Fulatika Maxaafa 40
40
Galdumiink Dunkaanxa Otenshana La'ote'ni Hosa
1Ookkoneechchi uduma Duuchchi Woddik Goottinna Muuse hiyyee qici: 2«Siretiki agenji e'yeexxe siretixxe barra'ni ani ulfinniki leellannoka dunkaane oti. 3Tommi ajaji borreessemeeki kinjuwwi hedheeka Kakotika Taabota dunkaan giddo uggi; Taabotakanna golo isikenni golli. 4Beerakanna dunkaan giddi'a aaxxe isika miyanna isi hana uggi; torbaane dhankoke xassika miya giddi'a aaxxe xassa iso'ni hana uggi. 5Ixaanna gunbaachcho Kakotike Taaboti edo uggi; dunkaaniinxe hula'ni golo goli. 6Ciincatik tolchi'a kadaaka tolchimalcho afenshatike dunkaanixxe hula edo uggi. 7Ansheccatixxa qore afenshatixxe dunkaanixxe oddo'ninna tolchimalchiinxa oddo'ni uggite wode'e wonshi. 8Dunkaanake dalla'a ijaari; golokanna dalla'iinxe hula'ni goli.
9«Ookkoo'ni dunkaana isike miyinni welti hariirtetixxe zayitenni hariirte woyyoonsi. 10Ciincatik tolchi'a kadaak tolchimalcho isike miyinni welti hariirte Duuchchi Woddike Gootti'a gargari foyi; hara woyyichchake kadaani. 11Konne qicinni ansheccatixxa qorenna iseka ofo'lisanjo hariirte Duuchchi Woddike Gootti'a gargari foyi.
12«Aarooniinna isixxa labbaxxa oose dunkaaniinxe hulaba iyyedagge'e anshe'naashsha assi; 13Woyyitte qeesetixxa seemma oddeessite'e hariirte'e Aarooni ani'a gargari foyemeeke qeesichcho kadeexxi ergatemaashsha assi. 14Labbaxxa isixxa oosenna iyyedagge'e seemma oddeessi. 15Insa'nenna qeesete kande ergatemmaashsha anna insa'neeka hariirtetteshshanni insa'neenna hariiri; hariiremmemmaxxee dagaake baro duuchcha'ni qeesete kande ani'a ergatemmaan» hiyye.
16Muusenna Duuchchi Woddiki Gootti isoo ajajeemmashshanni duuchchiinxa yaane asse. 17Tennexxee Gibtseke boganaa'ni fulleexxe langaxxe wogga'ni siretike agenjixxe siretixxe barra'ni Duuchchi Woddiki Gootti ulfinniki leellammaka dunkaanna ole. 18Muuse daldumiink dunkaanika utupha, utuphiinxa lekka, lumolla utuphanna danqarisanjo ugge welti abidise. 19Duuchchi Woddiki Gootti ajajemmashshanni dunkaani hana buyyisanjo diriirsse; gadhi darreka buyyisanjonna ugge; 20Tommi ajajuwwi borreessemeexxa lame kino adheexxi Kakotike Taaboti giddo ugge; Taabota dukatika haqichcho giissineexxe Taabotiinxe fanno'ni ugge; Taabotiinka buyyisanjonna Taabotake'ni buyye; 21Taabotakanna dunkaane giddi'a e'yishe golo gole; konne qicini Duuchchi Woddiki Gootti ajajemmashanni Taabota buqqe.
22Beerakanna dunkaane giiddi'a e'yisheexi goli edo middi darre'ni ugge; 23Duuchchi Woddiki Gootti ajajemmashshanni Duuchchi Woddike Gootti'a shiqqaaxxa midhatixxa kebbo beerake'ni hana ugge. 24Xassiinka miya dunkaane giddi'a e'yisheexi beerakenaa'ni bita'i darree'ni ugge. 25Ookkonna Duuchchi Woddiki Gootti ajajemmashshanni Duuchchi Woddike Gootti edo xassa xasse.#Fula. 30:11-16. 26Dunkaane giddo worqeti giissineeka hixaanika gubimalcho goli edo ugge.#Mat. 17:24. 27Iso'ninna Duuchchi Woddiki Gootti ajajemmashshanni eloka foole afeeka ixaana gube. 28Ookkoneechchi uduma galdumiinke dunkaanexxe hula'ni golo gole. 29Ookkoo ciincatik tolchi'a kadaaka tolchimalcho afenshatke dunkaani edo ugge; iso'ninna ciincatika tolchanna midhatixxa uwwa Duuchchi Woddiki Gootti ajajemmashshanni tolche; 30Ansheccatixxa qore afenshatik dunkaanixxenna tolchimalchiinxe oddo'ni ugge; anshecateena wode'e iitti wonshe. 31Muuse, Aarooninna Aaroonixxi labbaxxi oose anganna lekka insa'neexxa ookko anshe'ne; 32Duuchchiinxa yanna dunkaane giddi'a e'yinaa woddanna tolcha tolchinaa wodda Duuchchi Woddiki Gootti ajajemmashshanni anshe'naamman. 33Ookkoneechchi uduma Muusenna galdumiinkenna tolchimalchi qarqara'ni dalla'a ijaare; dunkaanibaa e'yinamaxxe dalla'ixxe hula'ni golo gole; konne qicinni huje duuchchiinxa huje bire.
Mageniinka Ulfinna
(Lak. 9:15-23)
34Ookkoo'ni dunkaane duumanchi buqe; Duuchchi Woddike Goottike ulfinniinki ifinni dunkaanna wo'me.#1 Moy. 8:10-11; Isa. 6:4; Hiz. 43:4-5; Wal. 15:8. 35Tennenaa'ni kexxeexxa Muuse dunkaane giddi'a e'ya dande'eemmabaan. 36Isira'eeliki ardinna hedhemmaxxa bakka waale edi'a me'aammaki duumanchi dunkaanakenaa'ni ke'aa wodda callaamman; 37Duumanchi dunkaanakena'ni ke'a gophoole he'nemmaba waalle'e edi'a me'inaammabaan. 38Me'inaa wodda duuchcha barra Duuchchi Woddike Goottika ulfinna leellishaaki duumanchi dunkaana buqaamman; hashsha kinni duumanchi giddo giira uundaamman.
Currently Selected:
Fulatika Maxaafa 40: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
