Fulatika Maxaafa 36
36
1«Baatsila'eeli'aanna Oholi'aabi'a iittanni woyyichcha dunkaana giissaake manni duuchchi'a Duuchchi Woddiki Gootti ege'nanna dande'a uwwemaxxee'e Duuchchi Woddiki Gootti ajajeeshshan duuchchinxa yaane hunjaan» hiyye.
Ardi Heddo Uwwa Iyyedageexa
2Ookkoneechchi uduma Muusenna Baatsila'eelinna Oholi'aabi, iittanni Duuchchi Woddiki Gootti beekkuma insa'ne'a uwwemmak manni dageexxi huje tennee'e ifixxe eeyyanni hujatee'e hasaaka beekumma afe'eeka manna duuchcha ye'ise. 3Insa'nenna Isira'eeliki ardi woyyichcha dunkaana giissatee kaddaaxxa uwwa iyyedagemmaxxa Muusexxe anganaa'ni aa'ne; yaane kinni Isira'eeliki ardi gorsa gorsa uwwa Muuseba iyyedaga uurriseemmabaan. 4Ookkoneechchi uduma huje hujammaki beeki manni duuchchi Muuseba mareexxi, 5Insa'nenna Muusee, «Hujetee Duuchchi Woddiki Gootti ajaje iimi darre ardi uwwa iyyedagate'ni hedheeni» hine.
6Ookkoneechchi uduma Muusse woyyichcha dunkaana olteexxi kaddaaxa uwwa ta'iini udumi'a ayyinna iyyedagoqqe'e hitaaxxa erga Muuse olla'i giddi'a erge; ookkoneechchi uduma ardi uwwa iyyedagaa waale; 7Uwwa shiqqeexxi huje duuchcha hunjee'na gattaaxxemman.
Mageni Ulfiniki Leellaaka Dunkaana Ota
(Fula. 26:1-37)
8Huje huja'neeke manni giddii'ni lumoka beekkuma afeemmaki manni woyyichcha dunkaanna ote; insa'nenna dunkaanna layinoti, iimatixxe bifanni, hamiraawwete hinaaxxe bifaninna diimmoxxe bifanni giissinneexe horiinxe ordanni, ise'ninna keela affeexxa dada borreessine'e tomme golo giissine. 9Mitti mittingi goli qixxe kadeexxi qeerrinni 12 meetire, godobikinna 2 meetiremman. 10Insa'nenna onde mitte darre'ni wele onde wele darre'ni uggine gence assine gonbe. 11Iimatixxe bifaxxe seemmanni giissineexxa qubuwwa gadhi darreke kasa'ni duuchchinge golo'ni uggine; 12siretike goluwwixxe kuta'ni onde tomme qubuwwa uggine; iittanni eettene onde tomme qubuwwaa edi darree'ni wele langake goluwwixxe kuta'ni onde tomme qubuwwa uggine. 13Lamiin darre'ni hedheeka golo mitteba abidisatee onde tomme worqetixxa hookkuwwa giissine.
14Dunkaane kaphatee kadaaka tommena mitte re'etixxe ordanni giissineeka buyyisanjo qophpheessine. 15Duuchchingi qixxe kadeexxi mitti mittiniigiki qeerrinni 13 meetire, godobi 2 meetiremmani. 16Onde mitte darre'ni wele jaane wele darre'ni uggineexxi qence assine gonbe. 17Mitte darreke goluwwixxe kutake handaara'ni onde tomme qube, langake goluwwixxe kutake handaara'ni iittanni wele onde tomme qube uggine. 18Dunkaane lamii darreka buyyisanjo mitteke assine abidisatee naasete hinaake sibiljinni onde tomme elqe kayyika abidaachcho giissine. 19Gadhi darreka lame dunkaanika buyyisanjo, mitte diimoxxe bifa'ni cuunpheeke gedhebiinke goginni, wele hallisemeeke goginni giissine.
20Dunkaanika utupha waaccotike haqichchini giissine; 21mitti mittinge utuphiki qeerrini 4 meetire, godobi 60 santi meetire kadaa wodda, 22lamiing utuphi elqe kayya weli qence assaachcho afeemman; duuchchinge iittanni giissineemman. 23Dunkaanike bita'i darre'ni lame tomme utupha uggine; 24lame tomme utuphi hunda lame lame lekka mitteba gence assaaka cunnichuwwa affeexxa shoole tomme birretike sibiljixxa lekka uggine. 25Dunkaanike middi darre'ni lame tomme utupha uggine; 26mitti mittinge utuphi hunda lame lame assineexxi shoole tomme lekka uggine; 27dunkaanike dhidhimi darre'ni jaane utupha uggine; 28udumi darree'ni qarrake'ni lame lame utupha giissine. 29Qarra qarrake'ni hedheeki utuphi buttii'ni iimi qico'ni weli qence hiyyeexi abidemeemman; wele qarra'ni hedheeki utupinna weli qence hiyyeemmaki konne qicinnitemman. 30Tennexxee mitti mittiingi utuphi hundii'ni lame lame lekka afaashsha assine saddeeti utuphi birretike sibiljinni giissineexxa tommenna jaane lekka afeemman.
31Tommenna onde danqarisanjo waaccotike haqichchinni giissine; konne qicinni ondi dunkaanke mitte darre'ni hedheeke utuphi'a kadaa wodda, 32ondi kinni wele darre'ni hedheeke utuphi'aaten; iittanni onde dunkaanke dudduri darree'ni dhidhimake'ni uggine. 33Utuphiinke mitte gama'ni heedheke oddotike booncho'ni uggineeki danqarisanji mitte kasinaa'ni wele kasi qico'ni geyaamman. 34Utuphakanna worqeti bunqe; danqarisanjo sa'issatee elaashsha utuphake'ni worqeti fannichcho giissine; danqarisanjuwwikinna worqeti buqemeemman.
35Goluwwakanna eloxxe layinonni giissine; iseenna iimatixxe bifanni, hamiraawwite hinaaxxe bifani, diimmoxxe bifaninna horiinxe ordanni giissine itti hana keela affeexe dadaaxxa fakke giissineemman. 36Goluwwa abidaaka shoole utuphuwwa waaccotike haqichchinni giissine worqeti bunqe; hookkuwwa isixxanna worqeti giissine; utuphi uurraaxxa shoole lekkuwwa birretike sibiljinni giissine; 37Dunkaaniinxe wuddumme'a layino iimatixxe bifanni, hamiraawwi hiyyendaaxxe bifanni, diimmooxe bifanninna horiinxe ordanni seense golo giissine; 38Konne goli'aanna hookko afeeka onde utupha giissine; utuphiinxa qaccenna zange isixxa worqeti bunqe; utuphakeenna naasetike sibiljinni onde lekka giissine.
Currently Selected:
Fulatika Maxaafa 36: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
