Matta 28
28
Ḥeggu n Yasuɛ
(Mq 16.1-10; Lq 24.1-12; Yuḥ 20.1-10)
1Mi yɛedda wass n usteɛfu, taṣebḥit n wass amezwaru n dduṛt, Meryem tamagdalit akked meryem-nni nniḍen, ṛuḥent ad d-ẓurent aẓekka n Yasuɛ. 2Deg yiwet n teswiɛt, tergagi lqaɛa ; ataya yiwen n lmelk n Umeɣlal, iṣubb-d seg igenni, iqeṛṛeb ɣer uẓekka, iswexxeṛ ablaḍ-nni, iqqim fell-as. 3Ittfeǧǧiǧ am lebṛaq, llebsa-s d tamellalt am udfel. 4Iɛessasen yellan dinna, ikcem-iten lxuf d ameqqran, qquren amzun mmuten. 5Inṭeq lmelk ɣer tilawin-nni, yenna-yasent : Kenemti ur ttaggademt ara, axaṭer ẓriɣ ɣef Yasuɛ i yettusemmṛen ɣef umidag i tettnadimt. 6Ulac-it dagi, iḥya-d si gar lmeyytin akken i t-d-yenna. Asemt-d ad twalimt amkan anda akken iḍleq ! 7Azzlemt ad tinimt i yinelmaden-is d akken iḥya-d si gar lmeyytin. Atan ad wen-izwir ɣer tmurt n Jlili ; dinna ara t-teẓrem. Atan nniɣ-awent-tt-id !
8Imiren kan, ṛuḥent seg uẓekka-nni s lfeṛḥ d ameqqran ɣas akken uggadent. Uzzlent ad awint lexbeṛ i yinelmaden-is n Yasuɛ.
9Ataya Yasuɛ immuger-itent-d, yenna-yasent : Sslam fell-akunt ! Qeṛṛbent, seǧǧdent zdat-s, ssudnent iḍarren-is. 10Imiren Yasuɛ yenna-yasent : Ur ttaggademt ! Ṛuḥemt inimt i watmaten-iw ad ṛuḥen ɣer tmurt n Jlili, dinna ara iyi-ẓren.
11Mi tteddunt deg ubrid, kra seg iɛessasen-nni n uẓekka kecmen ɣer temdint, xebbṛen imseflen imeqqranen ɣef wayen akk iḍran. 12Mi nnejmaɛen imṛayen n wegdud akked imeqqranen n imseflen, msefhamen ad fken i iɛessasen-nni ssuma tameqqrant n idrimen, 13nnan-asen : Init d akken d inelmaden-is i d-yusan deg yiḍ, ukren lǧetta-s mi nella neṭṭes. 14Ma yewweḍ lexbeṛ-agi ɣer lḥakem, d nekni ara t-iqablen i wakken ur wen-ixeddem ula d acemma. 15Iɛsekṛiwen-nni ṭṭfen idrimen-nni, xedmen ayen akk i sen-d-nnan imseflen. Tamsalt-agi ttɛawaden-tt-id wat Isṛail ar ass-a.
Yasuɛ iban-d i yinelmaden-is
(Mq 16.14-18; Lq 24.36; Yuḥ 20.19; Lcɣ 1.6-8)
16Ḥdac-nni n inelmaden ṛuḥen ɣer tmurt n Jlili, ɣer wedrar-nni anda i sen-yenna Yasuɛ ad mlilen. 17Mi t-walan seǧǧden zdat-s, meɛna kra deg-sen mazal cukkten. 18Yasuɛ iqeṛṛeb ɣuṛ-sen, yenna-yasen : Tettunefk-iyi-d tezmert ama di lqaɛa ama deg igenwan. 19Ṛuḥet ɣer tmura meṛṛa n ddunit, slemdet imdanen i wakken ad uɣalen d inelmaden-iw, ad ttwiɣeḍsen s yisem n Ubabat, n Umemmit akked Ṛṛuḥ imqeddes. 20Slemdet-asen ad xedmen ayen akk i wen-slemdeɣ. Ma d nekk ad iliɣ yid-wen yal ass alamma d taggara n ddunit.
Currently Selected:
Matta 28: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.