Filipenses 1
1
So' Pablo qoỹicoñideta't ca'li ỹidénaqtena jan' lidíise so' 'amaqténataxanaxaicpi Filipos lé'ecpi
1Jaỹim Pablo qataxa ñi' Timoteo, qo'mi lelatáqa so' Jesucristo. Sauoqo jan' qadidíise da' 'ami sedénaqtenaxalo ỹima da' 'oñíita 'me 'au'amaqténataxañii 'me 'ad'acháqadii jen' noic Filipos, jen'me lalémaxasetpi ñi' Dios qataxa ỹoqotéta'uo so' Cristo Jesús. Jan' qadidíise nataq'en taỹá'a na' lasoxola'pi jen'me qataxa na' lecochaxau'pi. 2'Ami 'auacoñiiỹeto' qomle da' liỹálaqtaxanaxac qataxa da' l'emáxac ñi' qadet'a Dios qataxa so' qadesaliaxanec Jesucristo.
So' Pablo netameetapeelégue so' 'amaqténataxanaxaicpi
3Jaỹim naale 'ami seenatalo, qana'chi saatapecot da' ñitónaxac ñi' Dios. 4Da' ñitaméetac, qana'chi ỹátaqta 'uo da' ỹamaic ỹasouaxat da' 'oñíita. 5Qá'a 'ami nataq'en 'anhuáñiỹa'uo da' 'au'axáchii da' 'ónaxaic qadipí'ic 'me n'aqtaguec so' Jesús, chiỹoqóchiỹi so' nolo' ca'li ỹímta da' 'auacoñiiỹet, cha ỹivíde'ta naỹi. 6Jaỹim ỹátaqta 'eesa qasen da' ñi'me Dios 'me chiỹoqóchiỹi da' 'ami ỹ'eteque da' 'ónaxaic dálaxaic 'adasoxoquii, jiñi'me quet'ot da' ỹ'étetac da'me, cha ỹividet'aguet ga' nolo' qomle n'iỹílaq so' Jesucristo. 7Da'me selá'a da' naq'áita da'me ỹeenataxac, qá'a ỹima da' 'oñíita jaỹim ỹátaqta 'ami ñoqopitalo, qataxa 'anhuáñiỹa'uo da' l'ágaxanataxanaxac ñi'me Dios, temaqaidi da'me jaỹim qoỹicoñideta't, 'uootaxa da' jaỹim ñichaatóoue jen' net'alpi da' soselégue da' n'aqtac 'me nec'alaxaqui, da' s'axat da' ỹátaqta 'eesa da'me. 8Qá'a ñi'me Dios ỹátaqta ỹaỹáteeta da' ỹima 'ami ñoqopitalo, da' séet'em da' loqopi'chi so' Jesucristo da' 'oñíita. 9Qataxa naale ñitaméetac, qana'chi siỹáxataaque da' maliaxa qonichíỹaxadiseguem da' 'adoqopi'chii, qaidi jalcote da' 'adaỹátenaxanaxaquii qataxa da' 'adaatetonaxanaxaquii, 10qaidi 'auaỹáchiñii da' 'aulóite'uo ga' ỹátaqta ỹiỹamqáchiiñi. Qaidi da' 'ad'óiỹaxaquii ỹoqovíchiỹi, qana'chi qaỹa 'te ga' 'ami qoỹasaxalóo'te 'adesamaxataxaquii qomle n'iỹílaq so' Cristo. 11Qaidi so' Jesucristo ỹátaqta 'en saqáchiỹi da' 'ad'óiỹaxaquii ga' 'ónaxaic nasoxoc, qaidi 'uo da' ni'ỹoxodénataguec qataxa da' li'ỹoxodic ñi' Dios.
Da' ỹ'óiỹaxac nichaatétaaue so' Cristo
12'Ami ỹaqáỹa', sétaaque da' 'auaỹáchiñiita da' souápiỹi, jeda'me 'ená'am da' lecochiỹa da' n'aqtaxanaxac 'me ỹ'axat da' nec'alaxa. 13Chan'eesa ỹima jen' leuataxanaxanec na' l'acháqa' ñi' let'a na' net'alpi jen' Roma, qataxa ỹima na' huet'éna, jen'me ỹaỹáten'a't da' jaỹim qoỹicoñideta't ỹasouaxat da' jaỹim sequétapegue' so' Cristo. 14Canale qoỹaỹáten da' jaỹim qoỹicoñideta't, qana'chi ỹamtaa'le da' ỹima na' ỹaỹi da' n'añaxat da' ỹ'axat da' l'aqtac ñi' Dios, qataxa ỹátaqta p'iỹá'a so' qadesaliaxanec. Qaỹa 'te d'oỹáaque.
15'Eesa da' 'uo na' ỹ'axátetac so' Cristo, qaláxasa quétaaue da' nep'aguénaxac qataxa da' nauténaxac. Qaláxasa 'uo na' laỹi ỹátaqta ỹiỹamqáchiiñi da' leenataxac. 16Qataxa 'uo na' 'chi ỹ'axátetac so' Cristo, qaláxasa 'chi 'uo ga'me naquitétaaque. Sa 'te 'oonolec ga' leenataxac, qá'a jen'me 'chi sétaaque da' nichíỹaxateegue da' ñi'queténaxac naỹi da' jaỹim qoỹicoñideta't. 17Qaláxasa jen'me laỹi quétaaue da' loqopi'chi, qá'a jen'me ỹaỹáten da' jaỹim soneta'ñína, da' qaidi soselégue da' n'aqtac 'me nec'alaxaqui. 18Qaláxasa na'chi 'ená'am sa 'te setená'a jen'me da' sa 'oonolec ga' leenataxac, 'uootaxa sa 'te naq'áita, qá'a da' ỹ'axat so' Cristo. Qaa'le naqaida ỹí'et da' ỹamaic.
Qataxa lamá'asa qa'en qomle da' ỹamaic da'me, 19qá'a saỹáten da' qaỹa 'te 'uo da' ỹ'óiỹaxac, qá'a 'ami jaỹim 'antamñiitapeelégue, qataxa da' lecochaxac so' lepaqal so' Jesucristo. 20Qá'a jaỹim da' séetapeec qataxa da'me ñaquitét'a da' qaỹa 'te qomle ga' ỹ'alóxo. Jaldáta da' qaỹa 'te ga' s'óitaaque da' s'aqtaxáatac, da' qaidi 'ená'am naỹi, qataxa na'chi 'eeta't da' jaỹim chiỹoqóchiỹi da' nichíctaiỹi da' qoỹilá'a da' li'ỹoxodic so' Cristo, naỹi da' maliaxa ñic'alétaiỹi, 'uootaxa da' ma'le seleu. 21Qá'a da' ỹ'óiỹaxac sóxote nichaatétaaue so' Cristo, chan'eesa qomle seleu, qaláxasa ỹágueegue qasen da' 'ónaxaic. 22Qaláxasa da' maliaxa ñic'alétaiỹi, qana'chi sañoxot da' s'onataxanot so' qadesaliaxanec. Chan'eesa jaỹim sa saỹáten ga'me selotelégue jenaa'me. 23Ỹátaqta 'uo laqalaic qasen ga'me selotelégue jenaa'me dos. Qá'a da' laqáỹa ỹeenataxac 'eet'oi: Jaỹim n'óota qomle da' seleu, qaidi na'chi 'eeta't da' souet'asop so' Cristo, qá'a da'me 'me ỹátaqta ỹágueegue qasen da' 'ónaxaic. 24Qaláxasa da' laqáỹa ỹeenataxac 'eet'oi: Da' 'uootaxa maliaxa ñic'alétaiỹi, da'me nataq'en ỹágueegue da' 'ónaxaic, ỹasouaxat da' 'oñíita. 25Qá'a ỹátaqta 'eesa qasen da'me, qataxa saỹáteeta da' 'ami souetaavlo, da' qaidi 'ami ỹicochiỹalo da' 'anqaloxodíitaseguem qataxa 'uo da' 'antónaxaquii. Qá'a 'uo da' 'adip'iỹáxaquii, 26da' qaidi ỹitaxa jaỹim 'oviit'asop, qana'chi 'ená'am da' sé'et da' 'antónaxaquii da' 'avi'ỹoxodíñiitac so' Cristo Jesús.
27Jaldato' da' 'ami 'anapichíiỹa da' 'adasoxoquii da' nateet'eguet da' n'aqtaguec so' Cristo. Qaidi qomle 'ami sevitalo, 'uootaxa sa ñañoxot, qaláxasa na'chi 'ená'am da' sétaaque da' jaỹim nivíd'a qomle ga' ỹipí'ic da' 'oñíita da' sa 'te 'ad'emáqaiñi, qataxa 'anavíquiitaỹi da' 'auloquiitapeelégue da' 'adip'iỹáxaquii 'me 'auachíỹoxochiỹáaue da' n'aqtac 'me nec'alaxaqui, 28qataxa 'ená'te da' 'au'óitapegalo ga'me 'ami nautéetapegalo. Qá'a da'me 'me l'anaxat da' jen'me tát'a da' qonoláxachiñi, qaláxasa nataq'en na'chi l'anaxat da' 'ami qonec'alaxatréegue. Qataxa da'me dójo' mai'chi chiỹoqo'ot ñi' Dios. 29Qá'a 'ami qoỹanema da' 'an'ágaxachii, da' qaidi 'au'amaqchíñii so' Cristo, qataxa da' 'uo da' 'an'queténaxaquii, qá'a ỹasouaxat so'me. 30'Ami nataq'en jaỹim 'eeta't da' qadelóiquiaxac. Sóxote da'me 'auaỹáchiñii da' 'éeta da' ñaqaliitaxac ca'li, qataxa naỹi 'uo da' 'adipí'iqui da' maliaxa sequet'ot da' ñaqaliitaxac.
Currently Selected:
Filipenses 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.