1 Juan 1
1
Jeso'me lenaxat n'aqtac 'me chiỹaqaỹi da' nec'alaxa
1Sedáxañi da' qaidi 'ami samaxasaxalo jeso'me chi'ena da' 'uo joca'li sonaliaxa 'uo jen' 'aléua, jeso'me ñaquiáxanaqchiỹi qataxa qademá'i da' sauanáqchiỹi. Jeso'me sauanáqchiỹi qataxa naua' qadoua' huasélta'ualo. Jeso'me naqaiso so' lenaxat n'aqtac 'me chiỹaqaỹi da' nec'alaxa. 2Jeso'me chiỹaqaỹi da' nec'alaxa joca'li naloxon, qana'chi qo'mi sauanáqchiỹi qataxa s'axátaqtac jeso'me. Qataxa 'ami s'axataxama jeso'me chiỹaqaỹi da' nec'alaxa 'me qaỹa 'te loiquiaqa', jeso'me huet'aguet joca'li ñi' qadet'a Dios, qataxa qo'mi naloxonalo. 3Chan'eesa 'ami s'axataxama jeda'me sauanáqchiỹi qataxa ñaquiáxanaqchiỹi, qaidi 'ami 'auañoxochii da' qo'mi 'auoqochiita'ualo, 'ená'am da' 'éeta da' qo'mi soqotaqáta'uo ñi' qadet'a Dios qataxa so' lec'óxot Jesucristo. 4Chan'eesa sedáxañi jeda'me dójo' 'ami samaxasaxalo, qaidi da' 'antónaxaquii ỹátaqta nalóchiiñi.
Ñi'me Dios ỹ'oqotelégue qa'en 'ena'uaquéna
5Naqaida jeda'me n'aqtaxanaxac 'me qo'mi ỹapaxaguenque so' Jesucristo da'me 'ami s'axataqtapeema, 'eet'oi: Ñi' Dios ỹ'oqotelégue qa'en 'ena'uaquéna, sa 'te 'uo ga' n'álaxa da' huet'ot jiñi'me. 6Chan'eesa da' senqapeela't da' soqotaqáta'uo jiñi'me, qaláxasa maliaxa souqátaaue jen' n'álaxa, qana'chi 'chi soqovínaxanaqtacóona da' 'uo ga' senqaac, qataxa da' 'uo ga' s'étaq. 7Qaláxasa da' souqátaaue jen' ỹ'oqóchiiñi, da' senqá'am ñi'me Dios da' nichaatétaaue jen' ỹ'oqóchiiñi, qana'chi ñi' 'oonolec da' senqáta ỹátaqta nacóot'ai ga' laqáỹa, qana'chi naua' letauo' 'me qoỹicodédeegue so' lec'óxot Jesucristo joca'li qoỹalaat, niỹóiñi 'ená'uac jen' qadoicpi.
8Da' senaqpeela't da' qaỹaua naua' qadoico, qana'chi qo'mi mai'chi ñoqovínaqtapeela't, qataxa sa 'te da' qo'mi 'eesoda. 9Qaláxasa da' s'axáta' naua' qadoico, qana'chi sip'iỹáq'a ñi'me Dios da' ỹañoxot da' ỹí'et ga' ỹiỹamqáchiiñi da' ỹapalaxat 'ená'uac jen' qadoicpi qataxa da' ỹiỹo ỹima na' sa nó'inpi. 10Qaláxasa da' senaqpeela't da' sa 'te 'uo ga' s'étaq qadoic, qana'chi 'ená'am qasenaq da' qovínaxanaxaic jiñi'me, qataxa sa sañoxotaqóona da' ỹátaqta s'amaqténaq da' l'aqtac.
Currently Selected:
1 Juan 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.