake; qachchuwi insa'nekirinna kollifatemeeke lumollamman; wele waalin Enaaqixxe horteka manna ookko anfenne. 29Amaaleqik manni hedha'neebi Negeebi giddon; Hiititotik, Iyyaabusikinna Amoorak manni koobatike boga'n hedha'neen; Kenaanik manni kinni abbaayyatee shiqibanna qarqara Yordaanoosike lagike'n hedha'neen» hiyye kule.
30Ookkoneechhci uduma Kaalebi Muuse edo manni sammi hiyyaashsha asseexxi, «Marree boga insa'neeka dhaallannon; insa'nee injifantannoxxinna kokaken» hiyye.
31Yaane kinni isinni welti me'eemmak manni, «No'o caala jajjabbake kandemaxxee insa'nee dandeenne injifantabe'non» hiyye. 32Mannikinna dooyye dagemake bogixxee elobaaxxa odo Isira'eelike ardi giddo hiyya'n odeesee qici: «Dooyyinennek bogi giddo hedhaaka manna ittaaken; ookko undenneki manni duuchchinna ejjuma qeerrarrammaken; 33Nefiliimika mannanna ookko anfennen; Enaaqixxi horte daggeek Nefiliimi'niten; no'onna ifi uundanoo wodda koro'miisa lanbenne; insa'nenna no'oo iittanni unde'een.»#Dada. 6:4.
Currently Selected:
Laakosinka Maxaafa 13: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
