Leewwitotika Maxaafa 19
19
Murtetixxanna Woyyummatika Seera
1Mageni Muuse, 2«Isira'eelike ardi'a: ‹Ani ha'nooki Mageni woyyichchake kadennaxxee ha'nonna woyyoomme.#Lew. 11:44-45; 1 Phex. 1:16.
3« ‹Ha'nonaa'ni mitti mittiniingi anna isikanna ama isixxa ulfeesowaal. Ajajeneshshani sanbata ulfeese ani Mageno ha'nooken.#Fula. 20:8; Lew. 5:12; 16.
4« ‹Wele mageno magenonfatatiba higginoqen; yookaan sibilo miseke'ni fakke wele magenuwwiinxa giissitinoqen; ani ho'nooke Magenon.#Lew. 20:15-16; Lan. 5:19-20.
5« ‹Mittoomiinka tolcha tolchitato wodda uwwenneka seera heqqi; tolchake'ninna ani gammadanon. 6Hori dulemeexxe barra'ni yookaan langa baro maala indowaal; sakka baro geyeexka giirate'ni gubbe. 7Sakka baro indoole batto'eeke kademmaxxee tolchi ikki anee gammachchiisaakebaan; 8Ookkone maalanna itaaki huuni manjinna ani'a woyyonsemeeka tufatendeexxe yaaneshsha uudemmaxxee cubbote isi'a kaddaan; isinna ifike ardi giddii'n fulowaal.
9« ‹Midha bukki assitinnaa wodda gabalate'ni hexxeexxa midha haandinoqqeni; haandinaa'na gatteexa deegge bukki assate udumi'a higginoqen; 10Woyine bukki assitato wodda daaloke'ni gateeka yookaan butta harca'eeka qocatee illeema udumi'a higgoxxen; gateeka duuchcha hiyyeeyyeeteenna keesummatee waali; ani Mageno ha'nooken.
11« ‹Moortinoqen.
« ‹Sobbinoqen.
« ‹Dhara haasottinoqen.
12« ‹Summi ankenni kakatinoqen; Mageni ha'nokika summa diqqeesitinoqen; ani Mageno ha'nooken.#Fula. 20:7; Lew. 5:11; Mat. 5:33.
13« ‹Olla'a atike'ni fuggoxxa assitoxxen; yookaan karra isixxa ifi'a adhdhitoxxen.
« ‹Rundiki hujisseteke manjiki rundi atiba mitte hashshanna galoqqen.#Lew. 24:14-15.
14« ‹Mansha laqabaaka yowwitoxxe; ille afabaaki edo gugufataashsha misechcho isi edo uggitoxxe; Mageno sodaat; ani Mageno atiken.#Lew. 27:18.
15« ‹Murte uutinaa wodda addatendineekenna dhugaatike kadde; duuchchinge toggi assitine murte uwwe malee hiyyeessa hiyyuma isixxe hitine miiccinoqen; dureessa durumma isixxe hitine sodaattinoqen.#Fula. 23:6-8; Lew. 16:19.
16« ‹Ardiinxe oddo'ni mammarenda'ni summa manjiinka ballesitaaxxa odo odeessitoxxe.
« ‹Murteti mini edo manjo mitte reyaashsha murro'a dhara dhugaate assite kuldoxxen; ani Mageno atiken.
17« ‹Dayyo atika jibbitoxxen; olla'ake'ni balleessa geessisaa wodda gorsi; isinni welti balleessanjoke kaddaboxxoshsha.#Mat. 18:15.
18« ‹Hoone manjo'ninna halo fuldoxxxe; ayye'ninna halo abidoxxen; yaane kinni ifi eetattashshan olla'a atika eeyyi; ani Mageno atiken.#Mat. 5:43; 19:19; 22:39; Mar. 12:31; Luq. 10:27; Rom. 13:9; Gel. 5:14; Ya'i. 2:8.
19« ‹Ajaja anka heqqe.
« ‹Mitte hore wele hore'n horsiisoxxeni.
« ‹Mitte ficha'ni lame gargari hexxeexxa sanne rokkoxxen.
« ‹Lame gargar hexxeexxe yaaneni giissineexxa seemma oddo'witoxxen.#Lew. 22:9-11.
20« ‹Mitti manji welekee uwendeexxe garbite dubarichchon welti yababuloole, ikki uwwendemmaki manji maallaqqa uwwa gophoolenna garbitte dubarrichchonna isen yababulemmaki manjichchi mura wonxaan; yaane kinni dubarrichcho garbummatenaa'ni fula gophphemmaxxee lamiinge'ni reyotixxa murte ibinsabaan. 21Tenne balleessa balleesseeki manji cubbo biratee labbaka gedhechcho Mageni ulfinniki leellammake duunkaanibaa iyyedagowwaal. 22Qeesichchikinna okkone manjixxa cubbo konne labbake gedhechchike tolchinni biraan; Magenikinna cubbo isixxa gattowwaal hiyyaani.
23« ‹Kanaanike boga'ni aaggine hooneenna gumma uwwaachcho kaassinoole sase wogga qico'ni uwwaaxxa gumma ita hoyyendeexxe kaddeexxa kassi hiyye. Tenne sase wogga giddo gumma ittinoqen. 24Sholgaxxe woggaxxi gumma ane Mageno galateeffatinaaxxe kaddo'a ani'a gargari hexxeexxe uwwa kadduuni. 25Ondixxe wogga'ni kinni gumma ittinaan; tenne assitinoole yanna yanna'ni gumma itti ha'no'a bira saxxa'ni me'itaan; ani Mageno ha'nookeni.
26« ‹Munde cingitebaaka maala ittinoqen.
« ‹Durrisiinxa huje hordofinoqeni.#Dada. 9:4; Lew. 7:26-27; 17:10-14; Lan. 12:16, 23; 15:23; 18:10.
27« ‹Umo ha'nookika qarqara qooxo haaxxitinoqen; areeda ho'nooka haruunsitine woxxinoqen; 28Biso ha'nooke'ni niqqisaate naqqalsitinoqen; yookaani reyeeke manji'a ifi cidhdhitinoqen; ani Mageno ha'nooken.#Lew. 21:5; Lew. 14:1.
29« ‹Butta yabaabulletinna battummati wo'mitabaashsha miyyaxxi atixxi belto dharichcha magenuwwaa magenonfanta'ni yababullammaba marte yababuldo'a wocci assite waaldoxen.#Lew. 23:17.
30« ‹Sanbata ulfeesse; woyyichcha anka mine ulfeesse; ani Magenoken.#Lew. 26:2.
31« ‹Ekedha haasosamma manna yookaani morammake mannika gorsa laqqinoqen; tenne assistinoole battootinaan; ani Mageni ha'nooke Magenon.#Lew. 18:11; 1 Sam. 28:3; 2 Moy. 23:4; Isa. 8:19.
32« ‹Geedhe lumolla daggaa'na uuddotole ofoldetebaa'ni qophphi hite kexxe ulfeessi; aneenna Mageno atika sodaati; ani Magenoken.
33« ‹Boga ha'nooke'ni ha'noni wele bogiki manni hedha'noole miiccinoqen. 34Gode ha'nooxxe Isira'eelike manji'a assitinammashshannii eloxxa insa'ne'anna asse. Umo ifikishsha assitine eeyye; ha'nonna konnechchi edi darre Gibtseke boga'ni keesummate kaddine hexxinemmaxxa qalli hiyye; ani Mageni ha'nooke Magenon.#Fula. 22:21; Lew. 24:17-18; 27:19.
35« ‹Qeerriniinke mikisanjini, adhdhuuriinke mikisanjininna dunemaachchiike mikisanjini manjo miiccinoqen. 36Dhugaatika mikisanjuwwa: qeerrinika, adhdhurriinkanna dunemaachchika miyyuwwa horatte; Gibtseke boginaa'ni ha'noo fulchchenneki ani Magenoken.#Lew. 25:13-16; Mam. 20:10.
37« ‹Uwwenneke ajaji'aanna seeri duuchchi'a addatemme. Ani Magenoken› » hiyye.
Currently Selected:
Leewwitotika Maxaafa 19: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
