Leewwitotika Maxaafa 23
23
Ayyaana Hitta Ulfeesinaaxxa
1Duuchchi Woddik Gootti Muuse hiyyee qic, 2«Isira'eelike ardi'a Woyyomeeke hite lassitatoki: ‹Ank Mageniinki ayyaani konnechchin butti'a hedheeken.
3« ‹Huje hujjinaaxxi jaane barra hexxeeni; torbeessoxxi sanbatiinxi barra kinni hafuura adhdhatixxe barran. Ettene barra magenonfachchote bukki hiyye male mitte hujenna hujjinoqen; hexxinaaxxe bakka duuchcha'ni sanbati Magenokee woyyoondeexxe barran.#Fula. 20:8-10; 23:12; 31:15; 34:21; 35:2; Lew. 5:12-14.
4« ‹Konnechchinni butti'a hedheeka ayyanuwwa'ni Mageni edo bukki hiyyati uwwendeexxe barra'ni ulfeessitinaan.
Sa'atikanna Kebbotika Ayyaana
(Lak. 28:16-25)
5« ‹Duuchchi Woddik Gootti ulfesemaaki Sa'atiki ayyaani woggatike siretike agenjo'ni tommenna sholgeesoxxe barra'ni arshsho e'yitee'na siphphi siphphi hiyyaa wodda kadaan.#Fula. 12:1-13; Lew. 16:1-2. 6Tommenna ondeessoxxe barranaa'ni Duuchchi Woddik Goottik kebbotiki ayyani kadaan eettene barranaa'ni torbaane barra qico'ni gamami e'yebaaxxa kebbo ittinaan. 7Tenne barruwwanaa'ni siretixxe barra'ni magenonfachchotte bukki hitinaan; barrate'ni huccitinaaxxe yaanenaa'ni tenne barra'ni mittetanna huccitinabaan. 8Torbaane barra qico'ni ciincatika tolcha Magenokee shiqishshe; barratixxa huje hucca waaldine torbaxxe barra'ni magenoonfachchottee bukki hitinaan.› »#Fula. 12:14-20; 23:15; 34:18; Lew. 16:3-8.
Tommitte Uwwa
9Duuchchi Woddik Gootti Muuse hiyyee qici, 10«Isira'eelike ardi'a hite haasotato qici: ‹Ani Mageni uwwaanneke boga'ni e'yitine midha hujjine bukki assitina wodda siretixxa ladde qeesichchokee uwwe; 11Mageni uwwa ha'nooxxa adhdhaashsha qeesichchi ladde Duuchchi Woddike Gootti'a lele'misatike tolcha asse shiqishaan. Qeesichchikinna tenne shiqishiyyo hasissaaki sanbatake'ni itti aandaaxxe barra'niten. 12Lele'misatika tolcha shiqishinaaxxe barra eettene'ninni xure itteeka afebaaka wogga mitteka gedhebiinka buruusa ciincatike tolcha assitine shiqishshe. 13Isinni welti ejeersiinxa zayiteni qushshineexxa lame kiilo shiqinshshe danneexxa bulle itatike tolcha assitine shiqishshe; tinninna fishshe Mageno gammachchiisaake tolcha kadaan; isinni welti mitte leetiro kaddaaka woyinetika bulbulo uwwate assitine shiqishshinaan. 14Tenne uwwanna Magenoke uutinebaangi edissine haandineexxe midhanaa'ni inqaxxa yookaan ayendeexxa yookaan buulle kebbissine ittinoqen. Kunni seeri dagaake baro'ni oose ha'nooxxixxe oose duuchcha'ni heqqemowaal.
Midha Aasseccatika Ayyaana
(Lak. 28:26-31)
15« ‹Ladde Duuchchi Woddike Gootti'a lele'misatike tolcha assitine shiqishinemmake sanbatanaa'ni ke'isitine torbaane sanbata laakko'we; 16Torbeessoke sanbati uduma onde tommeessoxxe barra'ni higgeeni haaroba midhatixxa uwwa Magenokee shiqishinaan; 17Mitti mittingi mini hadi lame lame kebbo lele'misatike tolcha asse Duuchchi Woddike Gootti'a shiqishowaal; mitte mittenda gamami e'yeexxa kebbo lame kiilo shiqqinshe danneexxa bulle ra'issine haaroxxe midhaxxe aasseccaa Magenokee umiinxe uwwa assitine shiqishshe. 18Kebboti welti ardi fayyaka mitte woggaka torbaane gedhebiinka buruusa, mitte jibichchanna lame korbeeyye shiqishowwaal; hori kunninna midhatixxe uwwaninna woyinetike bulbulixxe uwwani welti ciinceesinaake itatike tolcha kade shiqaan; kunni giirate'ni ciinceesinaaki tolchi Mageno gammachiisaake kadaan.#Fula. 23:16; 34:22; Lew. 16:9-12. 19Okkoo'ninna cubbo biratike tolchi'a mitte labbaka recco, mittoomiinke tolchi'a mitte woggaka lame gedhebiinka buruusa shiqishshe; 20Qeesichchikinna umiixxe midhani ra'issineexxa kebbo lame buruusinni welti Duuchchi Woddike Gootti'a lele'misatike tolcha asse shiqishaan; isenna qeesotiinke qoobbo kadaan; tinni uwwanna woyyooteexxeni. 21Itti barra magenonfachchotixxe barra kaddaashsha lassitinaan; mitte hujena hujjinoqen; tinninna hexxinaake boga duuchcha'ni oose ha'nooxixxe oose'ni duuchchi woddi'a aadate kadde hexxaan.
22« ‹Boga ha'nooke'ni midha bukki assitinaawodda fichchiinke kasinaa'ni haandinoqen; deegge gatteexxa bukki assatee udumi'a higginoqen; gateechcho hiyyeyyeteenna keesummatee waalle; ani Mageno ha'noken.› »
Malagatinka Ayaana
(Lak. 29:1-6)
23Mageni Muuse; 24«Isira'eelike ardi'a: ‹Torbeessoke agenjo'ni agenji e'yeexxe taakkaxxe barra'ni Mageno magenoonfachchotee malagatiki kullaxe kassitixxe hafuura adhdhitinaaxxe barra kaddowaal. 25Ettene barra'ni Magenoke ciinceesinaaka itatika tolcha shiqishshe malee ettene barra'ni mitte hujenna hujjinoqen.› »
Cubbo Biratixxa Barra
(Lak. 29:7-11)
26Mageni Muuse, 27«Konne torbeessoke agenjo'ni tommessoxxe barra'ni ardiinxa cubbo biratika seera muuxxinaaxxe barran; ettene barra'ni Mageno magenonfatatee bukki hitinaan; eettene barra afo'o ha'nooke'ni maqqinaachchi hedhoqqen; Magenokeenna ciiceesinaaka itatika tolcha shiqishshe; 28Mageno ha'nooki edo ardiinxa cubbo biratika seera muuxxinaaxxe barra kaddemmaxxee ettene barra'ni mitte hujenna hujjinoqen. 29Ettene barra'ni huuni manjinna afo'o isike'ni mise yaane maqaaki hedhoole isinna ifike ardi giddii'ni fulowwaal 30Ettene barra'ni huje hujaaki ayyinna hedhoole ardiinxe oddonaa'ni fulche lubbo balleessanon; 31Tinni aadatixxi akeette hexxinaake booncho duuchcha'ni oose ha'noxxixxe oose'n heqqendee hexxaan. 32Agenji e'yeexxe sallaneessoxxe barra'ni arishsho e'yiteexxe yannanaa'ni ke'isitine tommessoxxe barra'ni arishsho e'yitaaxxe yanna qico'ni ayyinna indaachcho afo'o isike'ni maqoqqen; tenne barra gargari hexxeexxe hafuura adhdhatixxe barra assitine heqqe.»#Lew. 16:29-34.
Fooqiinka Ayyana
(Lak. 29:12-40)
33Magenikinna Muuse, 34«Isira'eelixxe oose'a konne: ‹torbessoke agenjo'ni tommenna onddeesoxxe barranaa'ni torbaane barra Magenokee Fooqiinka ayyaana ulfeesitinaani. 35Tenne barruwwanaa'ni siretixxa barra Mageno magenoonfatinaake ayyaana kado male mitte hujenna hujjinoqen; 36Torbati giddo barra barra'ninni Magenoke ciincatika tolcha shiqishshinaan; saddeeteesso baro magenoonfachchotee bukki hitinaan; Magenoke ciinceesinaaxxe itaka tolcha shiqishshe; tinninna magenoonfachchotixxe barra kaddemmaxxe mitte hujenna hujjinoqen.#Lew. 16:13-15.
37« ‹Itatixxa uwwa, ciincatika tolcha, midhatixxa uwwa, tolchakanna ha'watixxa uwwa Magenokee shiqishshinaaxxe magenonfachchotixxe barra kaddaashsha Mageno ulfeesatee lassitinaaki ayyanuwwi konneraten. 38Kunni ayyanuwwi sanbatake'ni itti lebeme ulfeesemaaken; konne ayyanuwwa'ni uutinaaxxi uwwa, duuchchi wodda uutinaaxxe uwwa'ni, werreegi muuxemee'na uutinaaxxe uwwa'ninna fedhi ha'nooxxenni uutinaaxe uwwa'ni itti lebende Magenokee shiqqaaxxen.
39« ‹Boga ha'nooke'ni midha bukki assitinaa wodda torbeessoke agenjo'ni tommenna ondeessoxxe barranaa'ni ke'issitine konne Fooqiinka ayyaana Magenii edo torbaane barra qico'ni ulfeessitinaan; siretixxi barra gargari hexxeexxe hafuura adhdhatixxe barra kaddaan. 40Ettene siretixxe barra'ni boga ha'nookixxe haqqenaa'ni elo eloxxa gumma, meexxetika shafa, lagiin qarqara hedhaake haqichchika shafa abiddine Mageno ha'nooka lummissina'ni ayyaana ulfeesate'ni kexxinaan. 41Konne ayyaananna wogga wogga'nini torbeessoke agenjo'ni torbaxxe barra'ni ulfeesse; tinni oose ha'nooxixxe oose'ni duuchchi woddixxe aada kaddaan; 42Torbaane barraa'a Isira'eeliki ardi duuchchi fooqake'ni ofo'laan; 43Tennexxee ani Mageni Isira'eelika arda Gibtseke boganaa'ni fulchene wodda fooqa fooqilsina'ni he'naasha assennexa oose ha'nooxxixxi oose egendaan; ani Mageno ha'nooken.› »
44Konne qicinni Muuse Mageno ulfeesatee heqqiyyo hasissaake ayyanuwwixxa akeette Isira'eelike arda'ni kule.
Currently Selected:
Leewwitotika Maxaafa 23: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
