Matoosixxa Wengeele 8
8
Yessuusi Soomo'eeka Manjichcho Fayyise
1Yessuusi koobatenaa'n dirree wodda heddi manni iso'o hordofe. 2Ookkone wodda soomo'eek mitti manjichchi Yessusibaa dage. Isinna Yessuusi edo kumbu hiyyeexxi, «Ee, Gootta! Eettotole anee'e fayyisa dandeettaton» hiyye.
3Yessuusinna anga diriirisse ookkone manjo qaqqabeexxi, «Ate'e fayyisa eeyyaannen fayyi» hiyye. Manjichchikinna soomakenaa'n hirbange'n fayye. 4Yessuusi konnee'e soomakenaa'n fayyeeka manjichcho, «Tenne yaane mitteke'n kuldoxxe'e! Yaane kinni martettexxi ifi qeesichchoke'ni leellishi! Fayya atixxi insa'ne'e dhuga kulate kaddaashsha Muuse ajajemmaka tolcha shiqishi!» hiyye.
Dhibba Lolinka Manna Akeekammake Manjichchixxa Amana
(Luq. 7:1-10)
5Yessuusi Qifirnahoomike qachcha'n e'yee wodda mitti Roomik dhibba loliinke mannik ajajalli isiba dageexxi, 6«Gootta erganji anki naafee shiilexxi mine diipheen» hiyye kadhate.
7Yessuusinna iso'n, «Ani dage iso'o fayyisannon» hiyye. 8Dhibba lolinka manna ajajammaki kinni Yessuusi'i «Goottaa, anke mine'ni e'yitota'a ani geyeennekebaan. Yaane kinn mitte hiyyichcho calla haaso'i! Erganji ankinna fayya fayyaan hiyye hisse haaso'e. 9Lebeexxi, aninna baalloomiinke weli manni hunda ajajemaanneken; higgeen ani'a ajajema'neeka lolinka mannanna afeennen. Mitte ‹Me'i!› hiyyonnole me'aan; welekanna ‹Amo!› hiyyoonnole dagaan. Anka erganjonna ‹Konneechcho huji!› hiyyoonnole hujaan» hiyye.
10Yessuusi konne'e haaso'a laqe wodda, mambe'a hiyyeexxi isoo hordofammake manna'ni hiyyee qici, «Dhugaate ha'no'n haaso'aannenni, iita hexxeexxa lumoxxa amana afeeka mitte manjo midde Isira'eeli giddo afeebe'no. 11Tennee kassi hiyye! Heddi manni borotenaa'ninna dhidhimakenaa'n dagaan. Abirihaaminni, Yisaaqinninna Ya'iqoobinni welti mootumma iimixxe'n itatee ofo'laan.#13:29. 12Iimixxi mootumma alfan hiyyeme hedememmak manni kinn dukkanati giddo gadhi'a huinemaan. Ookko'o oodhishshatenna isso qarate kaddaan.»
13Yessuusinna ookkonee dhibba lolinka manna ajajammaka «Amana atixishsha ati'a kadduun; missiyyi!» hiyye. Erganji isikinna eettene yanna'inni fayye.
Yessuusi Elagopheeka Heddo Manna Fayyise
(Mar. 1:29-34; Luq. 4:38-41)
14Yessuusi Pheexiroosike mine'n e'ye wodda Pheexiroosixxa ballo eebbishe giisa gophe'na'a dhiiphphee'na afe. 15Anga isexxa qaqqabe wodda, hirbange'n eebbinji isee waale'na'a fayyite kexxeexxi Yessuusi'i keessunsite.
16Hashshee wodda heddo fuggichchi hafuurinni abide'emeeka manna Yessuusiba'a iyyedange; Yessuusi hiyyichcho ifikenni fuggichcha hafuuruwwa fulche; ela gopheemmaka manna duuchchanna fayyise. 17Tennee assati, wabeekichcha Issayaasi'n «Isi dhibo no'oxxa adhdheen; ela gonphe no'oxanna ba'edhe» hiyyemeemmak raagi muuxeme.#Isa. 53:4.
Yessuus Hordofa Laqqaak Hira
(Luq. 9:57-62)
18Yessuusi, heddi mann dageexxi isso'o qoqobe'na'a uudee wodda abbaayyaati widdi'a foofaashsha hordofeeyye ifixxa ajaje. 19Eettene yanna'ni mitti Seeriink#8:19 tenne bakka'n kulemeek Seeri Muuseke seeran hiyyaten barachchiisaalli Yessuusibaa dageexxi «Koo barachchisaallo, ati me'itattoobaa duuchcha atee hordofannon» hiyye. 20Yessuusinna «Jeedaluwwi bale ifixxe afee'eni; ci'atinna galdaaka mine afe'een; Manjiinki Belti#8:20 Manji belti hiyyaak hiyyichchi Yessuus ifi ye'aamake summamman. kinn umo ifika midde uggaabi hedheba'a» hiyyeexxi hiisse haaso'e.
21Hordofeeyyeti giddi'ni mitti iso'o, «Gootta edise marennexxi anka anna moogo» hiyye.#8:21 Moogo, Anni isik reyaa qico'n isoo'o gargareexxi moogo'a afe'eexxe halcha labbaan.
22Yessuusi kinn ookkone hordoffanjo «Reyeeki manni ifika reyeeka manna mooqo'a waaldetteexxi ati ane'e hordofi!» hiyye.
Yessuusi Danbala'a Sammi Asse
(Mar. 4:35-41; Luq. 8:22-25)
23Yessuusi hobolo giddi'a e'ye wodda hordofeeyye isixxinna isinni welti me'ite. 24Dedhange'n jabak danbala'i abbaayyate'ni ke'exxi hobolo lixisaa geye; ookkone wodda Yessuusi diipheemman. 25Hordofeeyyetinna Yessuusibaa shiqqeexxi, «Goottaa, ba'neennen! No'o anjiri!» hitteexxi isoo dammassite.
26Isinna «Ha'no amana heeno'mite'ek mann mayye'e sodaatinaa?» hiyye. Ookkonechchi udumi'a diidallotanna abbayya xixe, lumoxxi samminna kadde.
27Manni duuchchi lumo qico mamibe'a hiyyexxi, «Diidallotinna abbayya midde isi'a ajajenda'neeki kunni manji maa manjo!» hiyye.
Fuggichchi Hafuurinni Abidemeeka Lame Manna Yesuus Fayyise
(Mar. 5:1-20; Luq. 8:26-39)
28Yessuusi Galilixxa abbaayya foofeexxi Gergeessenoonike#8:28 wele tikaar Geerassenoon hitaan. bogibaa dagee wodda fuggichchi hafuurinni abideme'eki lami manni hirreessakenaa'ni fulleexxi isini futti hiyye; Insa'nenna hara lumoo qico fuggichchake kandeemmaxxee ayyinna ookkone ora sa'a dande'aammabaan. 29Insa'nenna «Koo Mageniinke Belto no'naa'n maa afeete? Yanna geltebaangi no'o abara uudissotaa daggettee?» hina'ni raarre.#Hay. 11:12; 2 Sam. 16:10.
30Insa'nenaa'n heenoo qico baayyatteek booncho'ni heddo booyye bobbaatemmaan. 31Fuggichchi haafuuruwwi kinni «No'o fulchchitattexxe kaddoole, booyyuwwatibaa me'inannoshsha ergi!» hinexxi Yessuusi kadhate.
32Yessuusinna insa'nee «Me'ee!» hiyye. Tennexxee fuggichchi hafuuruwwi konne lame mannanaa'ni fuleexxi booyyete'ni e'ye. Booyye duuchchiinxi bowwa'inke iriganaa'ni didda'n abbayyaati giddo lixxee rerte. 33Booyyetixxi allalisanonna baajjee qachchi giddi'a maritteexxi kaddeexxa yaane duuchcha odeessite. Fuggichchi hafuuri abideemmake manna'ni kaddeexxa yaane duuchchanna haasotte. 34Ookkonechchi uduma qachchiinki manni duuchchi Yessuusi'i uudo'a fule; isoo uundee woddanna insa'neke boginaa'ni me'aashsha iso'o kadhante.
Currently Selected:
Matoosixxa Wengeele 8: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia