Matta 26
26
Amciweṛ ɣef Yasuɛ
(Mq 14.1-2; Lq 22.1-2; Yuḥ 11.45-53)
1Mi ifukk Yasuɛ imeslayen-agi, yenna i yinelmaden-is :
2Mazal sin wussan i Lɛid n Usuref, Mmi-s n wemdan ad ittuzzenz i wakken ad ittusemmeṛ ɣef umidag.
3Dɣa imseflen imeqqranen akked imṛayen n wegdud nnejmaɛen deg ufrag n Kayif, i yellan d amesfel ameqqran. 4Msefhamen ad ṭṭfen Yasuɛ s tḥila i wakken ad t-nɣen. 5Meɛna nnan : Mačči deg ussan-agi n lɛid n Tuffɣa ara t-neḥbes, neɣ ma ulac ad ikker ccwal gar lɣaci.
Tabuqalt n rriḥa
(Mq 14.3-9; Yuḥ 12.1-8)
6Mi yella Yasuɛ di taddart n Bitanya, deg wexxam n Semɛun abeṛsi, 7attaya yiwet n tmeṭṭut tewwi-d tabuqalt yettwaxedmen s wedɣaɣ amellal, teččuṛ d leɛṭer ɣlayen. Mi yeqqim Yasuɛ ɣer ṭṭabla, tameṭṭut-nni tusa-d tesmar leɛṭer-nni ɣef uqerruy-is. 8Mi walan ayagi, inelmaden iɣaḍ-iten lḥal, nnan : Iwumi lexṣara-yagi ? 9Lemmer nezzenz leɛṭer-nni, tili yewwi-d ssuma tameqqrant ara nefṛeq i yigellilen ! 10Yasuɛ yeẓran wayen nnan wway gar-asen, yenna-yasen : Acuɣer i tesḥeznem tameṭṭut-agi ? D ayen yelhan i yi-texdem ! 11Axaṭer ad tesɛum daymen igellilen yid-wen, meɛna nekk ur ttiliɣ ara daymen yid-wen. 12Mi d-tesmar leɛṭer-agi fell-i, d tafekka-w i thegga i temḍelt-iw. 13Ad wen-iniɣ tidett : Di yal amkan n ddunit i deg ara ittubecceṛ Lexbeṛ n Lxir, ad d-ttmektayen tameṭṭut-agi d wayen texdem.
Yudas yuɣal d axeddaɛ
(Mq 14.10-11; Lq 22.3-6)
14Imiren Yudas n Qeṛyut, yiwen si tnac-nni n inelmaden n Yasuɛ, iṛuḥ ɣer imseflen imeqqranen, 15yenna-yasen : Ma wwiɣ-kkun ɣuṛ-s ad t-d-teṭṭfem, d acu ara iyi-tefkem ? Fkan-as tlatin n iṣurdiyen n lfeṭṭa. 16Seg imiren, Yudas ittɛassa tagnitt i deg ara yizmir ad izzenz Yasuɛ.
Imensi n Lɛid n Usuref
(Mq 14.12-26; Lq 22.7-23; Yuḥ 13.21-30; 1 Kur 11.23-25)
17Ass amezwaru n lɛid n weɣṛum mebla tamtunt, usan-d yinelmaden ɣer Yasuɛ nnan-as : A sidi, anda i tebɣiḍ ad ak-nheggi imensi n Lɛid n Usuref ? 18Yerra-yasen : Ṛuḥet ɣer temdint, ɣer leflani, init-as : Yenna-yak Ssid-nneɣ, lweqt-iw iwweḍ-d, deg uxxam-ik ara sɛeddiɣ Lɛid n Usuref nekk d inelmaden-iw. 19Inelmaden-nni xedmen ayen i sen-yenna Yasuɛ, heggan imensi n Lɛid n Usuref.
20Mi d-teɣli tmeddit, yeqqim Yasuɛ ad yečč akked inelmaden-is. 21Mi llan tetten yenna-yasen : Ad wen-iniɣ tidett : Yiwen seg-wen ad iyi-izzenz. 22Mi d-yenna ayagi, ikcem-iten akk leḥzen d ameqqran, bdan qqaren-as yiwen yiwen : Neɣ mačči d nekk a sidi ? 23Yerra-yasen : Win igren afus-is yid-i deg uḍebsi, d netta ara iyi-izzenzen. 24Ad iḍru d Mmi-s n wemdan akken yura fell-as ; meɛna a nnger n win ara t-izzenzen, lemmer ur d-ilul ara axir-is. 25Yudas ara t-ixedɛen inṭeq yenna-yas : Ɛni d nekk a sidi ? Yasuɛ yerra-yas : Atan tenniḍ-t-id !
26Mi llan tetten, yeddem-d Yasuɛ aɣṛum, iḥmed Ṛebbi, icekkeṛ-it, dɣa ibḍa-t, ifṛeq-it i yinelmaden-is, yenna-yasen : Ččet aɣṛum-agi : D tafekka-w. 27Iddem-d daɣen taqbuct, iḥmed Illu, icekkeṛ-it, ifka-yasen-tt, yenna-yasen : Swet akk si teqbuct-agi, 28axaṭer ayagi d idammen-iw, d idammen n temsisit, ara yazzlen ɣef yizumal n lɣaci ɣef ddemma n leɛfu n ddnubat-nsen. 29Ad wen-d-iniɣ : Ur ttuɣaleɣ ara ad sweɣ seg waman-agi n tẓurin alamma d ass i deg ara ten-sweɣ d imaynuten yid-wen, di tgelda n Baba.
Yasuɛ ixebbeṛ-d ɣef unkaṛ n Buṭrus
(Mq 14.27-31; Lq 22.31-34; Yuḥ 13.36-38)
30Mi fukken leḥmadi, ulin ɣer yiɣil Uzemmur.
31Imiren Yasuɛ yenna-yasen : Iḍ-agi ad wen-iliɣ akk d sebba n tuccḍa, axaṭer yura : Ad wwteɣ ameksa, ulli n tqeḍɛit-is ad rewlent ɣer yal tama#26.31 Walit Zakariya 13.7.. 32Meɛna mi ara d-ḥyuɣ si gar lmeyytin, ad iyi-tafem zwareɣ ɣer tmurt n Jlili. 33Buṭrus inṭeq, yenna : Ɣas ad sen-tiliḍ d sebba n tuccḍa i wiyaḍ akk, nekk d lmuḥal ad ccḍeɣ. 34Yasuɛ yenna-yas : Ad ak-iniɣ tidett : Deg iḍ-agi uqbel ad iskuɛ uyaziḍ, ad iyi-tnekṛeḍ tlata n iberdan. 35Buṭrus yerra-yas : Ɣas lukan d lmut ara mmteɣ yid-k, d lmuḥal ad ak-nekkṛeɣ ! Ula d inelmaden nniḍen, nnan-as am netta.
Tamazirt n Jitsimani
(Mq 14.32-42; Lq 22.39-46)
36Imiren Yasuɛ iṛuḥ yid-sen ɣer yiwen wemkan ittusemman Jitsimani, yenna i yinelmaden-is : Qqimet dagi, nekk ad ṛuḥeɣ ad ẓẓalleɣ dihin. 37Iwwi yid-s Buṭrus akked sin warraw-nni n Zabadi ; ibda ikcem-it leḥzen d uɣilif. 38Dɣa yenna-yasen : Ḥusseɣ s leḥzen n lmut, qqimet dagi, ɛiwzet yid-i ! 39Iṛuḥ iɣli ɣef wudem, ibda ittẓalla yeqqar : A Baba, ma yella wamek, ssebɛed fell-i leɛtab-agi ! Meɛna akken tebɣiḍ keččini, mačči akken bɣiɣ nekkini. 40Yuɣal-d ɣer inelmaden-is, yufa-ten-id ṭṭsen, yenna i Buṭrus : Ur tezmirem ara ad tɛiwzem yid-i ula d yiwet n ssaɛa ? 41Ɛiwzet, ẓẓallet, i wakken ur tɣellim ara deg ujeṛṛeb ! Axaṭer ṛṛuḥ dayem yewjed ma d tafekka d tameɛlalt ! 42Ibɛed akkin tikkelt tis snat i wakken ad iẓẓall, yenna : A Baba, ma yella ulamek ara tesbeɛdeḍ fell-i leɛtab-agi, ma ilaq ad iyi-d-yaweḍ ! Ad iḍru lebɣi-k ! 43Mi d-yuɣal, yufa-ten-id daɣen ṭṭsen, iɣleb-iten nuddam. 44Iǧǧa-ten, issebɛed iman-is daɣen fell-asen, idɛa tikkelt tis tlata am tikkelt-nni tamezwarut. 45Mi d-yuɣal ɣer inelmaden-is, yufa-ten-id mazal-iten ṭṭsen ; yenna-yasen : Lweqt i deg ara yettwisellem Mmi-s n wemdan ɣer ifassen n yemcumen iwweḍ-d, kunwi mazal-ikkun teṭṭsem ? 46Dɣa yenna-yasen : Kkret fell-awen, ataya iteddu-d win i yi-izzenzen !
Tuṭṭfa n Yasuɛ
(Mq 14.43-50; Lq 22.47-53; Yuḥ 18.3-12)
47Mazal-it ittmeslay mi d-iwweḍ Yudas yellan d yiwen si tnac-nni inelmaden. Ddan-d yid-s aṭas n lɣaci s iɛekkzan d ijenwiyen, ceggɛen-ten-id yimseflen imeqqranen akked imṛayen n wegdud. 48Win akken i t-izzenzen, imsefham yid-sen, yenna-yasen : Win i ɣef ara sellmeɣ, d win ara teṭṭfem ! 49Imiren, iqeṛṛeb ɣer Yasuɛ yenna-yas : Sslam fell-ak a sidi ! Dɣa isellem fell-as. 50Yasuɛ yenna-yas : Ay ameddakel, ayen ɣef i d-tusiḍ ad t-txedmeḍ, xdem-it ! Dɣa lɣaci-nni qeṛṛben ɣer Yasuɛ ṭṭfen-t.
51Yiwen seg wid yeddan d Yasuɛ ijbed-d ajenwi-ines, iwwet aqeddac n umesfel ameqqran, igzem-as ameẓẓuɣ-is. 52Yasuɛ yenna-yas : Err ajenwi-inek ɣer wemkan-is, axaṭer kra n win ara irefden ajenwi, ad immet s ujenwi ! 53Ɛni tɣileḍ ur zmireɣ ara ad ssutreɣ i Baba ad iyi-d-iceggeɛ luluf n lmalayek ? 54Amek ihi ara ttwikemmlent Tira i d-ixebbṛen d akken ilaq ad d-iḍru wayagi meṛṛa ?
55Imiren Yasuɛ yenna i lɣaci : Kul ass ttiliɣ yid-wen deg ufakan, sselmadeɣ, ur iyi-teṭṭifem ara, ass-agi tusam-d ɣuṛ-i s iɛekkzan d ijenwiyen am akken d bu tmegṛaḍ i lliɣ ! 56Meɛna annect-agi meṛṛa yeḍra-d i wakken ad ttwikemmlent tira n lanbiya.
Imiren, inelmaden meṛṛa ǧǧan-t, yal yiwen ɣer wanda yerwel.
Yasuɛ zdat n useqqamu n ccṛeɛ
(Mq 14.53-65; Lq 22.54-71; Yuḥ 18.13)
57Wid yeṭṭfen Yasuɛ wwin-t ɣer Kayif, ameqqran n imseflen, anda i nnejmaɛen imusnawen n ṭawrat d imṛayen n wegdud. 58Buṭrus iḍfer-it, ikcem ɣer wefrag n umesfel ameqqran, iqqim akked iɛessasen n lǧameɛ i wakken ad iẓer amek ara tefru temsalt.
59Imiren imseflen imeqqranen akked useqqamu n ccṛeɛ, ttnadin inigan ara icehden fell-as s ẓẓur, i wakken ad ḥekmen fell-as s lmut, 60meɛna ur as-d-ufin ara sebba, ɣas akken aṭas i d-yusan ad d-cehden fell-as s ẓẓur. Taggara usan-d sin yirgazen nnan : 61Argaz-agi yenna-d : Zemreɣ ad huddeɣ afakan n Yillu yerna ad as-ɛiwdeɣ lebni di tlata wussan. 62Ameqqran n imseflen ikker, yenna-yas : Ulac ayen ara d-terreḍ ɣef wayen akka i d-cetkan fell-ak ? 63Yasuɛ issusem. Dɣa ameqqran n imseflen yenna-yas : Greɣ-ak-d Illu yeddren, ma ur aɣ-d-tenniḍ ma d kečč i d Lmasiḥ, Mmi-s n Yillu ! 64Yasuɛ yerra-yas : Tenniḍ-t-id ! Yerna ad wen-iniɣ, sya d asawen : Mmi-s n wemdan ad iqqim ɣer uyeffus n Unezmar#26.64 Walit Ihellilen 110.1., ad t-twalim iteddu-d ɣef usigna seg yigenni#26.64 Walit Danyal 7.13 ; Aweḥḥi 1.7.. 65Imiren ameqqran n imseflen icerreg aqenduṛ-is yenna : Yekfeṛ ! Iwumi neḥwaǧ inigan tura ? Teslam akk amek i yekfeṛ ! 66D acu i tennam ? Rran-as : Yuklal lmut ! 67Dɣa bdan ssusufen-t, ttaken-as tiyitiwin d ibeqqayen, 68qqaren-as : Ɛqel a Lmasiḥ, ini-yaɣ-d anwa i ak-iwwten !
Ankaṛ n Buṭrus
(Mq 14.66-72; Lq 22.56-62; Yuḥ 18.15-27)
69Buṭrus yella iqqim deg ufrag, tqeṛṛeb ɣuṛ-s yiwet n tqeddact tenna-yas : Ula d kečč telliḍ d Yasuɛ Ajlili ! 70Meɛna inkeṛ zdat-sen meṛṛa yenna-yas : Ur ẓriɣ ara d acu tebɣiḍ ad d-tiniḍ ! 71Akken iteddu ɣer tewwurt, twala-t tqeddact nniḍen, tenna i wid akk yellan dinna : Wagi yella akked Yasuɛ Anaṣari ! 72Inkeṛ daɣen s limin : Ad wen-qqaṛeɣ ur ssineɣ ara argaz-agi ! 73Taswiɛt kan, wid yellan dinna qeṛṛben daɣen ɣer Buṭrus nnan-as : Mebla ccekk, kečč d yiwen seg-sen, tameslayt-ik tbeggen-d d akken d Ajlili i telliḍ ! 74Ibda ittgalla irennu : Di leɛmeṛ ur ssineɣ argaz-agi ! Imiren kan iskuɛ uyaziḍ. 75Dɣa Buṭrus immekta-d imeslayen-nni i as-d-yenna Yasuɛ : uqbel ad iskuɛ uyaziḍ, ad iyi-tnekṛeḍ tlata n tikkal#26.75 Walit Matta 26.33-35.. Iffeɣ ɣer beṛṛa s nndama tameqqrant, iṭṭerḍeq d imeṭṭawen.
Currently Selected:
Matta 26: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.