Yohaannisixxa Wengeele 15
15
Yessuusi Dhugaatike Woyinetike Hiddichchon
1«Dhugaatik woyinetik hiddichchi Anten; kaasallikinna anke Annan. 2Isinna ane'ni hexxee gummissabaaxxa dame duuchcha woxe hunaan; gumma gummissaaxxa dame duuchcha kinni caala gummissaashsha qurquraan. 3Ani ha'no'a kulenneke hiyyichchonaa'ni kexxeexxa ha'no ta'a ca'ichchaken. 4Ha'no Ane'ni hedhdhe! Aninna ha'no'ni hedhannon. Dame Woyinetike haqichcho'ni hedha gophphoole qofitti gumma gummisa dandeetabaani; ha'nonna ane'ni hedha gophinole gumma gummisa dandeetinabaan. 5Ani woyinetike hiddichon; ha'nonna damooleten. Huuni manjinna Ane'ni hedheexxe kaddoole Aninna iso'ni hedhonnole isi heddo gumma gummisaan: ha'noo Ani belo mittelchchonna assa dandeettinabann. 6Ane'ni hedhabaak gadhi'a hunneendeexxi baggammaxxe damooleshshaten; iitta hexxeexxi damoole qoncendeexxi giirate'ni uggendee'e gubattaan. 7Ha'no ane'ni hexxinoole ank hiyyichchinna ha'no'ni hedhoole halsitinaaxxa heene yaanenna kadhatte, ha'no'a uwwendaan. 8Heddo gumma gummisati anxe hordofeeyye kaddineexxa leellishshinoole tenne'ni anki Anni ulfataan.
9«Aabi anee eeyyemmashshanni Aninna ha'noo eeyyaannen. Ta'a eeyya anxe'n hedhdhe. 10Ani anke Annika ajaja heqqedhennexxi eeyya isixxe'n hedhanneshshanni, ha'noonna ajaja anka heqqexxinoole eeyya anxe'ni hexxinaan. 11Ani tennee ha'no'n kulennechchi gammashsho anxi ha'noo'n hexxaashshanna gammashsho ha'nooxxi wo'maxxe kaddaashshaten. 12Ajaji ankinna, Ani ha'noo eeyyanneshshani ha'noonna weli'anni weli eetinaashshaten.#Yoh. 13:34; 15:17; 1 Yoh. 3:23; Yoh. 5. 13Manji hedho ifixxa jaaluwwa ifikee sa'isseexxi uwwatenaa'n saxxaaxxi eeyya hexxebaan. 14Ani ha'noo ajajenneka ajaja muuxxinoole ha'no Anke jaaluwwan. 15Ani koneechchinni edi'a ha'no garbake hiyyabe'non; garbi gootti ifik hujaachcho ege'nebaan. Yaane kinni Ani anke Anninaa'n laqennexxa duuchcha ha'noo'n kuleennaxxee Ani ha'noo jaaluwwa anke hiyyeennen. 16Ante ha'noo fi'lenne malee ha'no Anee fi'ltinebaan; ha'no me'itinaashshanna gumma gummissinaashsha gumma ha'nooxxinna hexxaashsha ha'noo baalloonseennen. Tennexxee Aabi ha'noo summi ankenni kadhatinaaxxa duuchcha ha'no'a uwwaan. 17Ajaji ankinna ha'no weli'anni weli eetinaashshateni.
Kaba Buttik Manni Hordofeeyye Gibaaxxa
18«Butta duuchchiki manni ha'noo giboole ha'no edi darre anee gibeexxa ege'ne. 19Ha'no kaba butta duuchchike kaddine'eele butta duuchchik manni ifike assedheexxi ha'noo eeyyamman. Yaane kinni Ani butta duuchchike manninaa'n gargari asse ha'noo fi'lennaxxee ha'no buttatike mannabaan; butta duuchcha ha'no gibbaachchi tennexxeeten. 20‹Garbi gootta ifikenaa'n sa'abaan› hiyyeennexxi Ani ha'no'ni kulennaxxa kassi hiyye. Anee shorrine'eexxe kaddoole ha'noonna shorrinaan. Insa'ne hiyyichcho anka heqe'ne'eexxe kaddoole hiyyichcho ha'nookanna heqqe'naan.#Mat. 10:24; Luq. 6:40; Yoh. 13:16. 21Insa'ne anee ergeeka ege'na gonphemmaxxee, anke summixxe daafe'a tennee duuchcha ha'no'n assinaan. 22Ani dagennexxi insa'ne'n kula gopheennele silaa insa'ne'n cubbote kaddammabaan; Ta'a kinn insa'nexxe cubboxxe daafe'a aallantaachchi hedhebaan. 23Anee gibaaka anki Anninna isoo gibaan. 24Weli manji hujabaaxxa huje insa'nexxe oddo'n Ani huja gophenneele silaa insa'ne'a cubbote kaddammabaan. Yaane kinni ta'a insa'ne konne manbe'uwwa uunde'een: kaddo malee insa'ne aneenna Anna ankanna jibbine'een. 25Tinninna kaddeechchi, ‹Insa'nenna tolanga anee jibbineen› hiyyendeexxi seera insa'neke'ni borreessendeexxi muuxendaashshaten.
26«Ani Aabibaa'ni ha'no'a ergannok, Aabinaa'ni ha'no'a ergemaak dayyeessaalli dhugaatik Hafuuri dagaa wodda Isi anxee dhugaa kulaan. 27Ha'noonna kinni sirendenaa'ni aninni welti hexxinneemmaxxee dhugaa kuldinaan.»
Currently Selected:
Yohaannisixxa Wengeele 15: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
