At Ṛuma 1
1
Sslam
1Nekk Bulus, yellan d aqeddac n Yasuɛ Lmasiḥ#1.1 Neɣ : Win yettwaxtaṛen. Walit Amawal., ttwaxtaṛeɣ ad iliɣ d amceggeɛ, i wakken ad beccṛeɣ Lexbeṛ n Lxir n Yillu. 2Lexbeṛ-agi n Lxir i d-iwɛed Yillu si zik s yimi n lanbiya di Tira Iqedsen, 3d ayen iɛnan Mmi-s, Yasuɛ Lmasiḥ Ssid-nneɣ i d-ilulen s ṣṣifa n wemdan seg wedrum n Dawed, 4iban-d s tezmert d Mmi-s n Yillu i yella, s Ṛṛuḥ imqeddes, s ḥeggu-ines si gar lmeyytin : Yasuɛ Lmasiḥ ssid-nneɣ. 5S yis i aɣ-ixdem Yillu lemziya ad nili d imceggɛen, i wakken ad d-nawi s yisem-is imdanen n leǧnas meṛṛa ɣer ṭṭaɛa d liman, 6deg wacu tellam ula d kunwi iwumi d-issawel Yasuɛ Lmasiḥ. 7I wid akk yellan di temdint n Ṛuma, i iḥemmel Illu, iwumi i d-issawel ad ilin d ayla-s : Ṛṛeḥma d talwit ad wen-d-ttunefkent sɣuṛ n Yillu, baba-tneɣ akked Ssid-nneɣ Yasuɛ Lmasiḥ.
Bulus akked imasiḥiyen n Ṛuma
(Ṛum 15.23-32)
8Di tazwara, ad ḥemdeɣ Illu-yiw fell-awen meṛṛa s yisem n Yasuɛ Lmasiḥ, axaṭer iffeɣ lexbeṛ di ddunit meṛṛa d akken tumnem s Lmasiḥ. 9Illu i ɛebbdeɣ seg ul-iw, i ɣef qeddceɣ imi ttbecciṛeɣ Lexbeṛ n Lxir iɛnan Mmi-s, iẓra d akken ttadreɣ-kkun-d dima mi ara deɛɛuɣ ɣuṛ-s. 10Ssutureɣ mkul ass i Yillu i wakken ma yebɣa, ad afeɣ abrid amek ara n-aseɣ ɣuṛ-wen. 11Acḥal i bɣiɣ ad kkun-ẓreɣ, akken ad wen-fkeɣ kra n tikci n Ṛṛuḥ imqeddes i wakken ad tǧehdem, 12neɣ i wakken ad nemseǧhid wway gar-aneɣ ɣuṛ-wen, s liman i aɣ-icerken, liman-nwen d liman-inu.
13Ay atmaten, bɣiɣ ad teẓrem d akken acḥal n tikkal i ɛerḍeɣ ad n-aseɣ ɣuṛ-wen, i wakken lxedma-inu ad wen-d-teglu s kra n lfayda, am akken i d-tewwi lfayda i leǧnas nniḍen ; meɛna ar tura mazal ttmagareɣ-d uguren. 14Ilaq-iyi ad ṛuḥeɣ ɣer yimdanen n ddunit meṛṛa, ɣer leǧnas itqeddmen akked wid ur netqeddem ara, ɣer wid iɣṛan d wid ur neɣri ara. 15Daymi i bɣiɣ ad beccṛeɣ daɣen Lexbeṛ-agi n Lxir, i kunwi yellan di temdint n Ṛuma.
Lexbeṛ n Lxir yeɛnan Yasuɛ Lmasiḥ
16Ur sseḍḥaɣ ara s Lexbeṛ-agi n Lxir axaṭer d tazmert n Yillu i leslak n kra win yumnen s yis ; di tazwara i wat Isṛail, ad d-ḍefren leǧnas nniḍen. 17Lexbeṛ-agi n Lxir ibeggen-d amek i yettarra Yillu imdanen d iḥeqqiyen s liman, axaṭer s liman kan i nezmer ad nuɣal d iḥeqqiyen si tazwara alamma d taggara. Akken yura di Tira Iqedsen : Aḥeqqi ad yidir s liman#1.17 Walit Ḥabaquq 2.4..
Wid ur nesteɛṛef ara s Yillu
18Illu ittbeggin-d urrif-is seg igenni ɣef ddnub d cceṛ n yimdanen i yettɣummun lḥeqq s lbaṭel ; 19axaṭer ayen akk i ilaqen ad t-issinen ɣef Yillu, ẓran-t ; d Illu i sen-t-id-isbeggnen. 20Seg wasmi i d-ixleq ddunit, ayen akk iffren ɣef wallen, nettwali-t di lecɣal-is ; nezmer ad neɛqel d akken d netta kan i d Illu yesɛan tazmert ur nfennu ; daymi wigi ulac fell-asen ssmaḥ. 21Ɣas akken ẓran yella Yillu, ur setɛeṛfen ara s yis ; ur t-ḥmiden, ur t-ckiṛen, lameɛna ttkemmilen deg yir ixemmimen-nsen armi iɣumm ṭṭlam ulawen-nsen. 22Ḥesben iman-nsen d ukyisen armi uɣalen d imehbal. 23Beddlen tamanegt n Yillu yeddren s lmeṣnuɛat yesɛan ṣṣifa n wemdan ifennun, ṣṣifa n leḍyur, n iɣersiwen at ṛebɛa iḍarren, d wayen akk ileḥḥun ɣef uɛebbuḍ.
24Daymi i ten-iǧǧa Yillu tebɛen lebɣi n wulawen-nsen, xeddmen ticmatin, ssawḍen armi kksen lḥeṛma ɣef yiman-nsen. 25Beddlen tidett n Yillu s lekdeb, ɛebbden ayen ittwaxelqen, ǧǧan win i d-ixelqen kullec, netta i yettubarken i dayem ; Amin !
26D tagi i d sebba ɣef i ten-iǧǧa Yillu di lɛaṛ n ccehwat-nsen ; tilawin ttbeddilent irgazen s tlawin. 27Ula d irgazen ttaǧǧan tilawin, ittenkkar uḥaṛuq wway gar-asen, ttemyexdamen lɛaṛ ; d wagi i d lexlaṣ i yuklalen ɣef tidderɣelt-nsen.
28Imi ugin ad issinen Illu, yeǧǧa-ten Yillu di lɛeqliya-nsen iɛewjen i wakken ad xedmen ayen ur nlaq ara. 29Ččuṛen d lbaṭel akked wayen n diri : D ṭṭmeɛ, d cceṛ, d tismin ; d at tmegṛaḍ, d at ccwal, d at tḥila, d at tiḥeṛci, d iqerraḍen. 30Wa yekkat deg wa, d iɛdawen n Ṛebbi, ur ttneḥcamen ara, d imzuxiyen, d ikeddaben ; snulfuyen-d cceṛ, ttɛaṣin lwaldin-nsen. 31Ur sɛin lefhama, ur sɛin laman, ulac deg ulawen-nsen ṛṛeḥma neɣ leḥnana. 32Ɣas akken ẓran lḥisab n Yillu yettṛaǧu wid ixeddmen annect-agi yerna uklalen lmut, ttkemmilen di tikli-nsen yerna feṛṛḥen s wid ixeddmen am nutni.
Currently Selected:
At Ṛuma 1: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.