Ergameeyyetixxa Huje 15
15
Iyyerusaalemika Haagana
1Mitti mitti manni Yihudanaa'n Antsookiyyaa aade marreexxi, «Muuseke seerishsha jila ofoldinebaaki anjirema dandeetinabaan» hiyya'ni amaanye barachchiisa safe. 2Tinni yaanenna Phawuloosinna Bernabaasii'i insa'nenni welti jabaxxe moronshabaanna loliinbaa geessisse. Tennexxee Phawuloosinna Barinnaabaasi wele kirisitoositon welti Iyyerusaalemi'a mareexxi tenne yaanexxee ergameeyyetanna geedhe qorraashsha murnde.
3Tennexxee Mageniinxi tuutta insa'nee ergitee'naa me'ine. Finqenna Semaariya giddii'n sa'nee wodda Ayihudake kadebaak manni amaneexxi Mageniiba'a hitta higeexxa haasoonne. Tinni odonna amaanye duuchcha gammachchiisse. 4Iyyerusaalemi dange gennee wodda Mageniinxi tuuta, ergameeyyetinna geedhdhe insa'nee qophphexxe adhdhite. Ergeme'emmak manninna Mageni insa'nenni welti hedheexxi hujeexxa huje duuchcha insa'ne'n odeesse. 5Yaane kinni Feerisitotixxe gamonaa'n amaneemmak mitti mitti manni ke'e uurreexxi, «Ayihudake kadebaaki manni jila ofo'lanna Muuseka seera heqedhaashsha assa hassissaan» hiyye.
6Eergameeyyetinna geedhdhe tenne yaane mari'atto'aa mitteba bukki hite. 7Lumooxxa mari'e mari'antechchi uduma Pheexiroosi ke'e uurreexxi hiyyee qici, «Anke dayyuwwa! Ayihudake kadebaaki manni ani gami'ni wengeeltika hiyyechcho laqeexxi amanaashsha konnechchi edi darre Mageni ha'nooxxe oddoo'ni anee fileexxa egendine'een. 8Qalbe manjiiinxa ege'neeki Mageni no'aa uwweemmashanni insa'ne'aanna woyyichcha Hafuura uwwati insa'nee ifike assedheexxa kokeesse'een. 9Insa'nexxa qalbe amanat luqqi assati no'oxxe'ninna insa'nexxe oddo'n gargarunte assebaan, 10Mayeeta annuwwi no'okinna no'o ba'edha dandeennebe'noka qanbara hordofeeyyetixxe quce hana ba'issati mayee ta'a Mageno hega uudinna? 11No'onna anjiremeennek insa'neshshanni Gootta Yessuusike badhaadhinnite kaddeexxa amanaannen.»
12Bukki hiyyeemmak manninna tennee yaane duuchcha Bernabaasinna Phawuloosi Mageni insa'ne ga'mii'ni Ayihudake kadebaake mannixxe oddo'ni asseeka mambe'anna beessiisa duuchcha haasonnaa wodda ca'li hiyyee caqasa'neemman. 13Lamingi haaso'a birree wodda Ya'iqoobi hiyyee qici: «Anke dayyuwwa hiyyaannexxa laqqe 14Mageni Ayihudake kadebaake manninaa'n ifi'a kadaaka arda ediseexxi hitta fi'leexxa Simi'ooni no'o'aa barrise'een. 15Konne yaadinni welti wabeekotik hiyyichchi weli'aagaan; isinna hiyyemmeexxi borreessemmeemaa qici,
16« ‹Ookkonneechchchi uduma illee iima higennexxi
Ibeeka Daawwitika duunkaana ijaarannoni;
Isixxa olenna qammalchaannexxi
haaroba isoo uurrisannon.
17Tinninna wele getteexxi manjiinxi sanne Gootta halsitaashsha
summa ankenni ye'emeek gosa gosak ardi duuchchi anee halsaashshaten;
Hiyya'neen tennee yaanuwwa assaa'neek Dada Duuchchik Gootti;›
18yaannuwwatanna olminaa'n ege'nisheek Gootti.
19«Tennexxe ank yaadi Mageniibaa higeeka Ayihudake kadebaaka manna rakkinsabe'noshshaten. 20Tenne irra dharchcha mogeni'a tolcheendeexxa ita ittinoqqe'e, Yabaabulletenaa'ni bayyette, gorra'emebaak reyeeka hore biniinchiinka maala ittinnoqqe'e, mundetanna ittinoqqe'e hineennexxi insa'ne'aa borreessa no'oo hassissaan. 21Tinninna kaddaachchi Muusek seeri olminaa'n Edi Edi Sanbata'n Ayihudiinke magenoonfachchotike mine'n haasessemma'ninna qachcha qachcha'ninni lalabemma'n hedheemmaxxeten.»
Ayihudake Kaddebaaxxe Eettene Amaanye'a Ergemeeka Borreessa
22Ookkonneechchi uduma ergameeyye, geedhetinna amaanye duuchchi mitteba bukki hiteexxi insa'ne giddii'n manna filde'e Phawuloosinninna Bernabaasinni welti Antsookiyake qachchiba'a ergito'aa mudhdhite; insa'nenna amaanyet giddii'ni akeekisanjuwwake kadeeka Bersiyaan hiyyemeeke Yihudanna Sillaasitemman.
23Borreesakanna borreesineexxi insane'n ergine; boorreesi iikkinna hiyyaamma qici, «No'o ergameeyye, geedhetinna ha'nook dayyuwwi Antsookiya, Sooriyanna, Kilqiya hexxineeke Ayihudake kaddinebaake no'oke dayyuwwi'a nage'a shiqinshaannen. 24No'oxxe oddonaa'ni mitti mitti manni no'oo insa'nee ajanjebe'nong ha'noba'a dageexxi ha'no'n barachchiiseexxe yaannenni ha'noo rakkiseexxi mekki asseexxa lanqeennen. 25Tennexxee mitteba bukki hinennelchinni uduma ergeme dagaaka manna fillennexxi eeyyemeeka no'oka dayyuwwa Bernabaasinninnaa Phawuloosinni welti ha'noobaa erginonna'a weli angeennen. 26Barinnaabaasiinna Phawuloosii Gootta Yessuusi Kiristoosixxe huje'a hedho ifixxa sa'isseexxi uwwe'eeke mannan. 27Murreennexxi borreesinennexxa yaane afo'ikinna ha'noo'ni kullaashsha Yihudaanna Sillaasii'i ergineennen. 28Konnechchi butta hedheeka hasisaake seera kadoole malee wele hauritaaxxa ba'o ha'noo'ni ba'insaabe'noshsha Woyyichchi Hafuurinna no'oo weli'aangeennen; tinninna 29Dharichchi mageni'a tolchendeexxa ita itinoqqe'e; gorra'emebaak reyeeka hore biniinchika maala itinoqqe'e; mundetanna ittinoqqe'e; yababulletenaa'ni bayyatte; tenne yaane duuchchanaa'ni ifi heqqeexxinoole eloxxenni; nage'ik hedhdhe.»
30Iikki ergemeemmaki manninna geegeseme'e Antsookiya'a me'eexxi amaanye bukki aseechchi uduma ookkonee borreesa insa'ne'ni uwwe. 31Amaanyeteinna ookkonee borreesa haasessitee wodda isi sa'iseexxe jajabeessitaaxxe erga'ni lumooshsha gammadde. 32Yihudanna Sillaasi wabeekote kandeemmaxxee heddo haaso'inni eettene amaanye gorsineexxi jajjabeesine. 33Shiixxoxxa barranna ookko turreechchi uduma amaanyeti dayyuwwi nage'ik insa'nee geegesinee'naa insa'nee ergemmake mannibaa illee iima hinge.
34Sillaasi kinni ookkonni gato'a mudhdhe.#15:34 Mitti mitti olmik borreessuwwi konne laakkosika hiyyicho afeba'a 35Phawuloosinna Bernabaasi wele heddo amaanyenni welti Goottiinka hiyyichcho barachiinsa'ninna lallanba'n Antsookiya offolle.
Phawuloosixxanna Barinnaabaasixxa Gargar Higa
36Heenooxxe barra udumi'a Phawuloosi Bernabaasii'i, «Amo konnechchi edo Goottiinka hiyyichcho lallanbenneke qachchuwwi duuchchibaa illee iima hingennexxi amaanye dayyuwwi maye'n hedheexxa uundo» hiyye. 37Bernabaasinna Maariqoosi hiyyemeek Yohaannisi insa'nenni welti me'aashsha hase. 38Phawuloosi kinni kunni manjichchi insa'nenni welti me'aaxxa eeyyebaan; eeyyagibeechchinna isi Phinfilya giddo insa'nenaa'n gargar higeexxi gateemmaxxeenna hujetibaa insa'nenni welti muuxamii qico'n me'aa gopheemmaxxeeten. 39Tennenaa'n kexxeexxa insa'nexxe oddo'n jabaxxi weli aaggo gonphe kexxee'naa welinaa'ni gargar hinge. Tennexxee Bernabaasi Maariqoosii'i adhdheexxi markabik Qophphiroosi'a me'e. 40Phawuloosi kinni Sillaasii'i fi'le; amaanye dayyuwwinna Phawuloosii'i Goottiinke badhaadha'n maganne uuneechchi uduma ke'e me'e. 41Phawuloosinna Mageniinxa tuuta jajjabeessa'n Sooriyaa'ninna Kilqiya giddii'n sa'e.
Currently Selected:
Ergameeyyetixxa Huje 15: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
