Efesios 1
1
So' Pablo ỹidénaqtena jaso' lidíise so' 'amaqténataxanaxaicpi 'me l'acháqa' di' Efeso
1Jaỹim Pablo, da' ñamaxaságuec chiỹoqo'ot ñi' Dios da' jaỹim 'en da' lamaxasec so' Jesucristo. 'Ami sedénaqtenalo jan' ỹidíise, 'ami 'me 'ami lalémaxase'te ñi' Dios qataxa 'au'amaqchíñii so' Cristo Jesús, 'me 'ad'acháqadii na' noic Efeso. 2Sétaaque da' 'ami 'auacoñiiỹet da' lichoxodénataxanaxac qataxa da' l'emáxadic ñi' qadet'a Dios qataxa so' qadesaliaxanec Jesucristo.
Da' nichoxodénataguec ga' ỹoqotéta'uo so' Cristo
3Si'ỹoxodénaq ñi' Dios 'me let'a so' qadesaliaxanec Jesucristo, qá'a naỹi da' soqotaqáta'uo so' Cristo, qana'chi jiñi'me qo'mi ỹanema na' ỹodapecachi lichoxodénataxanaxac 'me chiỹaqsée'ma di' piỹem. 4Ñi' Dios jalchi'ena da' qo'mi liquiỹáqa, chiỹaqaỹi so' Cristo joca'li maliaxa qaỹa jen' 'aléua, qaidi da' na'chi 'eeta't da' souqat'ot jiñi'me da' huesóta qa'en da' qad'óiỹaxac qataxa qaỹa 'te ga' qadesamaxataxac. 5Chi'ena joca'li da' qo'mi ỹaqátaxata'salo da' qo'mi 'en lec'óqo'te, ỹasouaxat da' lesóxodic. Jeda'me chiỹoqóchiỹi qa'en so' Jesucristo, qá'a na'chida 'me ỹiỹamaxaden jiñi'me qataxa mai'chi 'éetapeec. 6Chan'eesa naqaido' qomle da' si'ỹoxodénaqtac ñi'me Dios ỹasouaxat da' li'ỹoxodic da' lichoxodénataxanaxac 'me qo'mi ỹanema, ỹasouaxat da' soqotaqáta'uo so' loqopitaxat lec'óxot. 7Qá'a ỹátaqta let'ádaic da' loqopi'chi ñi' Dios, chan'eesa qo'mi nec'alaxatréegue, chiỹoqóchiỹi qa'en da' leleuaxa so' lec'óxot da' ỹapalaxat ỹima jen'me qadoicpi. 8Ñi' Dios qo'mi ỹaloxonalo da'me sa naloqten lichoxodénataxanaxac da' qo'mi ỹanema ỹima jen' qadaỹátenaxanaxacpi qataxa da' qadaatetonaxanaxac, 9qataxa da' qo'mi ỹaatetonaxanaxanque da'me leenataxac 'me sa di'ỹoq, jeda'me 'éetapeec 'me sétaaque ỹí'et. 10Jeda'me 'éetapeec ñi'me ỹátaqta sa 'te sa ỹipaiỹi qom'chi ỹivíta ga' lalóqo', 'eet'oi: Ñi'me Dios sétaaque da' ỹima huet'ot qa'en da' lamaxasóxonaxac so' Cristo, jen'me huet'ot na' piỹem qataxa jen' huetalégue jen' 'aléua.
11Qá'a ñi' Dios jalchi'ena joca'li qo'mi liquiỹáqa da' sétaaque da' qo'mi ỹanema ga' tátapiỹi lauel ñi'me, qana'chi chiỹoqóchiỹi qa'en naỹi da' qo'mi soqotaqáta'uo so' Cristo. Ỹima da'me ỹátaqta nateet'eguet da' mai'chi leenataxac jiñi'me, 'me mai'chi l'onataxanaxac ỹima na' lasoxocpi, qataxa ỹí'et ga' ỹiỹamaxaden. 12Qana'chi 'éeta da'me jiñi'me, qaidi qo'mi 'me se'uáuaqat'eguet da' sep'iỹáq'a so' Cristo, da' qad'óiỹaxac chiỹoqóchiỹi da' qoỹi'ỹoxodéetac jiñi'me ỹasouaxat da' 'eesa p'asáiỹi. 13Qataxa nataq'en 'ami 'me sa judío lase' ca'li 'chi 'anaquiáxañiỹa da' n'aqtac 'me 'eesa 'me chiỹaqaỹi da' 'adec'alaxaquii, huá'a, qana'chi 'au'amaqchíñii so' Cristo, qana'chi 'ansóquii'uo so'me, qana'chi 'ami qoỹ'a'n da' ỹátaqta 'ami lalémaxase'te ñi' Dios. Qana'chi jeda'me chiỹoqóchiỹi so' Espíritu Santo 'me ỹ'axátet'aguet josii'chi ñi'me Dios. 14Naqaiso jeso'me ỹátaqta ỹ'aiñi da' qo'mi saconaxaguet ga' ỹ'axátetac ñi' Dios 'me qo'mi ỹanema qom'chi ỹivíta ga' lalóqo' da' huesolégue qa'en na' lalémaxasetpi, qaidi ñi'me qoỹi'ỹoxoden ỹasouaxat da' p'asáiỹi.
So' Pablo nachoxodenot ñi' Dios qaidi ỹanem da' laỹátenaxanaxac jen' 'amaqténataxanaxaicpi
15Chan'eesa jaỹim cana'le saỹáten da' 'ad'amaqténataxanaxaquii so' qadesaliaxanec Jesús qataxa da' 'adesóxodiquii da' 'adoqopichíiỹa ỹima jen'me lalémaxasetpi ñi' Dios, 16qana'chi jaỹim sequet'ot da' sáatac da' ñitónaxac naale ñitaméetac da' seenata'alo 'ami. 17Qana'chi ñachoxodéetapecot jiñi'me netamnaxala' so' qadesaliaxanec Jesucristo, jiñi'me qadet'a 'me p'asáiỹi, da' qaidi 'ami ỹanema ga' naỹátenaxanaxac 'me chiỹoqo'ot so' Espíritu Santo, qaidi 'auaỹáchiñii ga'me 'ami ỹaỹátenaxanaxanque jiñi'me, qataxa da' qaidi ỹátaqta 'auaatetoñii jiñi'me. 18Qataxa siỹaxaatapecot ñi' Dios, da' qaidi ỹ'idáxatooue da' 'adaatetonaxanaxaquii, qaidi 'auaỹáchiñiita jega'me 'anaquitaxaquii 'me 'uo da' 'ami ỹiỹáxanalo ñi'me, qataxa qaidi 'auaỹáchiñii da'me qaỹa 'te 'ená'am li'ỹoxodic 'me ỹaloxóotac ñi'me Dios da' ỹanem ỹima jen'me mai'chi lalémaxasetpi jiñi'me, 19qataxa qaidi 'auaỹáchiñii jeda'me ỹátaqta let'ádaic qataxa qaỹa 'te loiquiaqa' lañoqtaxanaxac 'me d'onataxáatapiilo qa'e'n da' qo'mi 'me s'amaqténaq. Dójo' qaỹa 'te ga' 'ená'am lañoqtaxanaxac, naqaida 'me ỹaloxon ñi' Dios, 20joca'li n'iỹílaxaseguem qa'en da' chiỹaqánỹi jaso' napa'lai't so' Cristo. Qana'chi taiỹi qa'en da' piỹem, da' qaidi na'ague jen' ỹaỹáten jiñi'me, 21ỹanem jeso'me da' napacalégue qa'en ỹima na' nañoqtaxanaxacpi, net'alpi 'me 'uo da' 'enec, nesaliaxanecpi 'me huet'ot na' piỹem, qataxa ỹima jen'me qonenaxatá'a lenaxat, naavlo jenaa'me souqataavlo noloqo'te, 'uootaxa jega'me maliaxa naỹáuo. 22Qana'chi ỹipataxalégue da' ỹilo'ogue qa'en ỹimaquéna so' Cristo, qataxa ỹanem da' na'chisóta 'oonolec laqaic qa'en ỹima na' 'amaqténataxanaxaicpi. 23Qá'a jen' 'amaqténataxanaxaicpi naqáina na' 'ená'am da' ló'oquiaxac so' Cristo. Jen'me ỹátaqta ỹimatet'a't da' lasoxoc jeso'me. Qataxa jeso'me ỹátaqta naloqchíichiiñi qa'en ỹimaquéna.
Currently Selected:
Efesios 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.